Dôm Bruk Ngak 7

Kadha lang anưd Ê-tiên

1Gru mưliêng glong yatha tanhi Ê-tiên: “Hu njaup yau nan lei?” 2Ê-tiên thuuk: “Pathau dei ai, dôm amư, likau xang pang dahlak lang yah! Pô Lingik xêh mưlang krung hu bhat tabiak mưthong muk kei khol drei nạn Ap-ra-ham tuk ong krưh dok tak Mê-sô-pô-ta-mi, dahlau di tuk mưrai mưdok tak Ca-ran, 3thong bican laic: ‘Xang tabiak truh di bhum mi thong gaup gan hư bloh nao mưrai bhum bhok mưca Ita pato ka hư.’ 4Ywa nan ka ong tabiak truh di nưgar Kar-đê thong mưdok tak Ca-ran. Hadei di tuk amư ong tapa urai, Pô Lingik ngak ka ong pađôn mưng libik nan tapa nưgar bloh rakaya krưh dok tak ni. 5Bhô ôh ƀai brei ka ong ƀang angui haget dalam nưgar ni, kanê tha cagam tanưh palwak takai lijang ôh hu, min Bhô he ka ong thong talei pajeh ong mưblah hu tanưh ni, kanê kal nan ong ô ka hu anưk. 6Pô Lingik brei thau laic talei pajeh ong mưca ngak mưnuix lơh ywa pak diya lingiu, mưca mưnuix urang mưk khol nhu ngak halun kloh thong aniai yak khol nhu dalam pāk rituh thun. 7Pô Lingik bican: ‘Min Ita mưca bican inư paran krung hu mưk khol nhu ngak halun kloh; hadei di nan, mưca khol nhu tabiak truh thong bhuktik Ita tak libik ni.’ 8Pô Lingik ƀai brei ka ong jan ji tapa rija khao tan. Yau nan, tuk Ap-ra-ham krung hu pajiơng tha urang anưk likei nan I-sag yơ khao tan ka anưk dalam harei ya dalipan. I-sag khao tan ka Ya-kôp thong Ya-kôp lijang ngak yau nan ka tha pluh dwa muk kei.

9Dôm muk kei jhak hatai thong Yô-sep, nan ka pablei ong tapa Ai-kâp; min Pô Lingik dok mưthong ong. 10Bhô dong paklah ong truh di graup rijan, ƀai brei ka ong karun hanim thong gruk jag karag pak anak Pha-ra-ôn, patao Ai-kâp; patao pabak rapajan ong ngak kar pan akok diya Ai-kâp thong bih rajeh patao. 11Kal nan, hu tha bala ơk mưjiơng tabiak dalam abih diya Ai-kâp thong Ka-na-an, nạn tha rijan prong ngak ka dôm muk kei khol drei ôh dwah bihu kaya ƀang. 12Tuk Ya-kôp hamit tak Ai-kâp hu padai abei, ong pachai abih akok môn khol drei tapa tak nan ƀang ya tha. 13Tal ƀang ya dwa, Yô-sep mưng sahadah ka dei ai thau ka drei; kaywa nan, Pha-ra-ôn lijang thau mưnga vôm Yô-sep tra. 14Yô-sep pađar rok Ya-kôp nạn amư drei thong abih mưnga vôm drei, patom abih nạn tajuh pluh limư urang. 15Yau nan, Ya-kôp trun tak Ai-kâp bloh mưtai tak nan, dôm akok môn khol drei lijang yau nan; 16Atau talang khol nhu bihu ba mưrai Si-cem, thong dar dalam tanum krung bihu Ap-ra-ham mưk jiên blei di dôm anưk likei Hê-mô dok pak Si-cem.

17Tuk jek thi tal bangyau Pô Lingik ngak thit panôic he thong Ap-ra-ham, akok bôl khol drei dok pak Ai-kâp kưk kakal paƀlwak ralô, 18ka tal tuk hu tha patao pakan tagôk pakrang diya Ai-kâp thong ôh thau tal Yô-sep. 19Patao ni anngak utan talei pajeh khol drei thong coh brah dôm muk kei khol drei, ep tatơk khol nhu xang parah klāk dôm anưk kamar, ôh lôi ka khol nhu diup. 20Dalam tanut vagtu nan, Mô-se bihu tabiak di rai, ƀok mưta mưlang bimi di anak Pô Lingik thong bihu rong tak thang drei dalam klau bilan. 21Tuk Mô-se gok ba nao klāk yơ bihu anưk kamei Pha-ra-ôn mưk ngak anưk thong rong ba yau anưk jiơng drei. 22Mô-se bihu baic abih gruk jag karag di mưnuix Ai-kâp; ong hu baniai bih dalam panôic đôm gam bruk ngak.

23Tuk bihu pāk pluh thun, ong tamuh dalam tian jamal paya nao ravang dôm dei ai drei nạn anưk bik I-sra-ên. 24Tuk ƀôh tha urang dalam khol nhu gok dok dang jwak jih, Mô-se binhêt kar dađaup urang gok jwak jek bloh tong mưtai mưnuix Ai-kâp nan piêh biyar mưbai. 25Ong đaka dei ai drei thau laic Pô Lingik angui tangin drei piêh dong paklah khol nhu, min khol nhu ôh thau. 26Harei hadei, tuk khol nhu krưh dok atong gaup yơ ong mưrai jek piêh pabrai panôic: ‘Mưni, dei ai lơy, krung hu nạn dei ai, habar dok dang jhak thong gaup yau nan?’ 27Ra krưh dok gơk tatơk mưnuix jek taphia drei talơg Mô-se tabiak thong đôm: ‘Thei krung hu padang xaai ngak mưnuix pakrang thong ngak kwan an khol dahlak? 28Xaai lijang ưng pamưtai dahlak yau krung hu pamưtai urang Ai-kâp mưng harei kabrôi habar?’ 29Mô-se birau hamit panôic nan ka đôic daup thong mưrai mưdok dalam nưgar Ma-đi-an. Tak nan, ong pajiơng bihu dwa anưk likei.

30Pāk pluh thun hadei, tha umat bhat tabiak tom ong dalam dalah apui libik rôm darôi dok krưh ghwơh tak bhum kamrang cơk Si-na-i. 31Mô-se ƀôh thong plơng kadơng di anak gruk kateh nan ka yam mai jek piêh iơk ka pajip vơk yơ ong hamit xap Pô bican: 32‘Ita nạn Pô Lingik anưd muk kei hư, Pô Lingik Ap-ra-ham, I-sag thong Ya-kôp.’ Mô-se hôic tatơk drei ôh khin mong. 33Pô gilaic bican: ‘Xang thwak kalik jwak truh di takai hư kaywa libik hư krưh dang nạn tanưh likam. 34Ita krung hu ƀôh pajip gruk raƀi raƀưp anưd bôl Ita tak Ai-kâp thong hamit xap patak parai khol nhu nạn ka trun dong paklah khol nhu. Urak ni xang mưrai, mưca Ita pachai hư mưrai Ai-kâp.’ 35Êng Mô-se ni nạn mưnuix khol nhu krung hu kamlah klāk thong đôm: ‘Thei krung hu padang ong ngak mưnuix pakrang thong kwan an?’, yơ mưni Pô Lingik krung hu pachai ong ngak urang pan akok thong pakat dong ba kaywa tha umat krung hu bhat tabiak thong ong dalam rôm darôi. 36Ong krung hu ba khol nhu tabiak, ngak dôm thunau ginrơh, nưm crih dalam nưgar Ai-kâp, ngok Tathik Bhông, thong libik bhum kamrang dalam pāk pluh thun. 37Êng Mô-se ni krung hu đôm thong anưk bik I-sra-ên: ‘Mưca Pô Lingik paƀlong tagôk dalam paran dei ai tha pakat hôr drơh yau dahlak.’#7:37 yau dahlak: Ngan nạn yau Bhô krung hu brôk dahlak tagôk. 38Êng ong nạn mưnuix krung hu dok krưh bhap pari, tak libik bhum kamrang thubik thong umat, dê bican thong ong ngok cơk Si-na-i thong dôm muk kei khol drei; thong ong lijang tôk mưk dôm panôic gruk diup piêh jao vơk ka khol drei. 39Min dôm muk kei khol drei ôh ciup pang panôic ong, kah ong tabiak bloh ba tian drei tal Ai-kâp. 40Khol nhu đôm thong A-rôn: ‘Likau xang ngak dôm yang libang nao dahlau khol dahlak kaywa ka nôk Mô-se nạn mưnuix krung hu ba khol drei tabiak truh Ai-kâp, khol dahlak ôh thau kabha haget krung hu mưjiơng tabiak ka ong nan pajơ.’ 41Dalam dôm harei nan, khol nhu đug tha hayap limo liôi, ƀai panôja ka thek hayap nan thong bui ôn ka bruk kaywa tangin drei ngak hajiơng. 42Yau nan, Pô Lingik krung hu thrah yơng di khol nhu thong klāk cek khol nhu mưliêng kakuh jabôl lingik, yau hu vak dalam tapuk hôr laic:

‘Hơic bôl I-sra-ên, hu njaup khol hư krung hu ƀai athur limah thong panôja ka Ita

Dalam pāk pluh thun dok pak libik bhum kamrang lei?

43Yau nan bloh khol hư gilaic cakông kanjak ka yang Mo-log,

Thong patuk yang Rom-phan,

Ar nạn dôm thek hayap bloh khol hư ngak tabiak piêh bhuktik.

Ywa nan ka, Ita lijang mưca aniai yak khol hư tapa gah dêh Ƀa-ƀi-lôn.’

44Muk kei khol drei krung hu Hadai Kaxan Jan ji dalam bhum kamrang, yau Pô Lingik krung hu thurah ka Mô-se xang ngak njaup tui yau xaidah bloh ong krung hu ƀôh. 45Muk kei khol drei krung hu tôk mưk huji ywa nan thubik thong Yô-suê ba nhu tamư nưgar khol nhu krung hu mưblah mưk mưng dôm bôl bloh Pô Lingik krung hu tiaup truh di khol nhu. Huji ywa nan dok kađong ka tal rai Đa-vit, 46mưnuix bihu karun di anak Pô Lingik, thong ong likau dwah tha libik biđang ka Pô Lingik anưd Ya-kôp#7:46 Pô Lingik anưd Ya-kôp: Dalam tha thanôn blah vak tangin nạn thang anưd Ya-kôp.. 47Hadei di nan, patao Sa-lô-môn darap ka Pô Lingik tha boh thang. 48Min Dê Glong Yatha ôh dok dalam thang kaywa di tangin mưnuix ngak, yau pakat hôr krung hu đôm:

49‘Pô bican: Thôr riga nạn thing mưnga Ita,

Thong tanưh nạn libik cek takai Ita.

Thang halei mưca khol hư darap ka Ita,

Libik halei nạn libik ka Ita padei gleh?

50Ôh njaup tangin Ita krung hu padang jiơng di rim pakar ni ô?’

51Hơic dôm urang khang akok, tian thong tangi ô ka bihu khao tan dêh! Rakaya mưradhag di Pô Nưbi Ginrơh miêt miêt. Muk kei rakaya yau halei yơ rakaya lijang yau nan! 52Hu hôr halei bloh muk kei rakaya ôh gơk tatơk? Khol nhu dok pamưtai dôm urang đôm pakat hôr ka gruk bhat mưrai anưd Dê Kahanôt anưd Pô Lingik, nạn Dê krung hu rakaya krung hu lambil thong pamưtai. 53Rakaya krung hu tôk mưk hakum jakar tathit kaywa dôm umat, min gilaic ôh pang tui hakum jakar nan!”

Ê-tiên ciup mưtai

54Tuk khol nhu pang dôm kadha nan, yơ biak dangih dalam tian bloh grik tagei thong Ê-tiên. 55Min Ê-tiên bihu bak lamak Pô Nưbi Ginrơh, mong ƀlan tagôk thôr riga, ƀôh xêh mưlang Pô Lingik thong Pô Yê-su dang gah hanuk Pô Lingik. 56Ong đôm: “Dêh, dahlak ƀôh dôm pakat lingik pơh tabiak thong Anưk Mưnuix dok gah hanuk Pô Lingik.” 57Kal nan, khol nhu drêu tagôk, kapơk tangi vơk thong ba gaup blak tamư mưk Ê-tiên 58hwa tabiak lingiu dhan, bloh glam patau di ong. Dôm rakaxan mưk khan ao drei cek di takai tha urang dam angan Sau-lơ. 59Tuk khol nhu dok krưh glam patau yơ Ê-tiên lang kar laic: “Likau di Pô nạn Pô Yê-su rok ba thap xwan dahlak.” 60Bloh ong khôi iêu prong xap: “Pô lơy, jôi tuh glaic ni ka khol nhu!” Birau kloh panôic yơ ong đih.

Currently Selected:

Dôm Bruk Ngak 7: CJM2024

Highlight

Copy