Dôm Bruk Ngak 6
6
Padang rapajan xêh ragxa
1Dalam tuk nan, thanôn anưk xêh paƀlwak, dôm mưnuix Yo Thaic đôm xap Hi-lap ih oh ƀwah kal mưnuix Yo Thaic đôm xap A-ram, kaywa dôm urang kamei bilau khol nhu krung hu gok klāk cek dalam bruk pabrei takhat kaya ƀang yāup harei. 2Tha pluh dwa Xêh Pachai patom nhom abih anưk xêh mai bloh đôm: “Klāk bruk lang pato Panôic Pô Lingik piêh ragxa paban ƀang nạn kabha ôh njaup. 3Yau nan, likau di dei ai xang rwah dalam thanôn drei tajuh urang bihu angan ji siam, bak lamak Pô Nưbi Ginrơh thong jag karag, khol dahlak mưca jao than bha ni ka khol nhu. 4Dok khol dahlak mưca kưk harat hatai ka gruk lang kar thong ragxa panôic Pô Lingik.” 5Abih drei jang bui tian ka dôm panôic nan; khol nhu krung hu rwah Ê-tiên nạn mưnuix bak lamak sagar thong Pô Nưbi Ginrơh, Phi-lip, Ƀô-kô-rơ, Ni-ka-no, Ti-môn, Ƀa-mê-na thong Ni-kô-la nạn mưnuix An-ti-ôt tui agama Yo Thaic. 6Khol nhu biđang ƀok tajuh urang nan ka dôm Xêh Pachai; dôm Xêh Pachai lang kar bloh cek tangin di ngok dôm urang ni. 7Panôic Pô Lingik ravak graup libik; thanôn anưk xêh tak Yê-ru-sa-lem paƀlwak biak ralô. Hu ralô gru mưliêng lijang takabal sagar gêk.
Ê-tiên gok đôm palek
8Ê-tiên bihu bak lamak karun hanim thong gon xagta, ngak dôm thunau ginrơh thong nưm crih biak prong dalam bôl bhap. 9Tuk nan, hu hadôm urang bha di thang nhom iêu nạn Thang Nhom Dôm Urang Salalah#6:9 Dôm Urang Salalah: Sani nạn dôm urang Yo Thaic dahlau dêh nạn halun kloh, min krung hu tabuh vơk ngan bihu ƀai brei gruk salalah. thong dôm urang palei pak Si-ren, A-leg-xan-đri-a, tapak tung dôm urang Yo Thaic pak Si-li-si thong nưgar A-si-a brôk tagôk jajek thong Ê-tiên. 10Min khol nhu ôh mưradhag nôi di panôic kadha jag karag thong Pô Nưbi Ginrơh nạn Dê krung hu ƀai brei ka ong dôm panôic kadha nan, 11hajiơng lwa pacuh tha thanôn urang đôm palek laic: “Khol dahlak krung hu hamit nhu đôm dôm panôic hanoh niêm tal Mô-se thong Pô Lingik.” 12Khol nhu paxut bôl bhap, dôm ginôr taha thong dôm gru pato adat blak tamư mưk bloh ba ong mưrai di anak Ginum biai. 13Khol nhu ba tabiak dôm rakaxan lor, đôm laic: “Urang ni bhian đôm dôm panôic tanrok tal Huji Likam thong hakum jakar. 14Kaywa khol dahlak krung hu hamit nhu đôm laic Yê-su mưnuix Na-xa-ret ni mưca thantik libik ni thong xalih adat caƀat bloh Mô-se krung hu tathit vơk ka khol drei.” 15Abih mưnuix dok tak Ginum biai jang patom mat mong Ê-tiên thong ƀôh ƀok ong drơh yau ƀok umat.
Currently Selected:
Dôm Bruk Ngak 6: CJM2024
Highlight
Share
Copy

Want to have your highlights saved across all your devices? Sign up or sign in
© 2024 Bible Society Vietnam. All rights reserved.