ରମିୟ 2
2
ମାପ୍ରୁ ଆଗୁଲାଇର ବିସାର୍ନା ଡେମ୍ତ
1 #
ମାତିଉ 7:1; ଲୁକ 6:37 ଡୁ'ତୁନ୍ସା' ଅ ବାଇଲ'ଗେ, ପେନ୍ ବିତ୍ରେ ଜାଏସା ମୁଇନ୍ଡା ଆପାଲ୍ରେମ ନ ଡୁ'ତୁନ୍ବାଇ' ପାପ୍ ଡେମ'ତୁନ ଡ'ସେକ୍ ସୁଁସୁ ଗଂତୁପେ, ମାତର୍ ନ ଆପାଲ୍ରେମ ଡୁ'ତୁନା ବିସାର୍ନା ଡିନ୍ଡେମ୍ବେଲା ନ ନିଜେ ବିସାର୍ନା ଡେମ୍ବର୍ଗୁତୁନ ଡ'ସେକ୍ ଏତ୍କୁଲା । ମାସା'ଡ'ନା ନ ଜା ଡ'ନାସା' ନସା ମାଇସୁଗ ପାପ୍ ଡେମ'ସେକ୍ ଡୁତୁନସା' ନିଂନା ଜିବନ୍ବକ୍ ଇ'କିସା ପାପ୍ ଆଡୁତା ଡ'ସେକ୍ ନ ସୁଁସୁ ଆଗଂତୁନ । 2ମାପ୍ରୁ ବିସାର୍ନା ଡିନ୍ଡେମ୍ବେଲା ସତ୍ବାଇ'ଉ ବିସାର୍ନା ଡେମ୍ତ । ସା' ଡୁ'ତୁନ୍ବାଇ' ପାପ୍କାମ୍ ଡେମ'କୁନୁଂ ରେମବକ୍ ମାଇ ସତ୍ବାଇ' ବିସାର୍ନା ଡେମ୍ତ ଡ'ସେକ୍ ନେଇ' ମାଗ'ତୁନେଇ' । 3ମାରି ଅ ବାଇଲକ୍, ଡୁ'ତୁନ୍ବାଇ' ପାପ୍କାମ୍ ଡେମ'କୁନୁଂ ରେମବକ୍ ଜୁଲ'ସେକ୍ ନ ପାପ୍କାମ୍ ଡେମ'ତୁନ ଡ'ସେକ୍ ଆମାଇ ନ ବିସାର୍ନା ଡେମ୍ତୁନ ମାତର୍ ନସା ମାଇସୁଗ ଡୁ'ତୁନ୍ବାଇ' ପାପ୍କାମ୍ ଡେମ'ସେକ୍ ଡୁତୁନ । ସା' ନ ଆନିଂ ମାପ୍ରୁ ବିସାର୍ନା ଆଡେମ୍ତ ଡ'ସେକ୍ ଏତ୍ଗୁତୁନ ଇ? 4ନ ପାପ୍ ଡେମ'ତୁନ ଡ'ନାସା ମାଇ ଆନ ଅବୁଦି ଆଲାତ୍ ଡେମ'ସେକ୍ ଆନ କେମା ବେଡ'ତାସା'ଉ ସୁରୁଇ' ଆନ ଡନ୍ଡ୍ ଆବେ'ତ । ସା' ଗୁତୁନ୍ ଜୁଲ'ସେକ୍ ନିଂ ବାଦ୍ଲି ମଡିନେମ୍ ମିଏସା ଡୁକୁନା ଡେନ୍ତା, ମାସା ଆଡେନ୍ତା ଡ'ସେକ୍ ନ ଏତ୍ଗୁତୁନ ଇ? ଆରାକ୍ । ମାପ୍ରୁ ମାସା' ଆନ ଅବୁଦି ଦୟା ଡେମ'ସେକ୍ ଡୁତା ଡ'ନା ମାଇ ଗୁତୁନ୍ ପାପ୍କାମ୍ ଅଲିରାକ୍କାମ୍ ଗୁଲାଇ ଅଡକ୍ସୁଂଅଁ'ସେକ୍ ନିଂବକ୍ ଆନ୍ଡେଇଁତାବେ ଡ'ସେକ୍ ଏତ୍ଗୁତାସା'ଉ ଆନ ଡନ୍ଡ୍ ଆବେ'ତ ।
5-6ମାତର୍ ନ ଜାଏସାନା ତୁମ' ମମାନ୍ବାର୍ବାଇ' ମାରି ନନା ଜିବନ୍ ବାଦ୍ଲି ଡିନ୍ଡେମ୍ପୁଲେଇ ଇ'କିସା ମୁନ୍ ଆରାକ୍ବାଇ' ରେମ । ସା' ମାପ୍ରୁ ଆନ ଗିସେକ୍ସେକ୍ ଅବୁଦି ଡନ୍ଡ୍କସ୍ଟ ବେ'ତ । ମାରି ମାଇ ଇନ୍ଡଇ'ୟା ଆରେମଲେ ବିସାର୍ନା ଡେମ୍ତ ଉନ୍ତା ମାଇ ଆଗୁଲାଇ ରେମଲେ ମା'ଏ ମାମା ଡେମ'ତା ଗୁତୁନ୍ ଗୁଲାଇ ଜୁଲ'ସେକ୍ ବଲ୍କାମ୍ ଡେମ'କୁନୁଂ ରେମବକ୍ ବଲ୍ ପୁରାସ୍ ବେ'ତ ମାରି ଅଲିରାକ୍କାମ୍ ଡେମ'କୁନୁଂ ରେମବକ୍ ଡନ୍ଡ୍ ବେ'ତ । ସା' ଉନ୍ତା ମାଇ ବିସାର୍ନା ଡେମ'କୁନୁଂ ଟିକ୍ ଡ'ସେକ୍ ଆଗୁଲାଇର ଅସୁଇ'ତ । 7ଜାଜା ଇସାଉ ବଲ୍କାମ୍ ଡେମ'ସେକ୍ ମାପ୍ରୁ ଆନିଂ ମୁନା'ରେମ୍ ବଲ୍ରେମ୍ ଡିଗେଇ'#2:7 ମାପ୍ରୁ ଆନିଂ ମୁନା'ରେମ୍ ବଲ୍ରେମ୍ ଡିଗେଇ' ମାପ୍ରୁନା ମଇମା ମାରି ମଡୁନମ୍ ଜିବନ୍ ଆନିଂ ବୁମ୍ବାମ୍ ଡୁତା ଡ'ସେକ୍ ଜାଜା ଇସାଉ ବଲ୍କାମ୍ଉ ଡେମ'ସେକ୍ ଡୁତା ଡୁ'ତୁନ୍ବାଇ' ରେମଲେବକ୍ ମାପ୍ରୁ ମଡୁନମ୍ ଜିବନ୍ ବେ'ତ । 8ମାତର୍ ଜାଜା ନିଜର୍ନା ମୁନ୍ସୁଗ ଗୁଲାଇ ଡେମ'ତା ମାରି ଅଲିରାକ୍ବାଇ'କାମ୍ ଡେମ'ସେକ୍ ଡୁକୁପୁଲେଇ ଇମ୍ବ'ନା ସତ୍ ବିସୟ ଡୁତା ଗୁତୁନ୍ ଅଡକ୍ସୁଂଅଁ'ତା ଡୁ'ତୁନ୍ବାଇ' ରେମଲେବକ୍ ମାପ୍ରୁ ଗିସେକ୍ସେକ୍ ଅବୁଦି ଡନ୍ଡ୍କସ୍ଟ ବେ'ତ । 9ଜାଜା ଅଲିରାକ୍କାମ୍ ଡେମ'ସେକ୍ ଡୁତା ଆମା'ଏ ଆଗୁଲାଇର ମାପ୍ରୁ ଦୁକକସ୍ଟ ମାରି ସିନ୍ତାରୁନ୍ତା ବେ'ତ । ଗୁତୁନ୍ ଗୁଲାଇ ସିଁସେଇଁ ଆଜିଉଦିରେମଲେ ବେ'ତ ମାରି ଜାଜା ଜିଉଦିରେମଲେ ଆରାକ୍ ଆମା'ଏସା ବେ'ତ । 10ମାତର୍ ଜାଜା ବଲ୍କାମ୍ ଡେମ'ସେକ୍ ଡୁତା ଆମା'ଏ ଆଗୁଲାଇର ମାପ୍ରୁ ମା'ଏ ବଲ୍ରେମ୍ ମୁନା'ରେମ୍#2:10 ମଇମା ଡ'ସେକ୍ ମା'ଏନ୍ ଜିବନ୍ବକ୍ ସାନ୍ତିସାର୍ଦା ବେ'ତ । ଗୁତୁନ୍ ଗୁଲାଇ ସିଁସେଇଁ ଆଜିଉଦିରେମଲେ ବେ'ତ ମାରି ଜାଜା ଜିଉଦିରେମଲେ ଆରାକ୍ ଆମା'ଏସା ବେ'ତ । 11ମାସା'ଡ'ନା ମାପ୍ରୁ ଇନ୍ଡଇ'ଏସା ଆରେମଲେ ପାଲ୍ପାଲ୍ ଆଜୁତ, ଆଗୁଲାଇର ସମାନ୍ଉ ଜୁତ ।
12ଜାଜା ଜିଉଦିରେମଲେ ଆରାକ୍ ମା'ଏ ମସାଲା ଲେକ୍ଲ' ବେଡ'କୁନୁଂ ନିୟମ୍ ମାଗ' ଆଡୁତା ଡ'ନାସା ମା'ଏ ପାପ୍କାମ୍ ଡେମ'ତାସା' ମାପ୍ରୁ ଆମା'ଏ ନାସାୟ'ସୁଂତ, ମା'ଏ ଗୁତୁନ୍ ନିୟମ୍ ମାଗ'ତାକି ଆରାକ୍ ଡ'ସେକ୍ ମାପ୍ରୁ ଆଜୁତ । ମାରି ଜିଉଦିରେମଲେ ମସାଲା ଲେକ୍ଲ' ବେଡ'କୁନୁଂ ନିୟମ୍ ମାଗ'ସେକ୍ସା ଗୁତୁନ୍ ନିୟମ୍ ମମାନ୍ବାର୍ ଡୁକୁନା ଗୁତୁନ୍ ନିୟମ୍ ଅନୁସାରେ ମାପ୍ରୁ ଆମା'ଏ ବିସାର୍ନା ଡେମ୍ତ । 13ମାସା'ଡ'ନା ମାପ୍ରୁ ଆଜା ଦରମ୍ରେମ୍ ଡ'ସେକ୍ ଜୁତ ଡ'ନା ସରଉ ନିୟମ୍ ଅଂଅଁ'କୁନୁଂ ରେମଲେବକ୍ ଆରାକ୍ ଜାଜା ଗୁତୁନ୍ ନିୟମ୍ ଗୁଲାଇ ମାନ୍ସେକ୍ ଡୁତା ଆମା'ଏଉ ମାପ୍ରୁ ଦରମ୍ରେମ୍ ଡ'ସେକ୍ ଜୁତ । 14ଜାଜା ଜିଉଦିରେମଲେ ଆରାକ୍ ମା'ଏନ୍ବକ୍ ମସାଲା ଲେକ୍ଲ' ବେଡ'କୁନୁଂ ନିୟମ୍ ଆଡୁତା ଡ'ନାସା ଇମ୍ବ'ନା ବଲ୍ ଇମ୍ବ'ନା ଆସାର୍ ଡ'ସେକ୍ ମା'ଏନ୍ ଜିବନ୍ ବିତ୍ରେ ସୁନ୍ତ । ଗୁତୁନ୍ ଜିବନ୍ ବିତ୍ରେ ସୁନ'କୁନୁଂସୁଗ କାମ୍ ଡେମ'ନା ଗୁତୁନ୍ ମା'ଏନା ମୁଇ ନିୟମ୍ସୁଗ ଡୁତା । 15ମାସା'ଡ'ନା ମା'ଏନା ଜିବନ୍ବକ୍ ଗୁତୁନ୍ ନିୟମ୍ ଡୁତାସା' ମା'ଏ ମାମା ଡେମ'ନା ନ ପାପ୍କାମ୍ ଡେମ'ତୁନ ଆରା'ଗେ ବଲ୍କାମ୍ ଡେମ'ତୁନ ଡ'ସେକ୍ ଗୁତୁନ୍ ନିୟମ୍ ଆମା'ଏ ସୁନ୍ତ । ମାରି ମା'ଏନା ଏତ୍ବକ୍ସା ଡୁ'ତୁନାଉ ଆମା'ଏ ଏତାଇତ । 16ତିର୍ଗି'ସୁମଂ ଆରେମଲେ ବିସାର୍ନା ଡିନ୍ଡେମ୍ପୁଲେଇ ମାପ୍ରୁ ଆଜିସୁଲା ବପୁ ବେ'ତ । ମାଇ ଆରେମଲେ ବିସାର୍ନା ଡିନ୍ଡେମ୍ବେଲା ନିଂ ଆପେ ସୁନ'କୁନୁଂ କେନ୍ ବଲ୍କବର୍ବକ୍ ଲେକ୍ଲ'କୁନୁଂସୁଗ ବିସାର୍ନା ଡେମ୍ତ । ଉନ୍ତା ରେମଲେ ମାମା ମା'ଏନ୍ ଜିବନ୍ ବିତ୍ରେ କଲେକଲେ ଗୁଲାଇ ଏତ୍କୁନୁଂ ଜୁଲ'ସେକ୍ କିରିସ୍ଟ ଜିସୁଲା ଆରେମଲେ ବିସାର୍ନା ଡେମ୍ତ ।
ଜିଉଦିରେମଲେନ୍ ତିତିବକ୍ ମାପ୍ରୁ ବେଡ'କୁନୁଂ ନିୟମ୍ ଡୁତା
17ନେଇ ଡ'ନା ଜିଉଦିରେମଲେ ମାରି ମସାଲା ଲେକ୍ଲ' ବେଡ'କୁନୁଂ ନିୟମ୍ ଗୁଲାଇ ନେଇ ମାନ୍ଗୁତୁନେଇ ଡ'ସେକ୍ ପେ ସୁନ'ତୁପେ ମାରି ଆନେଇ ମାପ୍ରୁ ନିଂନା ରେମ ଡ'ସେକ୍ ସିରେଲ' ବୁଂଅଁ'ତା ଡ'ସେକ୍ ପେ ବଡ୍ପୁନ୍ ଡେଂଗୁତୁପେ । 18ମସାଲା ବେଡ'କୁନୁଂ ନିୟମ୍ ଗୁଲାଇ ପେ ମାଗ'ତୁପେସା' ପେ ମି ଡୁକୁଡୁତା ଡ'ସେକ୍ ମାପ୍ରୁ ମା ମୁନ୍ ଡେଂଗୁତା ଗୁତୁନ୍ ପେ ମାଗ'ତୁପେ ମାରି ଇମ୍ବ'ନା ବଲ୍ ଇମ୍ବ'ନା ଆସାର୍ ଡ'ସେକ୍ସା ପେ ମାଗ'ତୁପେ । 19ଜାଜା ଆମାପ୍ରୁ ମମୁନାକ୍ ଡୁତା ମା'ଏ କାନାମ'ବାଇ' ରେମଲେସୁଗ ମାରି ଞୁର୍ବକ୍ ଡୁକୁନୁଂ ରେମଲେସୁଗ ଡୁତା । ସା' ଡୁ'ତୁନ୍ବାଇ' ରେମଲେବକ୍ ମାପ୍ରୁନା ବଲ୍ କୁରୁଂବକ୍ ମାରି ବଲ୍ ତାରା'ବକ୍ ନେଇ ରିଂଅଁ' ଉଇରେମ୍ ଡ'ସେକ୍ ପେ ବିସ୍ବାସ୍ ଡେମ'ତୁପେ । 20ମାରି ମସାଲା ବେଡ'କୁନୁଂ ନିୟମ୍ ନେନ୍ବକ୍ ଡୁତାସା' ନେଇ ଅବୁଦି ମାଗ'କୁନୁଂ ମାରି ଇମ୍ବ'ନା ସତ୍ ଡ'ସେକ୍ ମାଗ'କୁନୁଂ ରେମଲେସା' ଜା ଆମାପ୍ରୁ ଆମାକ୍ତ ମାରି ଜାଜା ମସାଲା ବେଡ'କୁନୁଂ ନିୟମ୍ ବଲ୍ ଆମାକ୍ତ ଆମା'ଏ ଅମାକ୍ ଗଂତୁନେଇ ଡ'ସେକ୍ ପେ ବିସ୍ବାସ୍ ଡେମ'ତୁପେ ।
21-22ଆଡୁଂଗାଲ' ଡ'ସେକ୍ ପେ ଆପାଲ୍ ରେମଲେ ସୁନ୍ତୁପେ ମାତର୍ ପେ ଡୁଂଗା'ଲ'ତୁପେ । ଜାଲିବାଇ' କାମ୍ ଆଡେମ' ଡ'ସେକ୍ ଆପାଲ୍ ରେମଲେ ସୁନ୍ତୁପେ ମାତର୍ ପେ ନିଜେ ଜାଲିବାଇ' କାମ୍ ଡେମ'ତୁପେ । ଆମୁର୍ତି ସୁନ୍ଡ୍ରକ୍ନା ପାପ୍ ଡ'ସେକ୍ ଆପାଲ୍ ରେମଲେ ପେ ସୁନ୍ତୁପେ ମାତର୍ ପେ ମନ୍ଦିର୍ବକ୍ ଉଇସେକ୍ ମାମା ଡୁଂଗା'ଲ' ରିଂତୁପେ । ଡୁ'ତୁନ୍ ଡ'ନା ଜୁ, ପେ ଆପାଲ୍ ରେମଲେ ଅମାକ୍ରେମ୍ ମାସା' ପେ ନିଜେ ଆମାକ୍ତୁପେ? 23ମାସା'ଡ'ନା ନେଇ ମସାଲା ବେଡ'କୁନୁଂ ନିୟମ୍ ମାଗ'କୁନୁଂ ରେମଲେ ଡ'ସେକ୍ ଅବୁଦି ବଡ୍ପୁନ୍ ଡେଂସେକ୍ ଆପାଲ୍ ରେମଲେ ଅମାକ୍ତୁପେ ମାତର୍ ପେ ନିଜେ ଗୁତୁନ୍ ନିୟମ୍ ଗୁଲାଇ ଆମାନ୍ତୁପେ । ସା' ପେ ଡେମ'କୁନୁଂ ଗୁଲାଇ କାମ୍ ଜୁଲ'ନା ଆମାପ୍ରୁ ପେ ଅ'ଗେୱାଲ'ତୁପେ । 24ଗୁତୁନ୍ସା'ଉ ଇନ୍ତେକନ୍ଡେ'କା ମାପ୍ରୁନା ଉଲାକ୍ବକ୍ ଡି'କେନା ଲେକ୍ଲ'ବୁଂଅଁ'କୁ, ମା ଡ'ନା “ପେ ଡି'କେନ୍ବାଇ' କାମ୍ ଡେମ'କୁନୁଂ ଜୁଲ'ସେକ ଜାଜା ଜିଉଦିରେମଲେ ଆରାକ୍ ମା'ଏ ମାପ୍ରୁ ଅଲିରାକ୍ବାଇ' ଡ'ସେକ୍ ସୁନ'ତା” ଡ'ସେକ୍ ଲେକ୍ଲ'ତା ।
25ପେ ସୁନତ୍ ଅ'ଡେମ'ତୁପେ । ମାତର୍ ପେ ସୁନତ୍ ଅ'ଡେମ'କୁନୁଂ ଜିଉଦିରେମଲେ ମସାଲା ବେଡ'କୁନୁଂ ନିୟମ୍ ଆମାନ୍ତୁପେ ଡ'ନା ପେ ସୁନତ୍ ଅ'ଡେମ'କୁନୁଂ ମାସା ଲାବ୍ ଆରାକ୍ । ସୁନତ୍ ମଡିନେମ୍ ରେମଲେବୁରଂ ପେସା ସମାନ୍ ଡୁତୁପେ । 26ସା' ଜାଜା ଜିଉଦିରେମଲେ ଆରାକ୍ ମା'ଏ ମସାଲା ବେଡ'କୁନୁଂ ନିୟମ୍ ମାନ୍ସେକ୍ ଡୁକୁନା ମା'ଏ ସୁନତ୍ ଆଡେମ୍ତ ଡ'ନାସା ମାପ୍ରୁ ଜୁଲ'ନା ମା'ଏ ସୁନତ୍ ଡେମ'କୁନୁଂସୁଗ ଡୁତା । 27ଡୁ'ତୁନ୍ ଡ'ନା ଜାଜା ଜିଉଦିରେମଲେ ଆରାକ୍ ମା'ଏ ନିୟମ୍ ମାନ୍ଗୁତାସା', ପେ ଜିଉଦିରେମଲେ ସୁନତ୍ ଡେମ'ତୁନେଇ ଡ'ନାସା' ଆପେ ଲେକ୍ଲ' ବେଡ'କୁନୁଂ ନିୟମ୍ ଆମାନ୍ତୁପେ ଡ'ନା ମା'ଏ ଆପେ ନିୟମ୍ ମମାନ୍ବାର୍ବାଇ' ରେମଲେ ଡ'ସେକ୍ ବିସାର୍ନା ଡେମ୍ତକି ଆରାକ୍? 28ସା' ମୁଇନ୍ଡା ରେମ ଜିଉଦିରେମଲେନ୍ ଡିଂଅଁବକ୍ ଜନମ୍ ଡେଂଗା' ଡ'ନା ଆରା'ଗେ ମାଇ ସୁନତ୍ ଡେମ'ତା ଡ'ନା ଆମାଇ ଜିଉଦିରେମ ଡ'ସେକ୍ ସୁଁସୁ ଗଂତା ଇ? ଆରାକ୍ । 29ମାତର୍ ମୁଇନ୍ଡା ନିଂ ସୁନତ୍ ଡେମ'କୁନୁଂ ରେମ ଡ'ନାସା ମାଇ ଜିଉଦିରେମ ଆଏତା । ମାତର୍ ମାପ୍ରୁନା ମୁନ୍ସୁଗ ମାଇନା ଜିବନ୍ ବୁଂଅଁ'ନାଉ ମାଇ ମୁଇନ୍ଡା ଜିଉଦିରେମ ଏତା, ମସାଲା ବେଡ'କୁନୁଂ ନିୟମ୍ ପଡ୍ସେ'ଗା ସରଉ ମମାନ୍ବାର୍ ଡୁକୁନା ମାଇ ଜିଉଦିରେମ ଆଏତା । ଗୁତୁନ୍ଉ ମାଇନା ଜିବନ୍ ବାଦ୍ଲି ଡେମ'ସେକ୍ ଆମାପ୍ରୁ ମାନ୍ବାର୍ପୁଲେଇ ମାପ୍ରୁନା ଜିବନ୍ ଆମାଇ ସାନ୍ଡୁଂତ । ଗୁତୁନାଉ ସତଇସାନା ସୁନତ୍ ଡିନ୍ଡେମ୍ନା । ଡୁ'ତୁନ୍ଉ ଜିବନ୍ ବାଦ୍ଲି ଡେଂକୁନୁଂ ରେମଲେବକ୍ ରେମଲେ ମାଇ ମୁନା'ରେମ୍ ଡ'ସେକ୍ ଅ'ଜୁତ ମାତର୍ ମାପ୍ରୁଉ ମାଇ ମୁନା'ରେମ୍ ଡ'ସେକ୍ ଜୁତ ।
Currently Selected:
ରମିୟ 2: BFW
Highlight
Copy
Compare
Share
Want to have your highlights saved across all your devices? Sign up or sign in
CC BY-NC-ND 4.0