Dôm Bruk Ngak 17

Phao-lô tak Tê-sa-lô-ni-ka

1Phao-lô thong Si-la nao tapa Am-phi-pô-lit, A-pô-lô-ni-a bloh mưrai Tê-sa-lô-ni-ka, libik hu thang nhom Yo Thaic. 2Tui tana rađap, Phao-lô mưrai thang nhom; dalam klau harei Sa-ƀat, ong jajek thong khol nhu, 3mưk Agal Nưbi lang yah thong paxakrưn laic Dê Krist xang ciup pađik pađwa, bloh diup vơk mưng lôg mưtai. Ong đôm: “Pô Yê-su bloh dahlak dok rao pahơh ka dôm ong sani nạn êng Dê Krist.” 4Tha thanôn urang dalam khol nhu bihu pahalar nao tui Phao-lô thong Si-la; lijang hu ralô urang Hi-lap takrung bhuktik Pô Lingik, thong ôh takik urang kamei bha di kavôm kaya mưda dial Pô Yê-su gêk. 5Min dôm urang Yo Thaic mưbai limuk, jāk mưnok poh blah poh mưk lingiu jalan ding, patom nhom tapôr ralô ngak racol dalam dhan. Khol nhu katung gaup mưrai thang Ya-sôn, dwah mưk Phao-lô thong Si-la piêh ba tabiak di anak bôl bhap. 6Dwah ôh ƀôh, khol nhu hwa Ya-sôn thong hadôm dei ai mưrai di anak jakar mưdin, palek palam: “Dôm ban ni krung hu ngak ka racol dalam dunya, urak ni mưnok nhu lijang mưrai sani, 7thong Ya-sôn krung hu padaup khik mưnok nhu! Abih tapôr nhu jang hu angak mưradhag di adat caƀat Sê-sa, đôm laic hu tha patao pakan, nạn Yê-su.” 8Pang dôm panôic nan, bôl bhap thong dôm kar pan gon mưdin jang karen karang. 9Hadei di nan, kar pan gon đôk Ya-sôn thong dôm urang pakan hakak jiên cek takai tui adat cek, bloh palao tabiak.

Tak Ƀê-rê

10Êng di mưlam nan, dei ai ba Phao-lô thong Si-la mưrai Ƀê-rê; tuk tal libik, khol nhu tamư thang nhom Yo Thaic. 11Dôm urang Yo Thaic tak ni hu mưnơix lanưng hatai hơl di dôm urang tak Tê-sa-lô-ni-ka; khol nhu tatang tiak takabal anga,#17:11 anga: Dalam xap Hi-lap nạn logos dok hu ar nạn panôic. harei halei lijang laƀong Agal Nưbi piêh pachang iơk panôic lang hu njaup lei. 12Ywa nan ka, ralô urang dalam thanôn khol nhu dial Pô Yê-su, hu dôm muk bha di kavôm kaya mưda Hi-lap thong dôm ong lijang ralô. 13Min tuk mưnuix Yo Thaic tak Tê-sa-lô-ni-ka hamit khao Phao-lô lijang tathit Panôic Pô Lingik tak Ƀê-rê yơ khol nhu mưrai tak nan piêh tamưplơh thong paxut bôl bhap. 14Binhêt, dei ai ba Phao-lô nao gah tathik, dok Si-la thong Ti-mô-thê mưdok vơk Ƀê-rê. 15Dôm urang bôl Phao-lô ba ong mưrai A-thên bloh gilaic mai, ba harak gon ka Si-la thong Ti-mô-thê xang mưrai tom ong bik kayôn bik siam.

Tak A-thên

16Kal nan, Phao-lô dok cang Si-la thong Ti-mô-thê tak dhan A-thên, ong dangih tuk ƀôh mưdin bak lamak dôm thek hayap. 17Yau nan, ong jajek thong mưnuix Yo Thaic thong mưnuix Bôl-Lingiu tui agama Yo Thaic dalam thang nhom, lijang yau dôm urang nao mai di lingiu klơng yāup harei. 18Hu hadôm kar sakarai bha di dwa kavôm Ê-pi-ku-riên#17:18 Ê-pi-ku-riên: Sani nạn kavôm sakarai baic tui gah xơh bui ywa ong Ê-pi-ku-rus (Epicurus) padang. thong Stô-xi-ên#17:18 Stô-xi-ên: Sani nan kavôm sakarai baic tui gah ep rup ywa Ze-nô (Zeno) thong ong Kri-si-put (Chrysippus) padang. lijang jajek thong ong. Ra yơ tanhi: “Ban katal caƀôi ni ưng đôm haget nan?” Urang dêh yơ đôm: “Mưda yau ong nan lang pahơh ka dôm yang libang diya lingiu” — kaywa Phao-lô rao lang Khao Siam ka Pô Yê-su thong gruk diup vơk.#17:18 Pô Yê-su thong gruk diup vơk: Gruk diup vơk dalam xap Hi-lap nạn tha angan akhar pukar inư anastasis. Ywa nan hu mưda gok dul chuk nạn angan tha yang kamei. 19Khol nhu mưk ong ba mưrai A-rê-ô-pa#17:19 A-rê-ô-pa: Sani nạn pak nhom vơk anưd ginum biai mưdin A-thên. thong tanhi laic: “Ong hu mưda brei ka khol dahlak thau pajip ka panôic katika birau bloh ong yah yaic nan lei? 20Kaywa dôm kabha ong lang khol dahlak pang crih di tangi. Ywa nan ka, khol dahlak ưng thau dôm kabha nan hu ar haget.” 21Biak rei, abih bôl A-thên thong mưnuix Bôl-Lingiu mưdok sani ciêt caga tuk vag piêh đôm thong pang kabha birau crih min.

22Kal nan, Phao-lô dang di krưh A-rê-ô-pa đôm laic: “Pathau rakaya nạn mưnuix A-thên, dahlak mong ƀôh dalam abih bruk, rakaya biak nạn dôm urang biak dial agama. 23Kaywa tuk nao graup mưdin, glang pachang dôm libik rakaya xambah, dahlak ƀôh tha jaban hu ratak akhar: BHUKTIK YANG ÔH THAU. Yau nan, Dê rakaya bhuktik bloh ôh thau nan, nạn êng Dê dahlak krưh dok rao pahơh ka rakaya sani. 24#Bruk 7:48.Pô Lingik nạn Dê krung hu padak padang nưrah thong rim pakar dalam nan, nạn Pô anưd tanưh thong lingik, ôh biđang dalam baha kaywa tangin mưnuix ngak hajiơng. 25Bhô lijang ôh hajat tangin mưnuix ragxa yau mưda Bhô hajat kabha haget, kaywa Bhô êng nạn Dê ƀai gruk diup, yava xwan thong rim paka pakan ka abih drei. 26Mưng tha urang, Pô krung hu ngak jiơng graup paran thong ngak ka khol nhu diup graup boh tanưh. Bhô pacek bangyau thong cam ia ka khol nhu mưdok, 27piêh ka khol nhu thôi ƀôi, pachang dwah Pô Lingik thong hu mưda gōk bihu Bhô, kanê Bhô ôh mưdok atah yāup urang dalam khol drei. 28Kaywa dok dalam Bhô, khol drei bihu diup, yattrak angak thong utxul, yau tha thanôn ra ariya anưd rakaya hu đôm: ‘Khol drei lijang nạn talei pajeh Bhô.’ 29Yau nan, krung hu nạn talei pajeh Pô Lingik, yơ khol drei jôi xanưng laic Pô Lingik#17:29 Pô Lingik: Dalam xap Hi-lap vak nạn Dê Keramat. drơh yau thek hayap mưng mưh, pariak, ngan patau kaywa mưnưng krah thong mat xanưng mưhati mưnuix ngak tabiak. 30Yau nan, Pô Lingik krung hu klāk tapa dôm bangyau luk gila nan; min urak ni, Bhô thurah ka abih drei mưdok graup libik xang tumal. 31Kaywa Bhô krung hu jarô tha harei bloh Bhô mưca mưk gruk kahanôt bican inư dunya kaywa mưnuix bloh Bhô krung hu padang. Thong piêh pakrưn kaxan ka abih drei ƀôh, Pô krung hu ngak ka mưnuix nan diup vơk mưng lôg mưtai.” 32Tuk hamit đôm ka gruk diup vơk mưng lôg mưtai, tha thanôn urang klao bilei, min hadôm urang pakan gilaic đôm: “Khol dahlak ưng pang ong đôm kadha ni tha ƀang tra.” 33Yau nan, Phao-lô niga truh di khol nhu. 34Min hu hadôm urang tui ong thong dial tôk Pô Yê-su, dalam thanôn nan hu Đê-ni nạn tha urang dalam ginum biai A-rê-ô-pa thong tha urang kamei angan Đa-ma-ri, mưthong dôm urang pakan gêk.

Currently Selected:

Dôm Bruk Ngak 17: CJM2024

Highlight

Copy