An Filipi 2

Kalasa na d'hi ho̱d Ka̱risti

1Awaz gabma̱n Ka̱risti swidiki no m'we̱s a̱n nocurimuc no. Awaz to̱nc ru la̱ta̱ska̱ ta̱m no c'de̱be̱. Awaz Hora̱md Na'Sil el baa no. Awaz a̱n ci de̱bca̱n se̱e̱te̱m hyannano a m'za̱i ne. 2De̱l na kaa m sud c'za̱ngkta̱ hwe̱di baan swe̱e̱ma̱n hid no d'baa d'da̱n. A̱n to̱n ta̱m hyannanon. A̱n soot ta̱m c'de̱b c da̱n. A̱n keka̱b ta̱m ri da̱nka̱. 3An em la rihi rema̱n a̱n guba̱sta̱ hid no alla a̱n em ka̱ndica̱n ka̱ka̱l da. Kalasa na hid no a̱n o̱m ta̱m az ahyan pa̱tk no. 4A koowe̱ wass la a̱n rihic ru c'taa da. Lag u wass ta̱m a rihic hyaaro no. 5Lag na de̱bc no soot ho̱da̱n de̱bc Ka̱risti Ye̱so.

6Ye̱so i A'Sila̱.

Go̱t ge̱ u napk az i unwa A'Sila̱,

u ta o̱m la e rihi da.

7U kalaska hid ru ho̱d coko,

daav u o̱mtin we̱du c'nocurimu ho̱d cinna.

8Au o̱mtin la we̱du c'nocurimu,

u kalaska hid ru.

U gabk ta̱m rina̱n Sila zeine.

I cek o na'wa̱a̱ a̱n cona k'kan.

9I rina̱n de̱lin bo̱ Sila ne̱e̱t o bo̱o̱d so̱dk kwe̱.

A ne̱e̱k ta̱m o dinda̱n hattin kooye̱ dinda a̱n k'gwin.

10Bat a na tana dind Ye̱so,

kooye̱ a̱n rein a̱nmi na'cona,

a mi nu'cop no alla a̱n copun yanda̱hna,

ti hyaa a̱n c'rwin.

11Koowe̱ tu vat ta̱m a̱n nwa̱a̱'a ru,

az i Ye̱so Ka̱risti a̱n rein Kan Go̱mca̱n Kooye̱.

Bat A'Sil K'Ceto ta kum k'gwin.

D'Za̱n a̱n copun yanda̱hna

12Hyaaren am rein ta̱'m to̱no̱. Ho̱da̱na̱n vetastain ta̱n gab lalk ri, za az i rema̱n a̱m el baa no c'taa da. A̱m to̱nk a̱n ryaa hwic a̱n gabma̱n lalk ri, am zain baa no da. Ryaa na hwic na'yomk a̱n hob d'gwa̱a̱ma̱. A̱n hongma̱n gela̱v Na'Sila̱. 13Rema̱n i Silan rein ta de̱l no ta̱n to̱nte, a̱n em ta̱m rina̱n ti pusa̱sa̱ na̱ c'de̱be̱.

14Em na kooye̱ za a̱n s'remrem a s'lana̱n da. 15I bat ta̱n soot an zattin ri d'reb da. An na zain a̱n bo̱p a̱n d'ko̱t da. Akna Na'Sil ta̱ma̱. An an daava̱ ha̱n an de̱bc naak ta̱m c celke, a ta kum ko̱tda̱n ta bo̱pt no a̱n da̱nda da. A̱n el ta̱m baa na̱ ho̱da̱n kebna d'za̱n. 16Bo̱p na lalksa̱ d'gwa̱a̱m ke̱kk, d'ba̱t d'da̱n. Bat ta̱'m em c'ka̱ndi a̱n nwaa a̱n hweda̱n vaakam Ka̱risti, az yomka ri ta soot ka̱ka̱l da.

17Awaz nan hwaa m na pad hiba̱m ri ho̱da̱n sak rema̱n ba̱sda̱n kasi lalko. Na swidisi baan sak no un bata̱m d'ba̱t a cokma̱n reina̱n emam Na'Sila̱. A̱m el a̱n pusu c'de̱be̱. Ta̱'m em ta̱m c'za̱ngkta̱ a nwaa na. 18I ho̱da̱n lo bo̱ ta̱m i ge̱be̱ste̱in a̱n em pusuu c'de̱be̱, a̱n em ta̱m c'za̱ngkta̱ d'kutu a mi ni.

Timoti na Eparoditus

19A Kanubu Ye̱so Ka̱risti se̱se̱, ta̱'m como Timoti baa no za na̱m'gos da. I bat ta̱'m hong ho̱da̱na̱n a̱n retine, de̱bc ri la̱tti. 20A̱m zatta noc hyan ho̱d ru un reina̱n to̱nca̱n hongun ke̱md no da. 21Rema̱n ahyan, i hid na̱ c'taa a wasstine. Za da̱n Ye̱so Ka̱risti da. 22Nwaa la a̱n napk ho̱da̱na̱n Timoti citin d'se̱e̱te̱. Rema̱n ho̱da̱na̱n waa tu se̱e̱tte̱ ceto, c emk cokma̱n ba̱sda̱n kasi lalk cwan c na̱. 23Ta̱'m como o za na̱m'gos da a̱m napt ho̱da̱na̱n rihic soottine. 24A Kanubu Ye̱so se̱se̱, mi a̱n hid ri, za na̱m'gos da, ta̱'m hau baa no.

25A̱m he̱nk i ge̱be̱ske̱ a̱m lago Eparoditus u vaako baa no. Hyaare kanayomk ho̱d k'koolo, un comain u se̱e̱tte̱ me. 26U to̱nk hwe̱di u he̱n no. Rem i gagk o d'hi az a̱n hongk az u ta ci m'ho̱o̱ka̱n da. 27I m'ga̱u la. U la̱tk gaago, u lak wa wa̱a̱. Sila hongk la za̱im ru. Za unwa la c'taa da. I a min ta̱ma̱. Rema̱n a gedkske m naam c'de̱b hwe̱di. 28Rema̱n taanlo, a̱m to̱nk hwe̱di a̱m lago o u vaako baa no. I bat ta̱n he̱n o, rema̱n a̱n em c'za̱ngkta̱. Mi ta̱m ti la̱ta̱sa̱ m c'de̱be̱.

29Marsa na o a̱n c'za̱ngkta̱ i kasi. A̱n ne̱e̱ o ta̱m k'gwin ho̱d i ge̱be̱ste̱in na ema goon na̱nna, rem Kan Go̱mca̱n Kooye̱. 30Ne̱e̱ na o k'gwin. Rem u lak wa wa̱a̱ rema̱n yomka Ka̱risti. I ta ad la o da. U getk cuusa̱n eel u emata m se̱e̱te̱da̱n a̱n zain a̱n la̱a̱ma̱n ema m ri da.

Currently Selected:

An Filipi 2: driNT

Highlight

Copy