2 Bitrus 3
3
Kan Go̱mca̱n Kooye̱ tu vaaka
1Hyaarene, i taka̱llaka̱ v'illa̱ ha̱n ka̱ m ge̱nvoin no. A̱m ge̱nvo-ge̱nvo no ca̱nca kwe̱ c'il rem a̱m bakasa no, a̱m o̱bo̱so̱ ta̱m de̱bc no kwe̱, a̱n em keka̱bs kasi. 2A̱m to̱nk az a̱n bakasa lalksa̱n baranc Na'Sil an zattin ri d'reb da vatin de̱ha̱nzo. Bakasa na ta̱m giirauna̱n Kanubu a Kan Gwa̱a̱ma̱d cinnan nesin comta̱nc ru a ve̱ce̱ no. 3Rina̱n pa̱tin kwe̱, nap na az a̱n hweca̱ d'be̱se̱, a c'hyaaka ta noka. Ta hyaak no, a gab ta̱m rihic naak ca̱n de̱bc na̱ to̱nine.
4Ta ze, “I nama kaa a̱n tu vaaka ho̱da̱na̱n u gigtin lalko? Lanma̱n hwec ceta cinna canma̱n a̱nta̱ma̱, v'daa ge̱ rihic ta vod ho̱da̱na̱n c latin lanma̱n takboda̱n copun yanda̱ha̱n da.” 5Hwec kaak la na̱ a̱n d'to̱nke, az i Silan emin a'con a̱n vatu na'nwa̱a̱. A bala ta̱m copun yanda̱ha̱n lanma̱ m'ho̱o̱. A de̱lk ta̱m ho̱o̱m rigk copune kwe̱ de̱ha̱nzo.#3:5 Go̱t ta̱m: D'Tak 1:6-9. 6I na̱m'ho̱o̱ ta̱m a̱n Sila baatin a hwaa goova̱n copun yanda̱ha̱n kwe̱.#3:6 Go̱t ta̱m: D'Tak 7:11. 7I lalks Na'Sil a̱n de̱lin a'con a copun yanda̱ha̱n retin v'daa, rema̱n i caa hweda̱ d'be̱se̱. Na dwaat kaa an zain ta gel A'Sil da a̱n hwela.
8Hyaaren an ta̱'m to̱no̱, a hwec kaa la no ri ha̱n da. D'Hwe d'da̱n baa Kan Go̱mca̱n Kooye̱, i ho̱d s'we̱e̱ v'kwe̱re̱. S'We̱e̱ v'kwe̱re̱ ta̱ma̱, i ho̱d d'hwe d'da̱n baa na̱.#3:8 Go̱t ta̱m: Zab 90:4. 9Kan Go̱mca̱n Kooye̱ za he̱re̱re̱ baan emma̱n rina̱n u zein az tu em ho̱da̱na̱n ahyan retin nu'he̱n da. U laa a̱n gaga̱m c'de̱b a nwaa na. Rema̱n wa to̱n az noc wa̱a̱ buka da. U to̱nk az koowe̱ han u bita̱l c'hwin u lag c'ko̱to.
10Hweda̱n vaakam Kan Go̱mca̱n Kooye̱ ti soot m'ze̱se̱ ho̱da̱n hanm hivi. Nan hong damra d'gudg a'cona. Cona ta yangse. Sila ta toks rihica̱n rein a̱nmin kwe̱. Sila ta ba̱tksa̱ ta̱m rihica̱n rein a̱nmin copun yanda̱hna. Ta a̱da̱sa̱ ta̱m rihica̱n neta̱n emka̱llin kwe̱.
11Ai retin bo̱ kaa nan dwaa rihica̱ ha̱n kwe̱ ho̱d uhna, iye̱ goon netna na i ge̱be̱se̱in a̱n soota? I ge̱be̱ske̱ a̱n em nocurimuca̱n zattin ri d'reb da a̱n gela̱v Na'Sila̱. 12A̱n val ta̱m hweda̱n Sila ta gedata koowe̱ lalko, a̱n to̱nma̱n hweda̱n lo can hyat-hyatte. I a̱n hweda̱n lo a̱n nan tokst a'con a̱n hwelana. Rihica̱n rein a̱nmin kwe̱, ca̱n ya̱ga̱. 13Rema̱n gigma̱n lalk Na'Sila̱, na el a̱n la̱gsa̱m a'con a copun yanda̱ha̱n a pouna̱. Va̱na̱n nan boro a̱n emma̱ m'ga̱u.#3:13 Go̱t ta̱m: Isa 65:17; 66:22; YYoh 21:1.
14Rema̱n taanlo, hyaarene, ai retin a̱n el a̱n la̱gsma̱n rihica̱ hna, kaa na d'hi a̱n soot an zattin c'ko̱pto̱ alla ri d'reba̱n da, de̱bc la̱t no ta̱m a unwa na. 15Kin na ta̱m a̱n de̱bc no az gagma̱n de̱bc Kan Go̱mca̱n Kooye̱ ti ne̱e̱ neta̱n d'ke̱e̱ a hobt d'gwa̱a̱ma̱. I ho̱da̱na̱n hyanna cinna Bulus ge̱na̱vtoin no a̱n versa̱n Sila ne̱in o.
16I ho̱da̱n lo bo̱ ta̱m u ge̱ntin a̱nmin taka̱llac ru kwe̱ tu tana rihica̱ hna. Taka̱llac ru ci rihic hyan ca̱n ciin kobd nu'ke̱e̱se̱. An robin s'nap a a nu'hevke-hevken vodaska la ca̱. I ho̱d a retin ta vodasa ge̱nsa̱n lalks Na'Sil s hyan. Ti cet la na̱ a̱n wa̱a̱'a d'kal-d'kala.
17Rema̱n taanlo, hyaarene, ai retin a̱n baask a̱n napk rihica̱ ha̱n kwe̱, gab na sasa. An lag la habsa̱d neta̱n an zain ta gab s'giira da, da̱ yangs no da. I caa a̱n lag baada̱ m'ga̱u va̱na̱n a̱n rein da. 18Ryaa na hwic a̱n sooca̱d nu'pusu a naps Kan buu cinna a Ka d'gwa̱a̱ma̱, Ye̱so Ka̱risti ni. I unwa a̱n nan ne̱e̱ k'gwin a̱nta̱ma̱ a d'kal-d'kal na. A̱nha̱a̱n.
© Wycliffe Bible Translators, Inc. and © The Nigeria Bible Translation Trust 2019