Taitus 2
2
La̱a̱s u kasi
1Vo la i ke̱ng a̱v la̱a̱sa̱ neta̱n la̱a̱s u m'ga̱u. 2La̱a̱sa̱ a̱rma̱n hwengane a kaams hid na̱. A soot an hwennain na ne̱e̱ na̱ k'gwin. A kaag hid na̱. A bat d'ba̱t baa Na'Sil a d'ke̱mne̱nne̱. A soot an to̱nc netna a an gaga̱m c'de̱b ne̱.
3Ho̱da̱n lo ta̱ma̱, la̱a̱sa̱ netan hwengane, a em nocurimuc na̱ a̱n gela̱v Na'Sila̱. Za so̱o̱ga̱n alla an ke̱mc neta̱n da. A la̱a̱sa̱ ta̱m neta̱n rihic kasi. 4A la̱a̱sa̱ yaa'netan ho̱da̱na̱n ta to̱nt wa̱ra na̱ a aka̱n na̱-na̱. 5A kaams ta̱m hid na̱. A em nocurimuc na̱ i kasi. A go̱t buuc na̱ i kasi. A se̱e̱te̱ netna. A ne̱e̱ ta̱m a̱rma̱n na̱ k'gwin, rema̱n a na naas la lalks Na'Sil da.
6Ho̱da̱n lo ta̱ma̱, kaag yaa'beba̱n a kaams hid na̱.
7Kooye̱ a̱n ta̱'v ema, kaa d'hi a̱v em e i kasi, bat neta̱n ta he̱n a gabese vo. Av wa a̱n la̱a̱sa̱m netna, la̱a̱sa̱ na̱ honhono, za ta̱m d'he̱t-d'he̱t da. 8Vat s'lalk ho̱da̱na̱n na zatina̱n he̱n naakda̱n lalks rov da. Bat an ha̱lc rov ta hong m'e̱n, a ta kum ta̱m rihic c'naak ca̱n ta tanta v da.
9La̱a̱sa̱ coka̱n az a em rina̱n an gigin na̱ zein na̱ kwe̱. Aa ema la na̱ k'se̱sse̱s da. 10Aa hiv la rihi an gigin na̱ da. A kwesa na̱ az i na̱nna an nan bat d'ba̱t a na̱nna na. Bat a̱n rina̱n ta em kwe̱, ta de̱l neta̱n he̱n ke̱mda̱n kabma̱n la̱a̱s Na'Sil kan gwa̱a̱ma̱d cinna.
11Pusuu Na'Sil un tu sava neta̱n d'gwa̱a̱ma̱, ceka baa neta̱n kwe̱. 12Pusuun lo la̱a̱ska̱ na az na lag emma̱n rihica̱ d'rebo, a to̱nca̱n rihic naak ca̱n copun yanda̱hna. Na kaams kaa hid cinna a̱n nocurimuca̱n te̱nte̱. Na soot netna m'ga̱u, an zattin ta̱m ri d'reb da. 13Na soot kaa a̱n valma̱n damran pusuuna̱n na saktin u'con. Un rein vaakam Na'Sil d'kut a Kan Gwa̱a̱ma̱d cinna Ye̱so Ka̱risti ni a̱nmin damran gwink na̱. 14Ye̱so codk hid ru rema̱n u to̱vt na baan kooye̱ goon rihic naak ca. U ho̱l ta̱m na rihica̱ d'rebo. U vaaksa ta̱m na neta̱n ru au dagine, an rein a̱n s'za̱k a em rihic kasi.
15I rihica̱ ha̱n a̱n ta̱'v la̱a̱sa̱ netna. Kangsa, a̱v kaag ta̱m neta̱n a̱n we̱sa̱m c'go̱mo̱. Av lag la noc gin a̱v da.
Currently Selected:
Taitus 2: driNT
Highlight
Copy
Compare
Share
Want to have your highlights saved across all your devices? Sign up or sign in
© Wycliffe Bible Translators, Inc. and © The Nigeria Bible Translation Trust 2019