Rô-ma 15

Yak yum dalam Pô

1Khol drei mưnuix khang xang anong đwa dôm khacoh anưd mưnuix laman, mih ôh ciêt thau ngak bak tung tian êng drei. 2Yāup urang dalam khol drei xang ngak bak tung tian mưnuix jek taphia drei piêh pajup hanim thong darap khol nhu. 3Kaywa Dê Krist lijang ôh ngak bui tian êng drei, yau hu panôic vak: “Panôic padhi padhak anưd dôm ra jhơk jhel Bhô krung hu tuh di dahlak.” 4Dôm haget krung bihu vak mưng yao jang piêh pato pakai ka khol drei, piêh nhơ di gruk mưrat thong paxơh anưd Agal Nưbi bloh khol drei hu kabha pachôm. 5Likau kanư Pô Lingik anưd gruk mưrat thong paxơh pajup dei ai dok dang yak yum thong gaup tui krơh Dê Krist Yê-su. 6Piêh ka dei ai hu sadanoh, tha yava xap bloh tahamid Pô Lingik, nạn Amư anưd Pô khol drei nạn Pô Yê-su Krist.

Khao Siam ka mưnuix Bôl-Lingiu

7Yau nan, dei ai xang kaywa di xêh mưlang anưd Pô Lingik bloh takabal gaup, lijang yau Dê Krist krung hu takabal dei ai. 8Dahlak likau đôm, Dê Krist krung hu kaywa di tantu Pô Lingik bloh gilaic jiơng halun ka dôm urang bihu khao tan, piêh tanap dôm panôic he bihu ƀai brei ka abih muk kei, 9thong ngak ka mưnuix Bôl-Lingiu tahamid Pô Lingik kaywa gruk athur alim Bhô. Yau hu panôic vak:

“Ywa nan ka, Mưca dahlak pôk mưyom Pô krưh abih bôl

Thong pôk mưyom angan Bhô”

10thong hu panôic vak:

“Hơic mưnuix Bôl-Lingiu, xang thubik bui thong bôl Pô,”

11thong laic:

“Hơic abih mưnuix Bôl-Lingiu, xang doh mưyom Pô

Thong abih bôl pôk mưyom Bhô!”

12Ê-sai lijang đôm:

“Mưng Ye-sê tabiak mưca tabiak tha ƀek gha,

Ywa nan ka Dê pakrang mưnuix Bôl-Lingiu;

Mưca mưnuix Bôl-Lingiu mưca pachôm pak Bhô.”

13Likau kanư Pô Lingik nạn halau pachôm ngak ka dei ai ƀo dro pakal bui thong thug siam dalam sagar, piêh nhơ di xagta Pô Nưbi Ginrơh, dei ai bihu hapwak pachôm!

Panôic patek

(15:14 – 16:27)

Rapajan Phao-lô

14Pathau dei ai, dahlak êng dial kajap laic dei ai takrung mưda tian anit mưnuix, bak gruk dul thau, thong hu karun adan ka gaup. 15Yau nan min, dalam harak paywa ka dei ai hu tha dwa kabha dahlak đôm katang đơ xit, nan nạn piêh pahadar dei ai vơk, kaywa Pô Lingik krung hu brei karun hanim ka dahlak, 16bihu ngak halun ka Dê Krist Yê-su dalam krưh dôm mưnuix Bôl-Lingiu, pangak rapajan mưliêng ka Khao Siam Pô Lingik, piêh ka mưnuix Bôl-Lingiu gilaic jiơng panôja bui tian Pô, bihu thrah nưbi kaywa Pô Nưbi Ginrơh.

17Yau nan, dalam Dê Krist Yê-su dahlak hu gađi gadha piêh mưyeh rup ka gruk hit ragxa Pô Lingik. 18Kaywa dahlak ôh khin đôm kabha haget pakan klāk tabiak dôm haget bloh Dê Krist krung hu ngak tapa di dahlak piêh ngak ka mưnuix Bôl-Lingiu pang tui Bhô. Mưng panôic đôm thong bruk ngak, 19mưng gon xagta anưd nưm crih thunau ginrơh, mưng ganuh khang Pô Nưbi Ginrơh [anưd Pô Lingik],#15:19 [anưd Pô Lingik]: Dalam tha thanôn blah vak tangin ôh hu dôm akhar. dahlak krung hu pablo Khao Siam anưd Dê Krist graup libik, mưng Yê-ru-sa-lem thong bhum jek taphia ka tal nưgar I-ly-ri. 20Min dahlak cong takrư dahlak nạn rao pahơh Khao Siam pak dôm libik bloh angan Dê Krist ô ka bihu pahơh tal, piêh klah di darap ngok tathar anưd urang pakan, 21yau panôic hu vak:

“Dôm urang ô ka bihu akhan ka Pô, mưca ƀôh Bhô,

Dôm urang ôh ka hamit ka Bhô, mưca thau ka Bhô.”

Phao-lô darô nao ravang Rô-ma

22 # Rô 1:13. Ywa nan ka nạn gađi gadha krung hu ralô ƀang ghak drưh dahlak nao ravang dei ai. 23Min urak ni dalam dôm nưgar ni ôh dok libik ka dahlak trah; hơl vơk, krung hu ralô thun kalah, dahlak biak cong mưrai ravang dei ai. 24Dahlak pachôm mưca veh ravang dei ai ngok jalan nao Sơ-pen;#15:24 Sơ-pen: Harei ni nạn diya Tei-Ƀan-Nha. thong hadei di tuk ƀôh thah tian kaywa bihu dok thong dei ai tha tuk vag, mưca dahlak nhơ di dei ai ba dahlak tapa tak nan. 25#I Kô 16:1-4.Min urak ni dahlak nao pak Yê-ru-sa-lem piêh ragxa dôm xêh nưbi. 26Kaywa mưnuix Ma-xê-đô-ni-a thong A-cai bui tian rik patom piêh pajup dôm urang kathot raƀah dalam thanôn dôm xêh nưbi dok pak Yê-ru-sa-lem. 27#I Kô 9:11.Khol nhu bui tian ngak bruk nan, min biak nao khol nhu lijang tavak thre di dôm urang nan gêk, kaywa mưyah mưnuix Bôl-Lingiu krung bihu klah rabha drap ar bha nưbi ginrơh, yơ khol nhu lijang xang ba drap ar athal mưnưk bloh pajup vơk. 28Ywa nan ka, hadei di tuk ngak bloh bruk ni, nạn tuk krung hu mưk rabha takhat dôm kaya kar ka khol nhu bloh, mưca dahlak tagôk jalan, veh ravang dei ai bloh nao Sơ-pen. 29Dahlak thau tuk tapa ravang dei ai, mưca dahlak mưrai tom dhar phôl labeh labieng anưd Dê Krist.

30Pathau dei ai, kaywa Pô khol drei nạn Pô Yê-su Krist thong ywa di tiak anit ranam anưd Pô Nưbi Ginrơh, dahlak neh likau dei ai xang thubik dahlak mưthuh kalin dalam panôic lang kar bloh dei ai kaywa di dahlak pôk limah tagôk Pô Lingik, 31piêh ka dahlak bihu klah truh dôm ra ôh dial dalam nưgar Yu-đê, thong rapajan dahlak tuk mưrai tak Yê-ru-sa-lem mưca bihu dôm xêh nưbi halar ciup. 32Yau nan, mưyah ghơh gimnit Pô Lingik, dahlak hu mưda bui ôn mưrai tom dei ai, thong thubik bihu padei gleh thong dei ai. 33Likau kanư Pô Lingik thug siam dok thong abih dei ai! A-men.

Currently Selected:

Rô-ma 15: CJM2024

Highlight

Copy