Yakub 2
2
An ka̱a̱ka̱nsi la neta̱n da
1Hyaarene, ai retin a̱n batk d'ba̱t baa Ye̱so Ka̱risti, ka k'gwin ta̱m Kan Go̱mca̱n Kooye̱, an em la ta̱n ka̱a̱ka̱nsi neta̱n da. 2Lag na ze az noc uvka̱ baan merad no a kwantva̱n zo̱n a kusa̱m kasin a'to̱po̱, kobnoc uva̱ la ba̱ru a kusa̱m sa̱tma̱lk ni. 3An marssa kan to̱po̱in kusi kasi, a̱n ne̱e̱ o k'gwin, a̱n ze o, “Soot taha̱n a̱n baad kasi.” A̱n ze kaa kobnoco, “Esa a̱nzu.” Alla “Soot nu'copo.” 4A̱n ta kwesa bo̱ c'ka̱a̱ka̱nsi baa no da? A̱n sootk ta̱m an gedma̱n lalk a̱n keka̱bs naak da?
5Hyaaren am reina̱n c'to̱n hwe̱di, gan na u'con: Sila ta dag ha̱n ho kobneta̱n a soot an bata̱m d'ba̱t baa na̱, a kum ta̱m go̱mc Na'Sil ca̱n Sila zein az ta ne̱e̱ an to̱nin na̱ da? 6Nwaa la a̱n gink kobnetna. Za ho a nu'kum a̱n rein ta hitksa̱ no da? Za na̱nna ta̱m a̱n rein ta sav no baan ka̱bda̱n gedma̱n lalk da? 7Za na̱nna ta̱m a̱n rein ta ela̱vso Ye̱so ka k'gwin, un rein kan buu no da?
8Awaz a̱n gabk giira so̱dk kwe̱ ho̱da̱na̱n na ge̱ntin a̱n ge̱nsa̱n lalks Na'Sila̱, “To̱n hyaara̱v ho̱da̱n hid rovo,” a̱n emk i kasi.#2:8 Go̱t ta̱m: Ggdk 19:18. 9An ka̱a̱ka̱nsi la netna, a̱n ko̱tko̱. Nan geda no ta̱m lalk az a̱n pask giira. 10Rema̱n koowe̱ a̱n gabin s'giira kwe̱ u ka̱lt kaa uda̱nka̱, u pask sa̱ kwe̱. 11Kan zeine, “Av em la d'o̱m da.” I unwa ta̱m a̱n zeine, “Av hwaa la noc da.” Av ta em d'o̱m da, a̱v hwaa kaa noco, a̱v pask giira.#2:11 Go̱t ta̱m: U'Rwa̱ 20:13,14; Rsgi 5:17,18. 12Kooye̱ a̱n ta̱n ema, kooye̱ ta̱m a̱n ta̱n vata, bakasa na az nan geda no lalk a̱n d'hwen. I ho̱da̱na̱n giirauna̱n rutin na m'cok vattine. 13Rema̱n koowe̱ a̱n zain tu kwisi na da, a nan buka kwisi la o baan gedma̱n lalk da. Kwisid pa̱tk la gedma̱n lalko.
Bata̱m d'ba̱t a u'em no
14Hyaarene, i'le̱e̱le̱ bo̱ kaa a̱n noc tu zet az u batk d'ba̱t baa Na'Sila̱? U za la kaa a̱n emma̱n rina̱n Sila zein da? Goon batma̱n ba̱tda̱n lo da̱n gwa̱a̱ bo̱ kaa o? 15Av nap az hyaara̱v zatta ri nu'to̱p alla c'ryaak da, 16a̱v zeuz o, “Caa bo̱ m'ho̱o̱kno̱. Sila ne̱e̱ v ri nu'to̱p a c'ryaak no,” a̱v ta ne̱e̱ la o rina̱n u to̱nin a̱n c'nocurimu da. Iye̱ bo̱ kaa v emine? 17I ho̱d da̱n. Av bat d'ba̱t baa Na'Sil a̱v ta em kaa rina̱n Sila zein da, batma̱n ba̱tda̱n lo, i da̱n ka̱ka̱la̱.
18Noc hyan tu la̱a̱ a̱n ze, “A̱v batk d'ba̱t baa Na'Sila̱, mi la ba̱ri a̱m el ta̱'m em rina̱n Sila zeine.” Kwesa m batma̱n ba̱ta̱d rov baa Na'Sila̱, a̱v za la kaa a̱n emma̱n rina̱n Sila zein da. Mi la ta̱'m kwesa v batma̱n ba̱ta̱d ri baa Na'Sil a̱n rina̱n m rein nu'emo. 19A̱n kabk az i A'Sil a'da̱nka̱ an reine. Ii kasi. Rinnas'ce kabk ta̱m tan, a el ta̱m ta zap rema̱n gelk Na'Sila̱. 20Vo kippi. A̱v la na̱m'val az na kwesa v az bata̱m d'ba̱t baa Na'Sil a̱v ta em la rina̱n Sila zein da, az i ka̱ka̱li? 21Za rema̱n sakuna̱n ceta cinna Ibrahi se̱ke̱in A'Sil a̱n waav ru Isaaku, u kumtin d'le̱g baa Na'Sil da?#2:21 Go̱t ta̱m: D'Tak 22:1-14.
22A̱n he̱nk bo̱ kaa ho̱da̱na̱n batma̱n ba̱ta̱d ru baa Na'Sil d'kut a emma̱n rina̱n Sila zeina̱n, emtin a'yomk da? Emma̱n rina̱n Sila zein kwesaka bo̱ kaa az u batk d'ba̱t kwe̱ baa Na'Sila̱. 23Ge̱nsa̱n lalks Na'Sil esk bo̱ kaa sa̱n zein ne, “Ibrahi batk d'ba̱t baa Na'Sila̱. Sila le̱gk ta̱m o.” Sila po̱gk ta̱m o, “Barav ri.”#2:23 Go̱t ta̱m: D'Tak 15:6; Isa 41:8. 24A̱n he̱nk bo̱ kaa ho̱da̱na̱n noc tu kumt d'le̱g baa Na'Sil baan rina̱n tu ema, za rema̱n bata̱m d'ba̱t baa Na'Sil e̱ne̱ne̱ da.
25I ho̱da̱n lo bo̱ ta̱m a̱n Sila le̱gtin Rahab, neta zamse#2:25 I kan nan po̱g karuwa a̱n c'ko̱go̱. rema̱n rina̱n u emine. U cila̱ska̱ an taama̱n ganca̱m ni'le̱e̱, u ho̱tt ta̱m na̱ a̱n le̱vk hyan a gyiiti.#2:25 Go̱t ta̱m: Jo̱s 2:1-21.
26Ho̱da̱na̱n we̱duna̱n zattin s'hob da retin i d'wa̱a̱, i ho̱da̱n lo bo̱ ta̱m a̱n bata̱m d'ba̱t baa Na'Sila̱, za a̱n emma̱n rina̱n Sila zein da, retin i ka̱ka̱la̱.
Currently Selected:
Yakub 2: driNT
Highlight
Copy
Compare
Share
Want to have your highlights saved across all your devices? Sign up or sign in
© Wycliffe Bible Translators, Inc. and © The Nigeria Bible Translation Trust 2019