ଗାଲାତିୟ 2

ପାଉଲ ଅଟେ ବିହି ଗ୍ରାମ୍ବାଗାଟାରି

1 # ପେରି ୧୧:୩୦; ୧୫:୨ ଏମ୍ୱାଟି ଚଉଦ ଅଁଣ୍ଡୁଟି, ନାନୁ ବର୍ନବ୍ବା ଡ଼ାହି ଜିରୁସାଲମଇନ୍ଦା ହାଚ୍ଚେଏ ଆଟେ ତିତସନିକି ୱାଡ଼େ ଆହାନ୍ ହାଜ୍ଜାଚ୍ଚେଏ । 2ନାଙ୍ଗେ ମୁଲାପେନୁ ଜିରୁସାଲମଇନ୍ଦା ହାଲ୍‌ବନ୍ ବାଗା ୱେସ୍ତାତେଞ୍ଜି, ଏମ୍ୱାଟି ନାନୁ ହାଚ୍ଚେଏ; ଏଦିମ୍ୱା ନାନୁ ୱାର୍ରି ମଣ୍ଡଲିତି ଗାମିନାରିନିକି ଅନଜିହୁଦିଙ୍ଗ୍ ରେଃଏସ୍ ଇମ୍ୱିନ୍ ସୁସମାଚାର ୱେସ୍‌ପିମାଃଇ, ଏଦା ଏୱାରିକି ୱେସ୍ତେଏ, ଏଦାକି ନା କାହେ ଅଟେ ହାଦାଡ଼୍‌ତି ୱାହନ୍ ଇନିସ୍‌କି ବାଃଏ ଆଃଏ । 3ମତ୍ର ନା ଡ଼ାହି ତିତସ ପାରୁଗାଟି ଗ୍ରିକ୍ କୁଏଞ୍ଜି ମାଚ୍ଚେଞ୍ଜି, ମତ୍ର ତାଙ୍ଗେ ଦାଲ୍ଲା ୱାଡ଼େ ସୁନତ ଆଅନ୍ ବାଗା ବାଦ୍ୟ କିଆହେଃଲ୍ଲାତେରି । 4ମା ପାଟ୍ଟି ଏଚ୍ଚେ ଦାଲ୍ଲା କଲ ଗ୍ରାପାଗାଟାରି ୱାନ୍, ମାମୁ ନିଜ୍ଜା ମାଞ୍ଜାଡ଼ି ଗାଟାମୁ ଇଞ୍ଜାନ୍ ଟକ୍କି କିଆନ୍ ମ୍ଡାମି ହଲ୍‌ଜାନାହି, କ୍ରିସ୍ଟ ଜିସୁ ଡ଼ାହି ଆଡ୍ଡାନ୍ ମାରୁ ଇମ୍ୱିନ୍ ଉଦ୍ଦା ପାଁଣ୍ଡାନ୍ନା, ଏମ୍ବାତି ପେଜୁ ଦାହାନାହି ମାଙ୍ଗେ କାମ୍ୱାରେଏଞ୍ଜି ଡେହେଙ୍ଗ୍ କାମା କିୱି କିଅନ୍ ବାଗା ଏଲୁ କିଚ୍ଚେରି । 5ମତ୍ର ସୁସମାଚାରତି ନିଜ୍ଜା ମି ପାଟ୍ଟି ଇନିସ୍ ହାବେ ୱେଲା ରଞ୍ଜାନ୍ ବାସାଆନେ, ଏଦାବାଗା ମାମୁ ଏ କଲ ଗ୍ରାପାଗାଟାରିକି ଇନ୍ନି କୁଲା କିଅନ୍ ବାଗାଟି ସୁଜଗ ହିଃଆତାମୁ । 6ଆଟେ ଏମ୍ବେନାରିକି ଗାମିନାରି ଇଞ୍ଜାନ୍ ପଙ୍ଗେନ୍ନେରି ଏୱାରି ଇନିୱାହୁତାରି, ଏଦି ନା ବାଗା ଇନ୍ନାଦି ଆଃଏ, ମୁଲାପେନୁ ନକେସି ହାବେତାରି ସମାନ୍, ଏ ଗାମିନାରି ନାଙ୍ଗେ ସୁସମାଚାରତାୱା ଇନ୍ନି ପୁନି କୁଲା ଆଟ୍‌ଚାନ୍ ଗ୍ରାପ୍‌ତାଦାଃଆତେରି । 7ମତ୍ର ଇ ଦାଲ୍ଲା ହୁଡ଼ିତେରି ଜେ, ପିତରନିକି ମୁଲାପେନୁ ଇନିସ୍ ସୁନତଗାଟାରିକି ସୁସମାଚାର ପ୍ରଚାର କିଅନ୍‌ତି କାଁଞ୍ଜୁ ହିଆଚ୍ଚେଞ୍ଜି, ଏଚିଡେହେଙ୍ଗ୍ ନାଙ୍ଗେ ଅସୁନତଗାଟାରିକି ସୁସମାଚାର ପ୍ରଚାର କିଅନ୍‌ତି କାଁଞ୍ଜୁ ହିଆଞ୍ଜାନେଞ୍ଜି । 8ମୁଲାପେନୁ ପିତରନିକି ଇନିସ୍ ସୁନତଗାଟାର୍ ବାଗା ରଃଅଞ୍ଜି ପେରିତତି କାମା କିଅନ୍ ବାଗା ବଲ ହିତେଞ୍ଜି, ଏଚିଡେହେଙ୍ଗ୍ ନାନୁ ୱାଡ଼େ ମୁଲାପେନୁତି ବଲଟି ଅନଜିହୁଦିଙ୍ଗ୍ ବାଗା ପେରିତତି କାମା କିଅନ୍‌ତି ବଲ ପାଁଣ୍ଡାମାଃଇ । 9ଆଟେ ଏଚ୍ଚିକିଃଆ ଏୱାରି ନାଙ୍ଗେ ହିଆଞ୍ଜାନ୍ ଅନୁଗ୍ରହ କୁଲାଟି ପୁଚ୍ଚେରି, ଏଚିତୁକାତାୱା ମୁଣ୍ଡା ଲାକ୍କାଟି ପଙ୍ଗେଏଚ୍ଚି ଜାକୁବ, ପିତର ଅଟେ ଜହନ, ସୁନତଗାଟାରି ବାଗା କାମା କିଅନ୍‌ତିକି, ନାଙ୍ଗେ ଅଟେ ବର୍ନବ୍ବାନିକି ଅନଜିହୁଦିଙ୍ଗ୍ ବାଗା ଆଡ୍ଡାନ୍ କାମା କିଅନ୍‌ତିକି ରାଜି ଆତେରି; 10ଏୱାରି ମାଙ୍ଗେ ୱାର୍ରି ହାକ୍କିଗାଟାରିକି ସାହାଜ୍ୟ କିଅନ୍ ବାଗା ୱେସାଞ୍ଜାତେରି, ଏ କୁଲାଟି ନାନୁ ୱାଡ଼େ ଆଗ୍ରହ ମାଚ୍ଚେଏ ।

ପାଉଲ ଆନ୍‌ତିୟକିଆତାୱା ପିତରତି ବୁଲ୍ ତସ୍‌ପନ୍

11ଏଚ୍ଚିକିଃଆ ପିତର ଆନ୍‌ତିୟକିଆ ଗାଡ଼ାନାଜୁଇନ୍ଦା ୱାଚ୍ଚେଞ୍ଜି, ଏଚିତୁକାତାୱା ପିତରତି ବୁଲ୍ କାମା ବାଗା ଏଦିମ୍ୱାନେଃଏ ନାନୁ ତାଙ୍ଗେ ୱ୍ଲିତେଏ । 12ଏଚ୍ଚିକିଃଆ ପିତର କାହେ ଆନ୍‌ତିୟକିଆତାୱା ୱାନାହି, ଅନଜିହୁଦିଙ୍ଗ୍ ଡ଼ାହି ତିନ୍‌ବା ଉନ୍‌ବା କିଚ୍ଚେଞ୍ଜି, ଏଚିତୁକାତାୱା ଜାକୁବ ପାଣ୍ଡାଞ୍ଜାତି ଏଚ୍ଚେ ଦାଲ୍ଲା ସୁନତଗାଟାରି ୱାତେରି, ଏମ୍ବାଟି ଏୱାଞ୍ଜି ଏ ସୁନତ ହାଜୁ ପାଲ୍‌ନି ଆଇନି ଜିହୁଦିଙ୍ଗ୍‌ତି ଆଚ୍ଚିଟି ଏୱାରିକି ପିହାନ୍ ଏୱାର୍ ଡ଼ାହି ତିନ୍ନେଟେଃଏ ତାନୁ ଆଙ୍ଗେ ବାସାଆତେଞ୍ଜି । 13ଆଟେ ଏଚ୍ଚେ ହାର୍‌କି ମାଚ୍ଚି ମାଞ୍ଜାଡ଼ିଗାଟି ଜିହୁଦିଙ୍ଗ୍ ୱାଡ଼େ ତା ଡ଼ାହି ଏଚିଡେହେଙ୍ଗ୍ କୁଟୁ ବେବାର୍ କିତେରି, ଇହିଙ୍ଗିସିକି ବର୍ନବ୍ବା ୱାଡ଼େ ଏୱାର୍‌ତି କପଟତାୱା ଦିତେଞ୍ଜି । 14ଏଚ୍ଚିକିଃଆ ଏୱାରି ସୁସମାଚାରତି ନିଜ୍ଜା ପାହେରିଃଆ ତାକେହେଃଲ୍ଲାନାଦା ହୁଡ଼ିତେଃଏ, ଏଚିତୁକାତାୱା ନାନୁ ହାବେତାରି ନକେସି ପିତରନିକି ୱେସ୍ତେଏ, “ଜଦି ନିନୁ ଜିହୁଦି ଆନ୍ ଜିହୁଦିଙ୍ଗ୍ ଡେହେଙ୍ଗ୍ ତାକେଟେଃଏ ଅନଜିହୁଦିଙ୍ଗ୍ ଡେହେଙ୍ଗ୍ ତାକେଞ୍ଜି, ଏହେଙ୍ଗ୍ ଆତେସି ନିନୁ ଇନିମିଡି ଅନଜିହୁଦିଙ୍ଗ୍‌ନିକି ଜିହୁଦିଙ୍ଗ୍ ଡେହେଙ୍ଗ୍ ତାକନ୍ ବାଗା ୱେସ୍‌ପିଞ୍ଜି ?”

ମାଞ୍ଜାଡ଼ି ତାୱାଟି ଦାର୍ମିକ ଲେକା ଆଅନ୍

15ମାରୁ ପ୍ଲିତାୱିଃଆଟେଃଏ ଜିହୁଦିଙ୍ଗ୍‌ନାସୁ, ମତ୍ର ଅନଜିହୁଦିଙ୍ଗ୍ ଡେହେଙ୍ଗ୍ ପାପିଗାଟାସୁ ଆଃଏ, 16#ରୁମି ୩:୨୦; ରୁମି ୩:୨୨ଆତେସ୍‌ୱାଡ଼େ ମାମୁ ପୁଞ୍ଜାନାମୁ ଜେ, ମସାତି ହାଜୁ ପାଲ୍‌ନି ଆନ୍ ଏମ୍ୱେନାଞ୍ଜି ୱାଡ଼େ ମୁଲାପେନୁ ନକେସି ଦାର୍ମିକ ଆଅନ୍ ମୁଃଏଞ୍ଜି, ମତ୍ର ରଃଅଞ୍ଜି ୱାର୍ରି ଜିସୁ କ୍ରିସ୍ଟନିକି ମାଞ୍ଜାଡ଼ି କିଆନ୍ ମୁଲାପେନୁ ନକେସ୍ ଦାର୍ମିକ ଆନେଞ୍ଜି । ଏଦାବାଗା ମାମୁ ମୁଲାପେନୁ ନକେସି ଦାର୍ମିକ ଆଅନ୍ ବାଗାଟି କ୍ରିସ୍ଟ ଜିସୁନିକି ମାଞ୍ଜାଡ଼ି କିନ୍ନାମୁ । ଏଦାକି ମସାତି ହାଜୁ ପାଲ୍‌ନି ଆନ୍ ଦାର୍ମିକ ଆଃଏଟେଃଏ କ୍ରିସ୍ଟନିକି ମାଞ୍ଜାଡ଼ି କିଆନ୍ ଦାର୍ମିକ ଆନାମୁ; ଇନାକି ମସାତି ହାଜୁ ପାଲ୍‌ନି ଆନ୍ ଏମ୍ୱେନାଞ୍ଜି ୱାଡ଼େ ଦାର୍ମିକ ଆଅନ୍ ମୁଃଏଞ୍ଜି । 17ମତ୍ର କ୍ରିସ୍ଟ ତାୱାଟି ଦାର୍ମିକ ଆଅନ୍ ବାଗାଟି ସେସ୍ଟା କିଆନ୍ ମାରୁ ଜିହୁଦିଙ୍ଗ୍ ଆନ୍ ୱାଡ଼େ ଜଦି ପାପିଗାଟାର୍ ଡେହେଙ୍ଗ୍ ତଞ୍ଜିନା ଇଚ୍ଚେସି, କ୍ରିସ୍ଟ ଇନ୍ନା ମା ବାଗାଟି ଦାଇ ଆନେଞ୍ଜି ? ଆଃଏ, ଏଦି ଏହେଙ୍ଗିସି ଏଚ୍ଚେକ୍‌ୱାଡ଼େ ଆଃଆକାଦି । 18ଜଦି ନାନୁ ମାନି ଆଃଏନୁ ଇଞ୍ଜାନ୍ ପିହାନ୍ ଏ ହାଜୁତିଦି ରିହିକ୍ ମାନିଆଅନ୍ ମ୍ରାସ୍ତେସି, ନାନୁ ନା ଗାଣ୍ଡିତିଦି ପାପିଗାଟାଞ୍ଜ୍ ଇଞ୍ଜାନ୍ ପରମାନ କିମାଃଇ । 19ଇନାକି ନାନୁ ମୁଲାପେନୁ ଉଦେସିଆଟି ନିମ୍ୱନ୍ ବାଗା ମସାତି ହାଜୁତାୱାଟି ମସାତି ହାଜୁ ବାଗା ହାମାଃଇ । ନାନୁ କ୍ରିସ୍ଟ ଡ଼ାହି କ୍ରୁସତାୱା ହାମାଃଇ; 20ନାନୁ ଆଟେ ନିମ୍ବାହେଃଲ୍ଲାନୁ, ମତ୍ର କ୍ରିସ୍ଟ ନା ତାୱା ନିମ୍ବାନ୍ନେଞ୍ଜି; ଅଟେ ନାନୁ ହାଦାଡ଼ି ଗାଣ୍ଡିଟି ମାଞ୍ଜାନାହି ଇମ୍ୱିନ୍ ପରନ୍‌ତାୱା ମାଃଇ, ଏଦି ମାଞ୍ଜାଡ଼ିଟି ଇଚ୍ଚେସି , ମୁଲାପେନୁତି ମ୍ରିଃଏଞ୍ଜି ଏମ୍ବେନାଞ୍ଜିକି ନାଙ୍ଗେ ଜେଡା କିଆନାହି ନା ବାଗାଟି କ୍ରୁସତାୱା ହାତେଞ୍ଜି, ତାଙ୍ଗେ ମାଞ୍ଜାଡ଼ି କିଆନ୍ ପରନ୍‌ତାୱା ନିମ୍ବେମାଃଇ । 21ଏଦାବାଗା ନାନୁ ମୁଲାପେନୁତି ଅନୁଗ୍ରହତିଦି ବାଃଏତାଦି କିହେଃଲ୍ଲେନୁ, ଇନାକି ଜଦି ମସାତି ହାଜୁତାୱାଟି ଦାର୍ମିକ ଆଇଚ୍ଚେସି, କ୍ରିସ୍ଟତି ହାଅନ୍ ବାଃଏ ଆନେ ।

Currently Selected:

ଗାଲାତିୟ 2: DWK

Highlight

Compare

Copy