ରମିୟ 3
3
ମାପ୍ରୁଲା ସତ୍ବାଇ'ଉ ଡୁତା
1ପେନ୍ ବିତ୍ରେ ଏନ୍ତୁକ୍ର ଏତ୍ଗୁତୁପେ, “ନେଇ' ଜିଉଦିରେମଲେସା' ପାଲ୍ ରେମଲେନ୍କୁରୁଂ ମାମା ଲାବ୍ ବାଂଗୁତୁନେଇ' ଇ? ମାରି ନେଇ' ସୁନତ୍ ଡେମ'ତୁନେଇ'ସା' ନେ'ନ୍ବକ୍ ମାମା ମୁନା' ଡୁତା ଇ?” 2ଡୁ'ତୁନ୍ ଡ'ନା, “ଅଁ'ଅଁ, ଡୁତା” ଡ'ସେକ୍ ନିଂ ଆପେ ସୁନ୍ତିଂ । ଗୁତୁନା ମା ଡ'ନା, ଜିଉଦିରେମଲେନ୍ ତିତିବକ୍ଉ ମାପ୍ରୁ ମାଇନା ତୁମ' ଗୁଲାଇ ବେଡ'ବୁଂଅଁ'ତା । ଗୁତୁନା ନିଂ ସିଁସେଇଁଉ ଆପେ ସୁନ୍ତିଂ । 3ମାତର୍ ମା'ଏନ୍ ବିତ୍ରେ ଏନ୍ତୁକ୍ର ମାପ୍ରୁ ବେଡ'କୁନୁଂ ଗୁତୁନ୍ ତୁମ' ବିସ୍ବାସ୍ ଆଡେମ୍ତ ଡ'ସେକ୍ ନିଂ ଆପେ ସତ୍ ସୁନ'ତିଂ । ଡୁ'ତୁନ୍ ଡ'ନା ମା'ଏ ଏନ୍ତୁକ୍ର ବିସ୍ବାସ୍ ଆଡେମ୍ତସା' ନିଂ ଡେମ୍ତିଂ ଡ'ସେକ୍ ତିତିବାଡ'ସେକ୍ ମାପ୍ରୁ ସୁନ'କୁନୁଂ ମାଇ ଆଡେମ୍ତ ଇ? 4ଇନ୍ଡଇ'ଏସା ଆରାକ୍ । ଗୁଲାଇ ରେମଲେ ପଲୁ ସୁନ'ନାସା ମାପ୍ରୁ ସତ୍ଉ ସୁନ୍ତ । ମାସା'ଡ'ନା ମାପ୍ରୁନା ଉଲାକ୍ବକ୍ ଡି'କେନା ଲେକ୍ଲ'ତା, ମା ଡ'ନା,
“ଅ ମାପ୍ରୁ, ନ ମା ସୁନ'ନାସା ଗୁତୁନ୍ ଗୁଲାଇ ସତ୍ । ସା' ଗୁଲାଇର ମାଇ ପଲୁ ସୁନ'ତା ଡ'ସେକ୍ ସୁନ'ନାସା ନନା ତୁମ' ଗୁଲାଇ ସତ୍ବାଇ'ଉ ।
ଆନ ଜାଏସା ବିସାର୍ନା ଡେମ'ନା ନଉ ଜିନ୍ତୁନ” ଡ'ସେକ୍ ଲେକ୍ଲ'ତା ।
5ଡୁ'ତୁନ୍ ଡ'ନା ରେମଲେ ଏତ୍କୁନୁଂସୁଗ ନିଂ ମୁଇ ସୁନ୍ତିଂ, ମା ଡ'ନା: ରେମଲେ ପାପ୍ ଡେମ'ତାସା' ମାପ୍ରୁ ଦରମ୍ବାଇ'ରେମ ଡ'ସେକ୍ ସୁଁସୁ ଗଂଗୁତା ଡ'ନା, ପେ ମା ଏତ୍ଗୁତୁପେ? ମାପ୍ରୁ ଆନେଇ' ବିସାର୍ନା ଡେମ'ସେକ୍ ଡନ୍ଡ୍କସ୍ଟ ବେଡ'କୁନୁଂ ବଲ୍ ଆରାକ୍ ଡ'ତୁପେ ଇ? 6ଇନ୍ଡଇ'ଏସା ଡୁ'ତୁନା ଆରାକ୍ । ମାସା'ଡ'ନା ମାପ୍ରୁ ଡେମ'କୁନୁଂ କାମ୍ ଗୁଲାଇଉ ବଲ୍ ଆରାକ୍ ଡ'ନା ମାଇ ଆକେନ୍ ଦେସ୍ଦୁନିଆନା ରେମଲେ ଆଗୁଲାଇର ମି ବଲ୍ ବିସାର୍ନା ଡିନ୍ଡେମ୍ ଗଂତା? 7ପେନ୍ ବିତ୍ରେ ଏନ୍ତୁକ୍ର ମାରି ସୁନ୍ତୁପେ, “ଜୁ, ନିଂ ପଲୁ ସୁନ'ତିଂସା' ମାପ୍ରୁ ଡୁ'ତୁନ୍ବାଇ' ଆରାକ୍ ମାଇ ସତ୍ବାଇ' ଡ'ସେକ୍ ଗୁଲାଇ ରେମଲେ ମାପ୍ରୁନା ଇମି ଅମୁନା'ତ#3:7 ଗୁଲାଇ ରେମଲେ ମାପ୍ରୁନା ଇମି ଅମୁନା'ତ ମାପ୍ରୁନା ମଇମା ଡ'ନା ମାସା' ମାପ୍ରୁ ଆନିଂ ମାଇ ପାପ୍ରେମ୍ ଡ'ସେକ୍ ବିସାର୍ନା ଡେମ'ତା?” 8ଡୁ'ତୁନ୍ ଡ'ନା ରେମଲେ ଅବୁଦି ପାପ୍ ଡେମ'ନା ଅଦିକ୍ ବଲ୍ ଡ'ସେକ୍ ସୁଁନେଇ' ଇ? ସତଇସା ନେଇ' ଡୁ'ତୁନାଉ ଆରେମଲେ ଅମାକ୍ଡେନ୍ତା ଡ'ସେକ୍ ଏନ୍ତୁକ୍ର ଆନେଇ ନିନ୍ଦାଲ'ତା, ମାତର୍ ଗୁତୁନ୍ ସତ୍ ଆରାକ୍ । ଜାଜା ଡୁ'ତୁନ୍ଉ ସୁନ'ତା ଆମା'ଏ ମାପ୍ରୁ ଡନ୍ଡ୍କସ୍ଟ ବେଡ'କୁନୁଂ ଟିକ୍ ଡୁତା ।
ଗୁଲାଇର ପାପ୍ବାଇ'
9ଡୁ'ତୁନ୍ ଡ'ନା ନେଇ' ଜିଉଦିରେମଲେସା' ପାଲ୍ ରେମଲେନ୍କୁରୁଂ ନେ'ନ୍ବକ୍ ମାମା ବଲ୍ ଡୁତା ଇ? ଇ'କିସା ଆରାକ୍ । ମାସା'ଡ'ନା ଜିଉଦିରେମଲେ ଡ'ନାସା ଜିଉଦିରେମ ଆରାକ୍ ଡ'ନାସା ନେଇ' ଗୁଲାଇର ସମାନ୍ । ମାସା'ଡ'ନା ପାପ୍ ଆନେଇ' ଆଗୁଲାଇର ପାପ୍କାମ୍ ଅ'ଡେମ'ତାସା' ନେଇ' ଗୁଲାଇର ପାପ୍ବାଇ' ରେମଲେ ଡ'ସେକ୍ ସିଁସେଇଁଉ ନେଇ' ଅଇଁୟ'ନେଇ' । 10ମାପ୍ରୁନା ଉଲାକ୍ବକ୍ ଡି'କେନ୍ ଲେକ୍ଲ'ତା, ମା ଡ'ନା,
“ଜାଏସା ଦରମ୍ବାଇ' ଆରାକ୍,
ଡୁ'ତୁନ୍ବାଇ' ମୁଇନ୍ଡାସା ରେମ ଆଡୁତା ।
11ସତ୍ବାଇ' ଇମ୍ବ'ନା ଡ'ସେକ୍ ମାଗ'କୁନୁଂ ରେମ ମୁଇନ୍ଡାସା ଆରାକ୍
ମାରି ମାପ୍ରୁନା ମୁନ୍ ମା ଗୁତୁନ୍ ମାଗ'ସେକ୍ ମାଇନା ମୁନ୍ସୁଗ ଡିନ୍ଡେମ୍ରେମ୍ ମୁଇନ୍ଡାସା ଆରାକ୍ ।
12ଗୁଲାଇ ରେମଲେ ମାପ୍ରୁନା ବଲ୍ କୁରୁଂ ଅନ୍ତୁର'ସେକ୍ ଅଲିରାକ୍ବାଇ' କୁରୁଂବକ୍ ଉଇଡେନ୍ତା ।
ସା' ମା'ଏ ଗୁଲାଇର ମାକ୍ନାବାଇ' ଡେଂଉଇଆର୍ଗା' ।
ଜାଏସା ବଲ୍କାମ୍ ଡିନ୍ଡେମ୍ରେମ୍ ଆଡୁତା କି
ଡୁ'ତୁନ୍ବାଇ' ରେମ ମୁଇନ୍ଡାସା ଆରାକ୍ ।
13ଆତିଲ'କୁନୁଂ ମଟ୍ ତଗ୍ଡାଲ'ନା ଅବୁଦି ଅଲିରାକ୍ବାଇ' ଡୁକ୍ତସା' ରେମଲେ ଅଡୁକ୍ ମୁନ୍ ଆରାକ୍ ଡେଂକୁନୁଂସୁଗ ମା'ଏନ୍ ତୁମ'କୁରୁଂ ଅବୁଦି ଅଂମଡୁସୁପ୍ବାଇ' ତୁମ' ତୁର୍ତା ।
ମା'ଏ ଆରେମଲେ ନାଡାଇତ ।
ନାଂବୁ' ଅବ'ନା ରେମଲେ ମି ଆଇ'କୁ ଗୁଇ'ତା ଡୁ'ତୁନ୍ସୁଗ ମା'ଏନା ତୁମ' ଆରେମଲେ ସୁନ'ନା ଆଇ'କୁ ଆଜିବନ୍ ବାମ୍ତା ।
14ମା'ଏ ଆରେମଲେ ଆନା ବୁଂତ ମାରି ଅବୁଦି ଗିସେକ୍ସେକ୍ ଅଲିରାକ୍ବାଇ' ସୁନ୍ତ ।
15ମା'ଏ ଆରେମଲେ ଅଡାପ୍ପୁଲେଇ ଅବୁଦି ମୁନ୍ ଡେଂସେକ୍ ଡୁତା ।
16ମା'ଏ ଆମ୍ବ' ଉଇନାସା ଗୁଲାଇ ବିଲାୟ'ସୁଂଅଁ'ସେକ୍ ଆରେମଲେ ଦୁକକସ୍ଟ ବିବେ'ପୁଲେଇ ମୁନ୍ ଡେଂଗୁତା ।
17ରେମଲେବୁରଂ ସାନ୍ତିସାର୍ଦା ଡେଂସେକ୍ ମି ଡୁକୁନା ଡେନ୍ତା ଡ'ସେକ୍ ମା'ଏ ଇ'କିସା ଆମାକ୍ତ ।
18ମା'ଏ ଆମାପ୍ରୁ ଆବୁତୁଂତା ।” ଡ'ସେକ୍ ଲେକ୍ଲ'ତା ।
19ସତଇସା ନିୟମ୍ ଜାନ୍ବକ୍ ବେଡ'ତା ମା'ଏ ଗୁତୁନ୍ ମାନ୍ସେକ୍ ଡୁକୁପୁଲେଇ ଲେକ୍ଲ' ବେଡ'ତା ଡ'ସେକ୍ ନେଇ' ମାଗ'ତୁନେଇ' । ସା' ଜାଏସା ମୁଇନ୍ଡା ନିଂନା ଜିବନ୍ବକ୍ ପାପ୍ ଆଡୁତା ଡ'ସେକ୍ ସୁଁସୁ ଆଗଂତା ମାରି ମାପ୍ରୁ ଜୁଲ'ନା ଦେସ୍ଦୁନିଆବକ୍ ଡୁକୁନୁଂ ଗୁଲାଇର ପାପ୍ନା ଡନ୍ଡ୍ ବୁମ୍ବାମ୍ ଡୁତା । 20#ଗାଲା 2:16ମାସା'ଡ'ନା ରେମଲେ ଗୁଲାଇର ଗୁତୁନ୍ ନିୟମ୍ସୁଗ ଡେମ'ସେକ୍ ଡୁକୁନାସାଏସା ମାପ୍ରୁ ଆମା'ଏ ଦରମ୍ରେମ୍ ଡ'ସେକ୍ ଆଜୁତ । ରେମଲେ ଅବୁଦି ପାପ୍ରେମ୍ ଡ'ସେକ୍ ନିୟମ୍ ଅସୁୟ'ତା ।
ମାପ୍ରୁ ମି ଆରେମଲେ ଦରମ୍ରେମ୍ ଅ'ଏତ?
21ମାତର୍ ଆ'ନା ନେଇ' ମସାଲା ବେଡ'କୁନୁଂ ନିୟମ୍ ମାନ୍ସେକ୍ ଡୁକୁନାଉ ଦରମ୍ରେମ୍ ଏ ଗଂତୁନେଇ' ଡ'ସେକ୍ ଆରାକ୍ ମାତର୍ ଆନେଇ' ଦରମ୍ରେମ୍ ଅ'ଏପୁଲେଇ ଅ'ରଇଁୟ'କୁନୁଂ ମୁଇ ତିମେ କୁରୁଂ ମାପ୍ରୁ ଆନେଇ' ଅସୁୟ'ତା । ଗୁତୁନ୍କୁରୁଂ ଇମ୍ବ'ନା ଡ'ସେକ୍ ମସାଲା ଲେକ୍ଲ'କୁନୁଂ ନିୟମ୍ବକ୍ ମାରି ବାବବାଦିଲେସା ଇନ୍ତେକନ୍ଡେ'କା ମାପ୍ରୁନା ଉଲାକ୍ବକ୍ ଲେକ୍ଲ'ବୁଂଅଁ'କୁ । 22#ଗାଲା 2:16ଗୁତୁନ୍ ମା ଡ'ନା ଜାଜା ଆଜିସୁ କିରିସ୍ଟଲା ବିସ୍ବାସ୍ ଡେମ୍ତ ଆମା'ଏ ଆଗୁଲାଇର ମାପ୍ରୁ ଦରମ୍ରେମ୍ ଅ'ଏତ । ମାପ୍ରୁ ଆଜାଏସା ପାଲ୍ପାଲ୍ ଆଜୁତ । 23ମାସା'ଡ'ନା ଗୁଲାଇର ପାପ୍କାମ୍ ଡେମ'ତାସା' ମାପ୍ରୁ ମୁଲ୍ ବେଡ'କୁନୁଂ ମାପ୍ରୁନା ଗୁତୁନ୍ ତାରା' ଆ'ନା ରେମଲେନ୍ବକ୍ ଆଡୁତା । 24ମାତର୍ ମାପ୍ରୁ ଆନେଇ' ଅବୁଦି ଦୟା ଡେମ'ତାସା' ଆନେଇ' ଦରମ୍ରେମ୍ ଅଏଲ'ସେକ୍ କିରିସ୍ଟ ଜିସୁନା ଲାଗିରେ ପାପ୍ନା ଡନ୍ଡ୍କସ୍ଟ ବୁମ୍ବାମ୍କୁରୁଂ ଆନେଇ' ଅ'ତୁର' । ନେଇ' ମାମା ବେଡ'ନେଇ'ସା' ଆରାକ୍ ମାତର୍ ଗୁତୁନା ମାଇ ଆନେଇ' ସରଉ ବେଡ'ତା । 25ନେଇ'ନା ପାପ୍ ବଲ୍ ଡିନ୍ଡେମ୍ପୁଲେଇ ମାପ୍ରୁ ଆଜିସୁ କିରିସ୍ଟଲା ଗେଲ'ସା' ନେଇ' ଡେମ'କୁନୁଂ ଗୁଲାଇ ପାପ୍ନା ଡନ୍ଡ୍କସ୍ଟ ବୁମ୍ବାମ୍ନା ଗୁଲାଇ ମାଇନା ବାଗ୍ବକ୍ ରିଂଗା' । ସା' ଜିସୁଲା ନେଇ'ନା ପାପ୍ପୁଲେଇ ମାଇନା ବନି ବେଡ' ଗୁଇ'ଗା' ଡ'ସେକ୍ ନେଇ' ବିସ୍ବାସ୍ ଡେମ'ନା ମାଇ ଆନେଇ' ମାରି ବଲ୍ ଡେମ୍ତ । ମାପ୍ରୁ ଗୁଲାଇ ସିଦାସିଦା ଡେମ'ତା ଡ'ସେକ୍ ଅସୁଇ'ପୁଲେଇ ମାଇ ଡୁ'ତୁନା ଡେମ' । ଆକିରିସ୍ଟ ଜିସୁଲା ରେମଲେନା ପାପ୍ପୁଲେଇ ବିବେ' ସିଁସେଇଁଉ ରେମଲେ ଡେମ'କୁନୁଂ ଗୁଲାଇ ପାପ୍ ମାପ୍ରୁ ଆଇଁଲ'ସେକ୍ ମାଇ ଆରେମଲେ ବଲ୍ ଡେମ'କୁ । 26ସା' ମାପ୍ରୁ ଦରମ୍ବାଇ' ଡ'ସେକ୍ ମାଇନା କାମ୍ ଗୁଲାଇ ଜୁଲ'ନା ମାକ୍ତୁନେଇ' । ମାପ୍ରୁ ଦରମ୍ବାଇ'ସା' ଆଜିସୁଲା ଜା ବିସ୍ବାସ୍ ଡେମ୍ତ ଆମାଇ ମାଇ ବଲ୍ ରେମ ଅ'ଏତସା' ଡୁ'ତୁନ୍ଉ ମାଇ ଆରେମଲେ ଆ'ନା ବଲ୍ ବିସାର୍ନା ଡେମ୍ତ ଡ'ସେକ୍ ଅସୁଇ'ପୁଲେଇ ମାଇ ଡୁ'ତୁନା ଡେମ'କୁ ।
27ଡୁ'ତୁନ୍ ଡ'ନା ନେଇ' ମାମା ଡେମ'ତୁନେଇ'ସା' ମାପ୍ରୁ ଆନେଇ' ଦରମ୍ରେମ୍ ଅ'ଏଲ' ଡ'ସେକ୍ ନେଇ' ବଡ୍ପୁନ୍ ଡିନ୍ଡେମ୍ ଗଂତୁନେଇ' ଇ? ଆରାକ୍ । ମାସା'ଡ'ନା ମାଇ ନିୟମ୍ ମାନ୍ଗୁତା ଡ'ସେକ୍ ମାପ୍ରୁ ଆନେଇ' ଦରମ୍ରେମ୍ ଆ'ଏତ ମାତର୍ ଆଜିସୁ କିରିସ୍ଟଲା ବିସ୍ବାସ୍ ଡେମ'ତୁନେଇ'ସା'ଉ ମାଇ ଆନେଇ' ଦରମ୍ରେମ୍ ଅ'ଏଲ'ତା । 28ମାସା'ଡ'ନା ମୁଇନ୍ଡା ରେମ ନିୟମ୍ବକ୍ ଲେକ୍ଲ'କୁନୁଂସୁଗ କାମ୍ ଡେମ'ନା ବଲ୍ ରେମ ଆଏତା ମାତର୍ ଆଜିସୁଲା ବିସ୍ବାସ୍ ଡେମ'ନାଉ ବଲ୍ରେମ୍ ଏତା ଡ'ସେକ୍ ନେଇ' ବିସ୍ବାସ୍ ଡେମ'ତୁନେଇ' । 29ଡୁ'ତୁନ୍ ଡ'ନା, ମାପ୍ରୁ ଜିଉଦିରେମଲେନାଉ ମାପ୍ରୁ ଇ? ମାଇ ପାଲ୍ରେମଲେନାସା ମାପ୍ରୁ ଆରାକ୍ ଇ? ଆରାକ୍, ମାଇ ଗୁଲାଇ ରେମଲେନା ମାପ୍ରୁ । 30#ଗାଲା 3:20ମାପ୍ରୁ ମୁଇନ୍ଡାଉ ଡୁତା । ସା' ଜିଉଦିରେମ ଡ'ନାସା ଜିଉଦିରେମ ଆରାକ୍ ଡ'ନାସା ଜାଏସା ମୁଇନ୍ଡା ଆଜିସୁ କିରିସ୍ଟଲା ବିସ୍ବାସ୍ ଡେମ'ନାଉ ମାପ୍ରୁ ଆମାଇ ଦରମ୍ରେମ୍ ଅ'ଏତ । 31ଡୁ'ତୁନ୍ ଡ'ନା ନେଇ' ବିସ୍ବାସ୍ ଡିନ୍ଡେମ୍ନାଉ ଡେନ୍ତା ଡ'ସେକ୍ ଇସାଉ ଅଇଁୟ'ତୁନେଇ' ଡ'ନା ନିୟମ୍ ଗୁଲାଇ ବାନାକ୍ନା ଡେନ୍ତା ଇ? ଆରାକ୍ । ମାସା'ଡ'ନା ନେଇ' ବଲ୍ ବିସ୍ବାସ୍ ଡେମ'ନାଉ ନିୟମ୍ ଗୁଲାଇ ବଲ୍ ମାନ୍ଗୁତୁନେଇ' ।
Currently Selected:
ରମିୟ 3: BFW
Highlight
Copy
Compare
Share
Want to have your highlights saved across all your devices? Sign up or sign in
CC BY-NC-ND 4.0