Rumi 8
8
Kathar Phala rwnai langma
1Jebwrok Khristo Jisubai baksa kwrwngjak Kaitor boknw arw senji manni chugw hinwi bakha kagalak. 2Langma rwnai Kathar Phalani kerongnalse Khristo Jisuni bisingtwi anw sumsok tei thwimung ikim daini yokrwkha. 3Borogni sumsok akwlni bagwi kerongnal jebw khalaimanjia, Kaitor obwnw khalaijak. Bw obwnw Bini Sakni Sajla hogwi khalaikha. Jeni akwl borogni kosol, Jebw saknw dali rwnaini bisingtwi sumsokni jotho pharannw nachra khalaikha. 4Kaitor obwnw khalaikha kerongnalni raidia sanmwngrok chini dayo soknaitwi, jebwrok Kaitorni phalani maping tong, matwr borogni akkwlni maping tongya.
5Jebwrok sumsok akwlni tolagw bokni sumsok bakha jebwnw nai odaiose srangw, Arw jebwrok Kathar Phalani tolagw tong bok Kathar Phala jebw nai odaiose sarangw. 6Sumsok akwl jebw nai odaio srangnaini thai ongkha thwimung, tei Kathar Phala jebw nai odaio srangnaini thai ongkha langma tei khakchangma. 7Aithani je bakha sumsok akwl jebw nai odaio srang, o bakha Kaitorni baitheo, twmwi himba obo Kaitorni kerongnal maniya, arw mabo manimaya. 8Halai jebwrok sumsok akwlni tolagw bok Kaitornw khachang rwmaya.
9Matwr jwtini Kaitorni phala nokhni bakhao tongw hingkhalai nokh borogni akwlni tolagw tongya, nokh Kathar phalani tolagwse tongw. Jeni bakhao Khristoni phala kwrwi bw Khristoniya. 10Matwr Khristo jwtini nokhni bakhao tongo hingkhlai sumsokni bagwi nokhni basakgw thwimung samung tangphung, raidattiyani thani nokhni phala kathang. 11Kaitor Jisunw kwthwini kathang khalayoi tisajak, tei Kaitorni phala jwtini nokhni bisingw tongw hingkhalai Bw nokhni thwiblang basaknw o Phalani bisingtwi kathang khalainai.
12Athani takhukrok, chwng lagai kachajak, matwr o lagai sumsok akwlni dayoya. Chini sumsok akwlni tolagw tongni nangya. 13Nokh jwtini sumsok akwlni tolagw himw halai, nokh thwinai. Matwr Kathar phalani bisingtwi basakni jotho benirai samung nachra khalaio hingkhalai nokh molbrumni bagwi kathang tongnai, 14Twmwi himba jebwrok Kaitorni Phalani twidulmungtwi tong bokse Kaitorni basa. 15Kaitorni daini nokh je pholanw mankha omolai selengni pholaya jebwni bagwi nokh arwbw kirithai, Nokh Kaitorni Phalanw manjak Bw nokhnw Bini basa ongnai bagrinw rwjak. Aithani bagwi chwng Kaitornw apha hinwi ringw. 16Kathar Phala sakbw chini bakhao i yakumunw rwdok je, chwng Kaitorni basa. 17Tei chwng jwtini Bini basa ongw, hai chwngbw Bini pwingmanai arw Khristobai baksa pwingmanai, jwtini Khristo jekhalayoi dugu bugijak obwtwijar khalayoi chwngbw Bwbai baksa dugu bugikhalai chwng Khristobai baksa chwngchuk ongnai.
Je chwngsacha chwng mannw
18Ang sio, je chwngsacha chini dayo saplangjaknw obwni naikhalai tabokni langmani satokma mannai omw mwngsaya. 19Kaitorni basarok baiphuo saplangjaknw obwni bagwi jotho ujinai srangwi naisinglaoi tonglaijak, 20Ujinaini o bachung pwisorai ongwi thangkha, matwr omw bini sakni muchungma baiya. Kaitorse obwnw pwisorai khalaio, matwr Kaitor omobai baksa i khadungnwbo rwjak, 21O khadung ongkhadwi, i ujinai o khwywi thangnai khamung daini yogwi Kaitorni basarokni chwngsacha sakhilani bagita ongmanai. 22Twmwi himba chwng sio, Kaitorni jotho jrwng satokmabai chirigwi karabdok jekhaoi birokni basa achaiphini sajagwi karab. 23Keber jotho ujinai dayoya, chwngbw jebwrok Phala Katharnw chini yoknaini pwila thai hinwi manjak, chini basakni yokma manni bagwi naisingwi khao chirikdok. 24Chwng tekhokma manjak aithani chini bakhao i khadungma tongw. Chwng jebwni bagwi khadungwi tong jwtini omonw manwi pai iswkhlai o khadunglai arw khadung tongya. Jebw manwi paikha, omoni bagwi swbw khadungwi tong? 25Jebw chwng tabokbw manjiya bini bagwi chwng khadungdok, khalongni bisingtwi omoni bagwi naisingwi tongdok.
26Omoni baderbw chini kebelmao Phala Kathar chwnw chubao. Ta hinwi surithai obwnw chwng siya, matwr jebw kokbai phuak maya omotwijar khalayoi gundriywi Phala Kathar sakse chini ongwi kabogw. 27Arw Kaitor Jebw borogni bakha rutubwi nai Bw Phala Katharni bakhani kokbw sio, twmwi himba Phala Kathar Kaitorni muchumani mapise Kaitorni borogrokni bagwi kabogw.
28Chwng sio jebwrok Kaitornw hamjak, kokongkha Kaitor sakni bachungni mapi jebwroknw ringkhojak, bokni hamkraini bagwi jotho baksa khalayoi samung tangwi thangdok. 29Kaitor je borog roknw aguni jimin sinijak bok Bini ongnai. Boknw Kaitor Bini Sajlani kosol ongni bagwi thi khalaywibw tongjak, o sajla kabangma takhukrokni bisingw pwila acahainai ongnaitwi. 30Bw boknwbw ringkhojak Jebwroknw Bw aguni jimin sinijak, jebwroknw Bw ringkhoka boknw Bw raidia hinwi goseyoi lajak, jebwroknw raidia hinwi goseoi lajak boknw bw sakni chwngsachabw yakpi rwkha.
Kaitorni hamjakma
31Iswkhalai i jotho kothoyw chwng ta satai? Kaitor jephuni chini mokhakgw tong aiphuo chini guna khalainai swrw tong? 32Kaitor sakni sajlanw hoda yokrwniya, obo tama chini jothoni bagwi Bwnw thwimungni yagw tisagwi rwkha. Iswkhalai Bw ta sajlabai baksa arw chwnw jotho yakpibo rwgalak? 33Kaitor jebwroknw saoi lajak swrw bokni baithe nali rwthai? Kaitor sakse boknw khatta kwrwi hinwi yachagwi lajak. 34Swrw boknw khatta ganang hinwi thi khalaitai? Jebw thwijak arw Jebwnw kwthwi daini kathang khalaijak o Khristo Jisu tabok Kaitorni yagara phaising tongw tei chini bagwi kabokdok. 35Iswkhalai imwtwijar tama tong jebw Khristoni hamjakma daini chwnw kachalw nwlwi honai? Kabangma tekto? Bakhani tekto? Satokma? Ukhirinai? Ri chumni kandar? Dosa? Thwimung? 36Kathar Elembago suijak tongo,
Nini bagwi jwnwmbiti chini daini kaisa ya kaisa buthal jadok,
Borogrok chwnw dali rwnai merani kosolse bakha kao.
37Matwr Jebw chwnw hamjajak, Bini bisingtwi chwng jotho dayo kaplai ongw. 38Twmwi himba ang i koknw gam khalayoi sio, thwimung eba langma, suari eba nalchirai, mwngsaswk tabok eba mwngsaswk baiskangni, eba jephwng pharan, 39eba mwngsaswk nokha sakani eba mwngsaswk hayungni tolani eba jotho ujinaini bisingni mwngsachwk Kaitorni hamjakma daini chwnw kachalw kwnwrwgwi homangalak. Kaitorni i hamjakma chini Subrai Jisu Khristo Jisuni bisingw tongw.
Currently Selected:
Rumi 8: TPE
Highlight
Copy
Compare
Share
Want to have your highlights saved across all your devices? Sign up or sign in
©️2025 Bible Students Fellowship of Bangladesh