ରମିୟ 9
9
ମାପ୍ରୁ ମାରି ମାଇ ସିରେଲ'କୁନୁଂ ଜିଉଦିରେମଲେ
1ନିଂ ଆପେ ଆ'ନା ମା ସୁଁସୁ ଡେନ୍ତିଂ ଗୁତୁନ୍ ଗୁଲାଇ ସତ୍ । ନିଂ କିରିସ୍ଟନା ରେମସା' ନିଂ ପଲୁ ଆସୁନ୍ତିଂ । ମାରି ନିଂ ଆପେ ସୁଁସୁଡେଂକୁନୁଂ କେନ୍ ଗୁଲାଇ ତୁମ' ସତ୍ ଡୁତା ଡ'ସେକ୍ ପବିତ୍ର ଆତ୍ମା ନିଂନା ଜିବନ୍ବକ୍ ସୁନ'ତା । 2-3ନିଂ ମା ଡ'ସେକ୍ ସୁନ୍ତିଂ ଡ'ନା ଜିଉଦିରେମଲେ ଆଜିସୁଲା ବିସ୍ବାସ୍ ଆଡେମ୍ତସା' ନିଂନା ଜିବନ୍ବକ୍ ଆମା'ଏ ଏତ୍ସେକ୍ ଅବୁଦି ଗୁଗୁଇ'ଗାଗାଇ'ବାଇ' ସିନ୍ତାରୁନ୍ତା ସା'ଗୁତା । ମାସା'ଡ'ନା କେନ୍ ଦର୍ତନିବକ୍ ମା'ଏ ଗୁଲାଇର ନିଂନା ରେମଲେ ମାରି ନିଂନା ବୁୟାଂଏଁ ତୁନାଲେ । ଜଦି ମା'ଏ ଆକିରିସ୍ଟ ଜିସୁଲା ବିସ୍ବାସ୍ ଡେମ୍ତୁନେଇ ଡ'ନା ମା'ଏନା ଲାଗିରେ ନିଂ ମା ଡିନ୍ଡେମ୍ପୁଲେଇସା ମୁନ୍ ଡେଂଗୁତିଂ । ଡ'ନା ମାପ୍ରୁ ଆନିଂ ଆନା ବୁଂଅଁ'ନାସା ମାରି ଜିସୁ କିରିସ୍ଟନା ଆଲାତ୍କୁରୁଂ ସୁଲୁଂ ଡେମ'ନାସା ନିଂ ମା'ଏନା ଲାଗିରେ ଗୁତୁନ୍ ଗୁଲାଇ ବୁମ୍ବାମ୍ପୁଲେଇସା ରାଜି ଡେମାନିଂ । 4ମାରି ମା'ଏ ଜା ଡ'ନା ଇସ୍ରାଏଲ୍ ରେମଲେ, ଆମା'ଏଉ ନିଂନା ଉଁ'ଉଁନେ ଡ'ସେକ୍ ମାପ୍ରୁ ସିରେଲ' ବୁଂଅଁ'ତା । ଆମା'ଏଉ ନିଂ ମିବାଇ' ଡ'ସେକ୍ ମାପ୍ରୁ ମାଇନା ମଇମା ଅସୁୟ' । ମାରି ମା'ଏବୁରଂ ମାପ୍ରୁ ପର୍ମାନ୍ ସବ'ସେକ୍ ମା'ଏପୁଲେଇ ନିୟମ୍ ବେଡ' । ମାରି ପେ ମି ଆନିଂ ସୁନ୍ଡ୍ର ଡୁତା ଡ'ସେକ୍ ମାପ୍ରୁ ଆମା'ଏ ଅମାଗ' ବେଡ'କୁ । 5ମା'ଏ ଜା ଡ'ନା ଇନ୍ତେକନ୍ଡେ'କା ମାପ୍ରୁ ସିରେଲ'କୁନୁଂ ଅବ୍ରାଆମ୍, ଇସାକ୍ ମାରି ଜାକୁବ୍ ଡ'କୁନୁଂ ନେଇ'ନା ୟା'ତୁତାଲେନା ରେମଲେ । କେନ୍ ଦର୍ତନିବକ୍ ମା'ଏନ୍ କୁଲ୍ବକ୍ଉ କିରିସ୍ଟଲା ମୁଇ ରେମ ଏଗ୍ସେକ୍ ଜନମ୍ ଡେଂଗା' । ମାଇଉ ଗୁଲାଇନା ବାଗ୍ବକ୍ ଡୁକୁନୁଂ ମାପ୍ରୁ, ସା' ନେଇ' ଆମାଇଉ ଇସାଉ ସୁନ୍ଡ୍ରଲାନେଇ' । ଆମେନ୍ ।
6ଇସ୍ରାଏଲ୍ ରେମଲେ ଆଜିସୁଲା ବିସ୍ବାସ୍ ଆଡେମ୍ତସା' ମାପ୍ରୁ ଆଇସ୍ରାଏଲ୍ଲା ତିତିବାଡ'ସେକ୍ ସୁନ'କୁନୁଂସୁଗ ଆଡେମ୍ତ ଡ'ସେକ୍ ନେଇ' ସୁଁସୁ ଗଂତୁନେଇ' ଇ? ଆରାକ୍ । ମାସା'ଡ'ନା ଇସ୍ରାଏଲ୍ନା କୁଲ୍ବକ୍ ଜନମ୍ ଡେଂକୁନୁଂରେମ୍ ଏନ୍ତୁକ୍ର ଇସ୍ରାଏଲ୍ ରେମ ଆରାକ୍ । 7ମାରି ମା'ଏ ଗୁଲାଇର ଅବ୍ରାଆମ୍ନା ଉଁ'ଉଁନେ ଡେଂକୁନାସା ମାପ୍ରୁ ଆଏନ୍ତୁକ୍ର ଅବ୍ରାଆମ୍ନା ଉଁ'ଉଁନେ ଡ'ସେକ୍ ଆଜୁତ । ମାସା'ଡ'ନା “ଇସାକ୍ନାକୁରୁଂ ଜନମ୍ ଡେଂକୁନୁଂ ଉଁ'ଉଁନେଉ ନନା ଉଁ'ଉଁନେ ଡେନ୍ତା” ଡ'ସେକ୍ ମାପ୍ରୁ ଆଅବ୍ରାଆମ୍ଲା ସୁନ'ବୁଂଅଁ' । 8କେନ୍ ଅର୍ତ ମା ଡ'ନା, ଅବ୍ରାଆମ୍ନା ଞେରିନା ମୁନ୍କୁରୁଂ ଜନମ୍ ଡେଂକୁନୁଂ ଗୁଲାଇର ମାପ୍ରୁନା ଉଁ'ଉଁନେ ଡ'ସେକ୍ ଆରାକ୍ । ମାତର୍ ମାପ୍ରୁ ତିତିବାଡ'କୁନୁଂସୁଗ ଜା ଜନମ୍ ଡେଂଗା' ଆମା'ଏଉ ମାପ୍ରୁ ଅବ୍ରାଆମ୍ନା ଉଁ'ଉଁନେ ଡ'ସେକ୍ ଜୁତ । 9ମାସା'ଡ'ନା ମାପ୍ରୁ ଆଅବ୍ରାଆମ୍ଲା ମା ଡ'ସେକ୍ ତିତିବାଡ'ବୁଂଅଁ' ଡ'ନା, “ବେର୍ମ ଆଇ'କେନ୍ଆଇ'ତୁନ୍ବେଲା ନିଂ ମାର୍ ମୁସଉ ଆକେ ସାପ୍ତିଂ । ଆଇ'ତୁନ୍ବେଲା ସାରାଲା ମୁଇ ଉଁ'ଉଁ ବାଂବୁଂତ” ଡ'ସେକ୍ ସୁନ'କୁ । ସା' ଗୁତୁନ୍ ଉଁ'ଉଁନା ଇମି ଇସାକ୍ । ମାଇଉ ନେଇ'ନା ମୁଲ୍ନା ତୁତାଲା ।
10ଆ'ଇତୁନାଉ ଡ'ସେକ୍ ଆରାକ୍, ଇସାକ୍ଲା ଇଂଗେର୍ସେ'ଗା ଆରିବିକାଲା ରିଂଅଁ' । ରିଂଅଁ'ସା' ମାଇନ୍କୁରୁଂ ରିବିକାଲା ବାତୁ'ଉ ଅଗ' । 11-12ମାତର୍ ମୁନା' ଉଁ'ଉଁ ଡାଉ ଉଁ'ଉଁନା ଗୁପାମ୍ରେମ୍ସୁଗ କାମ୍ ଡେମ୍ତ ଡ'ସେକ୍ ମାପ୍ରୁ ଆରିବିକାଲା ଆମାଇପା ଜନମ୍ ଡିନ୍ଡେମ୍ ସିଁସେଇଁଉ ମାରି ମାଇପା ବଲ୍ବାଇ'ସା ଆସାର୍ବାଇ'ସା କାମ୍ ଡିନ୍ଡେମ୍ ଅରଇ'ଏଉ ସୁନ'ବୁଂଅଁ'କୁ । ସା' କେନା ଜୁଲ'ନା ନେଇ' ମା ମାକ୍ତୁନେଇ' ଡ'ନା ମାପ୍ରୁ ଆଜା ସିରେତିଂ ଡ'ସେକ୍ ଏତ୍ଗୁତା ଡୁ'ତୁନ୍ସୁଗଉ ମାଇ ଡେମ୍ତ । ରେମଲେ ଡେମ'କୁନୁଂ କାମ୍ ଜୁଲ'ସେକ୍ ଆରାକ୍ ମାପ୍ରୁନା ମୁନ୍ସୁଗ ମାଇ ଗୁଲାଇ କାମ୍ ଡେମ୍ତ ଡ'ସେକ୍ ନେଇ' ମାକ୍ତୁନେଇ' । 13ଡୁ'ତୁନ୍ସା'ଉ “ନିଂ ଆଏସଲା ଆରାକ୍ ଆଜାକୁବ୍ଲା ଆଲାତ୍ ଡେମ'ତିଂ” ଡ'ସେକ୍ ମାପ୍ରୁନା ଉଲାକ୍ବକ୍ ଲେକ୍ଲ'ତା ।
14ମାପ୍ରୁ ଡି'କେନ୍ ଡେମ'ତା ଡ'ନା ନେଇ' ମା ଡ' ସୁଁସୁ ଗଂତୁନେଇ'? ମାପ୍ରୁ ଆଗୁଲାଇର ସମାନ୍ ଆଜୁତ ଡ'ସେକ୍ ସୁଁସୁ ଗଂତୁନେଇ' ଇ? ଆରାକ୍, ମାପ୍ରୁ ଇନ୍ଡଇ'ଏସା ଡୁ'ତୁନା ଆଡେମ୍ତ । 15ମାସା'ଡ'ନା, ଆମସାଲା ମାପ୍ରୁ ଇନ୍ତେକନ୍ଡେ'କା ଡି'କେନ୍ ସୁନ'କୁ, ମା ଡ'ନା, “ନିଂ ଆଜା ଦୟା ଡିନ୍ଡେମ୍ପୁଲେଇ ମୁନ୍ ଡେଂଗୁତିଂ ଆମାଇ ଦୟା ଡେମ୍ତିଂ ମାରି ଆଜା ଲିବିସୁପ୍ପୁଲେଇ ମୁନ୍ ଡେଂଗୁତିଂ ଆମାଇ ଲିବିସୁପ୍ତିଂ” ଡ'ସେକ୍ ସୁନ'କୁ । 16ସା' ରେମଲେନା ମୁନ୍ସୁଗ ଆରା'ଗେ ରେମଲେ ଡେମ'କୁନୁଂ ବଲ୍କାମ୍ ଜୁଲ'ସେକ୍ ମାପ୍ରୁ ଆରେମଲେ ଆସିରେତ ମାତର୍ ମାପ୍ରୁ ଦୟା ଡେଂସେକ୍ ମା ମୁନ୍ ଡେଂଗୁତା ଡୁ'ତୁନାଉ ମାଇ ଡେମ'ତା । 17ଆମିସର୍ ଦେସ୍ନା ଆପାର ରାଜା ମାପ୍ରୁ ସୁନ'କୁନୁଂ ମାପ୍ରୁନା ଉଲାକ୍ବକ୍ ଡି'କେନା ଲେକ୍ଲ'ବୁଂଅଁ'ତା, ମା ଡ'ନା, “ନିଂନା ବପୁ ଆଗୁଲାଇର ଅସୁଇ'ପୁଲେଇ ମାରି କେନ୍ ଦର୍ତନିବକ୍ ଗୁଲାଇ କୁନ୍ଡା ନିଂନା ଇମି ଅ'ନାଉଲେଇ' ଡ'ସେ'ଗାଉ ନିଂ ଆନ ମିସର୍ ଦେସ୍ନା ରାଜା ଅ'ଏଲ'ନିଂ” ଡ'ସେକ୍ ଲେକ୍ଲ'ତା । 18କେନ୍ ଜୁଲ'ନା ନେଇ' ମା ମାକ୍ତୁନେଇ' ଡ'ନା, ଆଜା ଦୟା ଡିନ୍ଡେମ୍ପୁଲେଇ ମାପ୍ରୁ ମୁନ୍ ଡେଂଗୁତା ଆମାଇଉ ମାପ୍ରୁ ଦୟା ଡେମ୍ତ ମାରି ଜାଏସା ମୁଇନ୍ଡା ମାପ୍ରୁନା ତୁମ' ମାନ୍ସେ'ଗା ଡୁକୁପୁଲେଇ ମୁନ୍ ଆରାକ୍ ଡ'ନା ମାଇ ଡୁ'ତୁନ୍ଉ ଡୁକୁଲେଇ' ଡ'ସେକ୍ ମାପ୍ରୁନା ମୁନ୍ ଡୁକୁନା ଆମାଇ ଡୁ'ତୁନାଉ ମାପ୍ରୁ ଅ'ଡେମ୍ତ ।
19ଡୁ'ତୁନ୍ ଡ'ନା ପେ ଏନ୍ତୁକ୍ର ସୁନ୍ତୁପେ, “ମାପ୍ରୁନା ମୁନ୍ସୁଗଉ ଗୁଲାଇ ଡେଂଗୁତା ଡ'ନା ମାସା' ମାପ୍ରୁ ଆନେଇ' ମାରି ମା'ଏ ଆନିଂ ଆମାନ୍ତା ଡ'ସେକ୍ ସୁନ'ତା? ମାପ୍ରୁନା ମୁନ୍କୁରୁଂ ପାଲ୍ ମାରି ଜାଏସା ଡିନ୍ଡେମ୍ ଆଗଂତା” ଡ'ସେକ୍ ସୁନ୍ତୁପେ । 20ମାତର୍ ନ ମୁଇନ୍ଡା ରେମ । ସା' ନ ଆମାପ୍ରୁ ଉଲ୍ଟା ଅ'ଗଁସ୍ଲାଗ୍ ଆଗଂତୁନ । ମୁଇ କିକ୍ ଆକୁମ୍ବିକ୍ ଆନିଂ ନ ମାସା' ଡି'କେନ୍ବାଇ' ଅ'ରଇଁୟ'ତୁନ ଡ'ସେକ୍ ଅ'ଗଁସ୍ଲାକ୍ତା ଇ? ଆରାକ୍ ଡୁ'ତୁନା ଆଡେମ୍ତ । 21ତୁବୁକ୍ବୁରଂ ମାମା ଅ'ରଇଁପୁଲେଇ କୁମ୍ବିକ୍ନା ମୁନ୍ ଡେନ୍ତା ଡୁ'ତୁନା ଅ'ରଇଁପୁଲେଇ ମାଇନା ଅଦିକାର୍ ଡୁତା । ସା' ମାଇ ଗୁତୁନ୍ ତୁବୁକ୍ବୁରଂ କି'ଗେ ଅ'ରଇଁବେଲା ମୁଇ କିକ୍ ବଲ୍ କାମ୍ପୁଲେଇସା ମାରି ମୁଇ କିକ୍ ଅଲିରାକ୍ବାଇ' କାମ୍ପୁଲେଇସା ଅ'ରଇଁ ଗଂତା ।
22ଡୁ'ତୁନ୍ସୁଗ ମାପ୍ରୁସା ପାପ୍ ଡେମ'କୁନୁଂ ରେମ୍ବକ୍ ଗିସେକ୍ସେକ୍ ମାଇନା ବପୁ ଅସୁଇ'ପୁଲେଇ ମାରି ଆମା'ଏ ନାସାଇବାର୍ପୁଲେଇ ଅଦିକାର୍ ଡୁତା ଡ'ନାସା ମାଇ ଅବୁଦି ଆଇଁଲ'ସେକ୍ ଡୁତା । 23ମାସା'ଡ'ନା ମାପ୍ରୁ ଆଜାଆଜା ମୁଲ୍ବାଂସା' ସିରେଲ' ବୁଂଅଁ'ତା ଆମା'ଏ ମାଇନା ମଇମା ଅସୁଇ'ପୁଲେଇ ମାରି ଗୁତୁନ୍ ମଇମା ଆମା'ଏ ବିବେ'ପୁଲେଇ ମାଇ ଦୟା ଡେଂସେକ୍ ଡି'କେନ୍ ଡେମ'ତା । 24ଗୁତୁନ୍ପୁଲେଇଉ ମାପ୍ରୁ ଆନେଇ' ଆଏନ୍ତୁକ୍ର ଜିଉଦିରେମଲେବକ୍ ମାରି ଜିଉଦି ଆରାକ୍ବାଇ'ନା ରେମଲେବକ୍ସା ସିରେଲ'ତା । 25ମାପ୍ରୁ ସୁନ'କୁନୁଂ ଅଂଅଁ'ସେକ୍ ବାବବାଦି ଅସେୟଲା ମାଇନା ଉଲାକ୍ବକ୍ ଡି'କେନା ଲେକ୍ଲ'ବୁଂଅଁ'ତା, ମା ଡ'ନା,
“ଜାଜା ନିଂନା ରେମ ଆରାକ୍ ଆମା'ଏ ନିଂନା ରେମ ଡ'ସେକ୍ ସୁନ୍ତିଂ
ମାରି ଆଜାଆଜା ନିଂ ଆଲାତ୍ ଡେମ' ଆବୁଂତିଂ ଆମା'ଏ ଆଲାତ୍ ଡେମ୍ତିଂ ।
26ମାରି ଇମ୍ବ'ନ୍ ଜାଗାବକ୍ ଆମା'ଏ
ପେ ନିଂନା ରେମ ଆରାକ୍ ଡ'ସେକ୍ ସୁନ'କୁନିଂ
ଆତା ଆମା'ଏ ପେ ଜିବନ୍ ଡୁକୁନୁଂ ମାପ୍ରୁନା ଉଁ'ଉଁନେ ଡ'ସେକ୍ ୱାଇତିଂ”
ଡ'ସେକ୍ ଲେକ୍ଲ'ବୁଂଅଁ'ତା ।
27ମାରି ବାବବାଦି ଜିସାୟଲା ଇନ୍ତେକନ୍ଡେ'କା ଅବୁଦି ଡକ୍ତି'ତା କିରକ୍ସେକ୍ ଇସ୍ରାଏଲ୍ ରେମଲେନା ବିସୟ ଡି'କେନା ସୁନ'କୁ । ମା ଡ'ନା,
“ଇସ୍ରାଏଲ୍ ରେମଲେ ସମ୍ଦର୍କିନ୍ଡାକ୍ନା ବାଲିସୁଗ ଏଜା ମଗୁନଂବାଇ' ଅବୁଦି ଡେଂନାସା
ମା'ଏନ୍ ବିତ୍ରେ ଏନ୍ତୁକ୍ରଉ ପାପ୍କୁରୁଂ ରକ୍ୟା ବାମ୍ତା ।
28ମାସା'ଡ'ନା ପ୍ରବୁଲା ସୁନ'କୁନୁଂସୁଗ ଆଦର୍ତନିନା ରେମଲେ ଆଗୁଲାଇର
ବିସାର୍ ଡିନ୍ଡେମ୍ନା ଗୁଲାଇ ମାଇ ସେଟ୍ଟ' ଅ'ଡମ୍ତ” ଡ'ସେକ୍ ମାଇ ସୁନ'କୁ ।
29ମାରି ଜିସାୟଲା ମୁଲ୍ ସୁନ'ତା,
“ପ୍ରବୁ ଅବୁଦି ବପୁବାଇ',
ମାଇ ନେଇ'ନା ରେମଲେନ୍ ବିତ୍ରେ ଆ'ଇରବକ୍ସୁଗ ନେଇ'ପୁଲେଇ ବ'ରଲ' ଆବୁଂଅଁ'ନା
ଇନ୍ତେକନ୍ଡେ'କା ସଦମ୍ ମାରି ଗମରା ଡ'କୁନୁଂ ଇମ୍ବାରୁ ଉଂଗମ୍ନା ରେମଲେ ପାପ୍କାମ୍ ଡେମ'ସା' ଆଗୁଲାଇର ଅଗୁୟ'କୁନୁଂସୁଗ ନେଇ'ସା ଗୁଲାଇର ଗୁଇ'ୟାନେଇ'ବେ” ଡ'ସେକ୍ ସୁନ'ତା ।
ଇସ୍ରାଏଲ୍ ରେମଲେ ବିସ୍ବାସ୍ ଆଡେମ୍ତ
30ଡୁ'ତୁନ୍ ଡ'ନା କେନ୍ ଗୁଲାଇନା ଅର୍ତ ମାଲେଇ? ଜାଜା ଜିଉଦିରେମ ଆରାକ୍ ମା'ଏ ବଲ୍ରେମ୍ ଏତିଂ ଡ'ସେକ୍ ବଲ୍କାମ୍ ଆଡେମ୍ତ ଡ'ନାସା' ମା'ଏନ୍ ବିତ୍ରେ ଏନ୍ତୁକ୍ର ଆଜିସୁଲା ବିସ୍ବାସ୍ ଡେମ'ସା' ମାପ୍ରୁ ଆମା'ଏ ବଲ୍ରେମ୍ ଅ'ଏଲ' । 31ମାତର୍ ଇସ୍ରାଏଲ୍ ରେମଲେ ମସାନା ନିୟମ୍ ଗୁଲାଇ ମାନ୍ସେକ୍ ଦରମ୍ରେମ୍ ଏପୁଲେଇ ଆ'ଇ ସେସ୍ଟା ଡେମ'ସା'ଏସା ମା'ଏ ଦରମ୍ରେମ୍ ଏ ଆଗଂତା । 32ମାସା'ଡ'ନା ମା'ଏ ମାପ୍ରୁନ୍ବକ୍ ବିସ୍ବାସ୍ ମଡିନେମ୍ ନିଜେ ବଲ୍କାମ୍ ଡେମ'ସେକ୍ ମାରି ନିୟମ୍ ମାନ୍ସେକ୍ ଦରମ୍ରେମ୍ ଏପୁଲେଇ ସେସ୍ଟା ଡେମ'ବୁଂଅଁ' । ମାତର୍ ଆଜିସୁଲା ବିସ୍ବାସ୍ ଆଡେମ୍ତସା' ମୁଇନ୍ଡା ବୁରେବକ୍ ଅତିପ୍ରକ୍ସେକ୍ ଲ'କୁନୁଂସୁଗ ମା'ଏ ଡେଂଉଇଗା' । 33ମାପ୍ରୁନା ଉଲାକ୍ବକ୍ ଗୁତୁନ୍ ବୁରେନା ବିସୟ ଡି'କେନା ଲେକ୍ଲ'ବୁଂଅଁ'ତା, ମା ଡ'ନା: “ଜୁ, ନିଂ ସିୟନ୍ ଡ'କୁନୁଂ ମୁନା'ଉଂଗମ୍ବକ୍ ମୁଇ ବୁରେ ବୁଂତିଂ । ଗୁତୁନ୍ ବୁରେ ବାଗ୍ବକ୍ ରେମଲେ ଅତିପ୍ରକ୍ସେକ୍ ଲଗ୍ଡାଇ'ତା । ମାତର୍ ଆମାଇ ଜା ବିସ୍ବାସ୍ ଡେମ୍ତ ମାଇ ଇନ୍ଡଇ'ଏସା ଆଗେୱାତା ।”
Currently Selected:
ରମିୟ 9: BFW
Highlight
Copy
Compare
Share
Want to have your highlights saved across all your devices? Sign up or sign in
CC BY-NC-ND 4.0