ରମିୟ 14
14
ଆପାଲ୍ ରେମଲେ ବିସାର୍ନା ଆଡେମ'
1 #
କଲସି 2:16
ଆଜିସୁଲା ବିସ୍ବାସ୍ ଡେମ'କୁନୁଂ ରେମଲେ ଜାଜା ମାପ୍ରୁନା ଉଲାକ୍ବକ୍ ଲେକ୍ଲ'କୁନୁଂ ତୁମ' ବଲ୍ ମବୁଜୁବାର୍ ଡୁତା ଡ'ନାସା ଆମା'ଏସା ପେବୁରଂ ମିସାଇଁ । ମାରି ମା'ଏ ବିସ୍ବାସ୍ ଡେମ'କୁନୁଂବକ୍ ଇମ୍ବ'ନା ବଲ୍ ଇମ୍ବ'ନା ଆସାର୍ ଡ'ସେକ୍ ମା'ଏବୁରଂ ପେ ଆକିରଗା' । 2ଜୁ, ମାପ୍ରୁନା ଉଲାକ୍ବକ୍ ଲେକ୍ଲ'କୁନୁଂ ତୁମ' ବଲ୍ ମାଗ'କୁନୁଂ ମୁଇନ୍ଡା ଗୁଲାଇ ସୁସୁମ୍ନା ସୁସୁମ୍ ଗଂତା ଡ'ସେକ୍ ବିସ୍ବାସ୍ ଡେମ'ତା ମାତର୍ ମାପ୍ରୁନା ଉଲାକ୍ବକ୍ ଲେକ୍ଲ'କୁନୁଂ ତୁମ' ବଲ୍ ମବୁଜୁବାର୍ରେମ୍ କାଲି ମା'ଲେ'ଉ ସୁସୁମ୍ ଡୁତା ଡ'ସେକ୍ ଏତ୍ସେକ୍ ମା'ଲେ'ଉ ସୁମ'ତା । 3ସା' ଜାଜା ଗୁଲାଇ ସୁମ୍ତ ମା'ଏ ଗୁଲାଇ ମସୁସୁମ୍ରେମ୍ବକ୍ ଆଗୁମୁଇଏଇ' ମାରି ଜାଜା ଗୁଲାଇ ଆସୁମ୍ତ ମା'ଏ ଜାଜା ଗୁଲାଇ ସୁସୁମ୍ରେମ୍ବକ୍ ମା'ଏ ପାପ୍ ଡେମ'ତା ଡ'ସେକ୍ ବିସାର୍ନା ଆଡେମେଇ'। ମାସା'ଡ'ନା ମାପ୍ରୁ ଆମା'ଏ ଆଗୁଲାଇର ସମାନ୍ ସିରେଲ'ତା । 4ପାଲ୍ ରେମଲେନା ଗତିରେମ୍ବକ୍ ବିସାର୍ନା ଡିନ୍ଡେମ୍ନା ଅଦିକାର୍ ନନ୍ବକ୍ ଆଡୁତା । ମାସା'ଡ'ନା ମାଇନା ସାକାର୍ଉ ମା'ଏ ବଲ୍କାମ୍ ଡେମ'ତା କି ଅଲିରାକ୍କାମ୍ ଡେମ'ତା ଡ'ସେକ୍ ବିସାର୍ନା ଡେମ୍ତ । ଡୁ'ତୁନାଉ ଜାଜା ଆଜିସୁଲା ବିସ୍ବାସ୍ ଡେମ'ତା ଆମା'ଏ ବିସାର୍ନା ଡିନ୍ଡେମ୍ନା ଅଦିକାର୍ ନନ୍ବକ୍ ଆଡୁତା ମାସା'ଡ'ନା ଜିସୁଲାଉ ମା'ଏନା ସାକାର୍ । ସା' ମାପ୍ରୁ ସୁନ'କୁନୁଂସୁଗ ଗୁଲାଇ ଡିନ୍ଡେମ୍ପୁଲେଇ ପ୍ରବୁ ଆମାଇ ସାନ୍ଡୁଂତସା' ମାଇ ବଲ୍କାମ୍ ଡେମ'ସେ'ଗା ଡୁକୁ ଗଂତା ।
5ମୁଇନ୍ଡା ଡ'ନା ଗୁଲାଇ ଦିନ୍ ବିତ୍ରେ ମୁଇ ଦିନ୍ଉ ବଲ୍ ଡୁତା ଡ'ସେକ୍ ଏତ୍ଗୁତା । ମାରି ମୁଇନ୍ଡା ଗୁଲାଇ ଦିନ୍ ସମାନ୍ ଡୁତା ଡ'ସେକ୍ ଏତ୍ଗୁତା । ମାତର୍ ଇମ୍ବ'ନ୍ ଦିନ୍ ଡ'ନାସା ଗୁଲାଇର ନିଜର୍ନା ଜିବନ୍ବକ୍ ଇମ୍ବ'ନ୍ ଦିନ୍ ବଲ୍ ଡୁତା ଡ'ସେକ୍ ଏତ୍ଗୁତା ଗୁତୁନ୍ସୁଗ ଡିନ୍ଡେମ୍ ଡୁତା । 6ମୁଇନ୍ଡା ରେମ ଆମାପ୍ରୁ ସୁନ୍ଡ୍ରପୁଲେଇ କେନ୍ ଦିନ୍ ବଲ୍ ଡୁତା ଡ' ଏତ୍ସେକ୍ ମୁଇ ଦିନ୍ ବୁଂଅଁ'ନା ଗୁତୁନ୍ ଦିନ୍ ଆପ୍ରବୁଲା ସୁନ୍ଡ୍ରପୁଲେଇଉ ମାଇ ବୁଂଅଁ'ତା । ଡୁ'ତୁନା ମୁଇନ୍ଡା ଗୁଲାଇ ସୁସୁମ୍ନା ସୁସୁମ୍ ଗଂତା ଡ'ସେକ୍ ବିସ୍ବାସ୍ ଡେମ'ସେକ୍ ଗୁଲାଇ ସୁମ'ନାସା ମାରି ମୁଇନ୍ଡା କାଲି ମା'ଲେ'ଉ ସୁସୁମ୍ ଡୁତା ଡ'ସେକ୍ ମା'ଲେ'ଉ ସୁମ'ନାସା ମା'ଏ ଗୁଲାଇର ସୁସୁମ୍ ସିଁସେଇଁଉ ଆମାପ୍ରୁ ସୁନ୍ଡ୍ରକ୍ସେ'ଗାଉ ସୁମ'ତା । 7-8ମାସା'ଡ'ନା ନେଇ' ଆଜିସୁଲା ବିସ୍ବାସ୍ ଡେମ'କୁନୁଂ ରେମଲେ ଜାଏସା ବୁରକ୍ନାସା ଗୁଇ'ନାସା ନିଜର୍ନାପୁଲେଇ ଆରାକ୍, ପ୍ରବୁଲାପୁଲେଇଉ ବୁରଗୁତୁନେଇ' ଆରାକ୍ନା ଗୁଇ'ତୁନେଇ' । ସା' ନେଇ' ବୁରକ୍ନାସା ଗୁଇ'ନାସା ନେଇ' ଗୁଲାଇର ପ୍ରବୁନା ରେମଲେ ।
9ମାସା'ଡ'ନା ଗୁଇ'କୁନୁଂ ରେମଲେନା ମାରି ଆ'ନା ବୁରକ୍ସେକ୍ ଡୁକୁନୁଂ ରେମଲେନା ପ୍ରବୁ ଏପୁଲେଇଉ କିରିସ୍ଟଲା ଗୁଇ'ସେକ୍ ଗୁଇ'କୁନୁଂକୁରୁଂ ମାରି ବୁରଗୁତା । 10#2 କରି 5:10ସା' ଆଜିସୁଲା ବିସ୍ବାସ୍ ଡେମ'କୁନୁଂ ଆପାଲ୍ ବୁୟାଂଏଁ ତୁନାଲେ ମାସା' ପେ ବିସାର୍ନା ଡେମ'ତୁପେ ଆରା'ଗେ ଗୁମୁଇୟ'ତୁପେ? ମାସା'ଡ'ନା ଆନେଇ' ଆଗୁଲାଇର ମାପ୍ରୁ ମୁସିଂ ବିସାର୍ନା ଡେମ୍ତ ।
11ମାପ୍ରୁନା ଉଲାକ୍ବକ୍ ଡି'କେନା ଲେକ୍ଲ'ତା, ମା ଡ'ନା,
“ପ୍ରବୁ ସୁନ'ତା, ନିଂ ଜିବନ୍ ଡୁକୁନୁଂ ମାପ୍ରୁସା', କେନ୍ ଦର୍ତନିନା ଗୁଲାଇ ରେମଲେ ଆନିଂ ଏନ୍ଡିକ୍ସେ'ଗା ସୁନ୍ଡ୍ରତା ମାରି ଗୁଲାଇର ମାଇଉ ମାପ୍ରୁ ଡ'ସେକ୍ ସୁନ୍ତ ।”
ଡ'ସେକ୍ ଲେକ୍ଲ'ତା । 12ଗୁତୁନ୍ସା' ନେଇ' ଗୁଲାଇର ନିଜେ ମାମା ଡେମ'କୁନେଇ' ଗୁତୁନ୍ ଗୁଲାଇନା ଇସାପ୍ ମୁଇନ୍ଡା ମୁଇନ୍ଡା ମାପ୍ରୁନ୍ବକ୍ ବିବେ' ପଡ୍ତା ।
ପାଲ୍ ରେମଲେ ଆନେଇ' ଜୁଲ'ସେକ୍ ପାପ୍ ଡିନ୍ଡେମ୍ସୁଗ ନେଇ' ଆଡୁକୁଲାନେଇ'
13ଡୁ'ତୁନ୍ସା' ନେଇ' ମୁଇନ୍ଡା ଆମୁଇନ୍ଡା ବିସାର୍ନା ଆଡେମ୍ନେଇ' । ମାରି ପାଲ୍ ରେମଲେ ଜାଏସା ଆନେଇ' ଜୁଲ'ନା ଆମାପ୍ରୁ ବିସ୍ବାସ୍ ମଡିନେମ୍ସୁଗବାଇ' ଆରା'ଗେ ପାପ୍ ଡିନ୍ଡେମ୍ସୁଗବାଇ' କାମ୍ ନେଇ' ଆଡେମ୍ନେଇ' ଡ'ସେ'ଗାଉ ଜିବନ୍ ବିତ୍ରେ ଏତ୍ଲାନେଇ' । 14ଆପ୍ରବୁ ଜିସୁଲା ନିଂ ବିସ୍ବାସ୍ ଡେମ'ତିଂସା' ଗୁଲାଇ ସୁସୁମ୍ଇ'ନା ବଲ୍ବାଇ' ଡ'ସେକ୍ ନିଂ ମାଗ'ତିଂ ମାରି ବଲ୍ ବିସ୍ବାସ୍ ଡେମ'ତିଂ ଡ'ସେକ୍ ନିଂ ଆପେ ସୁନ'ତିଂ । ମାତର୍ ଜା ଗୁତୁନ୍ ସୁସୁମ୍ନା ଅଲିରାକ୍ବାଇ' ଡ'ସେକ୍ ସୁନ୍ତ ମାଇପୁଲେଇଉ ଗୁତୁନା ଅଲିରାକ୍ । 15ମାରି ଆଜିସୁ ବିସ୍ବାସ୍ ଡେମ'କୁନୁଂ ବୁୟାଂଏଁ ଜାଏସା ମୁଇନ୍ଡା ଇମ୍ବ'ନ୍ ସୁସୁମ୍ଇ'ନା ଆସୁମ୍ତ ଗୁତୁନ୍ ନ ରିଂଅଁ'ସେକ୍ ଆମାଇ ଅସୁଇ' ଅସୁଇ' ସୁମ'ନା ଗୁତୁନ୍ ଜୁଲ'ସେକ୍ ମାଇନା ଜିବନ୍ବକ୍ ଅବୁଦି କସ୍ଟ ସାପ୍ତା । ନ ଆମାଇ ଡୁ'ତୁନା କସ୍ଟ ବେଡ'ନା ସତଇସା ନ ଆମାଇ ଆଲାତ୍ ଡେମ' ଆଡୁତୁନ । ମାଇପୁଲେଇସା କିରିସ୍ଟଲା ଗୁଇ'ଗୁତା ଡ'ସେକ୍ ଏତ୍ବାର୍ ଡୁତା, ସା' ଡୁ'ତୁନ୍ବାଇ'ନା ସୁମ'ସେକ୍ ନ କସ୍ଟ ଆବେଡ' । 16ସା' ନ ବାନିବାଇ' କାମ୍ ଡେମ'ତିଂ ଡ'ସେକ୍ ନନା ଜିବନ୍ବକ୍ ନ ମାଗ'ତୁନ ମାତର୍ ନ ଡେମ'କୁନୁଂ ଗୁତୁନ୍ ବାନିବାଇ' କାମ୍ ଜୁଲ'ସେକ୍ ପାଲ୍ ମୁଇନ୍ଡା ଗୁତୁନ୍ ପାପ୍କାମ୍ ଡ'ସେକ୍ ନିନ୍ଦାଲ'ନା ନ ଡୁ'ତୁନା ଆଡେମ' । 17ମାସା'ଡ'ନା ମାପ୍ରୁନା ରାଜିବକ୍ ସୁସୁମ୍ଇ'ନା ମୁନା' ଆରାକ୍ । ମାତର୍ ମାପ୍ରୁନା ମୁନ୍ସୁଗ ବଲ୍କାମ୍ ଡେମ'ସେକ୍ ପବିତ୍ର ଆତ୍ମାବୁରଂ ସାନ୍ତିସାର୍ଦା ଡେଂସେକ୍ ଡୁକୁନାଉ ମୁନା' ବିସୟ । 18ଡି'କେନା ରେମଲେ ଆକିରିସ୍ଟଲା ସେବା ଡେମ୍ତ ଡ'ନା ଗୁତୁନ୍ ଜୁଲ'ସେକ୍ ମାପ୍ରୁ ଅବୁଦି ସାର୍ଦା ଡେନ୍ତା ମାରି ରେମଲେସା ମା'ଏ ବଲ୍କାମ୍ ଡେମ'ତା ଡ'ସେକ୍ ସୁନ୍ତ । 19ଡୁ'ତୁନ୍ସା' ନେଇ' ଇସାଉ ଗୁଲାଇରବୁରଂ ସାନ୍ତିସାର୍ଦା ଡେଂସେକ୍ ଡୁକୁପୁଲେଇ ଏତ୍କୁଲାନେଇ' ମାରି ଅଦିକ୍ ଅଦିକ୍ ବିସ୍ବାସ୍ ଡିନ୍ଡେମ୍ପୁଲେଇ ମୁଇନ୍ଡା ଆମୁଇନ୍ଡା ଅ'ସାନ୍ଡୁଂଆଁନେଇ' ।
20ସୁସୁମ୍ଇ'ନାସା' ମାପ୍ରୁନା ବଲ୍କାମ୍ ନସ୍ଟ ଆଡେମ୍ନେଇ' । ଗୁଲାଇ ସୁସୁମ୍ଇ'ନା ବଲ୍ ଡୁତା ମାତର୍ ପାଲ୍ ରେମଲେନା ଜିବନ୍ବକ୍ କସ୍ଟ ସୁସାପ୍ବାଇ' ସୁସୁମ୍ଇ'ନା ସୁମ୍ତୁନ ଡ'ନା ନ ପାପ୍ ଡେମ'ତୁନ । 21ନେଇ' ସେଲିଆ'ଡଂ ଅଂଗୁର୍ଡାଗ୍ ସୁମ'ଇଡ'ନା ମାରି ପାଲ୍ ମାଏସା ଡେମ'ନା ଗୁତୁନ୍ ଜୁଲ'ସେକ୍ ଆଜିସୁଲା ବିସ୍ବାସ୍ ଡେମ'କୁନୁଂ ମୁଇନ୍ଡାନା ଜିବନ୍ବକ୍ କସ୍ଟ ସାପ୍ତା ଡ'ନା ଗୁତୁନ୍ ଗୁଲାଇ ନେଇ' ଆସୁମ' ଆଇଡ'ନା ବଲ୍ । 22କେନ୍ ଗୁଲାଇନା ବିତ୍ରେ ନ ମା ବିସ୍ବାସ୍ ଡେମ'ତୁନ ଗୁତୁନ୍ ଗୁଲାଇ ନନା ଜିବନ୍ ବିତ୍ରେ ବୁଂଅଁ'କୁଲା, ମାରି ମାପ୍ରୁସା ଗୁତୁନ୍ ଗୁଲାଇ ମାଗ'ତା ଡ'ସେକ୍ ନ ଏତ୍କୁଲା ମାରି ଆପାଲ୍ ରେମଲେ ଆଜାଏସା କେନା ସୁଁସୁ ଦର୍କାର୍ ଆରାକ୍ । ଜାଏସା ମୁଇନ୍ଡା ଇମ୍ବ'ନ୍ କାମ୍ ବଲ୍ବାଇ' ଡ' ମାଗ'ସେକ୍ ଗୁତୁନ୍ ଡିନ୍ଡେମ୍ ଡେଂନା ନିଂ ଅଲିରାକ୍ବାଇ' କାମ୍ ଡେମ'ତିଂ ଡ'ସେକ୍ ନିଜର୍ନା ଜିବନ୍ବକ୍ ଆଏତ୍ନା ମାପ୍ରୁ ଆମାଇ ଆସିର୍ବାଦ୍ ଡେମ୍ତ । 23ମାତର୍ ଜାଏସା ମୁଇନ୍ଡା ସୁସୁମ୍ଇ'ବେଲା କେନା ସୁମ'ନା ଡେନ୍ତାକି ଆସୁମ'ନା ଡେନ୍ତା ଡ'ସେକ୍ ବାର୍ଗା'ତାଂବାଇ' ଏତ୍ସେକ୍ ସୁମ୍ତ ଡ'ନା ମାପ୍ରୁ ଆମାଇ ଡନ୍ଡ୍ ବେ'ତ । ମାସା'ଡ'ନା ମାଇନା ଜିବନ୍ ବିତ୍ରେ ବିସ୍ବାସ୍ ଡେମ'କୁନୁଂସୁଗ ମାଇ ଆଡେମ୍ତ । ସା' ମୁଇନ୍ଡା ମା ଡେମ'ନାସା' ମାଇ ବିସ୍ବାସ୍ ଡେମ'କୁନୁଂସୁଗ ଆଡେମ୍ତ ଡ'ନା ମାଇ ପାପ୍ ଡେମ'ତା ।
Currently Selected:
ରମିୟ 14: BFW
Highlight
Copy
Compare
Share
Want to have your highlights saved across all your devices? Sign up or sign in
CC BY-NC-ND 4.0