An Filipi 3

Gabsa̱ m'ga̱u

1A̱n d'be̱se̱ kwe̱, hyaarene, em na c'za̱ngkta̱ rema̱n i nwaa neta̱n Kan Go̱mca̱n Kooye̱. A ta̱'m poo ge̱nvom no rihica̱ m baasin a̱m ge̱na̱vko no da. Baa no la, i gadgo. 2Gab na sasa a neta̱n naak ne, an rein ho̱d o̱m laag no. An zein az a za a na emaka noc s'ged da, a tu kum d'gwa̱a̱m da. 3I cinna la an rein a s'ged a m'ga̱u. An rein ta em c'hwiipsa̱ a̱n we̱sma̱n Hora̱md Na'Sila̱. An reina̱n c'ka̱ndi a̱n Ka̱risti Ye̱so. An zain ta̱m a̱n c'ka̱ndi a̱n rihica̱ c'nocurimu da.

4Go̱t la mi a̱m ci rina̱n ti de̱l be̱ a̱m em c'ka̱ndi a̱n rihica̱ c'nocurimu. Awaz noc el na̱m'he̱n az u ci rina̱n ti de̱l u em c'ka̱ndi a̱n rihica̱ c'nocurimu, a̱m hatk o.

5Am la̱vtin c'ya̱a̱r nu'maco, na emaka m s'geda. I mi kan Isra'ila. Goov Be̱nje̱mi, k'Yahude̱ va̱n ke̱ng. A na tana ga̱l s'giira, i mi k'Farisi. 6Za̱ks ri kwe̱ a̱n d'Yahude̱ de̱hne, i a̱m ryeesa a s'gab d'koba. A na can ta̱m baan gabma̱n giira, a nan kum ri d'reb baa ri da.#3:6 Go̱t ta̱m: YCCo 8:3; 22:4; 26:9-11. 7Rihica̱ m lain ta̱m he̱n kwe̱ az i u'kum baa ri, a̱m he̱nk ca̱ a̱nta̱ma̱ rihica̱n ka̱ka̱l rem Ka̱risti. 8Rina̱n pa̱tin ta̱m kwe̱, a̱m o̱mk c'rihi kwe̱ ca̱ sootk rihica̱n ka̱ka̱la̱ rema̱n naps Ka̱risti Ye̱so Kan buu ri. Napsa̱n lo hatk rihica̱n lo kwe̱ a̱n k'gwin. I rem ru a̱m robtin c'rihi kwe̱. A̱m o̱mk ta̱m ca̱ ho̱d k'biki, bat Ka̱risti tu soot u ri.

9A̱m to̱nk na gita̱ m a̱n gabs Ka̱risti. Za kan gela̱v Na'Sil rema̱n gaba̱m giiras Mosa da. I a̱m soot kan gela̱v Na'Sil rema̱n bata̱m d'ba̱t baa Ka̱risti. 10A̱m to̱nk a̱m nap Ka̱risti a we̱sma̱n po̱to̱so̱in o no. A̱m ryaa d'kob ho̱d ru. A̱m wa̱a̱ ta̱m ho̱d u utini. 11I bat mi lan ba̱ri, ho̱da̱na̱n ti emata kwe̱, a̱m po̱t ho̱d ru.

Baaku

12A̱m ta laa na̱m'ze az a̱m baask a̱m atka alla az i mi malmal da. A̱m laa a̱n c'ma̱d bat ta̱'m em rina̱n de̱lin Ye̱so Ka̱risti po̱gto̱ m baa ru. 13Hyaarene, a̱m ta o̱m hid ri ho̱d kan baasin u atk da. Rihi i'da̱nka̱ la m rein ta̱'m ema, a ta̱'m hav a̱n bakasama̱n rihica̱n to̱in da. I a̱m kaa d'hi a̱n hoba̱n rihica̱n rein a̱n hwici. 14A̱m padk a'cuu a̱n hoba̱n gambauna̱n Sila po̱gin m a̱m kaba. Un rein po̱tu d'kal a̱nz na'con rem Ka̱risti Ye̱so.

15Cinnananan ko̱grin kwe̱, i ge̱be̱ske̱ na ci goon de̱bca̱ hna. Awaz la keka̱bs no vodk a̱n rihic hyan, Sila ta ba̱tksa̱ no ca̱nca. 16Rihi i'da̱nka̱ la, va̱na̱n na baasin na ceka, a na vaak la dim da.

17Hyaarene, gabese na an gabesein me. Em na la̱a̱s baa an reina̱n c'nocurimu ho̱da̱na̱n c kwesatain no. 18Ho̱da̱na̱n m gostin ta̱'m ve̱ce̱ no, a̱m el ta̱m a̱n sudma̱n ve̱ce̱m no ta̱'m o̱nuzo. Az neta̱n el hwe̱di an nocurimuc na̱ kwesain c'ha̱l a̱n rina̱n de̱lin Ka̱risti ut a̱n cona k'kan. 19Be̱se̱d na̱, i wa̱a̱'a d'kala. I ba̱ta̱d na̱ a̱n rein Sila na̱. A el ta̱m a̱n c'ka̱ndi a̱n rihica̱ m'e̱n. A savk de̱bc na̱ baan rihica̱n copun yanda̱hna. 20Cinna la, i a na'cona. Na el ta̱m a̱n valma̱n vaakam ka d'gwa̱a̱ma̱ lanma̱n a̱n'a. Un rein Kan buu cinna, Ye̱so Ka̱risti. 21Rema̱n i we̱sma̱n Ka̱risti ciin ma̱n-ma̱n de̱l u vaakta c'rihi kwe̱ a̱n go̱mc ru. Ma̱n de̱l ta̱m u vodasa we̱du cinna un zattin k'gwin da, u vaak ho̱da̱n we̱du ru u k'gwin.

Currently Selected:

An Filipi 3: driNT

Highlight

Copy