Dôm Bruk Ngak 16

Phao-lô ba Ti-mô-thê tui

1Phao-lô mưrai dhan Đet-ƀơ thong Lit-trơ. Tak nan, hu tha anưk xêh angan Ti-mô-thê, anưk likei muk mưnuix dial Pô mưnuix Yo Thaic, thong amư nạn mưnuix Hi-lap. 2Dei ai dok tak Lit-trơ thong I-kô-ni jang ngak kaxan siam ka Ti-mô-thê. 3Phao-lô ưng ba Ti-mô-thê tui nan ka ong ngak adat khao tan ka nhu, kaywa dôm urang Yo Thaic dok dôm libik nan jang thau amư nhu nạn mưnuix Hi-lap. 4Tuk nao tapa dôm dhan, khol nhu lijang kakei dôm mưnuix dial Pô xang khik dôm tanap anưd dôm Xêh Pachai thong ginôr taha pak Yê-ru-sa-lem krung hu padang tabiak. 5Ywa nan ka, dôm Nhom Nưbi bihu khang kajap dalam sagar, thong thanôn mưnuix dial Pô kưk cak rôk yāup harei.

Phao-lô ƀôh catôi

6Khol nhu nao tapa graup nưgar Phi-ri-gi thong Ga-la-ti, kaywa Pô Nưbi Ginrơh ghak drưh khol nhu lang anga tak A-si-a. 7Tuk mưrai jek Mi-si-a, khol nhu ran tamư nưgar Ƀi-thi-ni, min Pô Nưbi Ginrơh anưd Pô Yê-su ôh brei idin 8birau mưng khol nhu nao thrang tapa Mi-si-a thong trun Trô-ac. 9Tuk mưlam, Phao-lô ƀôh tha catôi: Hu tha urang Ma-xê-đô-ni-a dang di anak drei neh likau laic: “Likau ong tapa Ma-xê-đô-ni-a dai dong khol dahlak!” 10Tuk Phao-lô ƀôh catôi nan, khol dahlak binhêt dwah ganap tapa Ma-xê-đô-ni-a, kaywa patom nôk laic Pô Lingik iêu khol dahlak rao pahơh Khao Siam pak nan.

Tak dhan Phi-lip – Li-đi dial Pô Yê-su

11Yau nan, mưng Trô-ac khol dahlak đik gilai nao tapak tal ƀôn palao Sa-mô-tra-xơ; harei hadei, mưrai Nê-a-pô-li, 12mưng libik nan, khol dahlak mưrai Phi-lip, mưdin tamưrơp#16:12 mưdin tamưrơp: Dalam tha thanôn blah vak tangin nạn mưdin yatha, dalam tha thanôn blah vak tangin pakan nạn mưdin samkhan yatha. di nưgar Ma-xê-đô-ni-a, bha tanưh Rô-ma. Khol dahlak mưdok tak nan hadôm harei. 13Dalam harei Sa-ƀat, khol dahlak tabiak lingiu baƀang dhan, jek hang krong, nạn libik khol dahlak xanưng laic mưnuix urang nhom gaup piêh lang kar. Khol dahlak dok dala bloh lang ka dôm urang kamei nhom pak nan. 14Hu tha urang kamei pangik pang khol dahlak, angan Li-đi, palei pak dhan Thi-a-ti-rơ, harat pablei khan bai bar ingu, nạn mưnuix bhuktik Pô Lingik. Pô pơh hatai Li-đi ngak ka muk patom mat tal panôic Phao-lô đôm. 15Hadei di tuk mưthong tôk ƀap-tem thong mưnuix thang drei bloh, Li-đi daa khol dahlak: “Mưyah dôm ong pachang dahlak nạn kloh hatai thong Pô, likau xang tamư mưdok vơk thang dahlak.” Bloh muk daa ep khol dahlak tamư.

Phao-lô thong Si-la gok jam – Kar khik thang danuh dial Pô Yê-su

16Tha vār, khol dahlak krưh dok nao tal libik lang kar yơ gōk tha halun kamei gok yang anưd ajin Phi-tôn#16:16 ajin Phi-tôn: Ajin imiêng. tamư thong dwah ralô laba ka pô tapa bruk imiêng. 17Nai nao tui Phao-lô thong khol dahlak prêu tagôk: “Dôm urang ni nạn halun Pô Lingik Glong Yatha, rao pahơh ka khol hư#16:17 khol hư: Dalam tha thanôn blah vak tangin nạn khol drei. ganap piêh bihu dong paklah.” 18Nai kưk ngak yau nan dalam ralô harei ngak ka Phao-lô biak cao ci birau mưng gaic mai đôm thong ajin laic: “Ita nưmax angan Pô Yê-su Krist thurah ka hư xang tabiak truh di urang ni.” Binhêt tuk nan, ajin tabiak truh. 19Min tuk dôm pô nai ƀôh ôh dok pachôm dwah laba bihu tra binhêt mưk Phao-lô thong Si-la, hwa tal klơng jao ka kar pan gon. 20Tuk ba tal anak dôm kwan an, khol nhu palek palam: “Dôm urang ni nạn mưnuix Yo Thaic ngak racol mưdin khol drei, 21pato pakai dôm adat caƀat bloh khol drei ôh mưda halar ciup ngan pangak, kaywa khol drei mưnuix Rô-ma.” 22Tapôr bôl lijang brôk tagôk mưradhag di dwa ong, dôm kwan an thurah hak ao thong tong poh dwa ong. 23Hadei di tuk tong poh, khol nhu mưk jam dwa ong bloh kakei thong ginôr khik thang danuh xang iơk mong kloh ghat. 24Bihu gon nan, ginôr khik thang danuh karơk dwa ong tamư thang danuh xup thong buh anuh takai vơk.

Kar khik thang danuh gilaic mai dial

25Nôic krưh mưlam Phao-lô thong Si-la dok krưh lang kar thong doh pôk mưyom Pô Lingik; dôm radanuh jang pangik pang. 26Asak, hu binhôr tatôn tanưh riya biak katang, thangak dôm canar var thang danuh tayun mưgei. Binhêt, abih baƀang pơh lah, talei threng anưd dôm radanuh jang lek trun abih. 27Ginôr khik thang danuh mưdơh tagôk ƀôh dôm baƀang thang danuh pơh lah, đaka dôm radanuh krung hu đôic daup bih nan ka thwak padak jarô binax rup. 28Min Phao-lô iêu prong xap: “Jôi ngak utan drei! Khol dahlak jang dok abih tak ni!” 29Ginôr khik thang danuh iêu mưk thang mưnhưk bloh đôic xamar tamư dalam thang danuh, yuh yuh khôi ala takai Phao-lô thong Si-la. 30Bloh ong ba dwa urang tabiak lingiu thong tanhi: “Pathau dôm ong, dahlak xang ngak haget piêh bihu dong paklah?” 31Dwa ong thuuk: “Xang dial Pô nạn Pô Yê-su yơ ong thong abih mưnga vôm ong mưca bihu dong paklah.” 32Dwa Xêh Pachai tathit panôic Pô ka ong thong abih mưnuix mưdok dalam thang ong gêk. 33Dalam mưlam nan, êng tuk nan, ginôr khik thang danuh ba dwa ong tabiak rao dôm nưm tathram; bloh binhêt, ong thong abih mưnga vôm jang ciup tôk ƀap-tem. 34Ginôr khik thang danuh daa dwa urang tagôk thang drei thong thai đam payak pađam. Ong thong abih mưnga vôm biak bui ôn kaywa krung hu dial Pô Lingik.

35Tal hadah, dôm kwan an pachai kadi kadai đôm thong ginôr khik thang danuh: “Xang biyar salalah ka dôm urang nan.” 36Yau nan, ginôr khik thang danuh đôm thong Phao-lô: “Dôm kwan an krung hu thurah ka dahlak biyar salalah ka dei ai; kaywa nan, tabiak mek, thong nao thug siam.” 37Min Phao-lô đôm thong khol nhu: “Khol dahlak nạn bôl Rô-ma, tuk ô ka padok glaic, min khol nhu krung hu tong poh khol dahlak di krưh bôl bhap bloh mưk karơk dalam thang danuh; urak ni khol nhu gilaic lwa palao khol dahlak habar? Ôh mưda bihu! Êng khol nhu xang mưrai sani piêh palao khol dahlak!” 38Dôm kwan an pang kadi kadai pathau vơk dôm panôic nan ka thur mưk kaywa thau dwa ong nạn bôl Rô-ma. 39Yau nan, khol nhu mưrai likau ampun bloh ba dwa ong tabiak thong kanư niga truh di dhan. 40Tuk tabiak di thang danuh, dwa Xêh Pachai tamư thang Li-đi ravang, paxơh dei ai bloh tagôk jalan.

Currently Selected:

Dôm Bruk Ngak 16: CJM2024

Highlight

Copy