ରମିୟ 8
8
ମାପ୍ରୁନା ଜିବନ୍ ଆନେଇ' ତିମେ ଜିବନ୍ ବେଡ'ତା
1ସା' ଆ'ନା ଜା ଆକିରିସ୍ଟ ଜିସୁଲା ବିସ୍ବାସ୍ ଡେମ'ସେକ୍ ଡୁତା ଆମାଇ ମାପ୍ରୁ ପାପ୍ବାଇ' ରେମ ଡ'ସେକ୍ ଡନ୍ଡ୍କସ୍ଟ ଆବେ'ତ । 2ମାସା'ଡ'ନା ନେଇ' ଆକିରିସ୍ଟ ଜିସୁଲା ବିସ୍ବାସ୍ ଡେମ'ସେକ୍ ମାଇବୁରଂ ମିସ୍ଗୁତୁନେଇ'ସା' ମାପ୍ରୁନା ଜିବନ୍ନା ନିୟମ୍ ଆନେଇ' ତିମେ ଜିବନ୍ ବେଡ'ସେକ୍ ପାପ୍ନା ବପୁକୁରୁଂ ଆନେଇ' ଅ'ତୁର' । ସା' ଆ'ନା ଗୁତୁନ୍ ପାପ୍ ଆନେଇ' ଇସାଉ ପାପ୍କାମ୍ ଅ'ଡେମ'ସେକ୍ ଅଗୁଇ' ଆଗଂତା । 3ନିୟମ୍ ଗୁଲାଇ ପାପ୍କାମ୍ ଡିନ୍ଡେମ୍ନା ମୁନ୍କୁରୁଂ ଆନେଇ' ରକ୍ୟା ଡିନ୍ଡେମ୍ ଆଗଂତା । ମାସା'ଡ'ନା ନେଇ' ରେମଲେ ନେଇ'ନା ବପୁବୁରଂ ଗୁତୁନ୍ ନିୟମ୍ ମାନ୍ସେକ୍ ଡୁକୁ ଆଗଂତୁନେଇ' । ନିୟମ୍ ମାନ୍ସେକ୍ ଡୁକୁନା ନେଇ' ରକ୍ୟା ବାମ୍ତୁନେଇ' ଡ'ସେକ୍ ଏତ୍କୁନେଇ' ମାତର୍ ଆଗଂତୁନେଇ'ସା' ମାପ୍ରୁ ଆନେଇ' ରକ୍ୟା ଡେମ' । ମି ଡ'ନା ମାଇ ଆମାଇନା ଉଁ'ଉଁ ମୁଇ ରେମସୁଗ ଡେମ'ସେକ୍ କେନ୍ ଦର୍ତନିବକ୍ ବେନ୍ଟାୟ' । ମାସା'ଡ'ନା ନେଇ' ଡେମ'କୁନୁଂ ପାପ୍ପୁଲେଇ ଗୁଇଏଇ' ଡ'ସେକ୍ ବେନ୍ଟାୟ' । ସା' ନେଇ' ପାପ୍ବାଇ' ରେମଲେନା ଞେରି ମି ଡୁତା ଡୁ'ତୁନା ମାଇସା ନେଇ'ସୁଗ ରେମ ଏଗା' । ମାଇ ରେମ ଏଗ୍ସେକ୍ ଗୁତୁନ୍ ଞେରିବକ୍ ନେଇ'ନା ପାପ୍ ଗୁଲାଇ ନାସାୟ'ସୁଂଅଁ' । 4ମାସା' ମାପ୍ରୁ ଡୁ'ତୁନ୍ ଡେମ' ଡ'ନା, ନେଇ'ନା ଞେରିନା ମୁନ୍ସୁଗ ପାପ୍କାମ୍ ଡିନ୍ଡେମ୍ପୁଲେଇ ନେଇ'ନା ଜିବନ୍ ଆ'ନା ଆବୁଂତୁନେଇ' ମାତର୍ ଆ'ନା ପବିତ୍ର ଆତ୍ମାନା ମୁନ୍ସୁଗ ଡୁତୁନେଇ'ସା' ନିୟମ୍ବକ୍ ଲେକ୍ଲ'କୁନୁଂସୁଗ ନେଇ' ବଲ୍ରେମ୍ ଏପୁଲେଇ ମାପ୍ରୁ ଡୁ'ତୁନା ଡେମ' ।
5-6ମାସା'ଡ'ନା ଜାଜା ଇସାଉ ଅଲିରାକ୍ବାଇ' ମୁନ୍ ଡେଂସେକ୍ ଡୁତା ମା'ଏ ଇସାଉ ଅଲିରାକ୍ବାଇ'ଉ ଏତ୍ସେ'ଗା ଡୁତା । ଡୁ'ତୁନ୍ବାଇ' ରେମଲେ ଗୁଇ'ତା । ମାତର୍ ଜାଜା ଇସାଉ ପବିତ୍ର ଆତ୍ମାନା ମୁନ୍ସୁଗ ଡୁତା ମା'ଏ ଇସାଉ ପବିତ୍ର ଆତ୍ମାନା ମୁନ୍ ମା ଗୁତୁନାଉ ଏତ୍ସେକ୍ ଡୁତା । ଡୁ'ତୁନ୍ବାଇ' ରେମଲେବକ୍ ଜିବନ୍ ମାରି ସାନ୍ତିସାର୍ଦା ବାମ୍ତା । 7ମାସା'ଡ'ନା ମୁଇନ୍ଡା ନିଜର୍ନା ଞେରିନା ମୁନ୍ସୁଗ ପାପ୍କାମ୍ ଡିନ୍ଡେମ୍ପୁଲେଇ ଏତ୍ସେକ୍ ଡୁକୁନା ଆମାଇ ମାପ୍ରୁନା ନିୟମ୍ସୁଗ ଡୁକୁପୁଲେଇ ମୁନ୍ ଆଡୁତା ମାରି ମାଇ ଇନ୍ଡଇ'ଏସା ମାପ୍ରୁନା ତୁମ' ମାନ୍ବାର୍ ଆଗଂତାସା' ମାଇ ମାପ୍ରୁବୁରଂ ଦାଇ ଡେଂସେକ୍ ଡୁତା । 8ମାରି ଜାଜା ନିଜର୍ନା ଞେରିନା ମୁନ୍ସୁଗ ପାପ୍କାମ୍ ଡେମ'ସେକ୍ ଡୁତା ମା'ଏ ଆମାପ୍ରୁ ସାର୍ଦାକୁସି ଅ'ଡେମ୍ ଆଗଂତା ।
9ମାତର୍ ପେନ୍ ଜିବନ୍ବକ୍ ମାପ୍ରୁନା ଜିବନ୍ ଡୁତା ଡ'ନା ପେ ପେନା ମୁନ୍ସୁଗ କାମ୍ ଆଡେମ୍ତୁପେ ମାତର୍ ମାପ୍ରୁନା ଜିବନ୍ ମା ଡେମ୍ ଡ'ସେକ୍ ସୁନ୍ତ ଗୁତୁନାଉ ପେ ଡେମ୍ତୁପେ । ମାରି ଜାଜାନ୍ ଜିବନ୍ବକ୍ କିରିସ୍ଟନା ଜିବନ୍ ଆଡୁତା ମା'ଏ ମାଇନା ରେମ ଆରାକ୍ । 10ପେ ପାପ୍ ଡେମ'ତୁପେସା' ପେନା ଜିବନ୍ ଇସାଉ ଗୁଇ'କୁନୁଂସୁଗ ଡୁତା ଡ'ନାସା ପେ ଆକିରିସ୍ଟଲା ବିସ୍ବାସ୍ ଡେମ'ତୁପେସା' ପେନା ଜିବନ୍ବକ୍ କିରିସ୍ଟଲା ଡୁତାସା' ମାପ୍ରୁ ଆପେ ଦରମ୍ବାଇ' ରେମ ଡ'ସେ'ଗାଉ ଜୁତ । 11#1 କରି 3:16ମାପ୍ରୁ ପବିତ୍ର ଆତ୍ମାନା ବପୁବୁରଂ ଆକିରିସ୍ଟ ଜିସୁଲା ଗୁଇ'କୁନୁଂକୁରୁଂ ବ'ରଲ'ତା । ଗୁତୁନ୍ ପବିତ୍ର ଆତ୍ମାଉ ପେନ୍ ଜିବନ୍ବକ୍ସା ଡୁତା । ସା' ମାଇନା ବପୁବୁରଂ ନେଇ'ନା ଗୁଇ'କୁନୁଂ ଞେରି ମାପ୍ରୁ ବ'ରତ ।
12ଅ ନିଂନା ବୁୟାଂଏଁ ତୁନାଲେ, ଡୁ'ତୁନ୍ସା' ଆ'ନା ନେଇ' ମା ଡିନ୍ଡେମ୍ ଡୁତା ଡ'ନା, ନେଇ' ନେଇ'ନା ଞେରିନା ମୁନ୍ସୁଗ ଅଲିରାକ୍ବାଇ' କାମ୍ ଡେମ' ଡୁକୁ ଆରାକ୍ । 13ମାସା'ଡ'ନା ନେଇ' ନେଇ'ନା ଞେରିନା ମୁନ୍ସୁଗ ଅଲିରାକ୍କାମ୍ ଡେମ'ସେକ୍ ଡୁକୁନା ନେଇ' ଗୁଇ'ତୁନେଇ' । ମାତର୍ ନେଇ'ନା ମୁନ୍ସୁଗ ଡେମ'କୁନୁଂ ଗୁଲାଇ ଅଲିରାକ୍କାମ୍ ମାପ୍ରୁନା ଜିବନ୍ନା ବପୁବୁରଂ ଅଡକ୍ସୁଂଅଁ'ନା ନେଇ' ଜିବନ୍ ବାମ୍ତୁନେଇ' । 14ମାସା'ଡ'ନା ମାପ୍ରୁନା ଜିବନ୍ ସୁନ'କୁନୁଂ ଅଂଅଁ'ସେକ୍ ମାଇନା ମୁନ୍ସୁଗ ଜା ଡୁତା ମା'ଏ ମାପ୍ରୁନା ଉଁ'ଉଁନେ ।
15 #
ଗାଲା 4:5–7
#
ମାର୍କ 14:36; ଗାଲା 4:6 ସା' ମାପ୍ରୁ ମାଇନା ଜିବନ୍ ଆନେଇ' ବେଡ'ତାସା' ନେଇ' ମାଇନା ଉଁ'ଉଁନେ ଏଗୁତୁନେଇ' । ସା' ମୁଇନ୍ଡା ଗତିରେମ୍ ଆମାଇନା ସାକାର୍ ବୁତୁଂସେକ୍ ଡୁକୁନୁଂସୁଗ ନେଇ' ବୁତୁଂସେକ୍ ଡୁକୁ ଦର୍କାର୍ ଆରାକ୍ । ମାସା'ଡ'ନା ନେଇ' ମାଇନା ଉଁ'ଉଁନେ ମାରି ମାଇନା ଜିବନ୍ ନେନ୍ବକ୍ ଡୁତାସା' ଆମାଇ ନେଇ' “ଅ ବା” ଡ'ସେକ୍ ୱାଇତୁନେଇ' । 16ମାସା'ଡ'ନା ମାପ୍ରୁନା ଜିବନ୍ ନେଇ'ନା ଜିବନ୍ବକ୍ ଡୁତାସା' ପେ ମାପ୍ରୁନା ଉଁ'ଉଁନେ ଡ'ସେକ୍ ମାପ୍ରୁନା ଜିବନ୍ ନେଇ'ନା ଜିବନ୍ବୁରଂ ଅଇଁୟ'ତା । 17ନେଇ' ମାପ୍ରୁନା ଉଁ'ଉଁନେସା' ମାପ୍ରୁ ଆମାଇନା ଉଁ'ଉଁନେ ବିବେ'ପୁଲେଇ ଡ'ସେକ୍ ବୁଂଅଁ'କୁନୁଂ ଗୁଲାଇ ମାଇ ଆନେଇ'ସା ବେ'ତ । ଗୁତୁନାଉ ଡ'ସେକ୍ ଆରାକ୍, ଆକିରିସ୍ଟଲା ମାମା ବେ'ତ ଗୁତୁନ୍ ସମାନ୍ ଆନେଇ'ସା ବେ'ତ । ଜିସୁଲା ଦର୍ତନିବକ୍ ଡୁକୁନୁଂବେଲା ରେମଲେ ଆମାଇ ମି ଅବୁଦି କସ୍ଟ ବେଡ'କୁ ଡୁ'ତୁନ୍ଉ ନେଇ' ଆମାଇ ବିସ୍ବାସ୍ ଡେମ'ତୁନେଇ'ସା' ରେମଲେ ଆନେଇ'ସା କସ୍ଟ ବେଡ'ନା ମାପ୍ରୁ ଆମାଇସୁଗ ଆନେଇ'ସା ସମାନ୍ ମଇମା ବେ'ତ ।
ଆ'ନା ନେଇ' କସ୍ଟ ବାଂଗୁତୁନେଇ' ଡ'ନାସା ତିର୍ଗି'ସୁମଂ ମାପ୍ରୁ ଆନେଇ' ବାନିବାଇ' ଜିବନ୍ ବେ'ତ
18ନେଇ' ଆ'ନା ଆକେ ତୁବୁକ୍ବକ୍ ଡୁକୁନୁଂବେଲା କସ୍ଟ ବାଂଗୁତୁନେଇ', ଗୁତୁନା ସତ୍ । ମାତର୍ ମାପ୍ରୁ ଆନେଇ' ତିର୍ଗି'ସୁମଂ ବିବେ'ପୁଲେଇ ବୁଂଅଁ'କୁନୁଂ ମଇମା ଗୁଲାଇ ଏତ୍ସେକ୍ ଡୁକୁନା ଆ'ନା ଆନେଇ' ବାଂକୁନୁଂ କସ୍ଟ ଗୁଲାଇ ବୁଏ' ଅବ'କୁନୁଂସୁଗଉ ଡୁତା ଡ'ସେକ୍ ଏତ୍ଗୁତିଂ । 19ମାସା'ଡ'ନା ମାପ୍ରୁ ଅ'ରଇଁଆର'କୁନୁଂ ଗୁଲାଇ ମାପ୍ରୁନା ଉଁ'ଉଁନେ ଜାଜା ଡ'ସେକ୍ ମାପ୍ରୁ ଅସୁଇ'ନା ବେଲା ଇନ୍ଡଇ'ୟା ସାପ୍ତା ଡ' ଅବୁଦି ଆସ୍ସେକ୍ ଜାଗ୍ଲ'ତା । 20ମୁଲ୍ମୁଲ୍ ମାପ୍ରୁ କେନ୍ ଦର୍ତନିବକ୍ ଡୁକୁନୁଂ ଗୁଲାଇ ମା ଏତ୍ସେକ୍ ଅ'ରଇଁୟ'ବୁଂଅଁ' ଡୁ'ତୁନ୍ସୁଗ ଆ'ନା ଡେଂଆଡୁତା । ଆ'ନା ମି ଡେଂଗୁତା ଡୁ'ତୁନ୍ଉ ଡେମେଇ' ଡ'ସେକ୍ ଦର୍ତନି ମାରି ଦର୍ତନିବକ୍ ଡୁକୁନୁଂଏନା ମୁନ୍ ଆରାକ୍ ମାତର୍ ମାପ୍ରୁନା ମୁନ୍ ଡୁକୁସା' ମାଇଉ ଆଗୁଲାଇ ଡୁ'ତୁନ୍ଉ ଡେମ' । ମାତର୍ ମୁସିଂ ମାପ୍ରୁ ଆଗୁଲାଇ ବଲ୍ ଡେମ୍ତ । ଗୁତୁନ୍ ଦିନ୍ ଇନ୍ଡ'ଇୟା ସାପ୍ତା ଡ'ସେକ୍ ମାପ୍ରୁ ଅ'ରଇଁୟ'କୁନୁଂ ଗୁଲାଇ ଅବୁଦି ଆସ୍ସେକ୍ ଜାଗ୍ଲ' ଡୁତା । 21ଆ'ନା ଜୁଲ'ନା ମାପ୍ରୁ ଅ'ରଇଁୟ'କୁନୁଂ ଗୁଲାଇ ଗୁଗୁଇ'ଆର୍ସେକ୍ ବୁ'ଗୁତା ମାତର୍ ମୁଇ ଦିନ୍ ସାପ୍ତା ଉନ୍ତା ମାପ୍ରୁ ଆଗୁଲାଇ ବଲ୍ ଡେମ୍ତସା' ଆଗୁଇ'ତା ମାରି ଆବୁ'ତା । ଆଗୁଲାଇର ମାପ୍ରୁ ମାଇନା ଉଁ'ଉଁନେସୁଗ ମଇମା ବେଡ'ସେକ୍ ବଲ୍ ଜୁତ ।
22ମୁଇନ୍ଡା ଜନମ୍ସି ଡେଂସେକ୍ ଡୁକୁନୁଂ ସେଲାନ୍ଲା ମି କସ୍ଟ ବାଂସେକ୍ ଡୁତା ଡୁ'ତୁନ୍ସୁଗ କେନ୍ ଦର୍ତନିବକ୍ ମାପ୍ରୁ ଅ'ରଇଁୟ'କୁନୁଂ ଗୁଲାଇ ଆ'ନ୍ପନ୍ତେକ୍ ସାଉର'ପୁନ୍ଡେମ'ସେକ୍ ଡୁତା ଡ'ସେକ୍ ନେଇ' ମାଗ'ତୁନେଇ' । 23#2 କରି 5:2–4ଗୁତୁନାଉ ଡ'ସେକ୍ ଆରାକ୍, ମାପ୍ରୁ ଆନେଇ' ବେ'ତିଂ ଡ' ତିତିବାଡ'ସେକ୍ ସୁନ'କୁନୁଂବକ୍ ସିଁସେଇଁ ମାପ୍ରୁନା ଜିବନ୍ ଆନେଇ' ମୁଇ ସିନସୁଗ ମାପ୍ରୁ ବେଡ'ତା । ମାରି ମାଇ ଆନେଇ' ମୁସିଂ ମାଇନା ଉଁ'ଉଁ ଅ'ଏଲ'ସେକ୍ ଗୁଲାଇ ଅଲିରାକ୍କୁରୁଂ କସ୍ଟକୁରୁଂ ଅ'ତୁର'ସେକ୍ ବଲ୍ ଡେମ୍ତ ଡ'ସେକ୍ ଆତୁନ୍ ଦିନ୍ ଜାଗ୍ଲ'ସେକ୍ ନେଇ'ନା ଜିବନ୍ ବିତ୍ରେ ନେଇ'ସା' ଅବୁଦି ସାଉର'ପୁନ୍ଡେମ'ସେକ୍ ଡୁତୁନେଇ' । 24ନେଇ' ଡନ୍ଡ୍କସ୍ଟ ବୁମ୍ବାମ୍ନାକୁରୁଂ ମାପ୍ରୁ ଆନେଇ' ରକ୍ୟା ଡେମ'କୁନୁଂବାଂସା' ମାପ୍ରୁ ଆନେଇ' ବେ'ତିଂ ଡ' ତିତିବାଡ'ସେକ୍ ସୁନ'କୁନୁଂ ମାଇ ବେ'ତ ଡ'ସେକ୍ ଅବୁଦି ଆସ୍ସେକ୍ ନେଇ' ଡୁତୁନେଇ' । ମାତର୍ ଜାଜା ଆସ୍ସେକ୍ ଡୁକୁନୁଂ ଗୁତୁନ୍ ବାଂଗୁତା ଡ'ନା ମା'ଏ ମାରି ଗୁତୁନ୍ ବୁମ୍ବାମ୍ପୁଲେଇ ଆସ୍ବାର୍ ଦର୍କାର୍ ଆରାକ୍ । 25ନେଇ' ମାମା ବୁମ୍ବାମ୍ ଅରଇ' ଗୁତୁନ୍ପୁଲେଇ ନେଇ' ଆସ୍ସେକ୍ ଡୁତୁନେଇ' । ଡୁ'ତୁନ୍ ଡ'ନା ଗୁତୁନ୍ ବାମ୍ତା ଡ'ସେକ୍ ନେଇ' ଅବୁଦି ଆଇଁଲ'ସେକ୍ ଜାଗ୍ବାର୍ ଡୁତା ।
26ଡୁ'ତୁନା ନେଇ' ବାମ୍ତୁନେଇ' ଡ'ସେକ୍ ଆସ୍ସେକ୍ ଡୁକୁନୁଂବେଲା ନେଇ' ଆମାପ୍ରୁ ବିସ୍ବାସ୍ ଡେମ'କୁନୁଂ ଉନାକ୍ ଉଇଡେଂକୁନା ମାରି ଅଦିକ୍ ବପୁ ବାଂସେକ୍ ଡୁକୁପୁଲେଇ ମାପ୍ରୁନା ଜିବନ୍ ଆନେଇ' ସାନ୍ଡୁଂତ । ମାରି ମି ପାର୍ତନା ଡିନ୍ଡେମ୍ ଡୁତା ଡ'ସେକ୍ ନେଇ' ଆମାକ୍ତୁନେଇ'ସା' ମାପ୍ରୁନା ଜିବନ୍ ନିଜେ ନେଇ'ପୁଲେଇ ଆମାପ୍ରୁ ପାର୍ତନା ଡେମ୍ତ, ମାତର୍ ମାଇ ମି ପାର୍ତନା ଡେମ'ତା ଗୁତୁନ୍ ନେଇ' ରେମଲେ ମୁମାକ୍ ଆଗଂତୁନେଇ' । 27ରେମଲେ ଗୁଲାଇର ମା'ଏନା ଜିବନ୍ବକ୍ ମାମା ଏତ୍ଗୁତା ଗୁତୁନ୍ ଗୁଲାଇ ମାପ୍ରୁ ମାଗ'ତାସା' ପବିତ୍ର ଆତ୍ମା ରେମଲେପୁଲେଇ ମା ଡ' ପାର୍ତନା ଡେମ'ତା ଡ'ସେକ୍ ମାପ୍ରୁ ମାଗ'ତା । ମାସା'ଡ'ନା ମାପ୍ରୁନା ମୁନ୍ ମା ଡ'ସେକ୍ ପବିତ୍ର ଆତ୍ମା ମାଗ'ତାସା' ଡୁ'ତୁନାଉ ମାଇ ମାପ୍ରୁନା ରେମଲେପୁଲେଇ ପାର୍ତନା ଡେମ'ତା । 28ମାରି ଜାଜା ଆମାପ୍ରୁ ଆଲାତ୍ ଡେମ'ତା ଆମା'ଏଉ ମାପ୍ରୁ ସିଁସେଇଁ ଏତ୍କୁନୁଂସୁଗ ସିରେଲ'ତା, ସା' ମା'ଏନ୍ ଜିବନ୍ବକ୍ ମାମା ଡେଂଗୁତା ଗୁତୁନ୍ ଗୁଲାଇ ମା'ଏନା ବଲ୍ପୁଲେଇ ମାପ୍ରୁ ଡେମ'ତା ଡ'ସେକ୍ ନେଇ' ମାଗ'ତୁନେଇ' । 29ମାସା'ଡ'ନା ମାପ୍ରୁ ଆମାଇନା ରେମଲେ ମୁଲ୍ମୁଲ୍ବାଂସା' ମାଗ'ବୁଂଅଁ' । ମାରି ଆନିଂନା ଉଁ'ଉଁ ଆଜିସୁଲାସୁଗ ଆମା'ଏ ଅ'ଏତିଂ ଡ'ସେକ୍ ମାଇ ଏତ୍କୁ । ମାସା'ଡ'ନା ମା'ଏ ଡୁ'ତୁନା ଏଗ୍ନା ମାପ୍ରୁନା ଗୁଲାଇ ଉଁ'ଉଁନେନ୍ ବିତ୍ରେ ଜିସୁଲା ମୁନା' ବୁୟାଂ ଏତା ଡ'ସେକ୍ ଏତ୍ଗା' । 30ମାରି ମାପ୍ରୁ ଆଜାଆଜା ମୁଲ୍ମୁଲ୍ ସିରେଲ' ବୁଂଅଁ'କୁ ମା'ଏ ଆମାଇ ବିସ୍ବାସ୍ ଡିନ୍ଡେମ୍ପୁଲେଇ ମାଇନ୍ବକ୍ ୱାୟ' । ୱାୟ'ସେକ୍ ମାଇ ଆମା'ଏ ଦରମ୍ରେମ୍ ଅ'ଏଲ' । ମାପ୍ରୁ ଆଜାଆଜା ଡୁ'ତୁନ୍ଉ ଦରମ୍ରେମ୍ ଅ'ଏଲ' ଆମା'ଏ ଜିସୁ କିରିସ୍ଟଲାବୁରଂ ମଇମା ବେଡ'ତା ।
କିରିସ୍ଟ ଜିସୁନା ଆଲାତ୍କୁରୁଂ ଆନେଇ' ମାଏସା ସୁଲୁଂ ବୁଂବୁଂ ଆଗଂତା
31ଡୁ'ତୁନ୍ ଡ'ନା କେନ୍ ଗୁଲାଇଉ ଏତ୍ସେକ୍ ନେଇ' ମା ସୁଁସୁ ଡୁତା? ମାପ୍ରୁ ନେଇ'ବୁରଂ ଡୁତା ଡ'ନା ଜାଏସା ଆନେଇ' ମାଏସା ଡିନ୍ଡେମ୍ ଆଗଂତା । 32ମାପ୍ରୁ ଆମାଇନା ଉଁ'ଉଁ ଆନେଇ' ବିବେ'ପୁଲେଇ ଆଁନ୍ସାଂତା ମାତର୍ ନେଇ' ଗୁଲାଇରନା ପାପ୍ପୁଲେଇ ଗୁଇଏଇ' ଡ'ସେକ୍ ବେଡ' । ଡୁ'ତୁନ୍ ବେଡ'ତା ଡ'ନା ମାଇ ଆନେଇ' ତିତିବାଡ'ସେକ୍ ବେ'ତିଂ ଡ'କୁନୁଂ ଗୁଲାଇଉ ଜିସୁଲାବୁରଂ ଆନେଇ'ସା' ଆବେ'ତ ଇ? 33ମାପ୍ରୁ ଆନେଇ' ସିରେଲ'ସେକ୍ ଦରମ୍ରେମ୍ ଅ'ଏଲ' ବୁଂଅଁ'ତାସା' ଜାଏସା ଆନେଇ' ମା'ଏ ପାପ୍ରେମ୍ ଡ'ସେକ୍ ମାରି ସୁଁସୁ ଗଂତା ଇ? ଆରାକ୍ । 34ମାରି ଆନେଇ' ପାପ୍ରେମ୍ ଡ'ସେକ୍ ଜାଏସା ଡନ୍ଡ୍କସ୍ଟ ବିବେ' ଗଂତା ଇ? ଆରାକ୍ । ମାସା'ଡ'ନା କିରିସ୍ଟ ଜିସୁଲା ନେଇ'ନା ପାପ୍ପୁଲେଇ ଗୁଇ'ସେକ୍ ମାରି ବୁରକ୍ସେକ୍ ମାପ୍ରୁନା ସୁସୁମ୍ତିକୁରୁଂ ଲେଇ'ସେକ୍ ନେଇ'ପୁଲେଇ ପାର୍ତନା ଡେମ'ସେକ୍ ଡୁତା । 35ସା' ଡୁ'ତୁନ୍ ଡ'ନା କିରିସ୍ଟନା ଆଲାତ୍କୁରୁଂ ଆନେଇ' ଜାଏସା ପାଲ୍ପାଲ୍ ଡିନ୍ଡେମ୍ ଆଗଂତା । ମାରି ନେଇ'ନା ଜିବନ୍ବକ୍ ଦୁକକସ୍ଟ ସାକ୍ନାସା ମାରି ସିନ୍ତା ସାକ୍ନାସା ମାରି ରେମଲେ ଆନେଇ' ବୁଗ'ତିଲ'ନାସା ମାରି ସୁସୁମ୍ଇ'ନା ଆବାଂନାସା ମାରି ନାଂଗା ଡେଂନାସା ମାରି ଅଗୁୟ'ସୁଂଅଁ'ନାସା କିରିସ୍ଟଲା ଆନେଇ' ଆଲାତ୍ ଡେମ'ସେ'ଗାଉ ଡୁତା ମାରି ମାଇନା ଆଲାତ୍କୁରୁଂ ମାଏସା ଆନେଇ' ପାଲ୍ ଡିନ୍ଡେମ୍ ଆଗଂତା । 36ଇନ୍ତେକନ୍ଡେ'କା ମାପ୍ରୁନା ଉଲାକ୍ବକ୍ ଡି'କେନା ଲେକ୍ଲ'ବୁଂଅଁ'ତା, ମା ଡ'ନା,
“ଅ ମାପ୍ରୁ, ଆନ ନେଇ ମାନ୍ସେକ୍ ଡୁତୁନେଇସା' ରେମଲେ ଆନେଇ ଅଡାପ୍ତୁନେଇ ଡ'ସେକ୍ ଇସାଉ କସ୍ଟ ବେଡ'ତା ।
ଆମେନ୍ଡାଲେ ଅଡାବ'ସେକ୍ ସୁସୁମ୍ପୁଲେଇ ବୁଂଅଁ'କୁନୁଂସୁଗ ଆନେଇ ଜୁଲ'ତା ।”
37ମାତର୍ ଆନେଇ' ଡି'କେନ୍ ଗୁଲାଇ କସ୍ଟ ଡେଂନାସା ଜିସୁ କିରିସ୍ଟଲା ଆନେଇ' ଆଲାତ୍ ଡେମ'ତାସା' ମାଇନା ବପୁବୁରଂ କେନ୍ ଗୁଲାଇନା ବାଗ୍ବକ୍ ନେଇ' ଜିନ୍ସେକ୍ ଡୁତୁନେଇ' । 38-39ମାସା'ଡ'ନା ନେଇ' ଗୁଇ'ନାସା ବୁରକ୍ନାସା ମାଇ ଆନେଇ' ଆଲାତ୍ ଡେମ'ତା । ମାରି ମାପ୍ରୁନା ଦୁତଲେସା କି ବୁତ୍ଲେସା ଆନେଇ' ମାଇନା ଆଲାତ୍କୁରୁଂ ସୁଲୁଂ ବୁଂବୁଂ ଆଗଂତା । ମାରି ଆ'ନା ମା ଡେଂନାସା ବେରା ମା ଡେଂନାସା ମାଇନା ଆଲାତ୍ ଇସାଉ ଡୁତା । ମାରି ଅବୁଦି ଅଦିକାର୍ ଡୁକୁନୁଂଏଁ ଡ'ନାସା ମାରି ସରଗ୍ନା ମାମା ଡ'ନାସା ଦର୍ତନିନା ମାମା ଡ'ନାସା ମାରି ମାପ୍ରୁ ଅ'ରଇଁୟ'କୁନୁଂ ଇମ୍ବ'ନାସା ନେଇ'ନା ପ୍ରବୁ କିରିସ୍ଟ ଜିସୁନା ଲାଗିରେ ଆନେଇ' ମାପ୍ରୁ ଆଲାତ୍ ଡେମ'କୁନୁଂକୁରୁଂ ସୁଲୁଂ ବୁଂବୁଂ ଆଗଂତା ଡ'ସେକ୍ ନିଂ ବଲ୍ ମାଗ'ତିଂ ।
Currently Selected:
ରମିୟ 8: BFW
Highlight
Copy
Compare
Share
Want to have your highlights saved across all your devices? Sign up or sign in
CC BY-NC-ND 4.0