Taitus 3
3
Nocurimuc a s'gaba
1Bakasa neta̱n az a gab c'go̱mo̱, a em rina̱n a zeine. Aa em la c'honga̱mzan da. A soot ta̱m a walgca̱n emma̱n kooye̱ in rein i kasi. 2Aa tana la noc a̱n dind naak da. A em sooca̱d kasi. A se̱e̱te̱ ta̱m hyannana̱. A kalasa ta̱m hid na̱ baa neta̱n kwe̱. 3Na bakasa na az na lak de̱ha̱n ho̱d na̱. Na lak na̱m'kipi. An zain ta gab lalk da. An na yangsine, a an to̱nca̱n he̱nu d'ke̱m de̱lin na̱m'cok no. An emin ta̱m c'nocurimu a̱n bo̱pma̱n neta̱n a̱n c'de̱be̱. A a d'hyubu nu. A an na ha̱line, a an ha̱lc hyanna cinnan na.
4Daava̱n A'Sil kan gwa̱a̱ma̱d cinna kwesatain la na m'za̱i, a to̱nc na̱-na̱, 5a gwa̱a̱k na za rema̱n rihic kasi ca̱n na emin da. I rema̱n kwisid na̱. We̱sma̱n Hora̱md na̱ guzk na c'ko̱to. A sudk ta̱m mata̱m na macu poune, a nocurimuc pooca̱n ne. 6Sila ne̱e̱k na Hora̱md na̱ yaga rem Ye̱so Ka̱risti kan gwa̱a̱ma̱d cinna. 7I bat ai retin na kumk d'le̱g rema̱n pusuu Na'Sila̱, nan soot an ta kum u'yob baan kumu na̱. A an ta sak ta̱m u'con a po̱t d'kala. 8Lalksa̱ ha̱n i m'ga̱u.
A̱m to̱nk az a̱v la̱a̱sa̱ rihica̱ ha̱n na̱m'we̱se̱. Bat an batin d'ba̱t baa Na'Sil ta kaa d'hi a nes hid na̱ baan emma̱n rihic kasi. Emma̱n rihica̱ ha̱n, ii kasi d'kala. Ta̱ma̱ i u'kum baa koowe̱.
9E̱l an lansa̱n ka̱ka̱la̱, a̱n gabma̱n kims an de̱hne, a̱n s'lan a i'dama̱n rema̱n gabma̱n giira Mosa. Rihica̱ ha̱n kwe̱, a ca̱n nokta ri d'kau da. 10Kan rein tu san d'naase, kaag o i caa a'ila̱. Au ta lag da, a̱v lag o a̱n c ru. 11Nap az goon nocun lo, de̱bc ru baask c celka. I ka c'ko̱t ta̱ma̱. U baask ta̱m u gedaka hid ru lalko.
D'Po̱o̱sso̱
12Am como Atemas alla Taikikus baa rovo, za̱ga̱vsi v noko baa ri a̱n le̱in Nikopolis. Rema̱n a̱m kink az ta̱'m hwaa daava̱n yo̱o̱yo̱n a̱n a̱n'a. 13Se̱e̱te̱ Zenas kan napsa̱n giiras nu'cop na̱nna Appo̱llos. A̱v ne̱e̱ na̱ ta̱m rina̱n ta to̱n kwe̱ rema̱n baala̱m na̱. 14Ze neta̱n cinna az a la̱a̱s kaam d'hi a em yomka kasi rema̱n a kwimiti hid na̱. Aa em la soocda̱n ka̱ka̱l da.
15An rein kwe̱ baa ri el a̱n po̱o̱so̱m rovo. Po̱o̱so̱ an ta to̱n co an rein a s'gaba.
Pusuu Na'Sil boro baa no.
Currently Selected:
Taitus 3: driNT
Highlight
Copy
Compare
Share
Want to have your highlights saved across all your devices? Sign up or sign in
© Wycliffe Bible Translators, Inc. and © The Nigeria Bible Translation Trust 2019