Rô-ma 11
11
Gruk tian siam anưk Pô Lingik jom thong bôl I-sra-ên
1 #
Phil 3:5. Ywa nan ka dahlak likau tanhi, Pô Lingik hu klāk lôi bôl Bhô halei? Ôh bik yau nan! Kaywa êng dahlak nạn mưnuix I-sra-ên talei pajeh Ap-ra-ham, gah môn Ƀên-ya-min. 2Pô Lingik ôh bik klāk lôi bôl Bhô nạn bôl bloh Pô krung hu thau dahlau. Dei ai hu thau Agal Nưbi vak ka kadha Ê-li krung hu ih oh ka bôl I-sra-ên di anak Pô Lingik yau halei thoh? 3“Pô lơy, khol nhu krung hu pamưtai dôm pakat hôr Bhô, phak pabrai jaban Bhô; ciêt dok vơk tha drei dahlak min, thong khol nhu lijang dwah pamưtai dahlak.” 4Min Pô Lingik thuuk thong ong yau halei? “Ita krung hu cek piêh caga ka Ita tajuh ribau urang likei ôh bik khôi pak anak yang Ƀa-ar.” 5Harei ni lijang yau nan rei, hu tha nôk dok kađong vơk bihu cwah rwah kaywa karun hanim. 6Min mưyah kaywa di karun hanim yơ ôh hajat tal bruk ngak vơk; mưyah thoh, karun hanim ôh dok nạn karun hanim.
7Yau nan ka habar? Bôl I-sra-ên ôh mưtal krung hu kabha drei pachang dwah. Dôm urang bihu rwah yơ krung hu mưtal bloh, min thanôn dok vơk nhu gilaic jiơng khang akok, 8yau panôic hu vak:
“Pô Lingik krung hu brei ka khol nhu tha mat xwan hatai lwak phik,
Mưta bang, tangi langoh, ka tal harei ni.”
9Đa-vit dok đôm:
“Cong lô paban đam payak khol nhu gilaic jiơng rajwak thong nhôl vang,
Patau hanek takai thong gruk pakel ka khol nhu;
10Cong lô ka mưta khol nhu gok tagloh piêh ôh dok ƀôh bihu,
Thong kaing khol nhu kưk khum hamiêt!”
Gruk dong tabuh mưrai tom mưnuix Bôl-Lingiu
11Yau nan dahlak likau tanhi, hu njaup bôl I-sra-ên krung hu hanek takai thangak xang jalơh cut halei? Ôh bik yau nan! Min kaywa gruk tanrok glaic anưd khol nhu bloh gruk dong paklah krung hu mưrai tom mưnuix Bôl-Lingiu piêh ngak ka khol nhu pakacah mưblah. 12Mưyah gruk tanrok glaic anưd khol nhu krung hu ngak ginup mưda ka dunya, thong mưyah gruk athu jwak khol nhu krung hu ngak ginup mưda ka mưnuix Bôl-Lingiu yơ gruk mưhê xarai khol nhu mưca bik ngak mưda hơl thau kađơ!
13Dahlak đôm thong dei ai nạn dôm mưnuix Bôl-Lingiu: Habiên dahlak dok ngak Xêh Pachai ka mưnuix Bôl-Lingiu, mưca dahlak dok ngak hadah hadai rapajan drei 14piêh kơh tagôk tian pakacah mưblah anưk paran dahlak, thong dong bihu tha thanôn urang dalam khol nhu. 15Kaywa mưyah bruk khol nhu gok nưh klāk krung hu ba mai ka bruk pabrai panôic ka abih dunya, yơ bruk khol nhu bihu takabal ôh njaup nạn gruk diup mưrai mưng lôg mưtai ô?
16Mưyah nôk tapung tamưrơp bihu limah nạn likam yơ bih ƀuk lapung lijang likam; mưyah gha nạn likam yơ dôm dhān lijang likam. 17Mưyah hu tha dwa dhān gok cakak klāk, thong ayut takrung nạn phun ô-liu klāk bhao bihu pagam tamư libik dôm dhān nạn piêh bihu klah rabha katak diup mưng gha phun ô-liu 18yơ jôi hu mưyeh rup thong dôm dhān nan. Mưyah ayut mưyeh mưyom yơ xang kanal laic ôh njaup ayut dadôn di gha, min nạn gha dadôn di ayut. 19Mưca ayut đôm: “Dôm dhān krung hu gok cakak piêh ita bihu pagam tamư.” 20Njaup rei. Dôm dhān nan krung hu gok cakak kaywa tian khol nhu ôh dial, dok ayut ciêt dang kajap bihu nhơ di sagar. Jôi ganan, min xang thur mưk. 21Kaywa mưyah Pô Lingik krung hu ôh damưn dôm dhān phiap yơ [cag] Bhô#11:21 yơ [cag] Bhô: Dalam tha thanôn blah vak tangin nạn yơ Bhô. lijang ôh damưn di ayut ô. 22Yau nan xang krưn thau gruk siam tian anưd Pô Lingik: Thur jom thong urang halei krung hu jalơh, min siam tian jom thong ayut, thalaic ayut kakal khik rup dalam gruk siam tian anưd Bhô, mưyah ô, mưca ayut lijang gok cakak klāk. 23Dok thong mưnuix Yo Thaic, mưyah khol nhu ôh kakal dalam gruk ôh dial yơ lijang mưca bihu pagam tamư, kaywa Pô Lingik hu gon pagam khol nhu vơk. 24Kaywa mưyah êng athar, ayut takrung nạn phun ô-liu bhao bloh bihu cakak thong pagam tamư phun ô-liu siam, mưgilaic thong phiap, laic haget khol nhu takrung nạn dôm dhān phiap, gilaic đang bihu pagam tamư êng phun ô-liu drei bik hơl.
Bôl I-sra-ên mưca bihu thi dong
25Pathau dei ai, dahlak ưng dei ai thau gruk palih kabal ni piêh ka dei ai ôh êng brei ka drei nạn jag karag, nan nạn: Tha nôk bôl I-sra-ên kưk khang akok ka tal tuk dôm mưnuix Bôl-Lingiu patamư tal abih. 26Yau nan abih bôl I-sra-ên mưca bihu thi dong yau panôic vak:
“Dê Dong Paklah mưca mưrai mưng Si-ôn,
Mưca Bhô ramik klāk dôm kabha ôh hôic taka di Pô Lingik truh di thang Ya-kôp;”
27“Thong sani nạn jan ji Ita padang thong khol nhu,
Tuk Ita yah klāk danuh glaic khol nhu.”
28Tui Khao Siam, khol nhu nạn ra thutruh anưd Pô Lingik, kabha nan hu hanim ka dei ai; min tui gruk cwah rwah, khol nhu bihu anit ranam nhơ di dôm muk kei drei, 29Kaywa dôm gruk ƀai brei thong bruk iêu anưd Pô Lingik ôh tuk halei xalih. 30Yau dei ai dahlau dêh ôh pang tui Pô Lingik, mai urak ni bihu athur alim nhơ di gruk khol nhu ôh pang tui, 31yơ lijang yau nan, urak ni khol nhu krung hu ôh pang tui piêh nhơ di gruk athur alim sahadah tabiak ka dei ai, khol nhu#11:31 khol nhu: Dalam tha thanôn blah vak tangin nạn urak ni khol nhu. lijang bihu athur alim. 32Kaywa Pô Lingik krung hu karơk abih drei dalam libik ôh pang tui, piêh athur alim abih drei.
33Ôi! Gruk ginup mưda, jag karag thong dul thau anưd Pô Lingik biak mưdalam thau kađơ! Gruk bican inư anưd Bhô ngak habar thau nôi, jalan ƀak Bhô ngak habar thau bihu!
34“Kaywa thei thau bihu thangka Pô,
Thei ngak kanưkei ka Bhô?”
35Ngan “Thei krung hu brei ka Pô dahlau,
Piêh bihu Bhô biyar vơk?”
36 #
I Kô 8:6. Kaywa rim pakar jang mưng Bhô, kaywa Bhô, thong tanatap tamư Bhô. Xêh mưlang bha di Bhô rit rai. A-men!
Currently Selected:
Rô-ma 11: CJM2024
Highlight
Share
Copy
Want to have your highlights saved across all your devices? Sign up or sign in
© 2024 Bible Society Vietnam. All rights reserved.
