I Kô-rir-tô 15
15
Gruk diup vơk
(15:1-58)
Gruk diup vơk anưd Dê Krist
1Pathau dei ai, dahlak ưng pahadar vơk ka dei ai Khao Siam bloh dahlak krung hu rao lang thong dei ai krung hu takabal, lijang yau krưh dok dang kajap dalam nan. 2Nhơ Khao Siam nan, dei ai bihu dong paklah mưyah dei ai khik kajap kabha dahlak krung hu rao lang; nan ô, dei ai hu dial lijang ôh hu hanim.
3Dahlak krung hu pahơh adat ka dei ai kabha samkhan abih bloh dahlak hu tôk mưk, nan nạn Dê Krist ciup mưtai kaywa di danuh glaic khol drei tui panôic Agal Nưbi. 4#Mat 12:40; Bruk 2:24-32.Bhô krung bihu dar, tal harei ya klau, Bhô krung hu diup vơk tui panôic Agal Nưbi; 5#Lu 24:34. Mat 28:16,17; Mag 16:14; Lu 24:36; Yâ 20:19.thong Bhô krung hu bhat tabiak ka Sê-pha, bloh ka kavôm tha pluh dwa Xêh Pachai. 6Hadei di nan, mưthong tha kal, Bhô bhat tabiak ka hơl limư rituh dei ai; nôk ralô dalam thanôn ni urak ni jang dok diup, min hu hadôm urang krung hu mưtai. 7Bhô lijang bhat tabiak ka Ya-kơ, hadei di nan ka abih Xêh Pachai. 8#Bruk 9:3-6.Hadei luic, Bhô lijang bhat tabiak ka dahlak yau ka tha linhang mưnưk u bilan. 9#Bruk 8:3.Kaywa dahlak nạn biak hin hot dalam thanôn dôm Xêh Pachai, ôh đang bihu êu nạn Xêh Pachai, kaywa dahlak krung hu phak pabrai Nhom Nưbi Pô Lingik. 10Min nhơ di karun hanim Bhô Lingik ka dahlak bihu yau harei ni, thong karun hanim Pô ƀai brei ka dahlak ôh njaup nạn ôh hu hanim. Gilaic vơk, dahlak ngak bruk ralô hơl abih urang pakan; min ôh njaup dahlak bloh nạn karun hanim Pô Lingik dok thong dahlak. 11Yau nan, kanê dahlak ngan dôm Xêh Pachai yơ nan nạn kabha khol dahlak rao lang thong nạn kabha dei ai krung hu dial.
Gruk diup vơk anưd urang mưtai
12Yau nan, mưyah dei ai bihu pang rao lang Dê Krist krung hu diup vơk mưng lôg mưtai, yơ habar dalam dei ai hu mưnuix gilaic đôm laic dôm urang mưtai ôh diup vơk? 13Mưyah mưnuix mưtai ôh diup vơk yơ Dê Krist lijang krung hu ôh diup vơk. 14Thong mưyah Dê Krist krung hu ôh diup vơk yơ gruk rao lang khol dahlak nạn ôh hu hanim, thong sagar dei ai lijang ôh hu hanim. 15Mưyah mưnuix mưtai biak biai ôh diup vơk yơ khol dahlak gok mong yau ngak kaxan lor ka Pô Lingik; kaywa khol dahlak krung hu ngak kaxan laic Pô Lingik krung hu ngak ka Dê Krist ôh diup vơk, dalam tuk Bhô ôh ngak ka Dê Krist diup vơk. 16Kaywa mưyah mưnuix mưtai ôh diup vơk yơ Dê Krist lijang ôh diup vơk. 17Thong mưyah Dê Krist diup vơk yơ sagar dei ai lijang ôh hu hanim, thong dei ai jang dok dalam danuh glaic drei. 18Yau nan, dôm urang krung hu mưtai dalam Dê Krist xang gok pao lihik. 19Mưyah pachôm anưd khol drei dalam Dê Krist ciêt mong tamư rai diup ni thoh min, yơ dalam abih urang, khol drei nạn dôm urang đang anit hơl di bih.
Pô Yê-su Krist, boh kacwa mưnik riya anưd gruk diup vơk
20Min urak ni, Dê Krist krung hu mưng lôg mưtai diup vơk, Bhô nạn boh kacwa ka dôm ra krung hu mưtai. 21Kaywa yau di tha urang bloh hu gruk mưtai yơ lijang hu tha urang bloh hu gruk diup vơk mưng lôg mưtai. Diup vơk mưng lôg mưtai. 22Yau dalam A-đam, abih drei jang mưtai; lijang yau nan, dalam Dê Krist, abih drei jang mưca diup vơk. 23Min yāup urang tui danak karei anưd drei: Dê Krist nạn boh kacwa akok mưnik riya; tal harei Dê Krist bhat mưrai, dôm urang bha di Bhô mưca diup vơk. 24Bloh gruk taluic mưca mưrai, nạn tuk Bhô jao dit biya vơk ka Pô Lingik nạn Amư, hadei di tuk Bhô krung hu thubang abih thek thong prưn pakrang, abih aco gon, abih ritdhi. 25Kaywa Bhô xang tho gon, ka tal habiên Pô Lingik “padok abih ra thutruh ala takai Bhô.” 26Ra thutruh taluic gok thubang nạn gruk mưtai. 27Kaywa Pô Lingik krung hu padok “rim pakar mai khôi di ala takai Dê Krist#15:27 Dê Krist: Dalam xap Hi-lap nạn Bhô..” Min tuk đôm “rim pakar mai khôi ala takai Dê Krist” yơ jalang jalôi ôh vang harung Dê padok rim pakar ala takai Bhô. 28Tuk rim pakar krung hu mai halar tui Bhô yơ kal nan êng Bhô nạn Anưk lijang mai halar tui Dê krung hu ngak ka rim pakar mai halar tui drei, piêh Pô Lingik ngak abih gruk dalam abih drei.
29Mưyah ôh yau nan ka dôm urang tôk ƀap-tem kala ka mưnuix mưtai mong akok di haget? Mưyah mưnuix mưtai biak ôh diup vơk yơ habar mưnuix urang gilaic tôk ƀap-tem kala ka khol nhu? 30Ywa haget êng khol dahlak tuk halei lijang xang jom ƀok thong ajandi? 31Pathau dei ai, dahlak jom ƀok thong gruk mưtai yāup harei!#15:31 dahlak jom ƀok thong gruk mưtai yāup harei: Ngan nạn dahlak mưtai yāup harei. Dahlak đôm yau nan kaywa boh mưyeh mưyom anưd dahlak ka dei ai dalam Dê Krist Yê-su, Pô khol drei. 32Đôm tui ganap mưrôxak, long tanhi dahlak bihu hanim haget mưyah dahlak mưthuh kalin thong dôm athur xanag harơh tak Ê-phê-sô? Mưyah mưnuix mưtai ôh diup vơk, yơ khol drei:
“Xang ƀang xang mưnhum,
Kaywa harei paguh mưca khol drei mưtai!”
33Dei ai jôi gok pagat: “Ayut côi jhak ngak pao mưnuh mưnưng siam.” 34Xang pagalaic hatai thong jôi tanrok glaic vơk, kaywa tha thanôn urang dalam dei ai ôh thau Pô Lingik. Dahlak đôm yau nan piêh dei ai tachaup ƀok.
Rup pabhap diup vơk
35Min mưca hu mưnuix đôm: “Mưnuix mưtai diup vơk yau halei? Khol nhu mưk rup pabhap halei bloh gilaic vơk?” 36Mưnuix gila gilap dêh lơy! Pakar haget xaai drāk, mưyah dahlau yatha ôh mưtai nao, yơ ôh diup vơk bihu. 37Dok pakar xaai drāk, ôh njaup êng nạn thek rup mưca tamuh tagôk, min ciêt nạn tha athar yau athar padai abei ngan hadôm paka athar pakan. 38Pô Lingik ƀai brei athar pajeh thek rup patui gimnit Bhô ưng, yāup paka athar pajeh tha bingu thek karei. 39Ôh njaup abih thap jang drơh gaup; thap anưd mưrôxak karei, thap athur bhiêp karei, anưd pukar cim karei, anưd pukar ikan karei. 40Lijang hu dôm binguk thek bha di lingik thong thek rup bha di tanưh; min xêh mưlang dôm binguk thek bha di lingik karei thong xêh mưlang dôm binguk thek bha di tanưh. 41Xêh mưlang ia harei karei; xêh mưlang ia bilan karei; xêh mưlang dôm patuk karei; xêh mưlang anưd patuk ni thong xêh mưlang patuk dêh lijang karei.
42Gruk diup vơk di dôm urang mưtai lijang yau nan. Rup pabhap drāk trun nạn pao tayah, min diup vơk nạn dok hamiêt; 43drāk trun nạn tachaup, min diup vơk nạn xêh mưlang; drāk trun nạn kre, min diup vơk nạn kati katang; 44drāk trun nạn rup pabhap athal mưnưk, min diup vơk nạn rup pabhap bha nưbi ginrơh. Mưyah krung hu rup pabhap athal mưnưk yơ lijang hu rup pabhap bha nưbi ginrơh, 45Yau hu panôic vak:
“Urang tamưrơp nạn A-đam krung hu gilaic hajiơng tha urang hu gruk diup,” min A-đam hadei luic ƀai brei nưbi yang nạn Dê ƀai brei gruk diup.
46Ôh njaup mưnuix bha nưbi ginrơh mưrai dahlau min nạn mưnuix phiap; hadei di nan nạn mưnuix bha nưbi ginrơh. 47Mưnuix tamưrơp mưng haluk bloh hu yơ bha di haluk; mưnuix ya dwa mưng thôr riga bloh mưrai. 48Dôm urang bha di tanưh yơ drơh yau mưnuix tabiak mưng tanưh; dôm urang bha di thôr riga yơ drơh yau Dê mưrai mưng thôr riga. 49Yau khol drei krung hu ba thek binguk di mưnuix tabiak di tanưh yơ khol drei mưca lijang pabak#15:49 khol drei mưca lijang pabak: Dalam tha thanôn blah vak tangin nạn khol drei lijang xang pabak. thek binguk anưd Dê mưrai mưng thôr riga.
Gruk thrơh tapa thong jaiyak hadei luic
50Pathau dei ai, dahlak ưng đôm laic, rilo thong darah ôh mưda liêng Dit Biya Pô Lingik bihu; gruk bhian pao tayah ôh mưda liêng gruk ôh bhian pao tayah bihu. 51#I Tê 4:15-17.Mưni, dahlak sahadah ka dei ai thau tha gruk palih kabal: Mưca khol drei ôh đih abih, min mưca abih bihu thrơh tapa 52dalam vakak, dalam thuƀit mưta, tuk xap kadêt taluic. Kaywa kadêt mưca yuk, mưnuix mưtai mưca diup vơk, ôh dok pao tayah tra, thong khol drei mưca bihu thrơh tapa. 53Kaywa athar bhian pao tayah ni xang cuk mưk athar ôh bhian pao tayah; athar bhian mưtai ni xang cuk mưk athar ôh bhian mưtai. 54Tuk athar bhian pao tayah, cuk mưk athar ôh bhian pao tayah; athar bhian mưtai cuk mưk athar ôh bhian mưtai yơ tuk nan mưca bihu thit panôic krung hu vak: “Gruk mưtai gok lôn lihik dalam gruk jaiyak.”
55“Hơic gruk mưtai, gruk jaiyak hư dok pak halei?
Hơic gruk mưtai, danuic hư dok pak halei?”
56Danuic anưd gruk mưtai nạn danuh glaic, ritdhi anưd danuh glaic nạn hakum jakar. 57Min đwa karun Pô Lingik krung hu ƀai brei ka khol drei gruk jaiyak nhơ di Pô khol drei nạn Pô Yê-su Krist. 58Pathau dei ai dahlak anit ranam, xang khang kajap, jôi tayun mưgei, xang ngak bruk hit Pô ganap dalah dalai takung, kaywa thau laic dhar mưk dei ai dalam Pô ôh njaup nạn ôh hu hanim ô.
Currently Selected:
I Kô-rir-tô 15: CJM2024
Highlight
Share
Copy
Want to have your highlights saved across all your devices? Sign up or sign in
© 2024 Bible Society Vietnam. All rights reserved.
