ପେରିତ 1
1
1 #
ଲୁକ 1:1–4
ଅ ତିୟପିଲ, ନିଂ ସିଁସେଇଁଉ ଆନ ଲେକ୍ଲ' ବେଡ'କୁନୁଂ ଉଲାକ୍ବକ୍ ଜିସୁଲା ସିଁସେଇଁଉବାଂସା' ମାମା ଡେମ'କୁ ମାରି ଆରେମଲେ ମାମା ଅମାଗ'କୁ ଗୁତୁନ୍ ଗୁଲାଇ, 2ମାରି ମାପ୍ରୁ ଆମାଇ ସରଗ୍ବକ୍ ଇନ୍ଡ୍ରିଂ ପନ୍ତେକ୍ ଡେଂକୁନୁଂ ଗୁଲାଇ ଲେକ୍ଲ' ବେଡ'ନିଂ । ମାଇ ସିରେଲ'କୁନୁଂ ପେରିତଲେ ମାମା ଡିନ୍ଡେମ୍ ଡୁତା ଡ'ସେକ୍ ପବିତ୍ର ଆତ୍ମା ଆମାଇ ସାନ୍ଡୁଂଅଁ'ସା' ମାଇ ସୁଁସୁ ଅ'ଡମ'ସା' ମାପ୍ରୁ ଆମାଇ ସରଗ୍ବକ୍ ରିଂଅଁ' ଡାଇ'ଗା' । 3ମାଇ କସ୍ଟବାଂସେକ୍ ଗୁଇ'ସେ'ଗା ସତଇସା ନିଂ ମାରି ବୁର'ଗୁତିଂ ଡ'ସେକ୍ ଅସୁଇ'ପୁଲେଇ ଆମାଇନା ପେରିତଲେ ସାଲିସ୍ଦିନ୍ ପନ୍ତେକ୍ ଅବୁଦି ପାଲି ଅ'ତୁନାଗା' । ମାରି ମାପ୍ରୁନା ରାଜିନା ବିସୟରେସା ମାଇ ଆମା'ଏ ସୁନ'। 4#ଲୁକ 24:49ମୁସିଂ ମା'ଏବୁରଂ ମାଇ ସୁସୁମ୍ ଲେଇ'କୁନୁଂବେଲା ଆମାଇନା ରେମଲେ ସୁନ', “ପେ ଜିରୁସାଲମ୍ ମୁନା'ଉଂଗମ୍କୁରୁଂ ଆଡୁଂଗା' । ମାତର୍ ନିଂନା ବା ଆପେ ବେ'ତିଂ ଡ'ସେକ୍ ତିତିବାଡ' ପର୍ମାନ୍ ସବ'କୁନୁଂ ଗୁତୁନା ପେ ବୁମ୍ବାମ୍ପନ୍ତେକ୍ ଆକେଉ ଜାଗ୍ଲ'ସେ'ଗା ଡୁକୁଲା । କେନା ନିଂ ସିଁସେଇଁଉ ଆପେ ସୁନ'କୁନିଂ । 5#ମାତିଉ 3:11; ମାର୍କ 1:8; ଲୁକ 3:16; ଜଅନ୍ 1:33ମାସା'ଡ'ନା ଜଅନ୍ଲା ଡାଗ୍ବୁରଂ ଆପେ ବାପ୍ତିସ୍ମା ବେଡ', ମାତର୍ ଆ'ଇ ଦିନ୍ ତିର୍ଗି' ମାପ୍ରୁଲା ଆପେ ପବିତ୍ର ଆତ୍ମାବୁରଂ ବାପ୍ତିସ୍ମା ବେ'ତ” ଡ'ସେକ୍ ସୁନ' ।
ଆଜିସୁଲା ସରଗ୍ବକ୍ ରିଂଅଁ' ଉଇଡେନ୍
6ସା' ପେରିତଲେ ଗୁଲାଇର ଜିସୁଲାବୁରଂ ଡୁକୁନୁଂବେଲା ମା'ଏ ଆଜିସୁଲା ଅ'ଗଁସ୍ଲା'ଗା', “ଅ ପ୍ରବୁ, ଇନ୍ତେ ନେଇନା ରାଜାଲେ ଆଇସ୍ରାଏଲ୍ରେମଲେ ସାସନ୍ ଡେମ'ସେକ୍ ଡୁକୁନୁଂସୁଗ ଆନେଇ ଆଇସ୍ରାଏଲ୍ରେମଲେ ନ ସାସନ୍ ଡିନ୍ଡେମ୍ନା ବେଲା ଆ'ନା ମାରି ଡେଂଗୁତା ଇ?” ଡ'ସେକ୍ ଅ'ଗଁସ୍ଲା'ଗା' ।
7ସା' ଜିସୁଲା ଆମା'ଏ ସୁନ' “ଗୁତୁନ୍ ଡିନ୍ଡେମ୍ନା ତାରିକ୍ ମାରି ବେଲା ନେମ୍ବାନା ଅଦିକାର୍ବକ୍ ଡୁତା । ପେ ଗୁତୁନ୍ ମାଗ୍ମାକ୍ପୁଲେଇ ଦର୍କାର୍ ଆରାକ୍ । 8#ମାତିଉ 28:19; ମାର୍କ 16:15; ଲୁକ 24:47,48ମାତର୍ ପବିତ୍ର ଆତ୍ମା ପେନ୍ ବାଗ୍ବକ୍ ସାକ୍ନା ପେ ବପୁ ବାମ୍ତୁପେ । ଗୁତୁନ୍ ବପୁବୁରଂ ପେ ଜିରୁସାଲମ୍ ମୁନା'ଉଂଗମ୍ବକ୍ ମାରି ଜିଉଦା ଜିଲାନା ଗୁଲାଇ କୁନ୍ଡା ମାରି ସମିରନି ଜିଲାନା ଗୁଲାଇ କୁନ୍ଡା ମାରି ଦର୍ତନିବକ୍ ଡୁକୁନୁଂ ଗୁଲାଇ ଦେସ୍ଦୁନିଆବକ୍ ଉଇସେକ୍ ଆଗୁଲାଇର ନିଂନା ବିସୟ ସାକି ସୁନ୍ତୁପେ” ଡ'ସେକ୍ ସୁନ' । 9#ମାର୍କ 16:19; ଲୁକ 24:50,51କେନ୍ ଗୁଲାଇଉ ସୁଁସୁ ଅ'ଡମ'ସା' ମା'ଏ ଆମାଇ ଜୁଲ'କୁନୁଂବେଲାଉ ମାପ୍ରୁ ଆମାଇ ବାଗ୍ବକ୍ ଅଡାୟ' ମାରି ମୁଇ ବାଦଲ୍ ସାକ୍ସେକ୍ ଆମାଇ ଡାଲୁଲ'ସୁଂଅଁ'ସା' ଆତୁନାତା ଡେଂଉଇଗା' ।
10ମାଇ ବାଗ୍ବକ୍ ଡୁଡାଇ'ବେଲା ମା'ଏ ଆମାଇ ଜୁ' ତାଂଡାୟ'ସେକ୍ଉ ଜୁଲ'କୁ । ଡୁ'ତୁନ୍ ତାଂଡାୟ'କୁନୁଂବେଲା ଇମ୍ବାୟ ଇଂଗେରେ ତୁଲୁଇବାଇ' ସକା ଅଲୁକ୍ସେକ୍ ସୁରୁଇ' ମା'ଏନ୍ ଉନ୍ତୁ' ତଂଗା' । 11ତଂସେକ୍ ମାଇପା ଆମା'ଏ ସୁନ' “ଅ ଗାଲିଲିନା ରେମଲେ, ମାସା' ପେ ଆକି'ତୁଂ ତାଂଡାୟ' ତଂଗୁତୁପେ? ପେନ୍କୁରୁଂ ସରଗ୍ବକ୍ ଡାଇ'ଉଇକୁନୁଂ କେନ୍ ଜିସୁଲା ମି କି'ତୁଂବକ୍ ଡାଇ'ଗା' ଡୁ'ତୁନ୍ସୁଗ ମାଇ ମାରି ମୁସ ଜର୍ତା” ଡ'ସେକ୍ ସୁନ' ।
ଇସ୍କରିୟତ୍ ଜିଉଦାନ୍ ତାନ୍ବକ୍ ଆପାଲ୍ ମୁଇନ୍ଡା ସିରେଡେନ୍
12ତିର୍ଗି' ପେରିତଲେ ଜିତ କୁନ୍ଡାକୁରୁଂ ଜିରୁସାଲମ୍ ମୁନା'ଉଂଗମ୍ବକ୍ ଆନ୍ଡେଇଁଗା' । ଗୁତୁନ୍ ଜିତ କୁନ୍ଡା ଡ'ନା ଜିରୁସାଲମ୍ ମୁନା'ଉଂଗମ୍ ଉନ୍ତୁ' ଡୁତା, ଡ'ନା ଗୁତୁନ୍ ଉଂଗମ୍କୁରୁଂ ମୁଇ କିଲିମିଟର୍ସୁଗଉ ସୁଲୁଂ ଡୁତା । 13#ମାତିଉ 10:2–4; ମାର୍କ 3:16–19; ଲୁକ 6:14–16ଆନ୍ଡେଇଁସେ'ଗା ମା'ଏ ମୁଲ୍ ଡୁକୁନୁଂ ବାଗ୍ବକ୍ନା ଡିଂଅଁବକ୍ ଗାଇଗା' । ଗୁତୁନ୍ ଡିଂଅଁ ବିତ୍ରେ ଜାଜା ଡୁକୁଗା' ଡ'ନା: ପିତର୍ଲା, ଜଅନ୍ଲା, ଜାକୁବଲା, ଆନ୍ଦ୍ରିୟଲା, ପିଲିପ୍ଲା, ତମାଲା, ବାର୍ତଲମିଲା, ମାତିଉଲା, ଆଲ୍ପିନା ଉଁ'ଉଁ ଜାକୁବଲା, ଉତ୍ଜଗି ସିମନ୍ଲା, ଜାକୁବ୍ନା ଉଁ'ଉଁ ଜିଉଦାଲାସା ଡୁକୁଗା' । 14ମା'ଏ ଆ'ଇରସୁଗ ସେଲାନେବୁରଂ ମାରି ଜିସୁନା ୟଂ ମରିୟମାବୁରଂ ମାରି ଜିସୁନା ବୁୟାଂଏଁବୁରଂ ଆତା ରୁନ୍ସେକ୍ ମାମା ପାର୍ତନା ଡିନ୍ଡେମ୍ ଡୁତା ଗୁତୁନ୍ ଗୁଲାଇବକ୍ ଏକ୍ଜୁଟ୍ ଡେଂସେକ୍ ଆତା ଇସାଉ ପାର୍ତନା ଡେମ'ସେକ୍ ଡୁକୁ ।
15ଆଇ'ତୁନ୍ବେଲା ଆଜିସୁଲା ବିସ୍ବାସ୍ ଡେମ'କୁନୁଂ ସକଡିସୁଗ ରେମଲେ ପାର୍ତନା ଡିନ୍ଡେମ୍ପୁଲେଇ ରୁନ୍କୁନୁଂବକ୍ ପିତର୍ଲା ତଂସେକ୍ 16ଡି'କେନ୍ ସୁନ': “ଅ ବୁୟାଂଏଁ ତୁନାଲେ, ଆଜିସୁଲା ସୁସପ୍ପୁଲେଇ ଆଦାଇରେମେ କୁରୁଂ ଅସୁୟ'ବେଡ'କୁନୁଂ ଆଜିଉଦାଲା ମା ଡେନ୍ତା ଡ'ସେକ୍ ପବିତ୍ର ଆତ୍ମା ସାନ୍ଡୁଂଅଁସା' ମାପ୍ରୁନା ଉଲାକ୍ବକ୍ ଇନ୍ତେକନ୍ଡେକ୍ ଦାଉଦ୍ଲା ଲେକ୍ଲ'କୁନୁଂ ଆ'ନା ସତଇସା ଡେଂଗା' । 17ମାଇସା ନେଇବୁରଂ ଡୁକୁ । ମାରି ନେଇବୁରଂ ମାପ୍ରୁନା କାମ୍ ଡିନ୍ଡେମ୍ପୁଲେଇ ଆମାଇସା ବେଡ'କୁ ।”
18 #
ମାତିଉ 27:3–8
ମାଇ ଡେମ'କୁନୁଂ ଗୁତୁନ୍ ଅଲିରାକ୍କାମ୍ ପୁଲେଇ ବାଂକୁନୁଂ ଗୁତୁନ୍ ଡାବୁବୁରଂ ସବ'କୁନୁଂ ଗୁତୁନ୍ ଇ'କି ଜମିବକ୍ ମାଇ ବାଗ୍ବକ୍କୁରୁଂ ପିଗୁକ୍ସେକ୍ ଲକ୍ଡାଇ'ଗା'ସା' ମାଇନା ଞେରି ସିସିକ୍ଲୁଲାର୍ ଉଇସେକ୍ ସୁଲଇ' ଗୁଲାଇ ତୁର୍ଗା' । 19ଜିରୁସାଲମ୍ ମୁନା'ଉଂଗମ୍ରେମ୍ ଗୁଲାଇର ଗୁତୁନ୍ ଅଂଅଁ' ମାରି ଆତୁନ୍ ଜମି ଅକଲ୍ଦମା ଡ'ସେକ୍ ମା'ଏ ଅ'ଇମିଲ' । ମା'ଏନ୍ ସାମ୍ବକ୍ “ଅକଲ୍ଦମା ଡ'ନା ବନିଜମି” ଡ'ସେକ୍ ଅର୍ତ ଡୁତା ।
20ପିତର୍ଲା ମାରି ସୁନ' “ମାସା'ଡ'ନା ଗିତସଂଗିତାବକ୍ ଲେକ୍ଲ'ତା: ‘ମାଇନା ଡିଂଅଁ ସରଉ ସିମ୍ରାକ୍ସେକ୍ ଡୁକୁଲେଇ' । ଗୁତୁନ୍ବକ୍ ଜାଏସା ଆବାସାଲେଇ'’ ଡ'ସେକ୍ ମାରି ‘ମାଇ ଡେମ'କୁନୁଂ ମୁନା'ରେମ୍ନା କାମ୍ ପାଲ୍ରେମ ଜାଏସା ରିଂଏଁଇ'’ ଡ'ସେକ୍ସା ଲେକ୍ଲ'ତା ।
21 #
ମାତିଉ 3:16; ମାର୍କ 1:9; ଲୁକ 3:21;
ମାର୍କ 16:19; ଲୁକ 24:51 ସା' ଆ'ନା ଜିଉଦାନା ତାନ୍ବକ୍ କାମ୍ ଡିନ୍ଡେମ୍ପୁଲେଇ ଆମୁଇନ୍ଡା ସିରେ ଡୁତା । ମାଇ ମିବାଇ' ରେମ ଡୁକୁଡୁତା ଡ'ନା ପ୍ରବୁ ଜିସୁଲା ନେଇ'ବୁରଂ ଇସାଉ ଡୁକୁନୁଂବେଲା ଗୁତୁନ୍ ରେମସା ନେଇ'ବୁରଂ ଇସାଉ ଡୁକୁନୁଂବାଇ' ଡୁକୁଡୁତା । 22ଡ'ନା, ଜଅନ୍ଲା ବାପ୍ତିସ୍ମା ବେଡ'କୁନୁଂବାଂସା' ମାପ୍ରୁ ଆଜିସୁଲା ସରଗ୍ବକ୍ ଇନ୍ଡ୍ରିଂ ପନ୍ତେକ୍ ନେଇ'ବୁରଂ ଇସାଉ ଡୁକୁନୁଂ ମୁଇନ୍ଡା ଡୁକୁଡୁତା । ମାରି ଆଜା ସିରେତ ମାଇ ଜିସୁଲା ଗୁଇ'ସେକ୍ ବୁରଗୁତା ଡ'ସେକ୍ ନେଇ'ବୁରଂ ଆଗୁଲାଇର ସାକି ସୁଁସୁ ଡୁତା ।”
23ସା' ମା'ଏ ଇମ୍ବାୟନା ଇମି ସୁନ' । ମୁଇନ୍ଡାନା ଇମି ଜସେପ୍ । ଆମାଇ ରେମଲେ ବର୍ସବା ମାରି ଜୁସ୍ତ ଡ'ସେକ୍ସା ୱାୟ'କୁ । ମାରି ମୁଇନ୍ଡାନା ଇମି ଡୁତା ମତିୟ । 24ମାରି ମା'ଏ ଡି'କେନ୍ ପାର୍ତନା ଡେମ': “ଅ ପ୍ରବୁ, ଗୁଲାଇର ମା'ଏନ୍ ଜିବନ୍ବକ୍ ମାମା ଏତ୍ଗୁତା ଡ'ସେକ୍ ନ ମାଗ'ତୁନ । ସା' କେନ୍ ଇମ୍ବାୟବକ୍ ଆଜା ନ ସିରେଲ'ତୁନ ଆନେଇ ନ ଅସୁଇ' । 25ଜିଉଦାଲା ଆମ୍ବ' ଉଇ ଡୁତା ଡ'ସେକ୍ ଡୁକୁଗା' ଗୁତୁନ୍ ତାନ୍ବକ୍ ମାଇ ଉଇଗା'ସା' ମାଇ ଡେମ'କୁନୁଂ ପେରିତନା କାମ୍ବକ୍ ଗୁତୁନ୍ ରେମ ପେରିତ ଏଲେଇ' ।” 26ତିର୍ଗି' ମା'ଏ ମାଇପାନା ଇମି ଲେକ୍ଲ'ସେ'ଗା ଜାନା ଇମିବକ୍ ସାପ୍ତା ଡ'ସେକ୍ ପାନ୍ଜି ବୁଂଅଁ' ଜୁଲ' । ଜୁଲ'ସା' ଗୁତୁନ୍ ମତିୟନା ଇମି ତୁର୍ଗା' । ସା' ଆମାଇ ମା'ଏ ସିରେଲ'ସେ'ଗା ଏଗାରଲକ୍ ପେରିତଲେବୁରଂ ମିସାୟ' ।
CC BY-NC-ND 4.0