2 An Korinti 2
2
1I rina̱n de̱lin bo̱ a̱m kigt a̱n de̱bc ri az a ta̱'m hau ta̱m baa no a̱m naas no c'de̱b da. 2Rema̱n awaz a̱m naask no c'de̱be̱, iwe̱ a̱n tu pusa̱sa̱ m c'de̱be̱? Za nwaananan m naasin c'de̱b da? 3A̱m ge̱no-ge̱no rihica̱ ha̱n rema̱n am cau la baa no a̱n kwesa m naam c'de̱b da. Nwaananan ge̱be̱se̱in a̱n pusa̱sa̱ m c'de̱be̱. A̱m dak d'gen az awaz de̱bc pusuku me, nwaa kwe̱ ta̱n em c'za̱ngkta̱. 4I a̱n naam c'de̱b hwe̱di, c'is palpal, a̱m ge̱na̱vtoin no taka̱llaka̱n lo. Za rema̱n a̱m naast no c'de̱b da, i a̱n napt ho̱da̱na̱n m retina̱n to̱nc no hwe̱di.
Kwisim kan ko̱tine
5Ai retin noc el baa no un emin rina̱n naasin na c'de̱be̱, za mi v'da̱n u naasin c'de̱b da, i cinna kwe̱. A̱m ta to̱n ta̱m a̱m sud a̱n de̱me̱ no da. 6Venuna̱n neta̱n ga̱l so̱dk baa no emain o, i ma̱a̱nka̱. 7A̱nta̱ma̱, i pa̱tk a̱n d'ke̱m a̱n kwisi o, a̱n la̱ta̱sa̱ ta̱m o c'de̱be̱. A za taanl da, a naam c'de̱b pa̱t o hwe̱di, tu lag gabs Ka̱risti. 8Rema̱n taanlo, a̱m el a̱n kons no a̱n kwesa o az a̱n el v'daa a̱n to̱nc ru. 9A̱m ge̱nvo-ge̱nvo ta̱m no rema̱n a̱m maakt no, bat ta̱'m nap awaz a̱n el ta̱n gab lalk kooye̱ daava.
10An kwisi nocun lo, mi la ba̱ri a̱m kwisiki o. Koowe̱ m kwisiini, awaz rihi el in nan ema noc d'kwisi, a̱m kwisiki o rem no, a̱n we̱sma̱n Ka̱risti ne̱in me. 11Rema̱n a A̱krimu pa̱t la cinna a̱n s'ver da. Na napk ho̱da̱n ha̱gca ru kwe̱.
De̱bc ta la̱t Bulus da
12Daava̱n m havtin Trowas a̱m ba̱sk kasi lalks Ka̱risti, Kan Go̱mca̱n Kooye̱ a̱ba̱ska̱ m d'haka. 13De̱bc ta la̱t la m da rema̱n a̱m ta he̱n hyaare Taitus da. A̱m lagt bo̱ na̱, a̱m to̱o̱k a̱m hav copun Makidoniya a̱n hob ru.
We̱sma̱n ryaam d'gaago
14C'Bo̱m baa Na'Sil an rein ta de̱l na kooye̱ daava na ryaa d'gaag rem Ka̱risti. Sila emk a'yomk a̱n cinna a ba̱rga̱sta̱ naps Ka̱risti koope̱, ho̱da̱n kos d'ha̱ng retin da̱n ga̱ma̱nna̱. 15C sootk na ho̱da̱n ri d'ha̱ng da̱n Ka̱risti se̱ke̱in A'Sila̱. Da̱n ga̱ma̱nna̱in baa an na gwa̱ini a baa an ta wa̱a̱n d'kala. 16Baa an rein la a̱n hora̱mca̱d na'wa̱a̱, ha̱ngda̱n lo i kos na'wa̱a̱, da̱n ta̱d san ta̱m a'wa̱a̱. An na gwa̱in la ba̱na̱, ha̱ngda̱n lo i u'po̱to, da̱n ta̱d san ta̱m u'po̱to. Iwe̱ bo̱ kaa a̱n tu hweks a̱n em yomka hna? 17Za rema̱n kind ho̱d ahyan a̱c retina̱n ba̱sda̱n kasi lalk da. C la-la a̱n ba̱sda̱n kasi lalk Na'Sil na̱m'ga̱u rema̱n i Silan comain co, a el ta̱m a̱n he̱na̱m co.
Currently Selected:
2 An Korinti 2: driNT
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. and © The Nigeria Bible Translation Trust 2019
2 An Korinti 2
2
1I rina̱n de̱lin bo̱ a̱m kigt a̱n de̱bc ri az a ta̱'m hau ta̱m baa no a̱m naas no c'de̱b da. 2Rema̱n awaz a̱m naask no c'de̱be̱, iwe̱ a̱n tu pusa̱sa̱ m c'de̱be̱? Za nwaananan m naasin c'de̱b da? 3A̱m ge̱no-ge̱no rihica̱ ha̱n rema̱n am cau la baa no a̱n kwesa m naam c'de̱b da. Nwaananan ge̱be̱se̱in a̱n pusa̱sa̱ m c'de̱be̱. A̱m dak d'gen az awaz de̱bc pusuku me, nwaa kwe̱ ta̱n em c'za̱ngkta̱. 4I a̱n naam c'de̱b hwe̱di, c'is palpal, a̱m ge̱na̱vtoin no taka̱llaka̱n lo. Za rema̱n a̱m naast no c'de̱b da, i a̱n napt ho̱da̱na̱n m retina̱n to̱nc no hwe̱di.
Kwisim kan ko̱tine
5Ai retin noc el baa no un emin rina̱n naasin na c'de̱be̱, za mi v'da̱n u naasin c'de̱b da, i cinna kwe̱. A̱m ta to̱n ta̱m a̱m sud a̱n de̱me̱ no da. 6Venuna̱n neta̱n ga̱l so̱dk baa no emain o, i ma̱a̱nka̱. 7A̱nta̱ma̱, i pa̱tk a̱n d'ke̱m a̱n kwisi o, a̱n la̱ta̱sa̱ ta̱m o c'de̱be̱. A za taanl da, a naam c'de̱b pa̱t o hwe̱di, tu lag gabs Ka̱risti. 8Rema̱n taanlo, a̱m el a̱n kons no a̱n kwesa o az a̱n el v'daa a̱n to̱nc ru. 9A̱m ge̱nvo-ge̱nvo ta̱m no rema̱n a̱m maakt no, bat ta̱'m nap awaz a̱n el ta̱n gab lalk kooye̱ daava.
10An kwisi nocun lo, mi la ba̱ri a̱m kwisiki o. Koowe̱ m kwisiini, awaz rihi el in nan ema noc d'kwisi, a̱m kwisiki o rem no, a̱n we̱sma̱n Ka̱risti ne̱in me. 11Rema̱n a A̱krimu pa̱t la cinna a̱n s'ver da. Na napk ho̱da̱n ha̱gca ru kwe̱.
De̱bc ta la̱t Bulus da
12Daava̱n m havtin Trowas a̱m ba̱sk kasi lalks Ka̱risti, Kan Go̱mca̱n Kooye̱ a̱ba̱ska̱ m d'haka. 13De̱bc ta la̱t la m da rema̱n a̱m ta he̱n hyaare Taitus da. A̱m lagt bo̱ na̱, a̱m to̱o̱k a̱m hav copun Makidoniya a̱n hob ru.
We̱sma̱n ryaam d'gaago
14C'Bo̱m baa Na'Sil an rein ta de̱l na kooye̱ daava na ryaa d'gaag rem Ka̱risti. Sila emk a'yomk a̱n cinna a ba̱rga̱sta̱ naps Ka̱risti koope̱, ho̱da̱n kos d'ha̱ng retin da̱n ga̱ma̱nna̱. 15C sootk na ho̱da̱n ri d'ha̱ng da̱n Ka̱risti se̱ke̱in A'Sila̱. Da̱n ga̱ma̱nna̱in baa an na gwa̱ini a baa an ta wa̱a̱n d'kala. 16Baa an rein la a̱n hora̱mca̱d na'wa̱a̱, ha̱ngda̱n lo i kos na'wa̱a̱, da̱n ta̱d san ta̱m a'wa̱a̱. An na gwa̱in la ba̱na̱, ha̱ngda̱n lo i u'po̱to, da̱n ta̱d san ta̱m u'po̱to. Iwe̱ bo̱ kaa a̱n tu hweks a̱n em yomka hna? 17Za rema̱n kind ho̱d ahyan a̱c retina̱n ba̱sda̱n kasi lalk da. C la-la a̱n ba̱sda̱n kasi lalk Na'Sil na̱m'ga̱u rema̱n i Silan comain co, a el ta̱m a̱n he̱na̱m co.
Currently Selected:
:
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. and © The Nigeria Bible Translation Trust 2019