ରମିୟ 6
6
ଜିସୁ କିରିସ୍ଟନା ଲାଗିରେ ନେଇ' ଜିବନ୍ ବାଂଗୁତୁନେଇ'
1ଡୁ'ତୁନ୍ ଡ'ନା ମାପ୍ରୁ ଆନେଇ' ଦୟା ଡେମ'ତାସା' ମାଇ ଆନେଇ' ମାରିମାରି ଦୟା ଡେମ'ସେକ୍ ନେଇ'ନା ପାପ୍ କେମା ଡେମ୍ତ ଡ'ସେକ୍ ନେଇ' ମାରିମାରି ପାପ୍ ଡେମ'ସେକ୍ ଡୁକୁନା ଡେନ୍ତା ଇ? ଆରାକ୍ । 2ଇନ୍ଡଇ'ଏସା ନେଇ' ଡୁ'ତୁନା ଆଡେମ୍ନେଇ' । ମାସା'ଡ'ନା ନେଇ' ଆଜିସୁଲା ବିସ୍ବାସ୍ ଡେମ'ତୁନେଇ'ସା' ପାପ୍କୁରୁଂ ଗୁଇ'କୁନୁଂସୁଗ ଡେଂଗୁତୁନେଇ' । ଗୁତୁନ୍ ଅର୍ତ ମା ଡ'ନା, ମୁଇନ୍ଡା ଗୁଇ'ଗା' ଡ'ନା ମାରି ମାଏସା କାମ୍ ଡିନ୍ଡେମ୍ ଆଗଂତା । ଡୁ'ତୁନ୍ସୁଗ ନେଇ' ପାପ୍କାମ୍ ଗୁଲାଇ ଅଡକ୍ସୁଂଅଁ'ତୁନେଇ'ସା' ମାରି ଗୁତୁନ୍ ପାପ୍କାମ୍ ଡେମ'ଡେମ' ଡୁକୁ ଆଗଂତୁନେଇ' । 3ମାରି ନେଇ' କିରିସ୍ଟ ଜିସୁନା ରେମ ଏଗୁତୁନେଇ' ଡ'ସେକ୍ ବାପ୍ତିସ୍ମା ରିଂଗୁତୁନେଇ' । ନେଇ' ବାପ୍ତିସ୍ମା ରିଂକୁନୁଂ ଅର୍ତ ଜିସୁଲାବୁରଂ ନେଇ'ସା' ତିରେ ଗୁଇ'କୁନୁଂସୁଗ ଡେଂଗୁତୁନେଇ' ଡ'ସେକ୍ ଡୁତା ଡ' ଗୁତୁନା ପେ ଆମାକ୍ତୁପେ ଇ? 4#କଲସି 2:12ନେଇ' ବାପ୍ତିସ୍ମା ରିଂରିଂନା, ଅର୍ତ ମା ଡ'ନା ନେଇ' ଜିସୁଲାବୁରଂ ତିରେ ଗୁଇ'ଗୁତୁନେଇ' ମାରି ଆନେଇ' ମାଇବୁରଂ ତିରେ ଆତିଲ'କୁନୁଂସୁଗ ଡେଂଗୁତା ଡ'ସେକ୍ ଡୁତା । ଡି'କେନା ଡେଂନା କିରିସ୍ଟଲା ବାଡେଇଁନା ବପୁବୁରଂ ମି ଗୁଇ'ସେକ୍ ମାରି ବୁରଗା' ଡୁ'ତୁନ୍ସୁଗ ନେଇ'ସା ତିମେ ଜିବନ୍ ବାଂସେକ୍ ଡୁ'ତୁନ୍ଉ ସାଲ୍ବାର୍ ଡୁତା ।
5ଡୁ'ତୁନା ନେଇ' ମାଇବୁରଂ ମିସ୍ସେକ୍ ଗୁଇ'କୁନୁଂସୁଗ ଡେଂଗୁତୁନେଇ' ଡ'ନା ଜିସୁଲା ଗୁଇ'ସେକ୍ ବୁରକୁନୁଂସୁଗ ନେଇ'ସା ବୁରକ୍ସେକ୍ ମାଇବୁରଂ ମିସ୍ତୁନେଇ' । 6ଜିସୁଲା କୁର୍ସବକ୍ ଗୁଇ'କୁନୁଂବେଲା ନେଇ' ପାପ୍ରେମ୍ସା' ମାଇବୁରଂ ଗୁଇ'ନେଇ' । ଡୁ'ତୁନ୍ ଡେଂଗା'ସା' ନେଇ'ନା ଞେରିବକ୍ ମୁଲ୍ସୁଗ ପାପ୍ ଡିନ୍ଡେମ୍ନା ମୁନ୍ ମାରି ଆସାପ୍ତା । ମାରି ଡୁ'ତୁନ୍ବାଇ' ଅଲିରାକ୍ ମୁନ୍ ଆନେଇ' ପାପ୍ ଅ'ଡେମ୍ ଆଗଂତା ଡ'ସେକ୍ ନେଇ' ମାଗ'ତୁନେଇ' । 7ମାସା'ଡ'ନା ନେଇ'ନା ଗୁଲାଇ ପାପ୍ କୁର୍ସବକ୍ ଜିସୁଲାବୁରଂ ଗୁଇ'ଗା'ସା' ନେଇ' ପାପ୍ ଡିନ୍ଡେମ୍ନା ମୁନ୍କୁରୁଂ ରକ୍ୟା ବାଂଗୁତୁନେଇ' ।
8ସା' ନେଇ' କିରିସ୍ଟଲାବୁରଂ ଗୁଇ'ଗୁତୁନେଇ' ଡ'ନା ମାଇବୁରଂ ବୁରସା ଗଂତୁନେଇ' ଡ'ସେକ୍ ନେଇ' ବିସ୍ବାସ୍ ଡେମ'ତୁନେଇ' । 9ମାସା'ଡ'ନା କିରିସ୍ଟଲା ଗୁଇ'ସେକ୍ ବୁରଗୁତାସା' ମାଇ ମାରି ଇନ୍ଡଇ'ଏସା ଆଗୁଇ'ତା ମାରି ଆମାଇ ଇନ୍ଡଇ'ଏସା ଅଗୁଇ'ସା ଆଗଂତା ଡ'ସେକ୍ ନେଇ' ମାଗ'ତୁନେଇ' । 10ମାରି ଜିସୁଲା ଗୁଲାଇରନା ପାପ୍ପୁଲେଇ ମୁସଉ ଗୁଇ'ଗା' । ମାତର୍ ମାପ୍ରୁନା ମୁନ୍ସୁଗ ବୁରକ୍ସେକ୍ ଡୁକୁପୁଲେଇଉ ଆ'ନା ମାଇ ବୁରକ୍ସେକ୍ ଡୁତା ।
11ଡୁ'ତୁନାଉ ପେସା, ନିଂ ଜିସୁଲାବୁରଂ ଗୁଇ'ଗୁତିଂସା' ପାପ୍ବୁରଂ ମାରି ଆମିସ୍ତିଂ, ଆ'ନା ନିଂ କିରିସ୍ଟ ଜିସୁଲାବୁରଂ ମିସ୍ଗୁତିଂସା' ମାପ୍ରୁନା ମୁନ୍ସୁଗଉ ଡେମ'ସେକ୍ ଡୁତିଂ ଡ' ଏତ୍ବାର୍ ଡୁତା । 12କେନ୍ ଦର୍ତନିବକ୍ ପେ ଡୁକୁନୁଂବେଲା ପାପ୍ ଡିନ୍ଡେମ୍ନା ମୁନ୍ ସାକ୍ସେକ୍ ଡୁ'ତୁନ୍ସୁଗବାଇ' ଗୁଲାଇ ଅ'ଡେମ୍ପୁଲେଇ ପେନା ଜିବନ୍ ଆବେଡ' । 13ମାରି ପେନା ଞେରିବକ୍ ଡୁକୁନୁଂ ଗୁଲାଇ ଅଲିରାକ୍ବାଇ' କାମ୍ ଡିନ୍ଡେମ୍ନା ଜିନିସ୍ସୁଗ ପାପ୍କାମ୍ ଡିନ୍ଡେମ୍ପୁଲେଇ ଆବେଡ' । ମାତର୍ ପେ ଜିସୁଲାବୁରଂ ଗୁଇ'ସେକ୍ ମାଇବୁରଂ ବୁରଗୁତୁପେସା' ପେ ତିମେ ଜିବନ୍ ବାଂଗୁତୁପେ । ସା' ପେନା ଞେରିବକ୍ ଡୁକୁନୁଂ ଗୁଲାଇ ମାପ୍ରୁନା ତିତିବକ୍ ବଲ୍କାମ୍ ଡିନ୍ଡେମ୍ନା ଜିନିସ୍ସୁଗ ବେ' । 14ମାସା'ଡ'ନା ଜୁ, ପେ ଆ'ନା ନିୟମ୍ବକ୍ ବିସ୍ବାସ୍ ଡେମ' ଆଡୁତୁପେ ମାତର୍ ମାପ୍ରୁ ଦୟା ଡେମ'ତାସା' ଆମାଇଉ ବିସ୍ବାସ୍ ଡେମ'ତୁପେ । ସା' ଆମୁଇନ୍ଡା ଗୁପାମ୍ରେମ୍ ସାକାର୍ କାମ୍ ଅ'ଡେମ'କୁନୁଂସୁଗ ପାପ୍ବାଇ' ଅଲିରାକ୍ବାଇ' ଏତ୍ ଆପେ ପାପ୍କାମ୍ ଆ'ଡେମେ'ଇ' ।
ପେ ଜାନା ଗୁପାମ୍ରେମ୍ ଡେଂସେକ୍ ଡୁକୁଡୁତା?
15ଡୁ'ତୁନ୍ ଡ'ନା ମା ଏତ୍ଗୁତୁପେ? ପେ ନିୟମ୍ ଗୁଲାଇ ମାନ୍ଗୁତୁପେସା' ଦରମ୍ରେମ୍ ଆଏତୁପେ ମାତର୍ ମାପ୍ରୁ ଆପେ ଦୟା ଡେମ'ତାସା' ଦରମ୍ରେମ୍ ଅ'ଏଲ'ତା ଡ'ନାଏ ପେ ଇସାଉ ପାପ୍କାମ୍ ଅଲିରାକ୍କାମ୍ ଡେମ'ସେକ୍ ଡୁକୁନା ଡେନ୍ତା ଡ'ସେକ୍ ଏତ୍ଗୁତୁପେ ଇ? ଆରାକ୍, ଇନ୍ଡଇ'ଏସା ଡୁ'ତୁନା ଆଏତ୍ଗା' । 16ଜାଏସା ମୁଇନ୍ଡା ରେମ ମୁଇନ୍ଡାନ୍ବକ୍ ଗୁପାମ୍ରେମ୍ ଏତିଂ ଡ'ନା ମାଇ ଗୁତୁନ୍ ସାକାର୍ବକ୍ ଡୁକୁକ୍ସେକ୍ ମାଇ ମାମା ସୁନ୍ତ ଗୁତୁନ୍ ଗୁଲାଇ ମାନ୍ସେକ୍ ଡୁକୁଡୁତା ଡ'ସେକ୍ ପେ ମାଗ'ତୁପେ । ପାପ୍ ଡିନ୍ଡେମ୍ନାସା ଡୁ'ତୁନାଉ । ପେନା ଜିବନ୍ବକ୍ ପାପ୍ ଡିନ୍ଡେମ୍ନା ମୁନ୍ ସାକ୍ସେକ୍ ଡୁ'ତୁନାଉ ପାପ୍ନା ଗୁପାମ୍ରେମ୍ସୁଗ ପାପ୍ ଡେମ'ସେକ୍ ଡୁକୁନା ପେ ଗୁଇ'ଉଇତୁପେ । ମାତର୍ ଆମାପ୍ରୁ ମାନ୍ସେକ୍ ଡୁକୁନା ମାଇ ଆପେ ଦରମ୍ରେମ୍ ଅ'ଏତ । 17ଇନ୍ତେକନ୍ଡେକ୍ ଆଜିସୁ ବିସ୍ବାସ୍ ଡିନ୍ଡେମ୍ ସିଁସେଇଁ ପେ ପାପ୍କାମ୍ ଡିନ୍ଡେମ୍ନା ମୁନ୍ ଡେଂସେକ୍ ପାପ୍ନା ଗୁପାମ୍ରେମ୍ସୁଗ ଡୁକୁପେ ମାତର୍ ଆ'ନା ପେ ଡୁ'ତୁନା ଆଡୁତୁପେ । ଆ'ନା ଆପେ ଅମାଗ'କୁନୁଂ ମାପ୍ରୁନା ତୁମ' ପେ ବଲ୍ ମାନ୍ସେକ୍ ଡୁତୁପେସା' ଆପେ ଏତ୍ସେକ୍ ନିଂ ଆମାପ୍ରୁ ଅବୁଦି ସୁନ୍ଡ୍ରଗୁତିଂ । 18ଆ'ନା ପେ ପାପ୍ନା ଗୁପାମ୍ରେମ୍ ଆରାକ୍, ଆପେ ମାପ୍ରୁ ଗୁତୁନ୍ ପାପ୍କୁରୁଂ ଅ'ତୁର' । ସା' ପେ ଆ'ନା ମାପ୍ରୁନା ଗୁପାମ୍ରେମ୍ ଏଗୁତୁପେସା' ବଲ୍କାମ୍ ଡେମ'ତୁପେ ।
19ପେ ରେମଲେସା' ମାଗ୍ମାକ୍ ଆଗଂତୁପେସା'ଉ ନିଂ ଡି'କେନ୍ ଗତିରେମ୍ନା ବିସୟ ଗୁଲାଇ ସୁନ'ସେକ୍ ଆପେ ଅମାକ୍ଡେନ୍ତିଂ । ଇନ୍ତେକନ୍ଡେକ୍ ପେ ଅବୁଦି ପାପ୍କାମ୍ ଅଲିରାକ୍କାମ୍ ଡେମ'ସେକ୍ ପାପ୍ନା ଗତିରେମ୍ସୁଗ ପେନ୍ ଜିବନ୍ ବେଡ'ପେ ମାତର୍ ଆ'ନା ପେ ମାପ୍ରୁନା ଗତିରେମ୍ସୁଗ ମାଇନା ତୁମ' ମାନ୍ସେକ୍ ବଲ୍କାମ୍ ଡିନ୍ଡେମ୍ପୁଲେଇ ପେନ୍ ଜିବନ୍ ବେ' । ଡୁ'ତୁନ୍ ଡେମ'ନା ପେ ପବିତ୍ରରେମ ଏତୁପେ । 20ଉନ୍ତା ପେ ପାପ୍ନା ଗତିରେମ୍ ଡେଂସେକ୍ ଡୁକୁନୁଂବେଲା ମାପ୍ରୁନା ମୁନ୍ସୁଗ ବଲ୍କାମ୍ ଡିନ୍ଡେମ୍ପୁଲେଇ ପେନା ଜିବନ୍ବକ୍ ମୁନ୍ ଆଡୁତା ଡେଂକୁ । 21ଡୁ'ତୁନ୍ଉ ପେ ଅଲିରାକ୍କାମ୍ ଡେମ'ସେକ୍ ଡୁକୁପେସା' ଆପେ ମା ବାଂକୁ? ଆ'ନା ଗୁତୁନା ପେ ଏତ୍ସେ'ଗା ଗେୱାଗୁତୁପେ, ଗୁତୁନାଉ ଆ'ନା ବାଂଗୁତୁପେ । ମାସା'ଡ'ନା ଡୁ'ତୁନ୍ବାଇ' କାମ୍ ଆପେନା ଜିବନ୍ ଗୁଗୁଇ'ନା କୁରୁଂବକ୍ ୱାୟ' ରିଂତା । 22ମାତର୍ ଆପେ ପାପ୍କୁରୁଂ ଅ'ତୁର'ସେକ୍ ମାପ୍ରୁନା ଗତିରେମ୍ ଅ'ଡେମ'ତାସା' ପେ ମା ବାଂଗୁତୁପେ ଡ'ନା ପେ ପବିତ୍ରବାଇ' ରେମ ଏଗୁତୁପେ । ମାରି ପେ ପବିତ୍ରବାଇ' ରେମ ଏଗୁତୁପେସା' ଆପେ ମଡୁନମ୍ ଜିବନ୍ ବେଡ'ତା । 23ମାସା'ଡ'ନା ଜା ପାପ୍କାମ୍ ଡେମ'ସେକ୍ ଡୁତା ମାଇ ଗୁଇ'ତା, ଗୁତୁନାଉ ମାଇନା କୁନ୍ତା । ମାତର୍ ଜା ଆନେଇ'ନା ପ୍ରବୁ ଆକିରିସ୍ଟ ଜିସୁଲା ବିସ୍ବାସ୍ ଡେମ'ସେକ୍ ଡୁତା ଆମାଇ ମାପ୍ରୁ ମଡୁନମ୍ ଜିବନ୍ ଦାନ ବେ'ତ ।
Currently Selected:
ରମିୟ 6: BFW
Highlight
Copy
Compare
Share
Want to have your highlights saved across all your devices? Sign up or sign in
CC BY-NC-ND 4.0