ରମିୟ 4
4
ଅବ୍ରାଆମ୍ଲା ଦରମ୍ରେମ୍ ଡ'ସେକ୍ ମାପ୍ରୁ ସୁଁସୁଡେନ୍
1ଡୁ'ତୁନ୍ ଡ'ନା ଇନ୍ତେକନ୍ଡେକ୍ ଡୁକୁନୁଂ ନେଇ'ନା ତୁତା ଅବ୍ରାଆମ୍ଲା ମା ବାଂଗୁତା ଡ'ସେକ୍ ନେଇ' ସୁଁସୁ ଗଂତୁନେଇ'? 2ଅବ୍ରାଆମ୍ଲା ବଲ୍କାମ୍ ଡେମ'କୁନୁଂ ଜୁଲ'ସେକ୍ ମାପ୍ରୁ ଆମାଇ ଦରମ୍ରେମ୍ ଡ'ସେକ୍ ଜୁଲ'ନାଏ ମାଇ ଅବୁଦି ବଡ୍ପୁନ୍ ଡେମାନା । ମାତର୍ ମାପ୍ରୁନ୍ବକ୍ ଉଇସେକ୍ ନିଂ ବଲ୍କାମ୍ ଡେମ'ତିଂ ଡ'ସେକ୍ ମାଇ ବଡ୍ପୁନ୍ ଡିନ୍ଡେମ୍ ଆଗଂତା । 3#ଗାଲା 3:6ମାସା'ଡ'ନା ମାପ୍ରୁନା ଉଲାକ୍ବକ୍ ଡି'କେନା ସୁନ'ତା, ମା ଡ'ନା “ଅବ୍ରାଆମ୍ଲା ଆମାପ୍ରୁ ବିସ୍ବାସ୍ ଡେମ' ମାରି ମାଇନା ବିସ୍ବାସ୍ ଜୁଲ'ସେକ୍ ମାପ୍ରୁ ଆମାଇ ଦରମ୍ରେମ୍ ଡ'ସେକ୍ ଜୁଲ' ।” 4ମୁଇନ୍ଡା ରେମ କାମ୍ ଡେମ'ନା ଆମାଇ କୁନ୍ତା ବେ'ତ । ଗୁତୁନ୍ କୁନ୍ତା ଆଲାତ୍ ଡେଂସେକ୍ ଆମାଇ ସରଉ ବେଡ'କୁନୁଂ ଆରାକ୍, ମାଇ କାମ୍ ଡେମ'ତାସା'ଉ ବାଂଗୁତା । 5ମାତର୍ ମୁଇନ୍ଡା ରେମନା କାମ୍ ଜୁଲ'ସେକ୍ ମାପ୍ରୁ ଆମାଇ ବଲ୍ରେମ୍ ଆ'ଏତ ମାତର୍ ପାପ୍ରେମ୍ ଆମାପ୍ରୁ ବିସ୍ବାସ୍ ଡେମ୍ତ ଡ'ନା ମାଇନା ବିସ୍ବାସ୍ ଜୁଲ'ସେ'ଗା ମାପ୍ରୁ ଆମାଇ ବଲ୍ରେମ୍ ଅ'ଏତ । 6ଆମୁଇନ୍ଡା ମାପ୍ରୁ ବଲ୍ରେମ୍ ଡ'ସେକ୍ ଜୁଲ'ନା ଗୁତୁନ୍ ରେମ ଅବୁଦି ସାର୍ଦା ଡିନ୍ଡେମ୍ ଗଂତା । ମାସା'ଡ'ନା ମାପ୍ରୁ ଆମାଇ ଡୁ'ତୁନା ଜୁଜୁପୁଲେଇ ମାଇ ମାଏସା କାମ୍ ଡିନ୍ଡେମ୍ ଦର୍କାର୍ ଆରାକ୍ । ଇନ୍ତେକନ୍ଡେ'କା ଡୁକୁନୁଂ ନେଇ'ନା ଦାଉଦ୍ ରାଜା ଡୁ'ତୁନାଉ ସୁନ'କୁ । ମାଇ ମା ଡ' ସୁନ'କୁ ଡ'ନା, 7“ଜାଜାନା ଅଲିରାକ୍କାମ୍ ବୁଲ୍କାମ୍ ଗୁଲାଇ ମାପ୍ରୁ କେମା ଡେମ'ତା ମାରି ଜାଜାନା ପାପ୍କାମ୍ ଗୁଲାଇ ମାପ୍ରୁ ସୁଲୁଂ ବୁଂଅଁ'ତା ଡୁ'ତୁନ୍ବାଇ' ରେମଲେ ଅବୁଦି କପାଲ୍ବାଇ' । 8ସତଇସା ପ୍ରବୁଲା ପାପ୍ କେମା ଡେମ'ସେକ୍ ଆଜାଆଜା ପାପ୍ ମଡିନେମ୍ରେମ୍ସୁଗ ଜୁଲ'ତା ଡୁ'ତୁନ୍ବାଇ' ରେମଲେ ଅବୁଦି କପାଲ୍ବାଇ' ।”
9କେନ୍ କପାଲ୍ବାଇ' ରେମଲେ ଡ'ସେକ୍ ସୁନ'କୁନୁଂ #4:9 ଗିରିକ୍ ସାମ୍ବକ୍ “ନୁରିଂନା ଇସା ଅଗ'କୁନୁଂ ରେମଲେ (ସୁନତ୍ ଡେମ'କୁନୁଂ ରେମଲେ) ମାରି ନୁରିଂନା ଇସା ମଅଗ'କୁନୁଂ ରେମଲେ (ସୁନତ୍ ମଡିନେମ୍ ରେମଲେ)” ଡ'ସେକ୍ ଡୁତାଜିଉଦିରେମଲେପୁଲେଇଉ ଇ? ଆରାକ୍, ଜାଜା ଜିଉଦିରେମଲେ ଆରାକ୍ ମା'ଏସା କପାଲ୍ବାଇ' ରେମଲେ । ମାସା'ଡ'ନା, ଅବ୍ରାଆମ୍ଲା ଆମାପ୍ରୁ ବିସ୍ବାସ୍ ଡେମ'ସା' ମାଇନା ବିସ୍ବାସ୍ ଜୁଲ'ସେକ୍ ମାପ୍ରୁ ଆମାଇ ଦରମ୍ରେମ୍ ଡ'ସେକ୍ ଜୁଲ' ଡ'ସେକ୍ ନେଇ' ସୁନ'ତୁନେଇ' । 10ଡୁ'ତୁନ୍ ଡ'ନା ମି ଆଅବ୍ରାଆମ୍ଲା ଦରମ୍ରେମ୍ ଡ'ସେକ୍ ମାପ୍ରୁ ଜୁଲ'? ମାଇ ସୁନତ୍ ଡେଂକୁନୁଂବେଲା କି ମଡିନେମ୍ ବେଲା? ଆରାକ୍, ମାଇ ସୁନତ୍ ଡିନ୍ଡେମ୍ ସିଁସେଇଁଉବାଂସା' ମାପ୍ରୁ ଆମାଇ ବଲ୍ରେମ୍ ଡ'ସେକ୍ ଜୁଲ'ତା । 11ଅବ୍ରାଆମ୍ଲା ସୁନତ୍ ଡେମ'କୁନୁଂ ଅର୍ତ ମା ଡ'ନା ମାଇ ଆମାପ୍ରୁ ବିସ୍ବାସ୍ ଡେମ'ସା' ସୁନତ୍ ଡିନ୍ଡେମ୍ ସିଁସେଇଁଉବାଂସା' ମାପ୍ରୁ ଆମାଇ ବଲ୍ରେମ୍ ଡ' ଜୁଲ'ତା ଡ'ସେକ୍ ମୁଇ ସିନ । ଡୁ'ତୁନ୍ ଡ'ନା ଜାଜା ସୁନତ୍ ମଡିନେମ୍ ଆମାପ୍ରୁ ବିସ୍ବାସ୍ ଡେମ'ତା ଆମା'ଏସା ଗୁଲାଇରବକ୍ ମାପ୍ରୁ ବଲ୍ରେମ୍ ଡ'ସେକ୍ ଜୁତ । ସା' ଜାଜା ସୁନତ୍ ମଡିନେମ୍ ଆମାପ୍ରୁ ବିସ୍ବାସ୍ ଡେମ'ସା' ମାପ୍ରୁ ଆମା'ଏ ବଲ୍ରେମ୍ ଡ'ସେକ୍ ଜୁଲ' ମା'ଏ ଗୁଲାଇରନା ବା ଅବ୍ରାଆମ୍ଲା ଏଗା' । 12ଅବ୍ରାଆମ୍ଲା ସୁନତ୍ ଡେମ'କୁନୁଂ ରେମଲେନାସା ବା, ମାତର୍ ସୁନତ୍ ଡିନ୍ଡେମ୍ ସିଁସେଇଁଉ ଅବ୍ରାଆମ୍ଲା ମି ଆମାପ୍ରୁ ବିସ୍ବାସ୍ ଡେମ'ବୁଂଅଁ'କୁ ଡୁ'ତୁନ୍ସୁଗ ସୁନତ୍ ଡେମ'କୁନୁଂ ରେମଲେସା ଆମାପ୍ରୁ ବିସ୍ବାସ୍ ଡେମ୍ତ ଡ'ନାଉ ଅବ୍ରାଆମ୍ଲା ମା'ଏନା ବା ଏତା ।
13 #
ଗାଲା 3:29
ଇନ୍ତେକନ୍ଡେକ୍ ମାପ୍ରୁ ଆଅବ୍ରାଆମ୍ଲା “ଆନ ମାରି ଆନନା ଉଁ'ଉଁନେ ଆନନା ଇଗ୍ଲେଇଁଏଁ କେନ୍ ଦେସ୍ଦୁନିଆନା ଅଦିକାର୍ ବେ'ତିଂ” ଡ'ସେକ୍ ତିତିବାଡ'ବୁଂଅଁ' । ଅବ୍ରାଆମ୍ଲା ନିୟମ୍ ମାନ୍ଗୁତାବେ ଡ'ସେକ୍ ମାପ୍ରୁ ତିତିବାଡ' ଆଡୁତା, ମାତର୍ ମାଇ ଆମାପ୍ରୁ ବିସ୍ବାସ୍ ଡେମ'ସା' ମାଇ ବଲ୍କାମ୍ ଡେମ'ତା ଡ'ସେକ୍ ଜୁଲ'ସେ'ଗାଉ ମାପ୍ରୁ ମାଇବୁରଂ ତିତିବାଡ'ବୁଂଅଁ' । 14#ଗାଲା 3:18ସା' ନିୟମ୍ ମାନ୍କୁନୁଂ ରେମଲେବକ୍ଉ ଅଦିକାର୍ ବେ'ତ ଡ'ନାଏ ମା'ଏ ଆମାପ୍ରୁ ବିସ୍ବାସ୍ ଡେମ'କୁନୁଂ ସରଉବେ ମାରି ମାପ୍ରୁ ଆମା'ଏ ତିତିବାଡ'ସେକ୍ ସୁନ'କୁନୁଂ ସତ୍ ଆରାକ୍ସୁଗ ଡେଂଉଇତା । 15ମାସା'ଡ'ନା ଜାଏସା ନିୟମ୍ ଗୁଲାଇ ମାନ୍ସେକ୍ ଡୁକୁ ଆଗଂତା । ସା' ଜା ନିୟମ୍ ଆମାନ୍ତା ଆମା'ଏ ମାପ୍ରୁ ଡନ୍ଡ୍କସ୍ଟ ବେ'ତ । ନିୟମ୍ ଆଡୁକୁନାଏ ରେମଲେ ନିୟମ୍ ଆମାନ୍ତା ଡ'ସେକ୍ ଆସୁଁନା ।
16 #
ଗାଲା 3:7
ଗୁତୁନ୍ସା' ଜାଜା ବିସ୍ବାସ୍ ଡେମ୍ତ ଆମା'ଏ ମାପ୍ରୁ ତିତିବାଡ'ସେକ୍ ସୁନ୍ତ । ଗୁତୁନ୍ ତିତିବାଡ'ସେକ୍ ମାପ୍ରୁ ଆଅବ୍ରାଆମ୍ନା ଉଁ'ଉଁନେ ଗୁଲାଇରବକ୍ ବେ'ତିଂ ଡ'କୁନୁଂ ନେଇ' ମାମା କାମ୍ ଡେମ'ନେଇ'ସା' ଆରାକ୍ ମାତର୍ ଆନେଇ' ଲିବିସୁପ୍ସେକ୍ ସରଉ ବେଡ'ତା । ମସାଲା ବେଡ'କୁନୁଂ ଗୁତୁନ୍ ନିୟମ୍ ମାନ୍ସେକ୍ ଡୁକୁନୁଂ ରେମଲେପୁଲେଇଉ ଡ'ସେକ୍ ଆରାକ୍ ଅବ୍ରାଆମ୍ଲାସୁଗ ଜାଜା ଆମାପ୍ରୁ ବିସ୍ବାସ୍ ଡେମ୍ତ ଆମା'ଏ ଆଗୁଲାଇର ବେ'ତ ଡ'ସେକ୍ ନେଇ' ମାଗ'ତୁନେଇ' । ମାସା'ଡ'ନା ଅବ୍ରାଆମ୍ଲା ନେଇ'ନା ଗୁଲାଇରନା ବା । 17ଗୁତୁନ୍ସା'ଉ ମାପ୍ରୁନା ଉଲାକ୍ବକ୍ ମାପ୍ରୁ ଆଅବ୍ରାଆମ୍ଲା ସୁନ'କୁନୁଂ ଡି'କେନା ଲେକ୍ଲ'ତା, ମା ଡ'ନା: “ନିଂ ଆନ ଅବୁଦି ଜାତିନ୍ ରେମଲେନ୍ ବା ଡ'ସେକ୍ ବୁଂଅଁ'ତିଂ ।” ମାପ୍ରୁ ଜୁଲ'ନା ମାଇ ଅବୁଦି ରେମଲେନା ବା । ମାସା'ଡ'ନା ମାଇ ଇମ୍ବ'ନ୍ ମାପ୍ରୁନ୍ବକ୍ ବିସ୍ବାସ୍ ଡେମ'ତା ଗୁତୁନ୍ ମାପ୍ରୁ ମିବାଇ' ଡ'ନା ରେମଲେ ଗୁଇ'କୁନୁଂବକ୍ ବ'ରପୁଲେଇ ବପୁ ଡୁକୁନୁଂ ମାରି ମାମା ମଡୁକୁବକ୍ସା' ମାଇନା ମୁନ୍ସୁଗ ଆମାଏସା ୱାୟ'ନା ଗୁତୁନ୍ ଡୁକୁନୁଂସୁଗ ଆଇ'କୁ ତୁର୍ ବେ'ତ ।
18-19ଆଅବ୍ରାଆମ୍ଲା ସଏ ବରସ୍ ଡେଂଗା'ସା' ଆମାଇ ମାରି ଉଁ'ଉଁ ଆବାମ୍ତା ମାରି ମାଇନା କୁନୁଇ' ସାରାଲାସା ଅବୁଦି ଡକ୍ରିଗା'ସା' ଉଁ'ଉଁ ବୁମ୍ବାମ୍ ଆଗଂତା । ଡୁ'ତୁନ୍ ଡ'ନା ଉଁ'ଉଁ ବାମ୍ତିଂ ଡ'ସେକ୍ ଅବ୍ରାଆମ୍ଲା ଆସ୍ବାର୍ ଆଗଂତା ଡ'ନାସା ମାଇ ବାମ୍ତିଂ ଡ'ସେ'ଗାଉ ଆସ୍ଗା' । ମାସା'ଡ'ନା ମାପ୍ରୁ ଆମାଇ ସୁନ' “ନନା ଉଁ'ଉଁନେ କି'ତୁଂବକ୍ ଡୁକୁନୁଂ ମୁମର୍ତ'ଗେସୁଗ ଲାଇଁତ” ଡ'ସେକ୍ ସୁନ'କୁନୁଂ ମାଇ ଅବୁଦି ବିସ୍ବାସ୍ ଡେମ'କୁ । ସା' ମାପ୍ରୁ ସୁନ'କୁନୁଂସୁଗ ମାଇ ଅବୁଦି ଜାତିନ୍ ବା ଏଗା' । 20ମାପ୍ରୁ ବେ'ତିଂ ଡ'ସେକ୍ ତିତିବାଡ' ସୁନ'କୁନୁଂବକ୍ ଅବ୍ରାଆମ୍ଲା ବାର୍ଗା'ତାଂବାଇ' ଆଏତ୍ତା । ମାଇ ବେ'ତ ଡ'ସେକ୍ ବଲ୍ ବିସ୍ବାସ୍ ଡେମ'ସେ'ଗାଉ ଆମାପ୍ରୁ ସୁନ୍ଡ୍ରଗା' । 21ମାପ୍ରୁ ଆନିଂ ତିତିବାଡ'ସେକ୍ ବେ'ତିଂ ଡ'କୁନୁଂସୁଗ ମାଇ ଡିନ୍ଡେମ୍ ଗଂତା ଡ'ସେକ୍ ଅବ୍ରାଆମ୍ଲା ଜିବନ୍କୁରୁଂ ଅ'ତୁର୍ସେକ୍ ଆମାପ୍ରୁ ବିସ୍ବାସ୍ ଡେମ' । 22ମାଇ ଆମାପ୍ରୁ ଡୁ'ତୁନ୍ଉ ବିସ୍ବାସ୍ ଡେମ'ସା' ମାପ୍ରୁ ଆମାଇ ଦରମ୍ରେମ୍ ଡ'ସେକ୍ ଜୁଲ' । 23ମାପ୍ରୁ ଡୁ'ତୁନ୍ଉ ଆମାଇ ଦରମ୍ରେମ୍ ଡ'ସେକ୍ ଜୁଲ' ଡ' ଲେକ୍ଲ'କୁନୁଂ ଅବ୍ରାଆମ୍ଲାପୁଲେଇଉ ଡ'ସେକ୍ ଆରାକ୍, 24ଗୁତୁନ୍ ନେଇ' ଗୁଲାଇରପୁଲେଇ ଲେକ୍ଲ'ବୁଂଅଁ'ତା । ମାସା'ଡ'ନା ନେଇ'ସା ଡୁ'ତୁନ୍ଉ ଆନେଇ'ନା ପ୍ରବୁ ଜିସୁଲା ଗୁଇ'କୁନୁଂକୁରୁଂ ଜା ବ'ରଲ' ଆମାଇ ବିସ୍ବାସ୍ ଡେମ'ନା ମାପ୍ରୁ ଆନେଇ'ସା ଦରମ୍ରେମ୍ ଡ'ସେକ୍ ଜୁତ । 25ଆକେନ୍ ଜିସୁଲା ନେଇ'ନା ପାପ୍ପୁଲେଇ ଗୁଇଏଇ' ଡ'ସେକ୍ ମାପ୍ରୁ ବେନ୍ଟାୟ' ମାରି ଆନେଇ' ଆଗୁଲାଇର ଦରମ୍ରେମ୍ ଅ'ଏପୁଲେଇ ମାପ୍ରୁ ଆମାଇ ଗୁଇ'କୁନୁଂକୁରୁଂ ବ'ରଲ' ।
Currently Selected:
ରମିୟ 4: BFW
Highlight
Copy
Compare
Share
Want to have your highlights saved across all your devices? Sign up or sign in
CC BY-NC-ND 4.0