Rô-ma 10
10
Gruk dong tabuh ka abih drei
1Pathau dei ai, tian dahlak bhian cong takrư thong panôic likau kanư dahlak thong Pô Lingik nạn piêh bôl I-sra-ên bihu dong paklah. 2Dahlak ngak kaxan ka khol nhu laic khol nhu hu tian tatang tiak thong Pô Lingik, min tian tatang tiak nan u kalimah. 3Kaywa ôh krưn thau gruk kahanôt Pô Lingik thong dwah ganap padang gruk kahanôt karei ka drei; nan ka khol nhu ôh halar tui gruk kahanôt Pô Lingik; 4kaywa Dê Krist nạn gruk taluic di hakum jakar, piêh abih drei dial jang bihu mong yau kahanôt.
Gruk dong tabuh ka abih drei
5Mô-se vak ka gruk kahanôt mưrai mưng hakum jakar laic thei ngak tui dôm kabha ni yơ mưca nhơ di nan mưng diup. 6Min gruk kahanôt mưrai mưng sagar đôm yau ni: “Jôi đôm dalam tian drei laic: ‘Thei mưca tagôk thôr riga?’ thong harung ar nạn piêh ba Dê Krist trun arkatê; 7ngan nạn: ‘Mưca thei trun barahum?’ thong harung ar nạn piêh ba Dê Krist mưng lôg mưtai tagôk.” 8Min panôic nan đôm haget?
“Panôic dok jek dei ai,
Ngok caƀôi pabah thong dalam tian dei ai.”
Ywa nan ka nạn panôic sagar bloh khol dahlak lang pato. 9Biak mưyah pabah dei ai tao Pô Yê-su nạn Pô, thong tian dei ai dial laic Pô Lingik krung hu ngak ka Bhô mưng lôg mưtai diup vơk yơ dei ai mưca bihu thi dong. 10Kaywa thei dial dalam tian yơ bihu mong yau kahanôt, thei pađang akhan pak pabah yơ bihu dong paklah. 11Agal Nưbi đôm: “Mưnuix halei dial Bhô mưca ôh gok mưlau mưlit.” 12Ôh hu gruk krưn krưh di mưnuix Yo Thaic thong mưnuix Bôl-Lingiu, kaywa mưthong harung tha Pô nạn Pô abih drei, Dê ƀai brei karun dalah dalai ka abih drei iêu kanư di Bhô. 13Kaywa, “thei iêu kanư angan Pô jang mưca bihu dong.”
14Min khol nhu ô ka dial Bhô yơ iêu kanư habar bihu? Ôh hamit đôm ka Bhô yơ ngak habar dial? Ôh thei rao lang yơ pang ganap halei? 15Mưyah ôh thei bihu pachai nao yơ ngak habar rao lang? Yau hu panôic vak: “Palāk takai dôm urang nao lang yah Khao Siam biak mưlang thau kađơ!” 16Min ôh njaup abih drei jang pang tui Khao Siam ô; Ê-sai êng krung hu đôm: “Pô lơy, thei ciup dial panôic khol dahlak rao lang?” 17Yau nan, sagar mai mưng dôm kabha mưnuix urang pang, bloh mưnuix urang pang nạn tuk panôic Dê Krist#10:17 Dê Krist: Dalam tha thanôn blah vak tangin nạn Pô Lingik. bihu rao lang.
18Min dahlak likau tanhi: Hu njaup nạn khol nhu ô ka bihu pang ô? Biak nao khol nhu pang bloh, kaywa:
“Xap dôm kaphwari krung hu danưy tabiak graup boh tanưh,
Thong panôic khol nhu krung hu tathit tal luic nưrah.”
19Dahlak gilaic tanhi: Hu njaup bôl I-sra-ên ôh thau ô? Dahlau yatha, Mô-se krung hu đôm:
“Mưca Ita ngak ka khol hư jhak hatai thong dôm bôl ôh njaup nạn bôl;
Mưca Ita ngak ka khol hư dangih mưkek thong tha bôl luk tapun.”
20Ê-sai gilaic khin hatai đôm laic:
“Dôm urang ôh pachang dwah Ita yơ krung hu gōk bihu Ita;
Ita krung hu sahadah êng drei tabiak ka dôm urang ôh likau kanư Ita.”
21Min ka bôl I-sra-ên, Bhô bican: “Luic harei Ita gak tangin tanatap tamư tha bôl ôh pang tui thong panik.”
Currently Selected:
Rô-ma 10: CJM2024
Highlight
Share
Copy
Want to have your highlights saved across all your devices? Sign up or sign in
© 2024 Bible Society Vietnam. All rights reserved.
