ଗାଲାତିୟ 1
1
ଜୁହାରି
1ନାନୁ ପାଉଲ, ରଃଅଞ୍ଜି ପେରିତତାନୁ, କୁଇଙ୍ଗ୍ ନାଙ୍ଗେ ଆଚି କିଆହେଲ୍ଲାଦାଃଏରି, କି ଇମ୍ୱିନ୍ କୁଏଞ୍ଜି ନାଙ୍ଗେ ପାଣ୍ତାହେଲ୍ଲାଦାଃଏଞ୍ଜି, ମତ୍ର ଜିସୁ କ୍ରିସ୍ଟ ଅଟେ ଇମ୍ୱିନ୍ ଆବା ମୁଲାପେନୁ ତାଙ୍ଗେ ହାନ୍ନାର୍ଟିଆଟି ରିହିକ୍ ନିକ୍ଚାନ୍ନେଞ୍ଜି, ଏ ମୁଲାପେନୁତାୱାଟି ଆର୍ପା ପାଁଣ୍ଡାମାଃଇ । 2ଆଟେ ନା ଡ଼ାହି ମାନ୍ନି ଆମ୍ୱେସ୍ଆଙ୍ଗିସ୍କା, ଗାଲାତିୟ ମଣ୍ଡଲିଙ୍ଗ୍ତାୱା ମାନ୍ନି ଜିସୁ କ୍ରିସ୍ଟନିକି ମାଞ୍ଜାଡ଼ି କିନ୍ନି ହାବେତ୍ ଆମ୍ବେସ୍ଆଙ୍ଗିସ୍କାନିକି ଇ ଆକୁ ୱ୍ରିଗେମାଃଇ । 3ନାନୁ ପ୍ରାତ୍ନା କିମାଃଇ ଜେ, ମା ଆବା ମୁଲାପେନୁ ଅଟେ ଦାର୍ମୁ ଜିସୁ କ୍ରିସ୍ଟଟିଆଟି ଅନୁଗ୍ରହ ଅଟେ ଲତୁ ମି ପାଟ୍ଟି ଆପାକାଦି । 4ଏୱାଞ୍ଜି ମା ଆବା ମୁଲାପେନୁତି ଇଚ୍ଚା ପାଲ୍ନି ଆନ୍, ଇ ଡ଼ଃଆନ୍ ପୁର୍ତିଟିଆଟି ମାଙ୍ଗେ ଜ୍ଡିପନ୍ ବାଗା ମା ପାପ ବାଗାଟି ତାନୁ ତା ପରନ୍ ହିତେଞ୍ଜି । 5ନିଜ୍ଜାନେଃଏ କାଲେଙ୍ଗ୍କାଲା ଟିକ୍ନା ମା ଆବା ମୁଲାପେନୁତି ଗଉରବ ଆପାକାଦି । ଆମେନ୍ ।
ରଣ୍ଡେନେଃଏ ସୁସମାଚାର
6କ୍ରିସ୍ଟତି ଅନୁଗ୍ରହଟି ଏମ୍ୱେନାଞ୍ଜିକି ମିଙ୍ଗେ ଆର୍ଚ୍ଚାଞ୍ଜାନେଞ୍ଜି, ତା ତାୱାଟି ମିରୁ ଇଚ୍ଚେ କାର୍ବେକ୍ ବ୍ଡୁଜ୍ଜାନାହି ବିହି ସୁସମାଚାରତିଦି ମାଞ୍ଜାଡ଼ି କିଞ୍ଜେରି, ଏଦା ପୁଞ୍ଜାନ୍ ନାନୁ ଆକ୍କାବାଡ଼ାଙ୍ଗ୍ ଆଇମାଃଇ । 7ଏଦି ବିହି ସୁସମାଚାର ଆଃଏ । ମତ୍ର ଏଚ୍ଚେ ଦାଲ୍ଲା ମିଙ୍ଗେ କ୍ରଟ୍ପାୱିଆନ୍ କ୍ରିସ୍ଟତି ସୁସମାଚାରତିଦି ବିହେ ୱେସାନ୍ ମିଙ୍ଗେ ବିହି ପାହେର୍ଇନ୍ଦା ଅନ୍ ବାଗା ସେସ୍ଟା କିଞ୍ଜାନେରି । 8ଏଦାକି ମାମୁ ଇମ୍ୱିନ୍ ସୁସମାଚାର ମିଙ୍ଗେ ପ୍ରଚାର କିଆତାମୁ, ଏଦା ପିହାନ୍ ଜଦି ମାମୁ କି ସର୍ଗତି ଦୁତଙ୍ଗ୍ ୱାଡ଼େ ବିହି ସୁସମାଚାର ପ୍ରଚାର କିଆତେସି ଏୱାରି ୱ୍ଲିପା ପାଁନାକାରି । 9ଇଦା ନାନୁ କାହେନେଃଏ ୱେସାଞ୍ଜାତେଃଏ, ହାଦାଡ଼ି ଆଟେ ରଲି ୱେସ୍ପିଞ୍ଜା, ମିରୁ କାହେଟେଃଏ ଇମ୍ୱିନ୍ ସୁସମାଚାର ଗ୍ରହନ କିଆଞ୍ଜେରି । ଏ ସୁସମାଚାର ପିହାନ୍ ଜଦି ଏମ୍ୱେନାଞ୍ଜି ବିହି ସୁସମାଚାର ମିଙ୍ଗେ ପ୍ରଚାର କିଆନେଞ୍ଜି, ଏହେଙ୍ଗ୍ ଆତେସି ଏୱାଞ୍ଜି ୱ୍ଲିପା ପାଁନାକାଞ୍ଜି । 10ମିରୁ ଏଲୁ କିଞ୍ଜେରି ଜେ, ନାନୁ ଦାଲ୍ଲାଙ୍ଗିଆଟି ସନ୍ମାନ୍ ପାଁନ୍ବନ୍ ବାଗା ସେସ୍ଟା କିମାଃଇମା ? ଆଃଏ, ମତ୍ର ରଃଅଞ୍ଜି ମୁଲାପେନୁ ମାନ୍ନେଞ୍ଜି, ଏୱାଞ୍ଜିକି ସନ୍ତୁସ୍ଟ କିଅନ୍ ବାଗାଟି ନାନୁ ସେସ୍ଟା କିମାଃଇ । ଜଦି ନାନୁ କୁଇଙ୍ଗ୍ନିକି ସନ୍ତୁସ୍ଟ କିଅନ୍ ବାଗା କିମାଃଇମା, ଏହେଙ୍ଗ୍ ଆତେସି ନାନୁ କ୍ରିସ୍ଟତି କାମ୍ବାରେଏଞ୍ଜ୍ତାନୁ ଆଃଏନ୍ମା ।
ପାଉଲ ମୁଲାପେନୁତାୱାଟି ଆର୍ପା ପାଁନ୍ବନ୍
11ଇନାକି ଏ ଆମ୍ୱେସ୍ଆଙ୍ଗିସ୍କାନାତେରି, ନାନୁ ମିଙ୍ଗେ ପୁନ୍ବି କିଅନ୍ ବାଗା ଇଚ୍ଚା କିଞ୍ଜା ଜେ, ଇମ୍ୱିନ୍ ସୁସମାଚାର ନାନୁ ପ୍ରଚାର କିଆଞ୍ଜାଆ, ଏ ସୁସମାଚାର କୁଇଙ୍ଗ୍ତାୱାଟି ଆଃଏ । 12ନାନୁ ଏଦା କୁଇଙ୍ଗ୍ତାୱାଟି ପାଁଣ୍ତାହେଃଲ୍ଲାନୁ କି ଏମ୍ୱେନାଞ୍ଜି ନାଙ୍ଗେ ଗ୍ରାପ୍ଚାହେଲ୍ଲାଦାଃଏଞ୍ଜି, ମତ୍ର ଜିସୁ କ୍ରିସ୍ଟତି ତଞ୍ଜୁ ତାୱାଟି ନାନୁ ପାଁଣ୍ଡାମାଃଇ । 13#ପେରି ୮:୩; ୨୨:୪,୫; ୨୬:୯–୧୧କାହେ ନାନୁ ଜିହୁଦି ଦର୍ମତାୱା ମାଚ୍ଚି ତୁକାତାୱା ନା ବେବାର୍ କୁଲାଟି ମିରୁ ପୁଞ୍ଜାଞ୍ଜେରି, ନାନୁ ମୁଲାପେନୁତି ମଣ୍ଡଲିତିଦି ଇନିସ୍ ବିହାନପୁ ହିଚ୍ଚେ, ଆଟେ ନାନୁ ମଣ୍ଡଲିତିଦି ନାହେଡ୍ କିଅନ୍ ବାଗାଟି ସେସ୍ଟା କିଚ୍ଚେ, 14#ପେରି ୨୨:୩ଆଟେ ନାନୁ ଜିହୁଦି ଦର୍ମତି ପାଲ୍ନି ଆଅନ୍ତାୱା ନା ହାନ୍ଦିତି ଜିହୁଦିଙ୍ଗ୍ ତାୱାଟି ନକେସି ମାଚ୍ଚେ ଅଟେ ମା ଜୁଜୁଆକେଙ୍ଗ୍ତି ହାଜୁ ବାଗାଟି ଗାପ୍ଚି ଆଗ୍ରହ ମାଚ୍ଚେ । 15#ପେରି ୯:୩–୬; ୨୨:୬–୧୦; ୨୬:୧୩–୧୮ମତ୍ର ମୁଲାପେନୁ ନାଙ୍ଗେ ନା ଇୟା ଟୁଟୁତାୱାଟି ଆଚି କିଆତେଞ୍ଜି ଅଟେ ତା ଅନୁଗ୍ରହଟି ତା ଆଙ୍ଗୁଲ୍ କାମା କିଅନ୍ତିକି ନାଙ୍ଗେ ଆର୍ତାତେଞ୍ଜି । 16ଏଚ୍ଚିକିଃଆ ମୁଲାପେନୁ ତା ମ୍ରିଃଏଞ୍ଜିକି ନା ତାୱା ପପ୍କନ୍ ବାଗା ରାହାଙ୍ଗ୍ ଆତେଞ୍ଜି, ଇନିସ୍କି ନାନୁ ଅନଜିହୁଦିଙ୍ଗ୍ ମାଦ୍ଦି ତାଙ୍ଗେ ପକିଃଇ, ନାନୁ ଏ କୁଲାଟି ଇମ୍ୱିନ୍ କୁଏଞ୍ଜ୍ତାୱାଟି ପରାମର୍ସ ଅଃଏଟେଃଏ, 17ନା କାହେ ଆଚି ପାଁଣ୍ଡାନ୍ନି ପେରିତଙ୍ଗ୍ ରେଃଏସ୍ ଜିରୁସାଲମଇନ୍ଦା ହାଃଲ୍ଲାତାନୁ, ମତ୍ର ଆରବ ଦେସାଇନ୍ଦା ହାଚ୍ଚେଏ, ଏମ୍ୱାଟି ରିହିକ୍ ନାନୁ ଦମେସକଇନ୍ଦା ୱ୍ଡେଚାନ୍ ୱାତେଏ । 18#ପେରି ୯:୨୬–୩୦ଏମ୍ବାଟି ମୁ ଅଁଣ୍ଡୁଟି ନାନୁ କେପାନିକି ଆଡ୍ଡନ୍ ବାଗାଟି ଜିରୁସାଲମଇନ୍ଦା ହାଚ୍ଚେଏ ଅଟେ ତା ଡ଼ାହି ପନ୍ଦ୍ର ଦିନା ବାସାଆତେ । 19ମତ୍ର ଏଦିମ୍ୱା ନାନୁ ଦାର୍ମୁତି ଆମ୍ୱେସ୍ ଜାକୁବନିକି ପିହାନ୍ ଆଟେ ଇମ୍ୱିନ୍ ପେରିତଙ୍ଗ୍ନିକି ଆଡ୍ଡାହେଃଲ୍ଲାତାନୁ । 20ନାନୁ ମୁଲାପେନୁ ନକେସ୍ ଇନ୍ନି କୁଲା ହାବେ ମିଙ୍ଗେ ୱ୍ରିଗେଞ୍ଜା, ଏୱା ହାବେ କଲ ଆଃଏ । 21ଏ ଡେଗ୍ଗା ନାନୁ ସିରିଆ ଅଟେ କିଲିକିଆ ରାଜିଇନ୍ଦା ହାଚ୍ଚେଏ । 22ଏଚିତୁକାତାୱା ଜିହୁଦା ରାଜିତାୱା ମାଚ୍ଚି କ୍ରିସ୍ଟ ମଣ୍ଡଲିତି ଦାଲ୍ଲା ହାବେ ନାଙ୍ଗେ ପୁଞ୍ଜାହେଲ୍ଲାଦାଃଆତେରି । 23ଇନାକି ଏୱାରି ୱାର୍ରି ନା କୁଲାଟି ୱେଞ୍ଜାଚ୍ଚେରି ଜେ, “କାହେ ଇ କୁଏଞ୍ଜି ମାଙ୍ଗେ ବିହାନପୁ ହିଆଞ୍ଜାତେଞ୍ଜି, ଏୱାଞ୍ଜି ଇମ୍ୱିନ୍ ମାଞ୍ଜାଡ଼ି କୁଲାଟି ନାହେଡ୍ କିଅନ୍ ସେସ୍ଟା କିଚ୍ଚେଞ୍ଜି, ହାଦାଡ଼ି ଏୱାଞ୍ଜି କ୍ରିସ୍ଟତି ଏ ମାଞ୍ଜାଡ଼ି କୁଲାଟି ପ୍ରଚାର କିନ୍ନେଞ୍ଜି ।” 24ଆଟେ ଏୱାରି ନା ବାଗାଟି ମୁଲାପେନୁନିକି ଜୁଙ୍ଗେଚ୍ଚେରି ।
Currently Selected:
ଗାଲାତିୟ 1: DWK
Highlight
Share
Compare
Copy
Want to have your highlights saved across all your devices? Sign up or sign in
© 2023 NLCI CC BY-NC-ND 4.0
