1 An Korinti 15
15
Lalkun po̱tu Ka̱risti
1Hyaarene, lag na a̱m bakasa no da̱n kasi lalkuna̱n m bisiin no. Un kabine, a̱n esk ta̱m s'naa s'il a̱n gabma̱n unwa. 2I rema̱n kasi lalkune a̱n kumtin d'gwa̱a̱ma̱, awaz a̱n kink rina̱n m bisiin no a̱n de̱bc no. An ta kin la da, batma̱n ba̱ta̱d no baa Na'Sil sootk rin ka̱ka̱la̱.
3A̱m kabka damran comuna̱n pa̱tin kwe̱. A̱m ve̱ce̱ke̱ no unwa honhon ho̱da̱na̱n m kabtain o. Comune, i az Ka̱risti uk rema̱n ko̱tc cinna, ho̱da̱na̱n i retin a'ge̱n a̱nmin ge̱nsa̱n lalks Na'Sila̱.#15:3 Go̱t ta̱m: Isa 53:5-12. 4Na sagk o. Sila po̱to̱sko̱ la o a̱n hweda̱ v'ta̱ccu, ho̱da̱na̱n i retin a'ge̱n a̱nmin ge̱nsa̱n lalks Na'Sila̱.#15:4 Go̱t ta̱m: Zab 16:8-10; Mat 12:40; YCCo 2:24-32. 5U he̱nske̱ Bitrus u'we̱de̱. U he̱nske̱ ta̱m c'comta̱n oopa ni'il nanlo u'we̱de̱.#15:5 Go̱t ta̱m: Luk 24:34; Mat 28:16-17; Mar 16:14; Luk 24:36; Yoh 20:19. 6An ta̱da̱n lo to̱o̱tin ta̱ma̱, u he̱nske̱ an gaba̱m ru a hatk s'za̱ngu s'tan u'we̱de̱. Ahyan hwe̱di baa na̱ el la v'daa. Ahyan baask la a uku. 7U he̱nske̱ ta̱m Yakub u'we̱de̱. U he̱nske̱ ta̱m c'comta̱n kwe̱ u'we̱de̱.
8A̱n d'be̱se̱ kwe̱, mi ta̱m u he̱nske̱ m u'we̱de̱. Miuna̱n rein ho̱d kan na matin daav ta caa da.#15:8 Go̱t ta̱m: YCCo 9:3-6. 9I miuna̱n rein u kalk kwe̱ baa comta̱nc Ye̱so. Ma hwenna be̱ az na po̱g a̱m k'comt da, go̱tma̱n ho̱da̱na̱n m ryeestain a s'gab d'koba. 10I rema̱n pusuu Na'Sil a̱m retin rina̱n m rein te̱nte̱. Pusuuna̱n Sila emain la me, u ta soot rin ka̱ka̱l da. Rema̱n a̱m hatk koowe̱ a̱n ba̱sma̱n kasi lalk Ye̱so. Za la mi a̱n emin da, i pusuuna̱n Sila emain me. 11Rema̱n taanlo, ai to̱n i mi alla comta̱nc hyan, i kasi lalk uda̱n a̱c biisin no. I a̱n unwa la a̱n battin d'ba̱ta̱.
Po̱to̱so̱m an wa̱ini
12Awaz na ba̱sk az Sila po̱to̱sko̱ Ka̱risti, i'le̱e̱le̱ a̱n ahyan baa no retin na̱m'ze az a na wa̱a̱, Sila a ta po̱to̱so̱ ta̱m na da?
13Awaz Sila a ta po̱to̱so̱ an wa̱in da, Ka̱risti ta po̱t bo̱ da. 14Awaz la Sila ta po̱to̱so̱ Ka̱risti da, ba̱sa̱d co i ka̱ka̱la̱. Batma̱n ba̱ta̱d no ta̱m baa Na'Sil i ka̱ka̱la̱. 15Rina̱n hatin la kwe̱, awabe̱ az Sila za ta po̱to̱so̱ an wa̱in ta̱m da, lawabe̱ ti soot az ca̱ emaka A'Sil c'ko̱lo̱. Ai retin ca̱ ba̱sk az Sila po̱to̱sko̱ Ye̱so. 16Awaz Sila za ta po̱to̱so̱ an wa̱in da, Sila ta po̱to̱so̱ bo̱ Ka̱risti da.
17Awaz la Sila ta po̱to̱so̱ Ka̱risti da, batma̱n ba̱ta̱d no baa Na'Sil sootk rin ka̱ka̱la̱. A̱n el ta̱m v'daa a c'ko̱to. 18Awaz i tan, an wa̱in ta̱m a̱n gabs Ka̱risti kwe̱, a yangk a d'naan a̱n d'hi. 19Awaz be̱ i a̱n nocurimuca̱ ha̱n c'taa a̱n na saktin u'con baa Ka̱risti, lak be̱ na pa̱tk neta̱n kwe̱ a̱n sootma̱n ri m'za̱i.
20Sila baask la a po̱to̱sko̱ Ka̱risti, kan a e̱tin u'po̱to̱so̱. 21Ai retin i lanma̱n baa noc a̱n wa̱a̱'a uvta̱in a̱n copun yanda̱hna, i ho̱da̱n lo bo̱ ta̱m a̱n po̱tu uvta̱in lanma̱n baa noco. 22Ho̱da̱na̱n neta̱n utin kwe̱ rem Ada̱mu, i ho̱da̱n lo bo̱ ta̱m a̱n Sila ta po̱to̱sto̱ neta̱n kwe̱ rem Ka̱risti. 23Koowe̱ ci la daav ru. I Ka̱risti a̱n Sila po̱to̱so̱in na̱m'e̱te̱. Sila ta po̱to̱so̱ neta̱n Ka̱risti daava̱n Ka̱risti vaaktaine. 24Daava̱n Ka̱risti ryaatin a c'go̱mo̱, a c'bo̱o̱ a m'we̱sa̱n kwe̱ a̱n d'gaago, u nes ta̱m A'Sil K'Ceto c'go̱mo̱, i a̱n daava̱n lo kaa a̱n be̱se̱d da̱n ceta.
25I ke̱ng Ka̱risti em c'go̱m i caa u pa̱t we̱sa̱m an ha̱lc ru.#15:25 Go̱t ta̱m: Zab 110:1. 26Kac'ha̱l u d'be̱se̱ un nan hwaa d'kala, i a'wa̱a̱. 27Lalks Na'Sil zeka, “Sila nesk o go̱mca̱n kooye̱.” An na zetin la “U nesk o go̱mca̱n kooye̱,” i kwesaka az Ka̱risti za a̱n go̱mc Sila nan nesin o go̱mca̱n kooye̱ da.#15:27 Go̱t ta̱m: Zab 8:6. 28Daava̱n Sila ta de̱lt kooye̱ i kwigti Waav na̱, i daava̱n lo la ba̱ru a̱n Waa a̱n hid ru tu kwigtti Sila nan nesin o go̱mca̱n kooye̱. Bat Sila ta em go̱mca̱ c'rihi kwe̱.
29Awaz Sila za ta po̱to̱so̱ an wa̱in da, i rema̱n ye̱ a̱n retin ta̱n ema neta̱n hyan baptisma rema̱n an wa̱in a̱n na uvt na emata na̱ baptisma da? Awaz Sila za ta po̱to̱so̱ an wa̱in da, iye̱ a̱n baptisma unlo tu swidi an wa̱in nane? 30I rema̱n ye̱ bo̱ kaa a̱n nan codt hid cinna kooye̱ daava? 31Ho̱da̱na̱n m naptin az a̱m el a̱n codma̱n hid ri kooye̱ daava, i ho̱da̱n lo bo̱ a̱m retina̱n c'ka̱ndi a̱n nwaa rema̱n rina̱n Ka̱risti Ye̱so Kan buu cinna emin a̱n nwaa. 32Awaz a̱m dumk d'gaag a rinna d'kad a̱n copun E̱fisu a̱m kwesata c'a̱rma̱, iye̱ bo̱ kaa a̱n ma kumu, awaz na za nan po̱to̱so̱ an wa̱in da? To̱ i,
“Lag na ryaak na so̱o̱,
rema̱n buk nan wa̱a̱.”#15:32 Go̱t ta̱m: Isa 22:13.
33An lag la na yangs no da, “Baran naak el ta naas noco.” 34I ge̱be̱ske̱ i gya̱n no a̱n lag c'ko̱to rema̱n ahyan baa no ta nap A'Sil da. A̱m vat-vat taanlo rema̱n a̱n hongt m'e̱n.
We̱du a̱n wa̱ini
35Noc tu la̱a̱ la a̱n ipka̱, “I ho̱da̱npe̱ a̱n nan po̱to̱sto̱ an wa̱ini?” Ta̱ma̱, “I a̱n ye̱ goon we̱dwa a̱n ta po̱tte?” 36Iye̱ goon kipma hna? Rina̱n v gwain kwe̱, a ti pota da, a za i baak a wa̱a̱ da. 37Rina̱n v gwain ta̱ma̱, za bebodan ta̱'v gwaa da, i v'yaana. Tade̱e̱da, i goon hii alla goon rihi hyan. 38I Silan rein ta vaaksa v'goo d'bebo, ho̱da̱na̱n a to̱ntine. Silan rein ta ne̱e̱ kooye̱ goon goova, bebod va̱.
39We̱du za goo v'da̱n da. We̱du neta̱nrima ello. We̱du rinnannutus ello. We̱du ge̱nna̱n ello. We̱du nema̱n el ta̱ma̱.
40Rihic na'con ci goon we̱du ca̱. Rihica̱n copun yanda̱ha̱n ci la goon we̱du ca̱. Gwinka̱n we̱dca̱n rein a'con vodk a ca̱n copun yanda̱ha̱n ne. 41Hwed ci za̱nd da̱. Pe̱e̱ti ci ta̱m za̱nd e. Keba̱n ci ta̱m za̱nd na̱. Keba̱n vodenke ta̱m a̱n d'za̱n.
42I ho̱da̱n lo bo̱ ta̱m a̱n ti soott baan po̱to̱so̱m an wa̱ini. We̱duna̱n na sagine, tu zugu. A na po̱to̱so̱ la o, a tu wa̱a̱ ta̱m da d'kala. 43Na sagk o a m'gin nu. Sila ta po̱to̱so̱ o a k'gwin ni. Na sagk o u kalke. Sila ta po̱to̱so̱ la o a m'we̱s ne̱. 44Na sagk o a̱n we̱du c'nocurimu. Sila ta po̱to̱so̱ la o a̱n we̱du d'hormo. Awaz we̱du c'nocurimu ello, we̱du d'hora̱m el la ta̱ma̱. 45I ho̱da̱n lo bo̱ i retin a'ge̱n a̱nmin lalks Na'Sila̱. Sa̱ zeka, “Ada̱mu, noc va̱ m'e̱t sootk noc u po̱tke.” Ada̱mu u d'be̱se̱ la, u sootk hora̱mda̱n da̱n po̱to̱so̱.#15:45 Go̱t ta̱m: D'Tak 2:7.
46Za la Ada̱mu u d'hora̱m a̱n hain na̱m'e̱t da, i Ada̱mu u c'nocurimu. Ada̱mu u d'hora̱m gaba kaa dima̱. 47Noc va̱ m'e̱t i kan copun yanda̱hna, i a̱n hwincan na emtin o. Noc u v'illa̱ la, i lanm na'cona. 48Ho̱da̱na̱n kan na main a̱n c'hwin retine, i ho̱da̱n lo bo̱ a̱n an copun yanda̱ha̱n retine. Ho̱da̱na̱n kan rwa̱in lanm na'con retine, i ho̱da̱n lo bo̱ ta̱m a̱n a na'con retine. 49Ho̱da̱na̱n na citin hyo̱o̱m nocuna̱n na emin a̱n c'hwin, i ho̱da̱n lo bo̱ ta̱m a̱n nan o̱mt hyo̱o̱m kan rwa̱in lanm na'cona.
50Hyaarene, go̱t ha̱n na rina̱n m rein nu'zeu. We̱du c'nocurimu a tu tak a̱n kum go̱mc Na'Sil da. I ho̱da̱n lo bo̱ ta̱ma̱, rina̱n ti zugu a ti tak a̱n kum rina̱n ti mal d'kal da.
51Go̱to̱, ta̱'m ve̱ce̱ no rihi ze̱ske̱. A nan wa̱a̱ kwe̱ da. Sila ta vodasa hyo̱o̱m cinna kwe̱ 52v'daa v'da̱n ho̱da̱n ge̱ptma̱n isa̱, a na hul kaaru d'be̱se̱. Daava̱n nan hult u'kaare, an wa̱in ta po̱to̱. A ta wa̱a̱ ta̱m da d'kala. Cinnananan ta wa̱in da, Sila ta vodasa hyo̱o̱m cinna kwe̱. 53I ke̱ng we̱duna̱n tu zugu, na vaaksa o we̱duna̱n zain tu zug da d'kala. We̱duna̱n tu wa̱a̱ na vaaksa o un tu mal d'kala. 54Daava̱n rina̱n ti zug vaaktin rina̱n zain ti zug da, in ti wa̱a̱ vaakk ta̱m rina̱n zain ti wa̱a̱ da, i daava̱n lo kaa a̱n rina̱n rein a'ge̱n a̱n lalks Na'Sil ti este. Sa̱ zeka, “Na ryaak a'wa̱a̱ d'gaago.”#15:54 Go̱t ta̱m: Isa 25:8.
55“A'Wa̱a̱, i pe̱ha̱n ryaama̱n gaaga̱d rovo?
A'Wa̱a̱! I pe̱ha̱n ta̱m laba̱m rovo?”#15:55 Go̱t ta̱m: Hos 13:14.
56Ko̱tcan rein laba̱m na'wa̱a̱. We̱sa̱m c'ko̱t la, i giira. 57C'Bo̱m la baa Na'Sil an de̱lin na ryaat d'gaag rem Ye̱so Ka̱risti, Kan Gomca̱n Kooye̱.
58Rema̱n taanlo, hyaaren an ta̱'m to̱n hwe̱di d'kala, es na s'naa s'ila̱. A rihi hevksa la no da. Nes na hid no kooye̱ daava rema̱n yomka Kan Go̱mca̱n Kooye̱. Rema̱n a̱n baask a̱n napk az coka̱m no rem Kan Go̱mca̱n Kooye̱, a ta̱m soot ka̱ka̱l da.
Currently Selected:
1 An Korinti 15: driNT
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. and © The Nigeria Bible Translation Trust 2019
1 An Korinti 15
15
Lalkun po̱tu Ka̱risti
1Hyaarene, lag na a̱m bakasa no da̱n kasi lalkuna̱n m bisiin no. Un kabine, a̱n esk ta̱m s'naa s'il a̱n gabma̱n unwa. 2I rema̱n kasi lalkune a̱n kumtin d'gwa̱a̱ma̱, awaz a̱n kink rina̱n m bisiin no a̱n de̱bc no. An ta kin la da, batma̱n ba̱ta̱d no baa Na'Sil sootk rin ka̱ka̱la̱.
3A̱m kabka damran comuna̱n pa̱tin kwe̱. A̱m ve̱ce̱ke̱ no unwa honhon ho̱da̱na̱n m kabtain o. Comune, i az Ka̱risti uk rema̱n ko̱tc cinna, ho̱da̱na̱n i retin a'ge̱n a̱nmin ge̱nsa̱n lalks Na'Sila̱.#15:3 Go̱t ta̱m: Isa 53:5-12. 4Na sagk o. Sila po̱to̱sko̱ la o a̱n hweda̱ v'ta̱ccu, ho̱da̱na̱n i retin a'ge̱n a̱nmin ge̱nsa̱n lalks Na'Sila̱.#15:4 Go̱t ta̱m: Zab 16:8-10; Mat 12:40; YCCo 2:24-32. 5U he̱nske̱ Bitrus u'we̱de̱. U he̱nske̱ ta̱m c'comta̱n oopa ni'il nanlo u'we̱de̱.#15:5 Go̱t ta̱m: Luk 24:34; Mat 28:16-17; Mar 16:14; Luk 24:36; Yoh 20:19. 6An ta̱da̱n lo to̱o̱tin ta̱ma̱, u he̱nske̱ an gaba̱m ru a hatk s'za̱ngu s'tan u'we̱de̱. Ahyan hwe̱di baa na̱ el la v'daa. Ahyan baask la a uku. 7U he̱nske̱ ta̱m Yakub u'we̱de̱. U he̱nske̱ ta̱m c'comta̱n kwe̱ u'we̱de̱.
8A̱n d'be̱se̱ kwe̱, mi ta̱m u he̱nske̱ m u'we̱de̱. Miuna̱n rein ho̱d kan na matin daav ta caa da.#15:8 Go̱t ta̱m: YCCo 9:3-6. 9I miuna̱n rein u kalk kwe̱ baa comta̱nc Ye̱so. Ma hwenna be̱ az na po̱g a̱m k'comt da, go̱tma̱n ho̱da̱na̱n m ryeestain a s'gab d'koba. 10I rema̱n pusuu Na'Sil a̱m retin rina̱n m rein te̱nte̱. Pusuuna̱n Sila emain la me, u ta soot rin ka̱ka̱l da. Rema̱n a̱m hatk koowe̱ a̱n ba̱sma̱n kasi lalk Ye̱so. Za la mi a̱n emin da, i pusuuna̱n Sila emain me. 11Rema̱n taanlo, ai to̱n i mi alla comta̱nc hyan, i kasi lalk uda̱n a̱c biisin no. I a̱n unwa la a̱n battin d'ba̱ta̱.
Po̱to̱so̱m an wa̱ini
12Awaz na ba̱sk az Sila po̱to̱sko̱ Ka̱risti, i'le̱e̱le̱ a̱n ahyan baa no retin na̱m'ze az a na wa̱a̱, Sila a ta po̱to̱so̱ ta̱m na da?
13Awaz Sila a ta po̱to̱so̱ an wa̱in da, Ka̱risti ta po̱t bo̱ da. 14Awaz la Sila ta po̱to̱so̱ Ka̱risti da, ba̱sa̱d co i ka̱ka̱la̱. Batma̱n ba̱ta̱d no ta̱m baa Na'Sil i ka̱ka̱la̱. 15Rina̱n hatin la kwe̱, awabe̱ az Sila za ta po̱to̱so̱ an wa̱in ta̱m da, lawabe̱ ti soot az ca̱ emaka A'Sil c'ko̱lo̱. Ai retin ca̱ ba̱sk az Sila po̱to̱sko̱ Ye̱so. 16Awaz Sila za ta po̱to̱so̱ an wa̱in da, Sila ta po̱to̱so̱ bo̱ Ka̱risti da.
17Awaz la Sila ta po̱to̱so̱ Ka̱risti da, batma̱n ba̱ta̱d no baa Na'Sil sootk rin ka̱ka̱la̱. A̱n el ta̱m v'daa a c'ko̱to. 18Awaz i tan, an wa̱in ta̱m a̱n gabs Ka̱risti kwe̱, a yangk a d'naan a̱n d'hi. 19Awaz be̱ i a̱n nocurimuca̱ ha̱n c'taa a̱n na saktin u'con baa Ka̱risti, lak be̱ na pa̱tk neta̱n kwe̱ a̱n sootma̱n ri m'za̱i.
20Sila baask la a po̱to̱sko̱ Ka̱risti, kan a e̱tin u'po̱to̱so̱. 21Ai retin i lanma̱n baa noc a̱n wa̱a̱'a uvta̱in a̱n copun yanda̱hna, i ho̱da̱n lo bo̱ ta̱m a̱n po̱tu uvta̱in lanma̱n baa noco. 22Ho̱da̱na̱n neta̱n utin kwe̱ rem Ada̱mu, i ho̱da̱n lo bo̱ ta̱m a̱n Sila ta po̱to̱sto̱ neta̱n kwe̱ rem Ka̱risti. 23Koowe̱ ci la daav ru. I Ka̱risti a̱n Sila po̱to̱so̱in na̱m'e̱te̱. Sila ta po̱to̱so̱ neta̱n Ka̱risti daava̱n Ka̱risti vaaktaine. 24Daava̱n Ka̱risti ryaatin a c'go̱mo̱, a c'bo̱o̱ a m'we̱sa̱n kwe̱ a̱n d'gaago, u nes ta̱m A'Sil K'Ceto c'go̱mo̱, i a̱n daava̱n lo kaa a̱n be̱se̱d da̱n ceta.
25I ke̱ng Ka̱risti em c'go̱m i caa u pa̱t we̱sa̱m an ha̱lc ru.#15:25 Go̱t ta̱m: Zab 110:1. 26Kac'ha̱l u d'be̱se̱ un nan hwaa d'kala, i a'wa̱a̱. 27Lalks Na'Sil zeka, “Sila nesk o go̱mca̱n kooye̱.” An na zetin la “U nesk o go̱mca̱n kooye̱,” i kwesaka az Ka̱risti za a̱n go̱mc Sila nan nesin o go̱mca̱n kooye̱ da.#15:27 Go̱t ta̱m: Zab 8:6. 28Daava̱n Sila ta de̱lt kooye̱ i kwigti Waav na̱, i daava̱n lo la ba̱ru a̱n Waa a̱n hid ru tu kwigtti Sila nan nesin o go̱mca̱n kooye̱. Bat Sila ta em go̱mca̱ c'rihi kwe̱.
29Awaz Sila za ta po̱to̱so̱ an wa̱in da, i rema̱n ye̱ a̱n retin ta̱n ema neta̱n hyan baptisma rema̱n an wa̱in a̱n na uvt na emata na̱ baptisma da? Awaz Sila za ta po̱to̱so̱ an wa̱in da, iye̱ a̱n baptisma unlo tu swidi an wa̱in nane? 30I rema̱n ye̱ bo̱ kaa a̱n nan codt hid cinna kooye̱ daava? 31Ho̱da̱na̱n m naptin az a̱m el a̱n codma̱n hid ri kooye̱ daava, i ho̱da̱n lo bo̱ a̱m retina̱n c'ka̱ndi a̱n nwaa rema̱n rina̱n Ka̱risti Ye̱so Kan buu cinna emin a̱n nwaa. 32Awaz a̱m dumk d'gaag a rinna d'kad a̱n copun E̱fisu a̱m kwesata c'a̱rma̱, iye̱ bo̱ kaa a̱n ma kumu, awaz na za nan po̱to̱so̱ an wa̱in da? To̱ i,
“Lag na ryaak na so̱o̱,
rema̱n buk nan wa̱a̱.”#15:32 Go̱t ta̱m: Isa 22:13.
33An lag la na yangs no da, “Baran naak el ta naas noco.” 34I ge̱be̱ske̱ i gya̱n no a̱n lag c'ko̱to rema̱n ahyan baa no ta nap A'Sil da. A̱m vat-vat taanlo rema̱n a̱n hongt m'e̱n.
We̱du a̱n wa̱ini
35Noc tu la̱a̱ la a̱n ipka̱, “I ho̱da̱npe̱ a̱n nan po̱to̱sto̱ an wa̱ini?” Ta̱ma̱, “I a̱n ye̱ goon we̱dwa a̱n ta po̱tte?” 36Iye̱ goon kipma hna? Rina̱n v gwain kwe̱, a ti pota da, a za i baak a wa̱a̱ da. 37Rina̱n v gwain ta̱ma̱, za bebodan ta̱'v gwaa da, i v'yaana. Tade̱e̱da, i goon hii alla goon rihi hyan. 38I Silan rein ta vaaksa v'goo d'bebo, ho̱da̱na̱n a to̱ntine. Silan rein ta ne̱e̱ kooye̱ goon goova, bebod va̱.
39We̱du za goo v'da̱n da. We̱du neta̱nrima ello. We̱du rinnannutus ello. We̱du ge̱nna̱n ello. We̱du nema̱n el ta̱ma̱.
40Rihic na'con ci goon we̱du ca̱. Rihica̱n copun yanda̱ha̱n ci la goon we̱du ca̱. Gwinka̱n we̱dca̱n rein a'con vodk a ca̱n copun yanda̱ha̱n ne. 41Hwed ci za̱nd da̱. Pe̱e̱ti ci ta̱m za̱nd e. Keba̱n ci ta̱m za̱nd na̱. Keba̱n vodenke ta̱m a̱n d'za̱n.
42I ho̱da̱n lo bo̱ ta̱m a̱n ti soott baan po̱to̱so̱m an wa̱ini. We̱duna̱n na sagine, tu zugu. A na po̱to̱so̱ la o, a tu wa̱a̱ ta̱m da d'kala. 43Na sagk o a m'gin nu. Sila ta po̱to̱so̱ o a k'gwin ni. Na sagk o u kalke. Sila ta po̱to̱so̱ la o a m'we̱s ne̱. 44Na sagk o a̱n we̱du c'nocurimu. Sila ta po̱to̱so̱ la o a̱n we̱du d'hormo. Awaz we̱du c'nocurimu ello, we̱du d'hora̱m el la ta̱ma̱. 45I ho̱da̱n lo bo̱ i retin a'ge̱n a̱nmin lalks Na'Sila̱. Sa̱ zeka, “Ada̱mu, noc va̱ m'e̱t sootk noc u po̱tke.” Ada̱mu u d'be̱se̱ la, u sootk hora̱mda̱n da̱n po̱to̱so̱.#15:45 Go̱t ta̱m: D'Tak 2:7.
46Za la Ada̱mu u d'hora̱m a̱n hain na̱m'e̱t da, i Ada̱mu u c'nocurimu. Ada̱mu u d'hora̱m gaba kaa dima̱. 47Noc va̱ m'e̱t i kan copun yanda̱hna, i a̱n hwincan na emtin o. Noc u v'illa̱ la, i lanm na'cona. 48Ho̱da̱na̱n kan na main a̱n c'hwin retine, i ho̱da̱n lo bo̱ a̱n an copun yanda̱ha̱n retine. Ho̱da̱na̱n kan rwa̱in lanm na'con retine, i ho̱da̱n lo bo̱ ta̱m a̱n a na'con retine. 49Ho̱da̱na̱n na citin hyo̱o̱m nocuna̱n na emin a̱n c'hwin, i ho̱da̱n lo bo̱ ta̱m a̱n nan o̱mt hyo̱o̱m kan rwa̱in lanm na'cona.
50Hyaarene, go̱t ha̱n na rina̱n m rein nu'zeu. We̱du c'nocurimu a tu tak a̱n kum go̱mc Na'Sil da. I ho̱da̱n lo bo̱ ta̱ma̱, rina̱n ti zugu a ti tak a̱n kum rina̱n ti mal d'kal da.
51Go̱to̱, ta̱'m ve̱ce̱ no rihi ze̱ske̱. A nan wa̱a̱ kwe̱ da. Sila ta vodasa hyo̱o̱m cinna kwe̱ 52v'daa v'da̱n ho̱da̱n ge̱ptma̱n isa̱, a na hul kaaru d'be̱se̱. Daava̱n nan hult u'kaare, an wa̱in ta po̱to̱. A ta wa̱a̱ ta̱m da d'kala. Cinnananan ta wa̱in da, Sila ta vodasa hyo̱o̱m cinna kwe̱. 53I ke̱ng we̱duna̱n tu zugu, na vaaksa o we̱duna̱n zain tu zug da d'kala. We̱duna̱n tu wa̱a̱ na vaaksa o un tu mal d'kala. 54Daava̱n rina̱n ti zug vaaktin rina̱n zain ti zug da, in ti wa̱a̱ vaakk ta̱m rina̱n zain ti wa̱a̱ da, i daava̱n lo kaa a̱n rina̱n rein a'ge̱n a̱n lalks Na'Sil ti este. Sa̱ zeka, “Na ryaak a'wa̱a̱ d'gaago.”#15:54 Go̱t ta̱m: Isa 25:8.
55“A'Wa̱a̱, i pe̱ha̱n ryaama̱n gaaga̱d rovo?
A'Wa̱a̱! I pe̱ha̱n ta̱m laba̱m rovo?”#15:55 Go̱t ta̱m: Hos 13:14.
56Ko̱tcan rein laba̱m na'wa̱a̱. We̱sa̱m c'ko̱t la, i giira. 57C'Bo̱m la baa Na'Sil an de̱lin na ryaat d'gaag rem Ye̱so Ka̱risti, Kan Gomca̱n Kooye̱.
58Rema̱n taanlo, hyaaren an ta̱'m to̱n hwe̱di d'kala, es na s'naa s'ila̱. A rihi hevksa la no da. Nes na hid no kooye̱ daava rema̱n yomka Kan Go̱mca̱n Kooye̱. Rema̱n a̱n baask a̱n napk az coka̱m no rem Kan Go̱mca̱n Kooye̱, a ta̱m soot ka̱ka̱l da.
Currently Selected:
:
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. and © The Nigeria Bible Translation Trust 2019