Yakub 3
3
La̱a̱ nwa̱a̱'a rovo
1Hyaarene, za nwaa kwe̱ a̱n ta̱n hob a̱n soot an la̱a̱sa̱m na lalks Na'Sil da. Rema̱n a̱n napk az nan buka pa̱t a̱n vena̱m an la̱a̱sa̱m na lalks Na'Sila̱. 2Koowe̱ el tu habs a̱n c'rihi hwe̱di. A noc la̱a̱ la kaamsma̱n nwa̱a̱'a ru, o̱pun lo zatta ri d'reb da. Tu la̱a̱ ta̱m kaamsma̱n hid ru.
3Na la nan de̱le̱ do̱k k'kobo na'nwa̱a̱ rem na gabtt o le̱va̱n na to̱ntine. 4Go̱t na ta̱m ho̱da̱n bumbka̱ m'ho̱o̱ retine. Go̱t ge̱ i k'damra hwe̱di, go̱t ta̱m c'e̱n a̱n cukma̱n ka̱n. I ni rihi la i reke a̱n kanucuk retin tu cuk ka̱ ga̱la̱n u to̱ntin az k noka. 5I ho̱da̱n lo bo̱ a̱n nwa̱a̱'a noc retine. Go̱t ge̱ i rihi i reke nu'we̱de̱, a el la ta em c'e̱wbe̱. Go̱t na ta̱m ho̱da̱n ka̱ngin hwela retin ti tokst damra k'kade. 6Nwa̱a̱'a noc i ho̱da̱n hwela. I na̱nna a̱n rein sakada̱ v'dum a̱n we̱du noco. Ta ko̱pso̱ noco, a de̱l ta̱m o a̱n hwela. I wa̱a̱ka̱n hwela la a̱n ka̱n buka toks na̱.
7Nocurimu la̱a̱k kaamsma̱n kooye̱ goon rinna d'kad na, nemna, oba̱lna a rinnanan rein a̱nmi m'saan kwe̱. 8Noc za la un la̱in kaamsma̱n nwa̱a̱'a ru da. Nwa̱a̱'a el a m'laba̱n ho̱d obla. A ta la̱a̱ ta̱m a̱n soot bodo da.
9I na'nwa̱a̱ a̱n na retin nan bo̱m Kan Go̱mca̱n Kooye̱, K'Ceto. I a̱n na̱nna ta̱m a̱n na retin nan rebga̱l netnanan Sila balin a̱n hyo̱o̱m na̱.#3:9 Go̱t ta̱m: D'Tak 1:26. 10I a̱n k'nwa̱a̱ k'da̱nka̱ a̱n na retin nan bo̱m A'Sila̱, na em ta̱m c'rebo. Hyaarene, i ta ge̱be̱se̱ taanl da. 11Nan kum dwa̱a̱da̱n da̱n o̱no̱ ho̱o̱m kasi a ma̱ m'lad ne? 12Hyaarene, ceun remba tu mat yaanin ceun o̱lif alla bar mat m'remba? I ho̱da̱n lo bo̱ ta̱ma̱, ho̱o̱m kasin a ma̱ m'lada̱n a ta̱m o̱no̱ d'dwa̱a̱ d'da̱n da.
Versa̱ m'ga̱u lan baa Na'Sila̱
13Iwe̱ a̱n rein ka s'ver a u'ke̱e̱se̱n baa no? Lag u kwesa vers ru a̱n emma̱n rihic kasi a̱n nocurimuc ru. A̱n kalasam d'hi ho̱da̱na̱n vers kwesatain o. 14Awaz la a̱n ci d'hyubu da̱ rork a̱n de̱bc no a to̱nca̱ d'hi ni, an to̱o̱ la a̱n c'ka̱ndi alla a̱n ha̱l m'ga̱u da. 15Goon versa̱n lo za lanma̱n baa Na'Sil da. I sa̱n copun yanda̱hna. Sa̱ zatta hora̱md Na'Sil da. Sa̱ lan baa A̱krimu. 16Va̱na̱n hyubud rein a to̱nca̱ d'hi ni, nan gita̱ d'naase, a kooye̱ rihic naak ca na.
17Versa̱n rwa̱in la lanma̱n baa Na'Sila̱, na̱m'e̱te̱, sa̱ zatta ri d'reb da. Sa̱n de̱l noc to̱n la̱ta̱m c'de̱be̱. Sa̱n de̱l noc se̱e̱te̱ hyaaro. Sa̱n de̱l noc ne̱e̱ hyaaron k'gwin. Sa̱n de̱l noc hong za̱im ahyan hwe̱di. Sa̱n de̱l ta̱m noc a̱n emma̱n rihic c'kasi. Sa̱ zatta m'ka̱a̱ka̱n alla c'mootamoo da. 18An rein ta se̱e̱pse̱ netna a em ta̱m rihica̱n ca̱n san la̱ta̱m c'de̱be̱, ta de̱l neta̱n hwe̱di a soot an gela̱v Na'Sila̱.
Currently Selected:
Yakub 3: driNT
Highlight
Copy
Compare
Share
Want to have your highlights saved across all your devices? Sign up or sign in
© Wycliffe Bible Translators, Inc. and © The Nigeria Bible Translation Trust 2019