ରମିୟ 5
5
ନେଇ' ମାପ୍ରୁବୁରଂ ସାନ୍ତିସାର୍ଦା ଡେଂସେକ୍ ବଲ୍ ଡୁତୁନେଇ'
1ଡୁ'ତୁନ୍ଉ ନେଇ' ଆଜିସୁଲା ବିସ୍ବାସ୍ ଡେମ'ତୁନେଇ'ସା' ମାପ୍ରୁ ଆନେଇ' ଦରମ୍ରେମ୍ ଡ'ସେକ୍ ଜୁଲ'ତା । ସା' ନେଇ'ନା ପ୍ରବୁ ଜିସୁ କିରିସ୍ଟନା ଲାଗିରେ ନେଇ' ମାପ୍ରୁବୁରଂ ସାନ୍ତିସାର୍ଦା ଡେଂସେକ୍ ବଲ୍ ଡୁତୁନେଇ' । 2ପ୍ରବୁ ଜିସୁ କିରିସ୍ଟଲା ଡେମ'କୁନୁଂ ନେଇ' ବିସ୍ବାସ୍ ଡେମ'ତୁନେଇ', ମାରି ମାଇ ଡୁ'ତୁନ୍ ଡେମ'ତାସା' ମାପ୍ରୁନା ଦୟା ନେଇ' ବାଂଗୁତୁନେଇ' ମାରି ନେଇ' ଗୁତୁନ୍ବକ୍ ଆ'ନା ଡୁତୁନେଇ' । ମାରି ମାଇ ଆ'ଇ ମୁନା'ବାଇ' ଡ'ସେକ୍ ମୁସିଂ ମାପ୍ରୁ ମାଇନା ମଇମା ଆନେଇ' ଅସୁଇ'ତ ଡ'ସେକ୍ ଅବୁଦି ଆସ୍ସେକ୍ ସାର୍ଦାକ୍ସେକ୍ ଡୁତୁନେଇ' । 3ଗୁତୁନାଉ ଡ'ସେକ୍ ଆରାକ୍, ଆନେଇ' ଦୁକକସ୍ଟ ବାଂନାସା ସାର୍ଦାକ୍ସେକ୍ ଡୁତୁନେଇ' । ମାସା'ଡ'ନା ଡୁ'ତୁନ୍ଉ ଦୁକକସ୍ଟ ନେଇ'ନା ଜିବନ୍ବକ୍ ସାକ୍ନାଉ ଗୁତୁନ୍ ଦୁକକସ୍ଟବକ୍ସା ମି ଆଇଁଲ'ସେକ୍ ଡୁକୁଡୁତା ଡ'ସେକ୍ ନେଇ' ମାକ୍ତୁନେଇ' 4ମାରି ଡୁ'ତୁନ୍ଉ ଆଇଁଲ'ସେକ୍ ଡୁକୁନା ମାପ୍ରୁ ଗୁତୁନ୍ ଜୁଲ'ସେକ୍ ମା'ଏ ଗୁତୁନ୍ବକ୍ ବଲ୍ ଡୁକୁ ଗଂତା ଡିକ୍ତ ମାରି ମାପ୍ରୁ ଆନେଇ' ଜୁଲ'ସେକ୍ ଡୁ'ତୁନ୍ ଡିକ୍ତ ଡ'ନା ମୁସିଂ ମାପ୍ରୁ ଆନେଇ' ବଲ୍ବାଇ' ବେ'ତ ଡ'ସେକ୍ ଆସ୍ବାର୍ ଗଂତୁନେଇ' । 5ନେଇ' ଡୁ'ତୁନା ମାଇ ବଲ୍ବାଇ' ବେ'ତ ଡ'ସେକ୍ ଆସ୍ସେକ୍ ଡୁକୁନା ଗୁତୁନ୍ ଆସ୍ ଆନେଇ' ମାଇ ଆବେ'ତ ଡେ ମାଡେ ଡ'ସେକ୍ ଆ'ସିନ୍ତାତ । ମାସା'ଡ'ନା ମାପ୍ରୁଲା ନେଇ'ନା ଜିବନ୍ବକ୍ ପବିତ୍ର ଆତ୍ମା ବେଡ'ତାସା' ମାପ୍ରୁନା ଆଲାତ୍ ନେଇ'ନା ଜିବନ୍ ବିତ୍ରେ ଅବୁଦି ବେଡ'ତା ଡ'ସେକ୍ ନେଇ' ମାଗ'ତୁନେଇ' ।
ମାପ୍ରୁ ଆନେଇ' ଅବୁଦି ଆଲାତ୍ ଡେମ'ତା
6ନେଇ' ଅବୁଦି ପାପ୍କାମ୍ ଅଲିରାକ୍କାମ୍ ଡେମ'ସେକ୍ ମାପ୍ରୁନ୍କୁରୁଂ ଅବୁଦି ସୁଲୁଂ ଡୁକୁନେଇ' । ମାରି ନେଇ'ନା ବପୁବୁରଂ ଗୁତୁନ୍ ପାପ୍କାମ୍କୁରୁଂ ନିଜେ ବାଇରି ତୁତୁର୍ ଆଗଂତୁନେଇ' ଡେଂକୁନେଇ' ମାତର୍ କିରିସ୍ଟଲା ମାଇନା ବେଲା ସା'ଗା'ସା' ନେଇ'ନା ପାପ୍ପୁଲେଇ ଗୁଇ'ଗା' । 7ମାପ୍ରୁ ଜୁଲ'ନା ବଲ୍ ରେମ ଡ'ସେକ୍ ଡୁକୁନୁଂ ମୁଇନ୍ଡାପୁଲେଇ ମାଇନା ତାନ୍ବକ୍ ନିଂ ଗୁଇ'ତିଂ ଡ'ସେକ୍ ମୁନ୍ଡେଂକୁନୁଂ ଅବୁଦି ରେମଲେ ଆଡୁତା । ମାତର୍ ଆପାଲ୍ ରେମଲେ ସାନ୍ଡୁଂରେମ୍ ମାରି ରେମଲେନା ବଲ୍ପୁଲେଇ ମାମା କାମ୍ ଡେମ'ସେକ୍ ଡୁକୁନୁଂ ବଲ୍ ରେମପୁଲେଇ ମାଇନା ତାନ୍ବକ୍ ନିଂ ଗୁଇ'ତିଂ ଡ'ସେକ୍ ଜାଏସା ମୁନ୍ ଡେମାନା । 8ମାତର୍ ନେଇ' ପାପ୍କାମ୍ ଅଲିରାକ୍କାମ୍ ଡେମ'ସେକ୍ ଡୁକୁନୁଂବେଲା କିରିସ୍ଟଲା ନେଇ'ନା ପାପ୍ପୁଲେଇ ନେଇ' ଗୁଗୁଇ' ବାଦୁଲ୍ ମାଇ ଗୁଇ'ଗା' । ଡୁ'ତୁନା ମାପ୍ରୁ ନିଂ ଆପେ ଅବୁଦି ଆଲାତ୍ ଡେମ'ତିଂ ଡ'ସେକ୍ ଆନେଇ' ଅସୁୟ' ।
9ସା' କିରିସ୍ଟଲା ମାଇନା ବନି ବେଡ'ସା' ମାପ୍ରୁ ଆନେଇ' ଆ'ନା ଦରମ୍ବାଇ' ରେମ ଡ'ସେକ୍ ଜୁଲ'ତା । ସା' ମାପ୍ରୁ ଆଗୁଲାଇର ବିସାର୍ନା ଡେମ'ସେକ୍ ଡନ୍ଡ୍କସ୍ଟ ବିବେ'ବେଲା କିରିସ୍ଟଲା ଆନେଇ' ଗୁତୁନ୍ ଡନ୍ଡ୍କସ୍ଟକୁରୁଂ ରକ୍ୟା ଡେମ୍ତ । 10ମାସା'ଡ'ନା ନେଇ' ମାପ୍ରୁବୁରଂ ଦାଇ ଡେଂସେକ୍ ଡୁକୁନେଇ' । ମାତର୍ ଆଇ'ତୁନ୍ବେଲା ମାପ୍ରୁନା ଉଁ'ଉଁ ନେଇ'ପୁଲେଇ ଗୁଇ'ଗା'ସା' ନେଇ' ମାପ୍ରୁବୁରଂ ମିସ୍ନେଇ' । ଆ'ନା ନେଇ' ମାପ୍ରୁବୁରଂ ମିସ୍ଗୁତୁନେଇ'ସା' କିରିସ୍ଟନା ଜିବନ୍ବୁରଂ ମାପ୍ରୁ ଆନେଇ' ମାରି ଅଦିକ୍ ରକ୍ୟା ଡେମ୍ତ । 11ସା' ଆ'ଇତୁନାଉ ଡ'ସେକ୍ ଆରାକ୍, ନେଇ'ନା ପ୍ରବୁ ଜିସୁ କିରିସ୍ଟନା ଲାଗିରେ ମାଇ ଆନେଇ' ମାପ୍ରୁଲାବୁରଂ ମିସାୟ'ସା' ମାପ୍ରୁ ଡି'କେନ୍ ଡେମ'କୁନୁଂ ଗୁଲାଇପୁଲେଇ ନେଇ' ସାର୍ଦା ଡେଂଗୁତୁନେଇ' ।
ଆଦମ୍ନାସା' ରେମଲେ ଗୁଇ'ଗା', ଜିସୁନାସା' ରେମଲେ ମଡୁନମ୍ ଜିବନ୍ ବାଂଗା'
12ଆଦମ୍ଲା ପାପ୍ ଡେମ'ସା' ମାଇ ମୁଇନ୍ଡାନାସା'ଉ କେନ୍ ଦେସ୍ଦୁନିଆବକ୍ ଗୁଲାଇ କୁନ୍ଡା ପାପ୍ ସା'ଗା' ମାରି ପାପ୍ନାସା' ଗୁଗୁଇ'ସା ସା'ଗା'। ଗୁଲାଇ ରେମଲେ ପାପ୍ ଡେମ'ସା' ଗୁତୁନ୍ ଗୁଗୁଇ' ଗୁଲାଇ ରେମଲେନ୍ ଜିବନ୍ବକ୍ ସା'ଗା' ।
13ଜୁ, ମସାଲା ନିୟମ୍ ଲେକ୍ଲ' ବିବେ' ସିଁସେଇଁସା ପାପ୍ ଦେସ୍ଦୁନିଆବକ୍ ଡୁକୁ । ମାତର୍ ଆଇ'ତୁନ୍ବେଲା ନିୟମ୍ ଆଡୁତାସା' ରେମଲେ ନିୟମ୍ ଆମାନ୍ତା ଡ'ନାସା ମା'ଏ ପାପ୍ ଡେମ'ତା ଡ'ସେକ୍ ଆଜୁତ । 14ଡୁ'ତୁନ୍ ଡ'ନାସା ଆଦମ୍ନାବାଂସା' ମସାନ୍ପନ୍ତେକ୍ ଡୁକୁନୁଂ ରେମଲେ ଗୁଲାଇରସା ଗୁଗୁଇ' ଆର୍ଗା' । ଆଦମ୍ଲା ମାପ୍ରୁନା ତୁମ' ମମାନ୍ବାର୍ ପାପ୍କାମ୍ ଡେମ'ସା' ଗୁଇ'ଗା' । ମାତର୍ ମା'ଏ ଆଦମ୍ଲା ଡେମ'କୁନୁଂସୁଗ ପାପ୍କାମ୍ ଆଡେମ୍ତ ଡ'ନାସା ଆଦମ୍ଲା ଗୁଇ'କୁନୁଂସୁଗ ମା'ଏସା ଗୁଇ'ଗା' । ଆଦମ୍ନା ତିର୍ଗି' ସୁସାପ୍ ଡୁକୁନୁଂ କିରିସ୍ଟଲାସୁଗ ଆଦମ୍ଲା ଡୁକୁ । 15ମାତର୍ ଆଦମ୍ଲା ପାପ୍ ଡେମ'ସା' ମା ଡେଂଗା' ମାରି ମାପ୍ରୁ ଆରେମଲେ ଦୟା ଡେଂସେକ୍ ଆକିରିସ୍ଟଲା ବେନ୍ଟାୟ'ସା' ମା ଡେଂଗା' ଗୁତୁନ୍ ଇମ୍ବାରୁ ଅ'ସରିଲ'ନା ମାପ୍ରୁନା ଦୟା ଅବୁଦି ମୁନା' । ଆଦମ୍ଲା ମୁଇନ୍ଡା ଡେମ'କୁନୁଂ ପାପ୍ନାସା' ଅବୁଦି ରେମଲେ ଗୁଗୁଇ' ଆର୍ଗା' ମାତର୍ ମାପ୍ରୁ ଦୟା ଡେଂସେକ୍ ଅବୁଦି ରେମଲେନା ପାପ୍ କେମା ଡେମ' ମାରି ଗୁଲାଇରପୁଲେଇ ଆତୁନ୍ ମୁଇନ୍ଡା ଡ'ନା ଆଜିସୁଲା ଦାନ ବେଡ'ସେକ୍ ମାପ୍ରୁ ମାଇନା ଦୟା ଅସୁୟ' । 16ମାରି ମାପ୍ରୁ ଆନେଇ' ଦୟା ଡେମ'ସେକ୍ ସରଉ ବେଡ'କୁନୁଂ, ଆଦମ୍ଲା ପାପ୍ ଡେମ'ସା' ମା ଡେଂଗା' ଗୁତୁନ୍ସୁଗ ଆରାକ୍ । ଆଦମ୍ଲା ମୁଇନ୍ଡା ପାପ୍ ଡେମ'ସା' ଗୁଲାଇର ପାପ୍ବାଇ' ରେମଲେ ଡ'ସେକ୍ ଡନ୍ଡ୍ ବାଂଗା' । ମାତର୍ ମାପ୍ରୁ ମା ଡେମ' ଡ'ନା ଗୁଲାଇର ପାପ୍ରେମ୍ ଡ'ନାସା ଆଗୁଲାଇର ଦୟା ଡେମ'ସେକ୍ ଗୁଲାଇରନା ପାପ୍ କେମା ଡେମ'ସେକ୍ ବଲ୍ରେମ୍ ଡ'ସେକ୍ ଜୁଲ' । 17ଆଦମ୍ଲା ମୁଇନ୍ଡା ପାପ୍ ଡେମ'ସା' ମାଇନା ଲାଗିରେ ଅବୁଦି ରେମଲେ ଗୁଗୁଇ' ଆର୍ଗା', ଗୁତୁନା ସତ୍ । ମାତର୍ ଜିସୁ କିରିସ୍ଟଲା ମୁଇନ୍ଡା ଡେମ'କୁନୁଂ ଲାଗିରେ ଆମାଇ ଜା ବିସ୍ବାସ୍ ଡେମ୍ତ ଆମା'ଏ ମାପ୍ରୁ ମଡୁନମ୍ ଜିବନ୍ ବେ'ତ ମାରି ବଲ୍ରେମ୍ ଡ'ସେକ୍ ଜୁତ । ମା'ଏ ଜିସୁଲାବୁରଂ ଇସାଉ ଡୁକୁ ଗଂତା । ମାସା'ଡ'ନା ମାପ୍ରୁ ଆଗୁଲାଇର ଦୟା ଡେମ'ତା ।
18ଡୁ'ତୁନାଉ ଆଦମ୍ଲା ଗୁତୁନ୍ ମୁଇ ପାପ୍ ଡେମ'ସା' ଗୁଲାଇର ପାପ୍ରେମ୍ ଡ'ସେକ୍ ଡନ୍ଡ୍ ବାଂଗା' ମାତର୍ ଜିସୁଲା ଗୁତୁନ୍ ମୁଇ ବଲ୍କାମ୍ ଡେମ'ସା' ଆମାଇ ଜା ବିସ୍ବାସ୍ ଡେମ୍ତ ଆମା'ଏ ଆଗୁଲାଇର ବଲ୍ରେମ୍ ଡ'ସେକ୍ ଜୁତ ମାରି ଆମା'ଏ ମଡୁନମ୍ ଜିବନ୍ ବେ'ତ । 19ମୁଇନ୍ଡା ଡ'ନା ଆଦମ୍ଲା ମାପ୍ରୁନା ତୁମ' ଆମାନ୍ତା ଡେଂକୁସା' ଅବୁଦି ରେମଲେ ପାପ୍ରେମ୍ ଏଗା' । ମାତର୍ ଡୁ'ତୁନ୍ସୁଗ ପାଲ୍ ମୁଇନ୍ଡା ଡ'ନା ଜିସୁଲା ମାପ୍ରୁନା ତୁମ' ମାନ୍ଗା'ସା' ଅବୁଦି ରେମଲେ ବଲ୍ରେମ୍ ଏତା । 20ରେମଲେ ନେଇ' ଆ'ଇ ପାପ୍ରେମ୍ ଡ'ସେକ୍ ମା'ଏ ନିଜେ ମାଗ୍ମାକ୍ପୁଲେଇ ମାପ୍ରୁ ମାଇନା ନିୟମ୍ ଆମା'ଏ ବେଡ' । ମାତର୍ ରେମଲେ ଅବୁଦି ଅବୁଦି ପାପ୍ ଡେମ'କୁନୁଂବେଲା ମାପ୍ରୁନା ଦୟା ଆରେମଲେ ଅବୁଦି ଅବୁଦି ଡେଂଗା' । 21ସା' ଡୁ'ତୁନା ରେମଲେ ଇସାଉ ପାପ୍ ଡେମ'ସେକ୍ ଡୁକୁସା' ମାପ୍ରୁ ଆମା'ଏ ଗୁଗୁଇ'ନା ଡନ୍ଡ୍ ବେଡ' । ମାତର୍ ଆ'ନା ମାପ୍ରୁ ଆରେମଲେ ଅବୁଦି ଲିବିସୁପ୍ସେକ୍ ବଲ୍ରେମ୍ ଡ'ସେକ୍ ଜୁଲ'ତା । ମାରି ନେଇ'ନା ପ୍ରବୁ ଜିସୁ କିରିସ୍ଟନା ଲାଗିରେ ଆରେମଲେ ମଡୁନମ୍ ଜିବନ୍ ବେଡ'ତା।
Currently Selected:
ରମିୟ 5: BFW
Highlight
Copy
Compare
Share
Want to have your highlights saved across all your devices? Sign up or sign in
CC BY-NC-ND 4.0