Rumi 7
7
Kailaimungni daini swrwngma
1Takhukrok, nokhlai Mosini kerongnal sio. Halai nokh sio na, borog jeswk sal thangwi tong keber oswk salse kerongnalni tolao tongw. 2Jeswk sal jora chala kathang tong oswk sal jora bwrwi kerongnal bai khajagwi tongo. Matwr chala thwinai jerw, o birokma kaijalainai kerongnalni khajak daini yogw. 3Matwr o bwrwi jwtini, bini chala kathang tongphini arw kaisa chalabai tongw hingkhalai bw sinalchua khalayo. Jwtini bini chala thwywi thangw hingkhalai, bw kaijalainai ikimni yokma manw, Arw aiphuo bw jwtini kothe chalanw lagw hingkhalai bw sinali ongalak.
4Aithani ani takhukrok, Khristoni basakni bisingtwi Mosini kerongnalni bima sanmao nokhbw thwikha. Omoni bagwi jenw kwthwi daini kathang khalaikha nokh o Jisu Khristoni ongkha, Kaitorni bagwi nokhni langma thai ganang ongwi kanw. 5Twmwi himba jephini chwng sumsok akwlni tolagw tongjak aiphuo kerongnal chini bisingo sumsokni kangma bancha sumchagwi tisao jebw chini bisingw samung tangjak, aithani chini langma thwinaini dayo thai ganang ongw. 6Jabio kerong nal chwnw chubwi tonjak, matwr tabok chini kacham aoang thwywi paikha arw chwng i kerong nalni khajak daini yokkha. Tabok chwng kacham suijak kerong nalni kosolya matwr Phala Katharni katal langmani bisingtwi Kaitornw mwnw.
Sumsokni beaita chini phantwilaima
7Iswkhalai chwng ta satai je, kerongnal chaya? Obwya, i kok kwbwi je, kerongnal kwrwi halai sumsok ta omono ang siyamw. "Lopha ta ongdi," kerongnal jwtini i koknw sayatilai lopha ta omonw ang siyamw. 8Matwr sumsok o tholmungni hamdal lagwi ani bisingw jotho lophanw sumchagwi rwkha, twmwi himba kerongnal tongya khalai sumsok kwthwi. 9Ani langmao kerongnal phainai aguo ang kathang tongjak, matwr o tholmung phainai loge loge sumsokbw thangwi kasakha, 10Aiphuo ang thwikha, je tholmungni bagwi langma manjanai kok o tholmung ani bagwi thwimung twbwkha. 11Kaitorni o tholmungni hamdal lagwi sumsok anw baneha, tei o tholmungni bisingtwi sumsok anw buthalkha.
12Matwr i kok thi je, kerongnal kathar tei bini tholmungbw kathar, thi tei gam. 13Iswkhalai tama ang o gam kerongnalni bagwi thwikha? Omoya, jebw hamkar omoni bisingtwise sumsok anw buthalkha, sumsok je kwbwi sumsok omo bijijanaitwi. Sumsok je bwswk sinisincha obw tholmungbaise sijagw.
Borogni kwrwngnwi akwl
14Chwng sio kerongnal pholang, matwr ang borogni akkwlni tolagw hinwi sumsok sumsokni seleng ongkha. 15Ang ta khalai omono ang sakbw bijiya, twmwi himba ang jebw khalaini nai obwnw khalaiya matwr jebwnw naisili obwnwse khalayo. 16Ang je chaya samung roknw khalaini naiya, omo roknwse ang khalaio hingkhalai ang kerongnalnw gam hinwi maniyoi lakha. 17Ang je chaya samungrok tangdok, obwroknw ang khalaidokya, obwrok o sumsokse khalaidok jebw ani bisingo bothol tangwi tong. 18Ang sio, ani sumsok aikangni bagwi ani bisingw gam mwngsa kwrwi. Jebw kwbwini gam obwnw khalaini ani muchuma tongo matwr pharan kwrwi. 19Samung gam jebwroknw ang khalaini muchu obwroknw khalaiya, obwni naikhalai jebwnw khalaini naiya o chaya samung roknwse ang khalaidok. 20Jebw khalaini naiya obwnw jephuni ang khalai aiphuo ang sak obwnw khalaiya, ani dayw je sumsok tong obwse anw khalairwgw.
21Iswkhalai ang sakni bisingw kwrwngsa ikimnw samung tangmani nungdok. O ikim ongkha imw jebw gam obwnw ang jephini khalaini nai aiphuo jwnwmni chaya angbai baksa wktak tongw. 22Ani bakha Kaitorni kerongnalnw hamjagw, 23matwr ang nungdok je, arw kwrwngsa ikim ani basak bisingw samung tangdok. O arw kwrwngsa ikim ani khani baithe choba khalaidok, tei sumsokni ikim dayo anw chubwi tondok, jebw ani bisingw samung tango. 24Bwswk kopal chaya borog ang! Ani bisingw sumsok akwl jebw thwimung twbwgwi phai bini yakni tabok swrw anw rwkkhiya khalaitai? 25Subrai Jisuni bisingtwi Kaitor ani bagwi jebw khalaikha obwni bagwi ang Bwnw hambai rwgw! Iswkhalai nungjagw je bakha aita ang Kaitorni kerongnalni seleng, matwr borogni akwl aita naikhalai ang sumsokni ikimni seleng.
Currently Selected:
Rumi 7: TPE
Highlight
Copy
Compare
Share
Want to have your highlights saved across all your devices? Sign up or sign in
©️2025 Bible Students Fellowship of Bangladesh