ପେରିତ 2
2
ପେନ୍ଟିକସ୍ଟ୍ ପରବ୍ବକ୍ ପବିତ୍ର ଆତ୍ମା ସୁସାପ୍ଡେନ୍
1ପେନ୍ଟିକସ୍ଟ୍ ପରବ୍ନା ଦିନ୍ ଆଜିସୁଲା ବିସ୍ବାସ୍ ଡେମ'କୁନୁଂ ରେମଲେ ଗୁଲାଇର ପାର୍ତନା ଡିନ୍ଡେମ୍ପୁଲେଇ ମୁନ୍ଡକ୍ବକ୍ ରୁନ୍କୁଗା' । 2ଆଇ'ତୁନ୍ବେଲା, ମୁଇ ମୁନା'ବାଇ' ଉଇଡାକ୍ ଉଇଡାଗ'ନା ମି ଲାଇତା ଡୁ'ତୁନ୍ସୁଗବାଇ' ସରଗ୍କୁରୁଂ ସେଟ୍ଟ' ଲାଇଗା' । ଗୁତୁନ୍ ଲାଇକୁନୁଂ ମା'ଏ ଲେଇ'କୁନୁଂ ଗୁତୁନ୍ ଡିଂଅଁ ବିତ୍ରେ ସାର୍ବେର୍ତି ଲାଇଗା' । 3ମାରି ଆତା ଲେ'ୟାଂସଂସୁଗବାଇ' ଡୁକୁନୁଂ ମା'ଏ ଜୁଲ' । ଗୁତୁନ୍ ଲେ'ୟାଂସଂସୁଗବାଇ' ଡୁକୁନୁଂ ମୁଇମୁଇ ଡେଂସେକ୍ ଆତା ଡିଂଅଁବକ୍ ଡୁକୁନୁଂ ଆଗୁଲାଇ ରେମଲେ ଆମୁଇନ୍ଡା ଆମୁଇନ୍ଡା ବାଗ୍ବକ୍ ମୁଇମୁଇ ଲେଇ'ଗା' । 4ସା' ଆମା'ଏ ଆଗୁଲାଇର ପବିତ୍ର ଆତ୍ମା ସବ' ମାରି ପବିତ୍ର ଆତ୍ମା ଆମା'ଏ ସାନ୍ଡୁଂଅଁସା' ମା'ଏ ଗୁଲାଇର ପାଲ୍ପାଲ୍ ସାମ୍ ଅଇଁ ମୁଲାୟ' ।
5ଆଇ'ତୁନ୍ବେଲା ଦର୍ତନିବକ୍ ଡୁକୁନୁଂ ଗୁଲାଇ ଜାତିନ୍ ରେମଲେନ୍କୁରୁଂ ଆମାପ୍ରୁ ବିସ୍ବାସ୍ ଡେମ'ସେକ୍ ଡୁକୁନୁଂ ଜିଉଦିରେମଲେ ଜିରୁସାଲମ୍ ମୁନା'ଉଂଗମ୍ବକ୍ ଡୁକୁଗା' । 6ସା' ଗୁତୁନ୍ ମୁନା'ବାଇ' ଲାଇକୁନୁଂ ଅଂଅଁ'ସେକ୍ ଅବୁଦି ରେମଲେ ମା ଡେଂଗା' ଡ'ସେକ୍ ଜୁଜୁ ସା'ଗା' । ସା' ଗୁତୁନ୍ ଆଜିସୁଲା ବିସ୍ବାସ୍ ଡେମ'କୁନୁଂ ରେମଲେ ପାଲ୍ପାଲ୍ ସାମ୍ ଅଇଁଡେଂକୁନୁଂ ମୁଇନ୍ଡା ମୁଇନ୍ଡା ଅଂଅଁ'ସେକ୍ ନେଇ'ନା ସାମ୍ବକ୍ ମା'ଏ ଅଇଁୟ'ତା ଡ'ସେକ୍ କାବା ଡେଂଉଇଗା' । 7ମାରି ମା'ଏ ଅବୁଦି କାବାକାବା ଡେଂସେକ୍ ଡି'କେନ୍ ସୁନ': “ଜୁ, ମା'ଏ ତ ଗୁଲାଇର ଗାଲିଲି ଜିଲାନା ରେମଲେ! 8ମାରି ମିଞାଂ ନେଇ'ନା ନିଜର୍ନା ସାମ୍ବକ୍ ମା'ଏ ଗୁଲାଇର ଅଇଁୟ'କୁନୁଂ ନେଇ' ଅଂଅଁ'ତୁନେଇ'? 9ନେଇ' ଆକେ ଡୁକୁନୁଂ ରେମଲେ ଏନ୍ତୁକ୍ର ପାର୍ତିୟ, ମାଦିୟ, ଏଲାମିୟ ଦେସ୍ନା ରେମଲେ, ମାରି ମେସପଟାମିଆ, ଜିଉଦା, ମାରି କାପଦକିଆ, ପନ୍ତ, ମାରି ଆସିଆ 10ପୁର୍ଗିଆ ମାରି ପଂପୁଲିଆ, ମିସର ଦେସ୍ନା ରେମଲେ ମାରି କୁରିନି ଉନ୍ତୁ' ଡୁକୁନୁଂ ଲିବିଆ ଦେସ୍ନା ରେମଲେ ମାରି ରମିୟ ଦେସ୍କୁରୁଂ ସା'କୁନୁଂ ରେମଲେ, 11ମା'ଏନ୍ ବିତ୍ରେ ଜନମ୍ବାଂସା' ଜିଉଦିରେମଲେ ଡୁକୁନୁଂଏଁ ମାରି ପାଲ୍ ଜାତିନ୍ ରେମଲେ ଜାଜା ଜିଉଦିରେମଲେନା ଗୁଲାଇ ନିୟମ୍ ବଲ୍ ଜୁଲ'ସେକ୍ ଡୁକୁନୁଂଏଁ, କିର୍ତିୟ, ମାରି ଆରବିୟନା ରେମଲେ ଡି'ତା ପାଲ୍ପାଲ୍ ଦେସ୍କୁରୁଂ ଆକେ ସା'କୁନୁଂ ରେମଲେ । ମାତର୍ ମାପ୍ରୁ ଡେମ'କୁନୁଂ ମୁନା'ମୁନା'ବାଇ' ବଲ୍କାମ୍ ଗୁଲାଇ ନେଇ'ନା ସାମ୍ବକ୍ ମା'ଏ ସୁନ'କୁନୁଂ ନେଇ' ଅଂଅଁ'ତୁନେଇ'” ଡ'ସେକ୍ ସୁନ' । 12ମା'ଏ ଗୁଲାଇର ଅବୁଦି କାବାକାବା ଡେଂଉଇଗା'ସା' କେନା ମି ଡି'କେନ୍ ଡେଂଗୁତା ଡ'ସେକ୍ ମା'ଏ ମା'ଏନ୍ ବିତ୍ରେ ଅଇଁୟ' । 13ମାତର୍ “ମା'ଏ ସାଗୁର୍ ଇଡ'ସେକ୍ ଅବୁଦି ବି'ଗୁତା” ଡ'ସେକ୍ ଏନ୍ତୁକ୍ର ଆମା'ଏ ଅ'କିୟାଲିକ୍ସେକ୍ ସୁନ' ।
ପିତର୍ଲା ଆରେମଲେ ସୁଁସୁଡେନ୍
14ସା' ପିତର୍ଲା ଏଗାର୍ଲକ୍ବୁରଂ ତଂସେକ୍ ଅବୁଦି ଡକ୍ତି'ତା ଆଗୁଲାଇର ଡି'କେନ୍ ସୁନ' “ଅ ଜିଉଦିରେମଲେ ମାରି ଜିରୁସାଲମ୍ ମୁନା'ଉଂଗମ୍ବକ୍ ଡୁକୁନୁଂ ଗୁଲାଇ ରେମଲେ, ପେ କେନା ମାଗ'କୁଲା । ଆ'ନା ନିଂ ମା ସୁନ୍ତିଂ ଗୁତୁନ୍ ପେ ବଲ୍ ଅଂ । 15ପେ ଏତ୍ଗୁତୁପେ ମା'ଏ ଗୁଲାଇର ବିଗୁତା ଡ'ସେକ୍ । ମାତର୍ ଡୁ'ତୁନା ଆରାକ୍ । ମାସା'ଡ'ନା ଆ'ନା ଇନ୍ଜୁର୍ ନଟାଉ ଡେଂଗୁତା । 16ଜୁ, ଆ'ନା ପେ ମା ଜୁଲ'ତୁପେ ମାରି ଅଂଅଁ'ତୁପେ ଗୁତୁନ୍ ଗୁଲାଇ ମା ଡ'ସେକ୍ ବାବବାଦି #2:16 ବାବବାଦି ଡ'ନା, ମାପ୍ରୁନା ତୁମ' ଅଂଅଁ'ସେକ୍ ଆରେମଲେ ସୁଁସୁରେମ୍, ଜୟେଲ୍ଲା ଡ'ସେକ୍ ମୁଇନ୍ଡା ଇନ୍ତେକନ୍ଡେକ୍ ସୁନ'କୁଗା' । ମାଇ ମା ଡ'ସେକ୍ ସୁନ'କୁ ଡ'ନା:
17‘ମାପ୍ରୁ ସୁନ'ତା, ଡୁନନ୍ଡମ୍ବେଲା
ନିଂ ଗୁଲାଇ ରେମଲେନ୍ବକ୍ ନିଂନା ଆତ୍ମା ବେନ୍ଟାଇତିଂ ।
ସା' ପେନ୍ ଇଂଗେର୍ଗୁଲେ ମାରି ସେଲାମ୍ବୁଇ'ଗୁଲେ ନିଂ ସୁନ'କୁନୁଂ ତୁମ' ଅଂଅଁ'ସେକ୍ ଆଗୁଲାଇ ରେମଲେ ସୁନ୍ତ ।
ମାରି ପେନ୍ ଇଂଗେର୍କୁନୁଂ ଇଂଗେରେ ମାରି ସେଲାଂକୁନୁଂ ସେଲାନେ ମଲେମ'ବେଲା ମୁସୁକ୍ଡିମ୍ସୁଗ ଜୁତ ।
ପେନ୍ ଡକ୍ରାଲେ ଲେମ'ବେଲା ମୁସୁକ୍ଡିମ୍ ମୁସୁକ୍ତ ।
18ଉନ୍ତ୍ବେଲା ଆନିଂ ସେବା ଡେମ'କୁନୁଂ ଆଇଂଗେରେ ମାରି ଆସେଲାନେ
ନିଂନା ଆତ୍ମା ନିଂ ବେ'ତିଂ ।
ସା' ଆମା'ଏ ନିଂ ମା ସୁନ୍ତିଂ ଗୁତୁନ୍ ଅଂଅଁ'ସେକ୍ ମା'ଏ ଆଗୁଲାଇ ରେମଲେ ସୁନ୍ତ ।
19ମାରି କି'ତୁଂବାଗ୍ବକ୍ କାବାକାବାବାଇ'ନା
ମାରି କେନ୍ ଦର୍ତନିବକ୍ ସିନଲେସା ଅସୁଇ'ତିଂ ।
ଗୁତୁନ୍ ମାମା ଡ'ନା: ବନି, ସୁଂଅଁ ମାରି ଅବୁଦି ମୁକ୍ସିଂ ତୁର୍କୁନୁଂ ରେମଲେ ଜୁତ ।
20ପ୍ରବୁଲା ଅବୁଦି ବପୁବାଂସେକ୍ ସୁସାପ୍ନା ଗୁତୁନ୍ ମୁନା' ଦିନ୍ ସିଁସେଇଁଉ
ସିଂଇଁ କାଲ୍ୟାଲ' ଉଇତା
ମାରି ଆର୍କେ ବନି ରଂଗସୁଗ ଡେଂଉଇତା ।
21ମାତର୍ ପ୍ରବୁନା ଇମି ସବ'ସେକ୍ ଜାଜା ଆମାଇ ୱାଇତ
ମା'ଏ ଗୁଲାଇର ରକ୍ୟା ବାମ୍ତା ।’ ”
22“ଅ ଇସ୍ରାଏଲ୍ ରେମଲେ ପେ ଅଂ । ଜୁ, ଆନାଜରିତ୍ ଉଂଗମ୍ନା ଜିସୁଲା ପେନ୍ବକ୍ ବେନ୍ଟାୟ'ନିଂ ଡ'ସେକ୍ ମାପ୍ରୁ ନିଜେ ଆପେ ଅସୁୟ'ତା । ମି ଡ'ନା, ମାପ୍ରୁ ଆମାଇ ସାନ୍ଡୁଂଅଁ'ସା' ମାଇ ଅବୁଦି କାବାକାବା ଡିନ୍ଡେମ୍ବାଇ' କାମ୍ ମାରି ସିନଲେସା ପେନ୍ବକ୍ ଡେମ'କୁ । ଗୁତୁନ୍ ପେ ଗୁଲାଇର ବଲ୍ ମାଗ'ତୁପେ । 23#ମାତିଉ 27:35; ମାର୍କ 15:24; ଲୁକ 23:33; ଜଅନ୍ 19:18ମାଇ ମି ଡୁକୁନା ଡେନ୍ତା ମାରି ଆମାଇ ମା ଡେଂନା ଡେନ୍ତା ଡ'ସେକ୍ ମାପ୍ରୁ ମୁଲ୍ବାଂସା' ଗୁଲାଇ ମାଗ'କୁସା' ଆମାଇ ପେନ୍ ତିତିବକ୍ ବେ'ତିଂ ଡ'ସେକ୍ ଏତ୍ଗା' । ସା' ପେ ଆମାଇ ମୁଇ କୁର୍ସବକ୍ ତିତି ତିକ୍ସୁଂ ଟାନ୍ଲ'ସେକ୍ ଲୁଆବୁରଂ ତାଂଅଁ'ସେ'ଗା ଅଗୁଇଏଇ' ଡ'ସେକ୍ ମାପ୍ରୁନା ନିୟମ୍ ମମାନ୍ବାର୍ ରେମଲେବୁରଂ ମିସ୍ସେକ୍ ଆମାଇ ଅଗୁୟ'ପେ । 24#ମାତିଉ 28:5,6; ମାର୍କ 16:6; ଲୁକ 24:5ମାଇ ଅବୁଦି କସ୍ଟ ବାଂସେକ୍ ଗୁଇ'ଗା' ମାତର୍ ମାପ୍ରୁ ଆମାଇ ଡୁ'ତୁନ୍ଉ ଗୁଇ'ଉଇଏଇ' ଡ'ସେକ୍ ମଅନ୍ତୁର୍ ଆମାଇ ଗୁଇ'କୁନୁଂକୁରୁଂ ମାରି ବ'ରଲ' । ମାସା'ଡ'ନା ଆମାଇ ଡୁ'ତୁନା ଅଗୁୟ' ବୁଂବୁଂପୁଲେଇ ଆଜାଏସା ବପୁ ଆଡୁତା ଡେଂକୁ । 25ଦାଉଦ୍ ରାଜାଲା ଜିସୁନା ବିସୟରେ ଡି'କେନା ସୁନ'ତା, ମା ଡ'ନା:
‘ପ୍ରବୁଲା ନିଂନା ସାର୍ମ'କନ୍ଡେକ୍ ଡୁକୁନୁଂ ନିଂ ଇସାଉ ଜୁଲ'ସେକ୍ ଡୁତିଂ ।
ମାଇ ନିଂନା ସୁସୁମ୍ତିକୁରୁଂ ଡୁତା ।
ସା' ନିଂ ଆଜାଏସା ଆବୁତୁଂତିଂ ।
26ଡୁ'ତୁନ୍ସା' ନିଂନା ଜିବନ୍ ଅବୁଦି ସାର୍ଦାଗୁତା ମାରି ନିଂ ସାର୍ଦା ଡେଂସେକ୍ ଆମାଇ ସୁନ୍ଡ୍ରତିଂ,
ମାରି ନିଂନା ଞେରିସା ଆମାପ୍ରୁ ଆସ୍ସେଗା' ଡୁତା ।
27ମାସା'ଡ'ନା ନ ଆନିଂନା ଜିବନ୍ ଗୁଇ'କୁନୁଂ ରେମଲେ ଡୁକୁନୁଂ ଜାଗାବକ୍ ଡୁକୁପୁଲେଇ ଅଡକ୍ ଆସୁଂତୁନ,
ମାରି ଆନନା ପବିତ୍ରବାଇ' ରେମଲେବକ୍ ନାସ୍ଉଇପୁଲେଇ ଆବେ'ତୁନ ।
28ଜିବନ୍ ବୁମ୍ବାମ୍ନାକୁରୁଂ ନ ଆନିଂ ଅସୁୟ'ନ,
ମାରି ନ ନିଂବୁରଂ ଡୁକୁକ୍ସେକ୍ ନିଂନା ଜିବନ୍ବକ୍ ଅବୁଦି ସାର୍ଦା ବେ'ତୁନ’
ଡ'ସେକ୍ ଦାଉଦ୍ଲା ସୁନ'ତା ।”
29“ଅ ବୁୟାଂଏଁ ତୁନାଲେ, ଇନ୍ତେକନ୍ଡେକ୍ ଡୁକୁନୁଂ ନେଇ'ନା ବୁସାଁ ଦାଉଦ୍ଲା ଗୁଇ'ଗା'ସା' ଆମାଇ ଆତିଲ'ସୁଂଅଁ' ଡ'ସେକ୍ ମାଇନା ବିସୟ ନିଂ ମବୁତୁଂ ଆପେ ସୁଁସୁ ଗଂତିଂ । ମାରି ଆମାଇ ଆତିଲ'କୁନୁଂ ଜାଗା ଡ'ନା ନେନ୍ବକ୍ ଆ'ନ୍ପନ୍ତେକ୍ସା ଡୁତା । 30ମାତର୍ ମାଇ ମୁଇନ୍ଡା ବାବବାଦିସା' ମାଇନା ଉଁ'ଉଁନେନ୍ ବିତ୍ରେ ଆମୁଇନ୍ଡା ମାଇନା କର୍ଜିବକ୍ ଅଲେଇ'ତିଂ ଡ'ସେକ୍ ମାପ୍ରୁ ତିତିବାଡ'ସେକ୍ ଆମାଇ ସୁନ'କୁନୁଂ ମାଇ ମାଗ'କୁଗା' । 31ତିର୍ଗି'ସୁମଂ ମାମା ଡେନ୍ତା ଡ'ସେକ୍ ଦାଉଦ୍ଲା ସିଁସେଇଁଉ ମାଗ'କୁସା' କିରିସ୍ଟଲା ଗୁଇ'ସେ'ଗା ମାରି ବୁରନା ବିସୟ ମାଇ ସୁନ'କୁ । ମାଇ ସୁନ' ମାପ୍ରୁ ଆକିରିସ୍ଟଲା ଗୁଇ'କୁନୁଂ ରେମଲେ ଡୁକୁନୁଂ ଜାଗାବକ୍ ଅଡକ୍ ଆସୁଂତ କି ମାଇନା ଞେରି ଆରାଇ'ସାଂବକ୍ ସୁସପୁଲେଇସା ଆବେ'ତ ଡ'ସେକ୍ ମାଇ ସୁନ'କୁଗା' । 32ଆକେନ୍ ଜିସୁଲା ଗୁଇ'କୁନୁଂକୁରୁଂ ମାପ୍ରୁ ମାରି ବ'ରଲ'ତା, ଗୁତୁନା ନେଇ' ଗୁଲାଇର ସାକି ଡୁତୁନେଇ' । 33ଆ'ନା ମାଇ ମାପ୍ରୁନା ସୁସୁମ୍ତିକୁରୁଂ ମୁନା'ରେମ୍ନା ତାନ୍ବକ୍ ଡୁତା । ବାଡେଇଁ ବେ'ତିଂ ଡ'ସେକ୍ ପର୍ମାନ୍ ସବ'କୁନୁଂ ଗୁତୁନ୍ ପବିତ୍ର ଆତ୍ମା ମାଇ ବାଡେଇଁନା ତିତିକୁରୁଂ ରିଂସେକ୍ ଆନେଇ ବେଡ'ତା । ଗୁତୁନାଉ ଆ'ନା ପେ ଆକେ ଜୁଲ'ତୁପେ ମାରି ଅଂଅଁ'ତୁପେ । 34-35ମାସା'ଡ'ନା ଦାଉଦ୍ଲା ଡ'ନା ସରଗ୍ବକ୍ ଡୁଡାଇ' ଅରଇ' ଡେଂକୁ ମାତର୍ ମାଇ ସୁନ'ତା:
‘ପ୍ରବୁ ଆନିଂନା ପ୍ରବୁଲା ସୁନ'ତା:
ନିଂ ଆନନା ଦାଇରେମେ
ନନା ତିକ୍ସୁଂ ଆଲୁଂ ଇନ୍ଡ୍ରିଂପନ୍ତେ'କା
ନ ନିଂନା ସୁସୁମ୍ତିକୁରୁଂ ଲେଇ'କୁଲା ଡ'ସେକ୍ ସୁନ'ତା’”
ଡ'ସେକ୍ ଦାଉଦ୍ଲା ସୁନ' ।
36ପିତର୍ଲା ମାରି ସୁନ', “ଅ ଇସ୍ରାଏଲ୍ ରେମଲେ, ଡୁ'ତୁନ୍ସା' ପେ ଆମ୍ବ'ନ୍ ଜିସୁଲା କୁର୍ସବକ୍ ତାଂଅଁ'ସେକ୍ ଅଗୁୟ'ତୁପେ, ଆମାଇ ପ୍ରବୁଲା ମାରି କିରିସ୍ଟଲା ଡ'ସେକ୍ ମାପ୍ରୁ ବୁଂଅଁ'ତା । କେନା ଇସ୍ରାଏଲ୍ ରେମଲେ ଗୁଲାଇର ବଲ୍ ମାଗ୍ମାକ୍ ଡୁତା” ଡ'ସେକ୍ ସୁନ' ।
37ସା' କେନ୍ ସୁନ'କୁନୁଂ ତୁମ' ମା'ଏ ଅଂଅଁ'ସା' ଆମା'ଏ ଆଜିବନ୍ ବାଂଉଇଗା' । ସା' ମା'ଏ ଆପିତର୍ଲା ମାରି ଆପାଲ୍ ପେରିତଲେ ଅ'ଗଁସ୍ଲା'ଗା', “ଅ ବୁୟାଂଏଁ, ଡୁ'ତୁନ୍ ଡ'ନା ନେଇ ମା ଡେମ୍ତୁନେଇ?” ଡ'ସେକ୍ ଅ'ଗଁସ୍ଲା'ଗା' ।
38ସା' ପିତର୍ଲା ଆମା'ଏ ସୁନ', “ପେ ଅଲିରାକ୍ବାଇ' କାମ୍ ଡେମ'କୁନୁଂ ଗୁଲାଇ ଅଡକ୍ସୁଂଅଁ'ସେକ୍ ମାପ୍ରୁନ୍ବକ୍ ଆନ୍ଡେଇଁସେକ୍ ପାପ୍କୁରୁଂ କେମା ବୁମ୍ବାମ୍ପୁଲେଇ ପେ ନିଜେନିଜେ ଜିସୁ କିରିସ୍ଟନା ଇମିବକ୍ ବାପ୍ତିସ୍ମା ରିଂଆଁ । ଡୁ'ତୁନ୍ ଡେମ'ନା ପେ ପବିତ୍ର ଆତ୍ମାନା ଦାନ ବାମ୍ତୁପେ । 39ମାଇ ଡି'କେନା ପର୍ମାନ୍ ସବ'କୁନୁଂ ପେପୁଲେଇସା ଡୁତା ପେନା ଉଁ'ଉଁନେ ଇଗ୍ଲେଇଏଁପୁଲେଇସା ଡୁତା ମାରି ଅବୁଦି ସୁଲୁଂବକ୍ ଡୁକୁନୁଂ ରେମଲେବକ୍ ଆଜାଆଜା ନେଇ'ନା ପ୍ରବୁ ମାପ୍ରୁଲା ମାଇନ୍ବକ୍ ୱାୟ'ତା ମା'ଏ ଗୁଲାଇରପୁଲେଇସା ଡୁତା ।”
40ମା'ଏ ବଲ୍ ମାଗ୍ମାକ୍ପୁଲେଇ ପିତର୍ଲା ଆମା'ଏ ଅବୁଦି ଅମାଗ'; ମାରି ମାଇ ଆମା'ଏ ସୁନ', “ଆ'ନ୍ବାଂସା' ଅଲିରାକ୍ବାଇ' କାମ୍ ଡେମ'ସେକ୍ ଡୁକୁନୁଂ କେନ୍ ରେମଲେନ୍କୁରୁଂ ପେ ରକ୍ୟା ବୁମ୍ବାମ୍ ଡୁତା” ଡ'ସେକ୍ ସୁନ' । 41ଜାଜା ପିତର୍ଲା ସୁନ'କୁନୁଂ ତୁମ' ଅଂଅଁ'ସେକ୍ ବିସ୍ବାସ୍ ଡେମ' ଆମା'ଏ ବାପ୍ତିସ୍ମା ବେଡ' । ଉନ୍ତ୍ଦିନ୍ ତିନ୍ ଅଜାର୍ ରେମଲେ ବିସ୍ବାସ୍ ଡେମ'ସେକ୍ ଆଜିସୁଲା ବିସ୍ବାସ୍ ଡେମ'କୁନୁଂ ରେମଲେବୁରଂ ମିସ୍ଗା' ।
ଆଜିସୁ ବିସ୍ବାସ୍ ଡେମ'କୁନୁଂ ରେମଲେ ଗୁଲାଇର ମିସ୍ସେକ୍ ଡୁକୁନୁଂ
42ମା'ଏ ଗୁଲାଇର ପେରିତଲେନା ତୁମ' ଅଂପୁଲେଇ ମାରି ମୁଇ ଡିଂଅଁନ୍ ରେମଲେସୁଗ ଡୁକୁପୁଲେଇ ଇସାଉ ମୁନ୍ ଡେଂସେକ୍ ଡୁକୁ । ମା'ଏ ଡୁ'ତୁନା ରୁନ୍କୁନୁଂବେଲା ରୁଟି ସିସିଡ'କୁ ମାରି ପାର୍ତନା ଡେମ'ସେକ୍ ଡୁକୁଗା' ।
43ପେରିତଲେ ଅବୁଦି କାବାକାବାବାଇ'ନା କାମ୍ ମାରି ଅବୁଦି ସିନଲେସା ଅସୁୟ'କୁସା' ଗୁଲାଇ ରେମଲେ ଅବୁଦି ବୁତୁଂଗା' । 44#ପେରିତ 4:32–35ଜାଜା ଆଜିସୁ ବିସ୍ବାସ୍ ଡେମ' ମା'ଏ ଗୁଲାଇର ମୁନ୍ଡକ୍ବକ୍ ଡୁକୁ । ମାରି ମା'ଏନ୍ବକ୍ ମାମା ଡୁକୁଗା' ଗୁତୁନ୍ ଗୁଲାଇ ରିଂସେକ୍ ଗୁଲାଇରପୁଲେଇ ଡ'ସେକ୍ ବୁଂଅଁ' । 45ମାରି ମା'ଏନା ଜମିବାଡି ମାରି ମା'ଏନା ଦନ୍ସମ୍ପତି ଡୁକୁନୁଂ ସୁଂଅଁ'ଆଡ'ସେକ୍ ଆଜାଆଜା ମାମା ଦର୍କାର୍ ଡୁକୁ ଗୁତୁନ୍ ଅନୁସାରେ ବେଡ' । 46ମାରି ମା'ଏ ଇସାଉ ମାପ୍ରୁନା ମନ୍ଦିର୍ବକ୍ ରୁନ୍ସେକ୍ ଡୁକୁ । ମାରି ମା'ଏ ଡିଂଅଁ ଡିଂଅଁବକ୍ ମିସ୍ସେକ୍ ରୁଟି ସିସିଡ'ସେକ୍ ମା'ଏନ୍ ଜିବନ୍ବକ୍ ଅବୁଦି ସାର୍ଦାକ୍ସେକ୍ ମା'ଏ ଗୁଲାଇର ମିସ୍ସେକ୍ ସୁମ'କୁ 47ଡୁ'ତୁନ୍ଉ ଡେମ'ସେକ୍ ମା'ଏ ଆମାପ୍ରୁ ସୁନ୍ଡ୍ରକୁ । ସା' ଗୁଲାଇ ରେମଲେ ଆମା'ଏ ଅବୁଦି ବଲ୍ ଡ'ସେକ୍ ସୁନ'କୁ । ମାରି ପାପ୍ନା ଡନ୍ଡ୍କୁରୁଂ ଜାଜା ରକ୍ୟା ବାଂଗା' ଆମା'ଏ ପ୍ରବୁ ମା'ଏବୁରଂ ଇସାଉ ମିସାୟ'କୁ ।
Currently Selected:
ପେରିତ 2: BFW
Highlight
Copy
Compare
Share
Want to have your highlights saved across all your devices? Sign up or sign in
CC BY-NC-ND 4.0