ଜହନ 10
10
ମେଁଣ୍ଡାଅଡାଙ୍ଗ୍ ଅଟେ ଗାଉଡ଼େଏଞ୍ଜି
1ନାନୁ ମିଙ୍ଗେ ନିଜ୍ଜାନେଃଏ ୱେସ୍ପିଞ୍ଜା, “ଏମ୍ୱେନାଞ୍ଜି ମେଁଣ୍ଡାଅଡାଙ୍ଗ୍ତି ହାଲାତାୱା ଦାରା ହିଆନ୍ ହଃଲ୍ଲେଞ୍ଜି, ମତ୍ର ବିହି ଗିଜ୍ଜୁ ଇନ୍ଦେଟ୍ ଏଙ୍ଗାନ୍ ହଲ୍ନେଞ୍ଜି, ଏୱାଞ୍ଜି ଟ୍ଡକେଞ୍ଜି ଅଟେ ଜୁରେଞ୍ଜି; 2ମତ୍ର ଏମ୍ୱେନାଞ୍ଜି ଦାରା ହିଆନ୍ ହଲ୍ନେଞ୍ଜି ଏୱାଞ୍ଜି ମେଁଣ୍ଡାଅଡାଙ୍ଗ୍ତି ଗାଉଡ଼େଏଞ୍ଜି । 3ଦାରା ଜପନ୍ତାଞ୍ଜି ତା ବାଗା ଦାରା ଗେର୍ଚାହିନେଞ୍ଜି, ଆଟେ ମେଁଣ୍ଡାଅଡାଙ୍ଗ୍ ତା ଉକୁଡ଼୍ ୱେଞ୍ଜିନ୍ନୁ ଅଟେ ଏୱାଞ୍ଜି ତା ହାବେ ମେଁଣ୍ଡାଅଡାଙ୍ଗ୍ତିଦି ପାରୁ ଆହାନ୍ ଆର୍ଚାନାହି ହପ୍ଚ୍ଚାନ୍ ଅଇନେଞ୍ଜି । 4ଏୱାଞ୍ଜି ତା ମେଁଣ୍ଡାଅଡାଙ୍ଗ୍ ହାବେ ହପ୍ନି ଡେଗ୍ଗା ଏୱାଞ୍ଜି ଏୱାଡ଼୍ତି ନକେ ନକେସ୍ ହାଜ୍ଜିନ୍ନେଞ୍ଜି ଅଟେ ମେଁଣ୍ଡାଅଡାଙ୍ଗ୍ ତା ବେତ ବେତଟ୍ ହାଜ୍ଜିନ୍ନୁ, ଇନାକି ଏୱା ତା ଉକୁଡ଼୍ ପୁଞ୍ଜିନ୍ନୁ । 5ମତ୍ର ଏୱା ପୁଞ୍ଜାହେଃଲ୍ଲାନାରିତି ବେତ ବେତଟ୍ ଏଚ୍ଚେକ୍ୱାଡ଼େ ହାଃଲ୍ଲଅ, ମତ୍ର ତା ତାୱାଟି ଡେହିନ୍ନୁ, ଇନାକି ଏୱା ପୁଞ୍ଜାହେଃଲ୍ଲାନାରିତି ଉକୁଡ଼୍ ପୁଞ୍ଜେହେଃଲ୍ଲ ।”
6ଜିସୁ ଏୱାରିକି ଇ ତୁକାଙ୍ଗାତା ୱେସ୍ତେଞ୍ଜି, ମତ୍ର ଏୱାଞ୍ଜି ଏୱାରିକି ଇନ୍ନା ଇନ୍ନା ୱେସ୍ପିଚ୍ଚେଞ୍ଜି, ଏୱା ହାବେ ଇନ୍ନା ଇଞ୍ଜାନ୍ ଏୱାରି ବୁଜ୍ଜି ଆଃଆତେରି ।
ଜିସୁ ନିଗ୍ଗା ଗାଉଡ଼େଏଞ୍ଜି
7ଏଦାକି ଜିସୁ ରିହିକ୍ ୱେସ୍ତେଞ୍ଜି, ନାନୁ ମିଙ୍ଗେ ନିଜ୍ଜାନେଃଏ ୱେସ୍ପିଞ୍ଜା ନାନୁ ଆଇମାଃଇ ମେଁଣ୍ଡାଅଡାଙ୍ଗ୍ତି ଦାରା । 8ଏଚ୍ଚେ ଜାଡ଼ା ନା କାହେ ୱାନ୍ନେରି, ଏୱାରି ହାବେ ଟ୍ଡକେଙ୍ଗ୍ ଅଟେ ଜୁରେଙ୍ଗ୍, ମତ୍ର ମେଁଣ୍ଡାଅଡାଙ୍ଗ୍ ଏୱାର୍ତି କାତା ୱେଃନାତୁ । 9ନାନୁ ଆଇମାଃଇ ଦାରା, ଏମ୍ୱେନାଞ୍ଜି ନା ହିଆନ୍ ହଲ୍ନେଞ୍ଜି, ଏୱାଞ୍ଜି ଜ୍ଡିପା ପାଁନେଞ୍ଜି ଆଟେ ତାନୁ ଲାଃଇ ୱାନ୍ ଅଟେ କାଟ ହାଜ୍ଜାନ୍ ତିନ୍ବା ପାଁନେଞ୍ଜି । 10ଟ୍ଡକେଞ୍ଜି ୱାର୍ରି ମ୍ଡାମି, ପାଗନ୍ ଅଟେ ନାହେଡ୍ କିଅନ୍ ୱାଇନ୍ନେଞ୍ଜି, ମତ୍ର ଏୱାରି ଇନିସ୍ ପରନ୍ ପାଁନେରି ଅଟେ ଗାପ୍ଚି ପାଁନେରି, ନାନୁ ଇଦାବାଗା ୱାମାଃଇ ।
11ନାନୁ ଆଇମାଃଇ ନିଗ୍ଗା ଗାଉଡ଼େଏଞ୍ଜ୍ତାନ୍ନୁ; ନିଗ୍ଗା ଗାଉଡ଼େଏଞ୍ଜି ମେଁଣ୍ଡାଅଡାଙ୍ଗ୍ ବାଗା ପରନ୍ ହିନେଞ୍ଜି । 12ଏମ୍ୱେନାଞ୍ଜି କୁଲି ପାଁନ୍ବନ୍ ବାଗା ମେଁଣ୍ଡାଅଡାଙ୍ଗ୍ କପେନ୍ନେଞ୍ଜି ଏୱାଞ୍ଜି ଗାଉଡ଼େଏଞ୍ଜି ଆଃଏ, ଇନାକି ମେଁଣ୍ଡାଅଡାଙ୍ଗ୍ ତା ଆପୁତ୍ତାଆ ଆଃଏ, ଏୱାଞ୍ଜି କ୍ଡାଡି ୱାଅନ୍ତା ହୁଡ଼ାନ୍ ମେଁଣ୍ଡାଅଡାଙ୍ଗ୍ ପିହାନ୍ ଡେହିନେଞ୍ଜି ଆଟେ କ୍ଡାଡି ୱାନ୍ ଏୱାତିଦି ଆହାନ୍ ବାରାୱିତି କିନେ । 13ଇନାକି ଏୱାଞ୍ଜି କୁଲିଗାଟାଞ୍ଜି ଅଟେ ମେଁଣ୍ଡାଅଡାଙ୍ଗ୍ ବାଗାଟି ଏଲୁ କିଃଏଞ୍ଜି । 14#ମାତି ୧୧:୨୭; ଲୁକ ୧୦:୨୨ନାନୁ ନିଗ୍ଗା ଗାଉଡ଼େଏଞ୍ଜ୍ତାନୁ, ନାନୁ ନା ମେଁଣ୍ଡାଅଡାଙ୍ଗ୍ ପୁଞ୍ଜିମାଃଇ ଅଟେ ଏ ମେଁଣ୍ଡାଅଡାଙ୍ଗ୍ ନାଙ୍ଗେ ପୁଞ୍ଜିଞ୍ଜାନୁ । 15ଏହେଙ୍ଗିସି ଆବା ନାଙ୍ଗେ ପୁଞ୍ଜାଞ୍ଜାନେଞ୍ଜି ଅଟେ ନାନୁ ଆବାନିକି ପୁଞ୍ଜାମାଃଇ । ଆଟେ ନାନୁ ନା ମେଁଣ୍ଡାଅଡାଙ୍ଗ୍ ବାଗା ପରନ୍ ହିମାଃଇ । 16ଇହିଙ୍ଗିସି ଆଟେ ନା ବିହି ମେଁଣ୍ଡାଅଡାଙ୍ଗ୍ ମାନ୍ନୁ, ଇମ୍ୱିନ୍ ମେଁଣ୍ଡାଅଡାଙ୍ଗ୍ ଇ ହାଲାତାୱା ହେଃଲ୍ଲ, ଏୱାଡ଼ିକି ୱାଡ଼େ ନାଙ୍ଗେ ତାପନ୍ ଆନେ, ଆଟେ ଏୱା ନା ଉକୁଡ଼୍ ୱେନ୍ନୁ; ଆଟେ ର ବିଡ଼ା ଅଟେ ରଃଅଞ୍ଜି ଗାଉଡ଼େଏଞ୍ଜି ଆନେଞ୍ଜି । 17ନାନୁ ନା ପରନ୍ ହିତି ବାଗା ଆବା ନାଙ୍ଗେ ଜେଡା କିଞ୍ଜାନେଞ୍ଜି, ଆଟେ ନାନୁ ନା ଏ ପରନ୍ ରିହିକ୍ ପାଁନ୍ବନ୍ ବାଗା ନାନୁ ଏଦା କିମାଃଇ । 18ଆଟେ ଏମ୍ୱେନାଞ୍ଜି ଏଦା ନା ତାୱାଟି ଅନ୍ ମୁଃଏଞ୍ଜି, ମତ୍ର ଏଦା ନାନୁ ନା ଇଚ୍ଚାଟି ହିଃଇ ଅଟେ ଏଦା ହିଅନ୍ ନା ହକତ୍ ମାନ୍ନେ ଅଟେ ଏଦା ରିହିକ୍ ୱ୍ଡେପ୍ଚ୍ଚାନ୍ ତାପନ୍ ବାଗା ନା ହକତ୍ ମାନ୍ନେ । ନାନୁ ଆବାତାୱାଟି ଇ ଆଦେସ୍ ପାଁଣ୍ଡାମାଃଇ । 19ଇ ହାବେ କାତା ବାଗା ଜିହୁଦିଙ୍ଗ୍ତି ମନ ରିହିକ୍ ବାଗା ବାଗା ଆତେ । 20ଏୱାର୍ତାୱାଟି ତୁଲ୍ଲେ ଦାଲ୍ଲା ୱେସ୍ପନ୍ ମ୍ରାସ୍ତେରି, “ତାଙ୍ଗେ ବୁତ ଆହାନ୍ନେ, ଏୱାଞ୍ଜି ବାଡ଼ାଙ୍ଗ୍ଗାଟାଞ୍ଜି, ଇନ୍ନା ବାଗା ତା କାତା ୱେଞ୍ଜିଞ୍ଜେରି ?” 21ବିହି ଦାଲ୍ଲା ୱେସ୍ତେରି, “ଇୱାହାବେ ତ ବୁତ ଆହାନ୍ନି କୁଏଞ୍ଜ୍ତି କାତା ଆଃଏ; ବୁତ ଇନ୍ନା କାଡ଼ାଙ୍ଗ୍ଗାଟାଞ୍ଜ୍ତି କାଡ଼୍କା ୱ୍ରିପ୍କନ୍ ମୁନେ ?”
ଜିହୁଦିଙ୍ଗ୍ ଜିସୁନିକି ଗ୍ରହନ କିଃଆତେରି
22ଏମ୍ବାଟି ପେନି ତୁକା ଜିରୁସାଲମତାୱା ମନ୍ଦିର ଉଚ୍ଚର୍ଗ କିଅନ୍ତି ରେହାଙ୍ଗ୍ ମାଚ୍ଚେ । 23ଆଟେ ଜିସୁ ମନ୍ଦିରତାୱା ସଲମନତି ମଣ୍ଡପତାୱା ତ୍ରେବିଚ୍ଚେଞ୍ଜି । 24ଏଚିତୁକାତାୱା ଜିହୁଦି ଦାଲ୍ଲା ତାଙ୍ଗେ ଗୁଞ୍ଜେର୍ ଗ୍ରୁଚାନ୍ ୱେଚ୍ଚେରି, “ଆଟେ ଏଚ୍ଚି ଦିନା ମାମୁ ସନ୍ଦେହ କିଆନ୍ ବାସାଆନାମୁ ? ଜଦି ନିନୁ କ୍ରିସ୍ଟ, ଇଚ୍ଚେସି ମାଙ୍ଗେ ନେହେନ୍ ୱେସ୍ତାମୁ ।”
25ଜିସୁ ଏୱାରିକି ୱ୍ଡେପ୍ଚ୍ଚି ୱେସ୍ତେଞ୍ଜି, ନାନୁ ମିଙ୍ଗେ ୱେସାଞ୍ଜା ମତ୍ର ମିରୁ ମାଞ୍ଜାଡ଼ି କିହେଃଲ୍ଲେରି; ନା ଆବା ପାରୁଟି ନାନୁ ଇମ୍ୱିନ୍ ହାବେ କାମା କିମାଃଇ, ଏ ହାବେ ନା କୁଲାଟି ସାକି ହିଞ୍ଜାନେ । 26ଆତେସ୍ୱାଡ଼େ ମିରୁ ମାଞ୍ଜାଡ଼ି କିହେଃଲ୍ଲେରି; ଇନାକି ମିରୁ ନା ବିଡ଼ାତି ମେଁଣ୍ଡାଅଡାଙ୍ଗ୍ ଆଃଏ । 27ନା ମେଁଣ୍ଡାଅଡାଙ୍ଗ୍ ହାବେ ନା ଉକୁଡ଼୍ ୱେଞ୍ଜିନ୍ନୁ ଅଟେ ନାନୁ ତାଙ୍ଗେ ପୁଞ୍ଜିମାଃଇ, ଆଟେ ଏୱା ନା ବେତ ବେତଟ୍ ୱାଇନୁ । 28ଆଟେ ନାନୁ ଏୱାଡ଼ିକି ଟାକ୍କିଡ଼ହ୍ନାତି ପରନ୍ ହିମାଃଇ, ଆଟେ ଏୱା ଏଚ୍ଚେକ୍ୱାଡ଼େ ନାହେଡ୍ ଆଃଅ, ଆଟେ ଏମ୍ୱେ ୱାଡ଼େ ନା କାଜ୍ଜୁତାୱାଟି ଏୱାଡ଼ିକି ମିଞ୍ଜାନ୍ ଅନ୍ ମୁଃଏ । 29ନା ଆବା ନାଙ୍ଗେ ଇନ୍ନା ହିଆଞ୍ଜାନେଞ୍ଜି, ଏଦି ହାବେତାୱାଟି ବେର୍ରାନାଦି#୧୦:୨୯ ହାବେତାୱାଟି ବେର୍ରାନାଦିଇ କାତାତିଦି ବିହି ପୁତିତାୱା ନା ଆବା ନାଙ୍ଗେ ଇନ୍ଦାରିକି ହିଆଞ୍ଜାନେଞ୍ଜି ଏୱାଞ୍ଜି ହାବେତାୱାଟି ବେର୍ରାନାଞ୍ଜି ଇଞ୍ଜାନ୍ ୱ୍ରିଗାଆନ୍ନେ । , ଆଟେ ଆବାତି କାଜ୍ଜୁତାୱାଟି ଏମ୍ୱେ ଏଦା ମିଞ୍ଜାନ୍ ଅନ୍ ମୁଃଏ । 30ନାନୁ ଅଟେ ଆବା ସମାନ୍ ।
31ଜିହୁଦିଙ୍ଗ୍ ତାଙ୍ଗେ ଜିଅନ୍ ବାଗା ଆଟେ ରଲି ୱାଲ୍ଲିଙ୍ଗ୍ ପେଗ୍ଦେରି । 32ଜିସୁ ଏୱାରିକି ୱେସ୍ତେଞ୍ଜି, “ନାନୁ ଆବାତି ଆଦେସ୍ ଡେହେଙ୍ଗ୍ ନାନୁ ମି ତାୱା ଗାପ୍ଚି ନିଗ୍ଗା କାମା କିଆମାଃଇ; ଏ ହାବେତ୍ କାମାତାୱାଟି ଇମ୍ୱିନ୍ କାମା ବାଗା ନାଙ୍ଗେ ୱାଲ୍ଲିଙ୍ଗ୍ ଜିସ୍କେଞ୍ଜାଦେରି ?” 33ଜିହୁଦିଙ୍ଗ୍ ତାଙ୍ଗେ ୱେସ୍ତେରି, “ନିଗ୍ଗା କାମା ବାଗାଟି ମାମୁ ନିଙ୍ଗେ ୱାଲ୍ଲିଙ୍ଗ୍ ଜିସ୍କେ ହେଲ୍ଲାଦାଃଆମୁ, ମତ୍ର ମୁଲାପେନୁନିକି ଅଡ୍ଡେଞ୍ଜି, ଆଟେ ନିନୁ କୁଏଞ୍ଜି ଆନ୍ତାତି ନି ଗାଣ୍ଡି ମୁଲାପେନୁ ଡ଼ାହି ସମାନ୍ କିନ୍ନି ବାଗା ମାମୁ ନିଙ୍ଗେ ୱାଲ୍ଲିଙ୍ଗ୍ ଜିସ୍କେଞ୍ଜାନାମୁ ।”
34ଜିସୁ ଏୱାରିକି ୱ୍ଡେପ୍ଚ୍ଚି ୱେସ୍ତେଞ୍ଜି, “ମି ହାଜୁତାୱା ୱ୍ରିଗାଆନ୍ନେ, ମୁଲାପେନୁ ଇଞ୍ଜିନ୍ନେଞ୍ଜି, ମିରୁ ହାବେତାତେରି ପେନ୍ଙ୍ଗାନାତେରି ।” 35ଏମ୍ୱେନାରି ମୁଲାପେନୁତି ବାକ୍ୟ ୱେଞ୍ଜାନ୍ନେରି, ମୁଲାପେନୁ ଏୱାରିକି ଦର୍ମପୁତିତାୱା ମିରୁ ମୁଲାପେନୁ ଡେହେଙ୍ଗ୍ ଇଞ୍ଜାନ୍ ୱେସାନ୍ନେଞ୍ଜି । ଆଟେ ଦର୍ମପୁତିତାୱା ୱ୍ରିଗାଆନ୍ନି ଇ କାତାତିଦି ଲେପ୍କନ୍ ମୁପନ୍ ଆଃଏ । 36ଏହେଙ୍ଗ୍ ଆତେସି ଇନ୍ଦାରିକି ଆବା ପିର୍ନି କିଆନ୍ ପୁର୍ତିଇନ୍ଦା ପାଣ୍ଡାଞ୍ଜାନ୍ନେଞ୍ଜି, ଏୱାଞ୍ଜି ନାନୁ ମୁଲାପେନୁତି ମ୍ରିଃଏଞ୍ଜି ଇଞ୍ଜାନ୍ ୱେସ୍ପନେଃଏ, ଏୱାଞ୍ଜିକି ମିରୁ ମୁଲାପେନୁନିକି ଅଡ୍ଡେନ୍ନେଞ୍ଜି ଇଞ୍ଜାନ୍ ଇନିସ୍ ୱେସ୍ପିଞ୍ଜେରି ? 37ଜଦି ନାନୁ ନା ଆବାତି କାମା ହାବେ କିହେଃଲ୍ଲାନୁ ଇଚ୍ଚେସି, ନାଙ୍ଗେ ମାଞ୍ଜାଡ଼ି କିଆଦାଃଆଟୁ । 38ମତ୍ର ଜଦି ନାନୁ ନା ଆବାତି ଇଚ୍ଚାଟି କାମା ହାବେ କିମାଃଇ, ଏ କୁଲାଟି ମିରୁ ନାଙ୍ଗେ ମାଞ୍ଜାଡ଼ି କିଆଦାଃଆତେସି ୱାଡ଼େ ନାନୁ କିଆନ୍ନି କାମାତିଦି ମାଞ୍ଜାଡ଼ି କିଦୁ, ଏହେଙ୍ଗ୍ଆତେସ୍ ମିରୁ ପୁଞ୍ଜେରି ଅଟେ ବୁଜ୍ଜି ଆଦେରି ଜେ, ଆବା ନା ପାଟ୍ଟି ମାନ୍ନେଞ୍ଜି ଅଟେ ନାନୁ ଆବା ପାଟ୍ଟି ମାଃଇ ।
39ଏମ୍ବାଟି ଏୱାରି ତାଙ୍ଗେ ଆହ୍ପନ୍ ବାଗା ରିହିକ୍ ସେସ୍ଟା କିତେରି, ମତ୍ର ଏୱାଞ୍ଜି ଏୱାର୍ତାୱାଟି ରେମ୍ବାନ୍ ହଚାନ୍ ହାଚ୍ଚେଞ୍ଜି । 40#ଜହ ୧:୨୮ଏମ୍ବାଟି ଏୱାଞ୍ଜି ରିହିକ୍ ଜର୍ଦ୍ଦନତି ଆନେଟ୍ ୱାଡୁ ହାଜ୍ଜାନ୍ ଜହନ ଇମ୍ୱିନ୍ ଗର୍ରିତାୱା କାହେ ଡୁବନ୍ ହିଚ୍ଚେଞ୍ଜି, ଏ ଗର୍ରିଇନ୍ଦା ୱାନ୍ ଏଦିମ୍ୱା ବାସାଆତେଞ୍ଜି । 41ଏଗେଲ୍ ଦାଲ୍ଲା ତା ଟାକ୍କେ ୱାନ୍ ୱେସ୍ତେରି, “ଜହନ ଇନ୍ନା ଆକ୍କାବାଡ଼ାଙ୍ଗ୍ତି କାମା କିଃଆତେଞ୍ଜି, ମତ୍ର ଇ କୁଏଞ୍ଜ୍ତି କୁଲାଟି ଜହନ ଇମ୍ୱିନ୍ କାତା ହାବେ ୱେସ୍ତେଞ୍ଜି, ଏ ହାବେ ନିଜ୍ଜାନେଃଏ” 42ଆଟେ ଏ ଗର୍ରିତାୱା ଏଗେଲ୍ ଦାଲ୍ଲା ତାଙ୍ଗେ ମାଞ୍ଜାଡ଼ି କିତେରି ।
Currently Selected:
ଜହନ 10: DWK
Highlight
Share
Copy
Want to have your highlights saved across all your devices? Sign up or sign in
© 2023 NLCI CC BY-NC-ND 4.0
