ରମିୟ 7
7
ମସାନା ନିୟମ୍କୁରୁଂ ଜିସୁଲା ଆନେଇ' ଅ'ତୁର'ତା
1ଅ ନିଂନା ବୁୟାଂଏଁ ତୁନାଲେ, ପେ ଗୁଲାଇର ନିୟମ୍ ଗୁଲାଇ ମାଗ'କୁନୁଂ ରେମଲେ ଡ'ସେକ୍ ନିଂ ମାଗ'ତିଂ । ସା' ଆ'ନା ଜୁ, ମୁଇନ୍ଡା ରେମ ଆ'ଇ ଦିନ୍ ଜିବନ୍ ବାଂସେକ୍ ଡୁତା ଆଇ'ତୁନ୍ ଦିନ୍ ମାଇ ଗୁଲାଇ ନିୟମ୍ ମାନ୍ସେକ୍ ଡୁକୁଡୁତା ଡ'ସେକ୍ ପେ ଆମାକ୍ତୁପେ ଇ? 2ଆପେ ଅମାକ୍ପୁଲେଇ କେନ୍ ମୁଇ ସୁନ୍ତିଂ, ଜୁ, ମୁଇନ୍ଡା ସେଲାନ୍ଲା ଇ'ପର୍ଗା' ଡ'ନା ଗୁତୁନ୍ ଇଂଗେରା ଗୁଗୁଇ'ପନ୍ତେ'କା ମାଇବୁରଂଉ ଗୁତୁନ୍ ସେଲାନ୍ଲା ତିରେ ଡୁକୁଡୁତା ଡ'ସେକ୍ ନେଇ'ନା ନିୟମ୍ ଡୁତା । ମାତର୍ ମାଇନା ଇମ୍ପର୍ ଗୁଇ'ଗା' ଡ'ନା ଗୁତୁନ୍ ନିୟମ୍ସୁଗ ମାଇ ମାରି ଡୁକୁ ଦର୍କାର୍ ଆରାକ୍ । 3ଇମ୍ପର୍ଡେଇଁ ଡୁକୁନୁଂବେଲା ମାଇ ପାଲ୍ ଇଂଗେରେବୁରଂ ଲେମକ୍ନା ଆମାଇ ରେମଲେ ଜାଲିବାଇ' ସେଲାନ୍ଲା ଡ'ସେକ୍ ସୁନ୍ତ । ମାତର୍ ଇମ୍ପର୍ଡେଇଁ ଗୁଇ'ଗା' ଡ'ନା ମାଇ ନିୟମ୍ସୁଗ ଡୁକୁ ଦର୍କାର୍ ଆରାକ୍ସା' ମାଇ ଆପାଲ୍ ଆମୁଇନ୍ଡା ଇ'ପର୍ଗା' ଡ'ନା ଆମାଇ ରେମଲେ ଜାଏସା ଜାଲିବାଇ' ଡ'ସେକ୍ ଆସୁନ୍ତ ।
4ଡୁ'ତୁନ୍ଉ, ଅ ନିଂନା ବୁୟାଂଏଁ ତୁନାଲେ, ଇନ୍ତେକନ୍ଡେକ୍ ନେଇ' ଗୁତୁନ୍ ନିୟମ୍ ମାନ୍ସେକ୍ ଡୁକୁନେଇ' ମାତର୍ ଆ'ନା ନେଇ' କିରିସ୍ଟଲାବୁରଂ ଗୁଇ'ଗୁତୁନେଇ'ସା' ଗୁତୁନ୍ ନିୟମ୍ସୁଗ ଉଇ ଦର୍କାର୍ ଆରାକ୍ । ମାତର୍ ଆ'ନା ନେଇ' କିରିସ୍ଟନା ରେମ ଏଗୁତୁନେଇ' ମାରି ଆମାଇ ମାପ୍ରୁ ଗୁଇ'କୁନୁଂକୁରୁଂ ବ'ରଲ'ତା । ଡୁ'ତୁନ୍ସା' ନେଇ' ମାପ୍ରୁନା ବଲ୍କାମ୍ ଡିନ୍ଡେମ୍ ଗଂଗୁତୁନେଇ' । 5ଇନ୍ତେକନ୍ଡେକ୍ ନେଇ' ନେଇ'ନା ମୁନ୍ସୁଗ ଡୁକୁନୁଂବେଲା ନେଇ'ନା ଜିବନ୍ବକ୍ ପାପ୍କାମ୍ ଡିନ୍ଡେମ୍ନା ମୁନ୍ ଡେଂସେକ୍ ଡୁକୁନେଇ' । ମାରି ନିୟମ୍ବକ୍ ମା ଆଡେମ' ଡ'କୁ ଗୁତୁନାଉ ଡିନ୍ଡେମ୍ପୁଲେଇ ମୁନ୍ ଡେଂକୁନେଇ' । ସା' ଡୁ'ତୁନ୍ଉ ନେଇ' ନେଇ'ନା ଞେରିବୁରଂ ଅବୁଦି ପାପ୍କାମ୍ ଡେମ'ଡେମ'ସେକ୍ ଡୁକୁନେଇ' । ସା' ନିୟମ୍ବକ୍ ଆଡେମ' ଡ'କୁନୁଂ ଗୁଲାଇ ପାପ୍କାମ୍ ନେଇ' ଡେମ'ସେକ୍ ଗୁଇ'ଉଇକୁନେଇ' । 6ମାତର୍ ଆ'ନା ନେଇ' ଆଜିସୁଲା ବିସ୍ବାସ୍ ଡେମ'ସେକ୍ ଡୁତୁନେଇ'ସା' ଗୁଲାଇ ନିୟମ୍କୁରୁଂ ଆନେଇ' ଅ'ତୁର' । ଡୁ'ତୁନ୍ସା' ଆ'ନା ନେଇ' ଗୁଲାଇ ନିୟମ୍ ମାନ୍ସେକ୍ ଡୁକୁ ଦର୍କାର୍ ଆରାକ୍ ମାସା'ଡ'ନା ଜିସୁଲା ଗୁଇ'କୁନୁଂବେଲା ନେଇ'ସା' ମାଇବୁରଂ ଗୁଇ'କୁନୁଂସୁଗ ଡେଂଗୁତୁନେଇ'ସା' ଗୁଲାଇ ପାପ୍କାମ୍କୁରୁଂ ମାପ୍ରୁ ଆନେଇ' ଅ'ତୁର' । ସା' ନେଇ' ଆ'ନା ଉଲାକ୍ବକ୍ ଲେକ୍ଲ'ବୁଂଅଁ'କୁନୁଂ ନିୟମ୍ ଏତ୍ବାର୍ ଦର୍କାର୍ ଆରାକ୍ ମାସା'ଡ'ନା ମାପ୍ରୁନା ପବିତ୍ର ଆତ୍ମା ଆନେଇ' ମାପ୍ରୁନା ମୁନ୍ସୁଗ କାମ୍ ଡିନ୍ଡେମ୍ପୁଲେଇ ତିମେ ମୁଇ କୁରୁଂ ଅସୁୟ'ତା ।
ମାପ୍ରୁନା ନିୟମ୍ ମାରି ପାପ୍କାମ୍
7ଡୁ'ତୁନ୍ ଡ'ନା ପେ ମା ଏତ୍ଗୁତୁପେ, ମସାଲା ବେଡ'କୁନୁଂ ନିୟମ୍ ଅଲିରାକ୍ବାଇ' ଡ'ସେକ୍ ସୁଁସୁ ଗଂତୁନେଇ' ଇ? ଇନ୍ଡଇ'ଏସା ଆରାକ୍ । ନିଂ ମା ଡ' ସୁନ'ତିଂ ଡ'ନା, ନିୟମ୍ବକ୍ ଲେକ୍ଲ'କୁନୁଂ ଗୁଲାଇ ମାଗ'ତୁନେଇ'ସା'ଉ ପାପ୍ ଡ'ନା ମା ଡ'ସେକ୍ ନେଇ' ମାଗ'ତୁନେଇ' । ଆରାକ୍ନା ନେଇ' ଆମାକ୍ନେଇ' । ମାସା'ଡ'ନା ଲାଡ୍ସି ଆଡେଂଗା' ଡ'ସେକ୍ ନିୟମ୍ବକ୍ ଲେକ୍ଲ' ଆବୁଂଅଁ'ନାଏ ନେଇ'ନା ଜିବନ୍ବକ୍ ଲାଡ୍ସିବାଇ' ଏତ୍ ସା'କୁନୁଂ ଅଲିରାକ୍ବାଇ' ଡ'ସେକ୍ ନେଇ' ଆମାକ୍ନେଇ' । 8ମାତର୍ ନିୟମ୍ବକ୍ ଆଡେମ' ଡ'ସେକ୍ ଲେକ୍ଲ'ତାସା' ନେନ୍ବକ୍ ଡୁକୁନୁଂ ପାପ୍ ଆନେଇ' ଆଡେମ' ଡ'ସେକ୍ ଲେକ୍ଲ'କୁନୁଂ ଗୁତୁନ୍ ପାପ୍କାମ୍ ମାରିମାରି ଅ'ଡେମ୍ପୁଲେଇ ସେସ୍ଟା ଡେମ'ତା । ସା' ନିୟମ୍ବକ୍ ଗୁତୁନା ଲେକ୍ଲ' ଆବୁଂଅଁ'ନାଏ ନେଇ' ପାପ୍ ଆଡେମ୍ନେଇ' । 9ଇନ୍ତେକନ୍ଡେକ୍ ନିୟମ୍ବକ୍ ଲେକ୍ଲ'କୁନୁଂ ଗୁଲାଇ ମା ଡ'ସେକ୍ ମମୁନାକ୍ ଡୁକୁନୁଂବେଲା ନେଇ'ନା ଜିବନ୍ ବଲ୍ ଡୁକୁଗା' । ମାତର୍ ନେଇ' ଇନ୍ଡ'ୟା ଗୁତୁନ୍ ନିୟମ୍ ମାଗ'ନେଇ' ଉନ୍ତ୍ବାଂସା' ପାପ୍ ମା ଡ'ସେକ୍ସା ମାଗ'ନେଇ' । ସା' ଗୁତୁନ୍ ପାପ୍ ଆନେଇ' ଅଲିରାକ୍ବାଇ' କାମ୍ ଅ'ଡେମ୍ ମୁଲାୟ' । 10ସା' ନେଇ' ପାପ୍କାମ୍ ଡେମ'ତୁନେଇ'ସା' ମାପ୍ରୁ ଜୁଲ'ନା ନେଇ' ମୁଇନ୍ଡା ଗୁଇ'କୁନୁଂ ରେମସୁଗ । ଡୁ'ତୁନାଉ ଆନେଇ' ଜିବନ୍ ବିବେ'ପୁଲେଇ ବେଡ'କୁନୁଂ ଗୁତୁନ୍ ନିୟମ୍ ଆନେଇ' ଅଗୁଇ' ଡେଂକୁନୁଂସୁଗ ଡେଂଗା' ।
11ନିୟମ୍ବକ୍ ଡୁକୁନୁଂ ମାନ୍ସେକ୍ ପାପ୍ ଡେମ'ନାସା ମାସା ଆଡେନ୍ତା ଡ'ସେକ୍ ପାପ୍ ଆନିଂ ନାଡାୟ' ମାରି ଆନିଂ ଅଗୁୟ' । 12ମାତର୍ ମାପ୍ରୁ ବେଡ'କୁନୁଂ ମସାନା ନିୟମ୍ ପବିତ୍ରବାଇ' ମାରି ମାଇ ମାମା ଡେମ୍ ଡ'ସେକ୍ ସୁନ'କୁନୁଂସା ଗୁଲାଇ ପବିତ୍ରବାଇ', ସତ୍ବାଇ' ମାରି ବଲ୍ବାଇ' । 13ଡୁ'ତୁନ୍ ଡ'ନା କେନ୍ ବଲ୍ବାଇ' ଡ'କୁନୁଂ ନିୟମ୍ ଆନିଂ ଅଗୁଇ'ପୁଲେଇ ଡେଂଗା' ଇ? ଇନ୍ଡଇ'ଏସା ଡୁ'ତୁନା ଆରାକ୍ । ଗୁତୁନ୍ ବଲ୍ବାଇ' ନିୟମ୍ବୁରଂ ନେଇ'ନା ପାପ୍ଉ ଆନେଇ' ଅଗୁୟ' । ମାରି ପାପ୍ ଡ'ନା ମା ଡ'ସେକ୍ ଗୁତୁନ୍ ନିୟମ୍ ଆନିଂ ଅମାଗ' ।
ନେଇ'ନା ଜିବନ୍ବକ୍ ପାପ୍ ଡୁତାସା' ନେଇ' ନିୟମ୍ ମାନ୍ବାର୍ ଆଗଂତୁନେଇ'
14ମସାଲା ଲେକ୍ଲ'କୁନୁଂ ନିୟମ୍ ଗୁଲାଇ ମାପ୍ରୁନା ଆତ୍ମାଉ ବେଡ'ତା । ମାତର୍ ନିଂ ମୁଇନ୍ଡା ରେମ, ନିଂନା ଞେରିନା ମୁନ୍ସୁଗ ଅଲିରାକ୍କାମ୍ ଡିନ୍ଡେମ୍ପୁଲେଇ ମୁନ୍ ଡେଂସେକ୍ ଡୁତିଂସା' ପାପ୍ନା ଗତିରେମ୍ସୁଗ ଡେଂଗୁତିଂ ଡ'ସେକ୍ ନେଇ' ମାଗ'ତୁନେଇ' । 15#ଗାଲା 5:17ନିଂ ମିବାଇ' କାମ୍ ଡେମ'ତିଂ ଡ'ସେକ୍ ଇ'କିସା ନିଂ ଆମାକ୍ତିଂ । ମାସା'ଡ'ନା ବଲ୍ବାଇ' କାମ୍ ଡିନ୍ଡେମ୍ପୁଲେଇ ଏତ୍ତିଂ ମାତର୍ ଡୁ'ତୁନା ନିଂ ଆଡେମ୍ତିଂ । ଇମ୍ବ'ନା ଆନିଂ ମୁନ୍ ଆରାକ୍ ଗୁତୁନାଉ ନିଂ ଡେମ'ତିଂ । 16ଡୁ'ତୁନ୍ଉ ଇମ୍ବ'ନା ଆନିଂ ମୁନ୍ ଆରାକ୍ ଗୁତୁନାଉ ନିଂ ଡେମ'ତିଂସା' ନିୟମ୍ସୁଗ ନିଂ ପାପ୍ ଡେମ'ତିଂ ଡ'ସେକ୍ ନିଂନା ଜିବନ୍ବକ୍ ଏତ୍ ସାପ୍ତାସା' ମାପ୍ରୁ ବେଡ'କୁନୁଂ ନିୟମ୍ ବଲ୍ବାଇ' ଡ'ସେକ୍ ସୁନ୍ତିଂ । 17ସା' କେନ୍ ଅଲିରାକ୍ବାଇ' କାମ୍ ଗୁଲାଇ ନିଂ ଡେମ' ଆଡୁତିଂ ମାସା'ଡ'ନା ଅଲିରାକ୍ବାଇ' କାମ୍ ଡିନ୍ଡେମ୍ପୁଲେଇ ଆନିଂ ମୁନ୍ ଆରାକ୍ ମାତର୍ ନିଂବକ୍ ଡୁକୁନୁଂ ପାପ୍ଉ ଆନିଂ ଅଲିରାକ୍ବାଇ' କାମ୍ ଡିନ୍ଡେମ୍ପୁଲେଇ ମୁନ୍ ବେଡ'ସେ'ଗା ଆନିଂ ପାପ୍କାମ୍ ଅ'ଡେମ୍ ଡେନ୍ତା । 18ମାସା'ଡ'ନା ନିଂ ମୁଇନ୍ଡା ପାପ୍ବାଇ' ରେମସା' ନିଂନା ଜିବନ୍ବକ୍ ଇ'କିସା ବଲ୍କାମ୍ ଡିନ୍ଡେମ୍ନା ମୁନ୍ ଆଡୁତା ଡ'ସେକ୍ ନିଂ ମାଗ'ତିଂ । ମାସା'ଡ'ନା ବଲ୍କାମ୍ ଡିନ୍ଡେମ୍ପୁଲେଇ ଆନିଂ ମୁନ୍ ଡୁତା ଡ'ନାସାଏସା ଗୁତୁନ୍ ନିଂ ଡିନ୍ଡେମ୍ ଆଗଂତିଂ । 19ମାସା'ଡ'ନା ବଲ୍କାମ୍ ଡିନ୍ଡେମ୍ପୁଲେଇ ମୁନ୍ ଡୁକୁନାସା ନିଂ ଗୁତୁନ୍ ବଲ୍କାମ୍ ଆଡେମ୍ତିଂ ମାତର୍ ଇମ୍ବ'ନା ଅଲିରାକ୍ବାଇ' କାମ୍ ଡୁତା ଗୁତୁନ୍ ଡିନ୍ଡେମ୍ପୁଲେଇ ମୁନ୍ ଆଡୁତା ଡ'ନାସା ନିଂ ଗୁତୁନାଉ ଡେମ'ତିଂ । 20ଡୁ'ତୁନ୍ ଡ'ନା, ଇମ୍ବ'ନା ଆନିଂ ମୁନ୍ ଆରାକ୍ ଗୁତୁନାଉ ନିଂ ଡେମ୍ତିଂ ଡ'ନା ଡୁ'ତୁନ୍ବାଇ' ଅଲିରାକ୍କାମ୍ ନିଂ ନିଜେ ଡେମ' ଆଡୁତିଂ ମାତର୍ ନିଂନା ଜିବନ୍ବକ୍ ଡୁକୁନୁଂ ପାପ୍ଉ ଆନିଂ ଡୁ'ତୁନ୍ବାଇ' କାମ୍ ଅ'ଡେମ୍ଡେନ୍ ।
21ସା' ଆନିଂ ମା ଡେଂଗୁତା ଡ'ନା, ନିଂ ବଲ୍କାମ୍ ଡେମ୍ତିଂ ଡ'ନାସା ନିଂ ଆଗଂତିଂ ମାସା'ଡ'ନା ନିଂବକ୍ ପାପ୍ ଡିନ୍ଡେମ୍ପୁଲେଇ ମୁନ୍ ବିବେ'ନା ମୁଇ ନିୟମ୍ ଡୁତାସା' ଡୁ'ତୁନାଉ ଡେମ'ତିଂ ଡ'ସେକ୍ ମାଗ'ତିଂ । 22ସା' ମାପ୍ରୁନା ନିୟମ୍ ନିଂନା ଜିବନ୍ବକ୍ ଅବୁଦି ସାର୍ଦା ବେଡ'ତା । 23ମାତର୍ ନିଂବକ୍ ମାମା ଇସାଉ ଡେଂଗୁତା ଡ'ସେକ୍ ନିଂ ମାଗ'ତିଂ । ସା' ମାପ୍ରୁନା ନିୟମ୍ସୁଗ ଡୁକୁପୁଲେଇ ଗୁତୁନ୍ ଆନିଂ ମୁନ୍ ଆବେ'ତ । ଗୁତୁନ୍ ମା ଡ'ନା ନିଂନା ଜିବନ୍ବକ୍ ଡୁକୁନୁଂ ପାପ୍ । ଗୁତୁନ୍ ପାପ୍ ଇସାଉ ମାପ୍ରୁନା ନିୟମ୍ବୁରଂ ରିମ'ସେ'ଗା ଡୁକୁନୁଂସୁଗ ଡୁତା, ମା ଡ'ନା ମାପ୍ରୁନା ମୁନ୍ସୁଗ ଡୁକୁନୁଂ ବଲ୍କାମ୍ ଡିନ୍ଡେମ୍ପୁଲେଇ ଆନିଂ ଏତ୍ ସାକ୍ନାସା ଅଲିରାକ୍ବାଇ' କାମ୍ ଡିନ୍ଡେମ୍ପୁଲେଇ ମୁନ୍ ବେଡ'ସେକ୍ ପାପ୍ ଅ'ଡେମ୍ତ । 24ଅୟଂ ଅୟଂ, ନିଂ ଆ'ଇକେନ୍ ଅଲିରାକ୍ବାଇ' ରେମ! ନିଂ ଡି'କେନ୍ ପାପ୍କାମ୍ ଡେମ'ସେକ୍ ଡୁକୁନା ଗୁଇ'ତିଂବେ । ଜାଏସା ଆନିଂ ରକ୍ୟା ଡିନ୍ଡେମ୍ରେମ୍ ଆଡୁତା ଇ? 25ଆରାକ୍, ମୁଇନ୍ଡା ଡୁତା, ନେଇ'ନା ପ୍ରବୁ ଜିସୁ କିରିସ୍ଟଲା । ଆନିଂ ରକ୍ୟା ଡିନ୍ଡେମ୍ପୁଲେଇ ଆମାଇ ବେନ୍ଟାୟ'ସା' ନିଂ ଆମାପ୍ରୁ ସୁନ୍ଡ୍ରତିଂ ।
ସା' ଆ'ନା ଜୁ, ନିଂନା ମୁନ୍ବକ୍ ମାପ୍ରୁନା ନିୟମ୍ ମାନ୍ସେକ୍ ଡୁକୁପୁଲେଇ ମୁନ୍ ଡୁତା ମାତର୍ ଅଲିରାକ୍ବାଇ' କାମ୍ ଡିନ୍ଡେମ୍ନା ମୁନ୍ ଆ'ନାସା ନିଂନା ଞେରିବକ୍ ଡୁତାସା' ନିଂ ପାପ୍ ଡେମ'ସେକ୍ ଡୁତିଂ ।
Currently Selected:
ରମିୟ 7: BFW
Highlight
Copy
Compare
Share
Want to have your highlights saved across all your devices? Sign up or sign in
CC BY-NC-ND 4.0