ପେରିତ 19
19
ପାଉଲଲା ଏପିସିୟ ମୁନା'ଉଂଗମ୍ବକ୍ ଡେମ'କୁନୁଂ କାମ୍
1ଆପଲଲା କରିନ୍ତିୟ ଉଂଗମ୍ବକ୍ ଡୁକୁନୁଂବେଲା ପାଉଲଲା ପାଲ୍ପାଲ୍ ଉଂଗମ୍ବକ୍ ଉଇସେକ୍ ଏପିସିୟ ମୁନା'ଉଂଗମ୍ବକ୍ ଡେଲ'। ଡେଲ'ସା' ଆତା ଆଜିସୁ ବିସ୍ବାସ୍ ଡେମ'କୁନୁଂ ରେମଲେ ଆ'ଇରବକ୍ସୁଗ ଜୁଲ' । 2ପାଉଲଲା ଆମା'ଏ, “ପେ ଜିସୁନା ବଲ୍କବର୍ ବିସ୍ବାସ୍ ଡେମ'ପେସା' ପବିତ୍ର ଆତ୍ମା ବାଂକୁପେ ଇ?” ଡ'ସେକ୍ ଅ'ଗଁସ୍ଲା'ଗା' ।
ସା' ମା'ଏ ଆମାଇ ସୁନ', “ଆରାକ୍, ପବିତ୍ର ଆତ୍ମା ଡୁତା ଡ'ସେକ୍ ନେଇ ଇନ୍ଡଇ'ଏସା ଅଂଅଁ' ଆଡୁତୁନେଇ” ଡ'ସେକ୍ ସୁନ' ।
3ସା' ପାଉଲଲା ଆମା'ଏ ଅ'ଗଁସ୍ଲା'ଗା', “ଡୁ'ତୁନ୍ ଡ'ନା ପେ ମିବାଇ' ବାପ୍ତିସ୍ମା ରିଂକୁପେ?” ଡ'ସେକ୍ ଅ'ଗଁସ୍ଲା'ଗା' ।
ସା' ମା'ଏ ସୁନ', “ନେଇ ଜଅନ୍ଲା ବେଡ'କୁନୁଂ ବାପ୍ତିସ୍ମା ରିଂଗୁତୁନେଇ” ଡ'ସେକ୍ ସୁନ' ।
4 #
ମାତିଉ 3:11; ମାର୍କ 1:4,7,8; ଲୁକ 3:4,16; ଜଅନ୍ 1:26,27 ପାଉଲଲା ସୁନ', “ପାପ୍କାମ୍ ଅଲିରାକ୍କାମ୍ ଗୁଲାଇ ଅଡକ୍ସୁଂଅଁ'ସେକ୍ ଜାଜା ମାପ୍ରୁନ୍ବକ୍ ଆନ୍ଡେଇଁ ସା'ଗା' ଆମା'ଏ ଜଅନ୍ଲା ବାପ୍ତିସ୍ମା ବେଡ'କୁ । ଜା ମୁଇନ୍ଡା ମାଇନା ତିର୍ଗି' ସୁସାପ୍ଡେନ୍ତା ଗୁତୁନ୍ ଜିସୁନ୍ବକ୍ ବିସ୍ବାସ୍ ଡିନ୍ଡେମ୍ପୁଲେଇ ମାଇ ଆରେମଲେ ସୁନ'କୁଗା' ” ଡ'ସେକ୍ ସୁନ' । 5ସା' ମା'ଏ ଗୁତୁନ୍ ଅଂଅଁ'ସେକ୍ ପ୍ରବୁ ଜିସୁନା ଇମିବକ୍ ବାପ୍ତିସ୍ମା ରିଂଗା' । 6ତିର୍ଗି' ପାଉଲଲା ମା'ଏନ୍ ବ'ବ୍ ବାଗ୍ବକ୍ ତିତି ବୁଂଅଁ'ସା' ଆମା'ଏ ଆମୁଇନ୍ଡା ଆମୁଇନ୍ଡା ମା'ଏନ୍ ବାଗ୍ବକ୍ ପବିତ୍ର ଆତ୍ମାନା ବପୁ ସା'ଗା', ସା' ମା'ଏ ପାଲ୍ପାଲ୍ ସାମ୍ବକ୍ ଅଇଁୟ' ମାରି ମାପ୍ରୁନା ତୁମ' ଅଂଅଁ'ସେକ୍ ଆରେମଲେ ସୁଁସୁ ମୁଲାୟ' । 7ମା'ଏ ଗୁଲାଇର ବାରଲକ୍ସୁଗ ଇଂଗେରେ ଡୁକୁ ।
8ତିର୍ଗି' ପାଉଲଲା ଜିଉଦିରେମଲେନା ପାର୍ତନା ଡିଂଅଁବକ୍ ଉଇସେକ୍ ତିନ୍ମାସ୍ ପନ୍ତେ'କା ମବୁତୁଂ ମାପ୍ରୁନା ରାଜି ବିସୟରେ ସୁନ'ସେକ୍ ମାପ୍ରୁନ୍ବକ୍ ଆରେମଲେ ବିସ୍ବାସ୍ ଅ'ଡେମ୍ପୁଲେଇ ସେସ୍ଟା ଡେମ' । 9ମାତର୍ ମା'ଏନ୍ ବିତ୍ରେ ଆ'ଇରସୁଗ ପାଉଲଲା ସୁନ'କୁନୁଂ ଅଂଅଁ'ସେକ୍ ବାସ୍ ବିସ୍ବାସ୍ ଆଡେମ୍ତ କି ମାଇ ସୁନ'କୁନୁଂ ମାରି ଅଂପୁଲେଇସା ମୁନ୍ ଆଡେମ୍ତ । ମାରି ମା'ଏ ରେମଲେ ଡୁକୁନୁଂବକ୍ ପ୍ରବୁନା କୁରୁଂନା ବିସୟରେ ଅବୁଦି ଅଲିରାକ୍ବାଇ' ସୁନ' । ଡୁ'ତୁନ୍ସା' ପାଉଲଲା ଆମା'ଏ ଅନ୍ତୁର'ସେକ୍ ଡୁଂଗା', ମାରି ଆଜିସୁ ବିସ୍ବାସ୍ ଡେମ'କୁନୁଂ ଆରେମଲେ ମାଇ ୱାୟ' ଉଇସେକ୍ ତୁରାନ୍ନ ଡ'ସେକ୍ ଇମିକୁନୁଂ ମୁଇନ୍ଡା ରେମ ରେମଲେବୁରଂ ଅଇଁପୁଲେଇ ଅ'ରଇଁୟ'କୁନୁଂ ମୁଇ ମୁନା' ଡିଂଅଁ'ବକ୍ ଇସାଉ ମାପ୍ରୁନା ତୁମ' ଅମାଗ'କୁ । 10ଡି'କେନା ଦୁଇବରସ୍ ମାଇ ଆରେମଲେ ଆତା ଅମାଗ', ସା' ଆସିଆ ଦେସ୍ବକ୍ ଡୁକୁନୁଂ ଜିଉଦିରେମଲେ ମାରି ଗିରିକ୍ ରେମଲେ ପ୍ରବୁନା ତୁମ' ଅଂଅଁ' ।
ସ୍କେବାନା ଉଁ'ଉଁନେ
11ମାରି ଅବୁଦି କାବାକାବା ଡିନ୍ଡେମ୍ବାଇ' କାମ୍ ଡିନ୍ଡେମ୍ପୁଲେଇ ମାପ୍ରୁ ଆପାଉଲଲା ଅବୁଦି ବପୁ ବେଡ'। 12ଡୁ'ତୁନ୍ସା' ପାଉଲନା ଞେରିବକ୍ ବାଂକୁନୁଂ ଉର୍ମାଲ୍ ଆରାକ୍ନା ଜାଗଲି ରିଂସେକ୍ ସିକୁନୁଂ ରେମଲେବକ୍ ବୁଂଅଁ'ବୁଂଅଁ'ନା ସିରେମେ ବାନି ଡେଂଉଇକୁ ମାରି ବୁତ୍ଲେସା ତୁର୍ସେକ୍ ଡୁଂକୁ ।
13ଏନ୍ତୁକ୍ ଜିଉଦିରେମଲେସା ଉଂଗମ୍ ଉଂଗମ୍ ବୁଲ୍ଲ'ସେ'ଗା ଆବୁତ୍ଲେ ଞନ'କୁ, ମା'ଏ ମି ଞନ'କୁ ଡ'ନା “ପାଉଲଲା ଇମ୍ବ'ନ୍ ଜିସୁନା ଇମିବକ୍ ସୁନ'ତା, ଗୁତୁନ୍ ଜିସୁନା ଇମିବକ୍ ପେ ତୁର୍ଡୁଂଆଁ ଡ'ସେକ୍ ନିଂ ଆପେ ସୁନ'ତିଂ” ଡ'ସେକ୍ ପ୍ରବୁ ଜିସୁନା ଇମି ସବ'ସେକ୍ ଆବୁତ୍ଲେ ଞୁଞପୁଲେଇ ସେସ୍ଟା ଡେମ'ତା । 14ଜାଜା ଡି'କେନ୍ ଡେମ'କୁ ଡ'ନା ସ୍କେବା ଡ'ସେକ୍ ଇମିକୁନୁଂ ଜିଉଦିରେମଲେନା ମୁନା'ପୁଜାରିଲେନ୍ ମୁନା'ପୁଜାରିନା ଉଁ'ଉଁନେ ସାତ୍ଲକ୍ ଡି'କେନା ଡେମ'କୁ । 15ମାତର୍ ମା'ଏ ଡିନ୍ଡେମ୍ବେଲା ବୁତ୍ ଆମା'ଏ ସୁନ', “ନିଂ ଆଜିସୁଲା ମାଗ'ତିଂ ମାରି ଆପାଉଲଲା ସମଡ'ତିଂ, ମାତର୍ ପେ ଜାଲେଇ?” ଡ'ସେକ୍ ସୁନ' । 16ଡି'କେନା ସୁନ'ସେକ୍ ଗୁତୁନ୍ ବୁତ୍ ସବ'କୁନୁଂ ରେମ ମା'ଏନ୍ ବାଗ୍ବକ୍ ପଡ'ଡାଇ'ସେକ୍ ଆମା'ଏ ଅବୁଦି ବୁଗ୍ସଲ'ତିସଲ' । ସା' ମା'ଏ ଗୁଲାଇର ପୁଂରଂ ଡେଂସେକ୍ କାବ୍ରାଲ' ସିତ୍ରାଲ'ସେକ୍ ଗୁତୁନ୍ ଡିଂଅଁକୁରୁଂ ବାଇରି ଉର' ଡୁଂଗା' ।
17କେନା ତୁମ' ଏପିସିୟ ଉଂଗମ୍ବକ୍ ଡୁକୁନୁଂ ଜିଉଦିରେମଲେ ମାରି ଗିରିକ୍ ରେମଲେ ଅଂଅଁ'ସେକ୍ ମା'ଏ ଗୁଲାଇର ଅବୁଦି ବୁତୁଂଉଇଗା' । ମାରି ପ୍ରବୁ ଜିସୁଲା ଅବୁଦି ବପୁବାଇ' ଡ'ସେକ୍ ମା'ଏ ମାଗ'ସା' ମା'ଏ ଗୁଲାଇର ମାଇନା ଇମିବକ୍ ମଇମା ବେଡ' । 18ମାରି ବିସ୍ବାସ୍ ଡେମ'କୁନୁଂ ରେମଲେ ଅବୁଦିର ସାକ୍ସେକ୍ ମା'ଏ ନିଜେନିଜେ ଅଲିରାକ୍ବାଇ' କାମ୍ ଡେମ'କୁନୁଂ ପାଲ୍ ବିସ୍ବାସି ରେମଲେ ଅଂସୁଗ ଗୁଲାଇରନ୍ ଦେକ୍ତେ ସୁନ'ସେକ୍ ଆମାପ୍ରୁ କେମା ଲୁଡ' । 19ମାରି ଜାଜା ଏରେମ୍ ଡୁକୁ ମା'ଏ ଅବୁଦିର ନିଜର୍ ନିଜର୍ନା ଉଲା'ଗେ ଗୁଲାଇ ରିଂଅଁ'ସେକ୍ ଗୁଲାଇର ଜୁଲ'କୁନୁଂବକ୍ ବାଲ'ସୁଂଅଁ' । ଗୁତୁନ୍ ଉଲାକ୍ନା ଦାମ୍ ରେମଲେ ଇସାପ୍ ଡେମ'ସା' ପସାସ୍ ଅଜାର୍ ରୁପାନା ଡାବୁ ଡେନ୍ତା ଡ'ସେକ୍ ମାଗ' । 20ଡି'କେନା ପ୍ରବୁନା ତୁମ' ଅଦିକ୍ ଅଦିକ୍ ଗୁଲାଇ କୁନ୍ଡା ଉନୁଂଗା' ମାରି ରେମଲେନା ଜିବନ୍ ବାଦ୍ଲି ଡିନ୍ଡେମ୍ପୁଲେଇ ଗୁତୁନ୍ବକ୍ ଅବୁଦି ବପୁ ଡୁକୁ ।
ଏପିସ ମୁନା'ଉଂଗମ୍ବକ୍ ଆପାଉଲଲା ଅବୁଦି କସ୍ଟ ବିବେ'ଡେନ୍
21ଡି'କେନା ଗୁଲାଇ ଡେଂକୁନୁଂ ତିର୍ଗି' ପାଉଲଲା ମାକିଦନିଆ ମାରି ଆକାୟା ଦେସ୍ ରି'ତା ଜିରୁସାଲମ୍ବକ୍ ଉଇପୁଲେଇ ଏତ୍ଗା' । ମାରି ଆତା ଉଇସେକ୍ ରମ୍ ମୁନା'ଉଂଗମ୍ବକ୍ସା ଉଇ ଡୁତା ଡ'ସେକ୍ ମାଇ ଏତ୍ଗା' । 22ଏତ୍ସେକ୍ ଆମାଇ ସାନ୍ଡୁଂପୁଲେଇ ଡୁକୁନୁଂ ଆତିମତିଲା ମାରି ଆଏରାସ୍ଟଲା ଆମାଇପା ଇମ୍ବାୟବକ୍ ମାକିଦନିଆ ଦେସ୍ବକ୍ ବେନ୍ଟାୟ'ସେକ୍ ମାଇ ମାରି ଆ'ଇଦିନ୍ସୁଗ ଆସିଆ ଦେସ୍ବକ୍ ଡୁକୁକ୍ ଉଇଗା' । 23ଆଇ'ତୁନ୍ବେଲା ଗୁତୁନ୍ ପ୍ରବୁନା କୁରୁଂ ବିସୟରେ ବିସ୍ବାସ୍ ଡେମ'କୁନୁଂ ରେମଲେବକ୍ କସ୍ଟ ବିବେ' ମୁଲାୟ' । 24ମାସା'ଡ'ନା ଦିମିତ୍ରିୟ ଡ'ସେକ୍ ଇମିକୁନୁଂ ମୁଇନ୍ଡା ରୁପାନା କାମ୍ ଡିନ୍ଡେମ୍ରେମ ଆତା ଡୁକୁ । ମାଇ ଆର୍ତେମି ଡ'କୁନୁଂ ମୁଇ ମାପ୍ରୁବୁଇ'ନା ମନ୍ଦିର୍ ଡାଉଡାଉବାଇ' ରୁପାବୁରଂ ଅ'ରଇଁୟ' ସୁଂଅଁ'ସେକ୍ ମାଇ ମାରି ମାଇବୁରଂ କାମ୍ ଡେମ'କୁନୁଂ ଗୁଲାଇ ରେମଲେ ଗୁତୁନ୍କୁରୁଂ ଅବୁଦି ଡାବୁ କମାୟ'କୁ । 25ସା' ଗୁତୁନ୍ ରେମ ଆମାଇନା କାମ୍ରେମେ ମାରି ମା'ଏବୁରଂ ମିସ୍ସେକ୍ କାମ୍ ଡେମ'କୁନୁଂ ଆପାଲ୍ ରେମଲେ ଆଗୁଲାଇର ମୁନ୍ଡକ୍ବକ୍ ୱାୟ'ସେକ୍ ସୁନ', “ଅ ବୁୟାଂଏଁ, କେନ୍ କାମ୍କୁରୁଂ ନେଇ' ଅବୁଦି ଡାବୁ ବାଂଗୁତୁନେଇ' ଡ'ସେକ୍ ପେ ବଲ୍ ମାଗ'ତୁପେ । 26ମାତର୍ ରେମଲେ ତିତିବୁରଂ ଅ'ରଇଁୟ'କୁନୁଂ ଡେପ୍ତାଲେ ମାପ୍ରୁ ଆରାକ୍ ଡ'ସେକ୍ କେନ୍ ପାଉଲଲା ଆରେମଲେ ଅମାଗ'ତା, ମାରି ଏପିସିୟ ଉଂଗମ୍ବକ୍ଉ ଡ'ସେକ୍ ଆରାକ୍ ଆସିଆ ଦେସ୍ବକ୍ ଡୁକୁନୁଂ ଆଗୁଲାଇ ରେମଲେସା ସୁନ'ତା, ସା' ମା'ଏ ଅବୁଦିର ଗୁତୁନା ସତ୍ ଡ'ସେକ୍ ବିସ୍ବାସ୍ ଡେମ'ତା । କେନା ପେ ଅଂଅଁ'ତୁପେ ମାରି ଜୁଲ'ତୁପେ । 27ସା' ଆ'ନା ଜୁ, ନେଇ' ଡିନ୍ଡେମ୍ନା କେନ୍ କାମ୍ ଗୁଲାଇ ବଲ୍ ଆରାକ୍ ଡ'ସେକ୍ ରେମଲେ ସୁନ୍ତ, ଗୁତୁନାଉ ଡ'ସେକ୍ ଆରାକ୍, ମାରି ଆର୍ତେମି ଡ'କୁନୁଂ ମୁନା' ମାପ୍ରୁବୁଇ'ନା ମନ୍ଦିର୍ବକ୍ସା ରେମଲେ ଜାଏସା ସୁସାପ୍ପୁଲେଇ ମୁନ୍ ଆଡେନ୍ତା । ମାରି ଗୁଲାଇ ଆସିଆ ଦେସ୍ନା ରେମଲେ ମାରି ଗୁଲାଇ ଦେସ୍ଦୁନିଆନା ରେମଲେ ଆନେଇ'ନା ମୁନା' ମାପ୍ରୁବୁଇ' ସୁନ୍ଡ୍ରକ୍ସେକ୍ ଡୁତା, ମାତର୍ ଆ'ନାବାଂସା' ସୁରୁଇ' ରେମଲେ ଆତୁନ୍ ଆର୍ତେମି ମାପ୍ରୁବୁଇ' ମୁନା' ମାପ୍ରୁବୁଇ' ଡ'ସେକ୍ ଆଜୁତ” ଡ'ସେକ୍ ସୁନ' ।
28ସା' ଦିମିତ୍ରିୟଲା ସୁନ'କୁନୁଂ କେନ୍ ତୁମ' ଅଂଅଁ'ସେକ୍ ମା'ଏ ଅବୁଦି ଗିସେ'ଗା', ମାରି ଅବୁଦି କିରକ୍ସେକ୍ “ଏପିସିୟ ରେମଲେନା ଆର୍ତେମି ମାପ୍ରୁବୁଇ' ଅବୁଦି ମୁନା'!” ଡ'ସେକ୍ ସୁଁସୁ ମୁଲାୟ' । 29ସା' ଗୁତୁନ୍ ଅଂଅଁ'ସେକ୍ ଗୁତୁନ୍ ମୁନା'ଉଂଗମ୍ ଗୁଲାଇ କୁନ୍ଡାନ୍ ରେମଲେ ସୁରୁଇ' ମା'ଏବୁରଂ ମିସ୍ସେକ୍ ଅବୁଦି କିରକ୍ମରକ୍ସେକ୍ ଇନ୍ଡ୍ରିମ୍ସୁଗ ଡେଂକୁ । ଏନ୍ତୁକ୍ ରେମଲେ ଅବୁଦି ଗିସେକ୍ସେକ୍ ପାଉଲଲାବୁରଂ ଉଇଡେଂକୁନୁଂ ଆମାକିଦନିଆ ଦେସ୍ନା ରେମ ଆଗାୟଲା ମାରି ଆଆରିସ୍ତାର୍କଲା ସବ'ସେକ୍ ଆତା ଡୁକୁନୁଂ ମୁଇ କେଲ୍ବାର୍ନା ଜାଗାବକ୍ ଉର' ଉଇଗା' । 30ସା' ପାଉଲଲା ମା'ଏ ଡୁକୁନୁଂ ଗୁତୁନ୍ କେଲ୍ବାର୍ନା ଜାଗାବକ୍ ଉଇପୁଲେଇ ମୁନ୍ଡେଂକୁ ମାତର୍ ମାଇନା ସିସ୍ୟଲେ ଆଉଇଗା' ଡ'ସେକ୍ ପିଟାୟ' । 31ଗୁତୁନ୍ ଦେସ୍ନା ମୁନା'ରେମେ ଆ'ଇରସୁଗ ପାଉଲନା ବାଇଲ'ଗେ ଡୁକୁ । ମା'ଏ ଆମାଇ ଗୁତୁନ୍ କେଲ୍ବାର୍ନା ଜାଗାବକ୍ ଆଉଇଏଇ' ଡ'ସେକ୍ କବର୍ ବେନ୍ଟାୟ' ।
32ଆଇ'ତୁନ୍ବେଲା ଗୁତୁନ୍ କେଲ୍ବାର୍ନା ଜାଗାବକ୍ ରୁନ୍କୁନୁଂ ରେମଲେ ଗୁଲାଇର ଅବୁଦି କିରକ୍ସେକ୍ ମା'ଏନ୍ ବିତ୍ରେ ଏନ୍ତୁକ୍ର ମୁଇ ତୁମ' ସୁନ'କୁ ମାରି ଏନ୍ତୁକ୍ର ପାଲ୍ ମୁଇ ତୁମ' ସୁନ'କୁ, ସା' ମା ଡିନ୍ଡେମ୍ ଡୁତା ଡ'ସେକ୍ ମା'ଏ ଆମାକ୍ତ ଡେଂକୁ । ମାରି ମା'ଏ ଏନ୍ତୁକ୍ର ମାସା' ନେଇ ଆକେ ମୁନ୍ଡକ୍ବକ୍ ରୁନ୍ଗୁତୁନେଇ ଡ'ସେକ୍ସା ଆମାକ୍ତ ଡେଂକୁ । 33ଆଇ'ତୁନ୍ବେଲା ଆତା ରୁନ୍କୁନୁଂ ଜିଉଦିରେମଲେ ଏନ୍ତୁକ୍ର ଆକେ ମାମା ଡେଂଗୁତା ଡ'ସେକ୍ ରେମଲେବୁରଂ ନ ବଲ୍ ମାମା ସୁଁ, ଡ'ସେକ୍ ଆଆଲେକ୍ଜାନ୍ଡର୍ଲା ଆତା ସୁଁସୁପୁଲେଇ ସୁନ' ବେନ୍ଟାୟ' । ସା' ଆଲେକ୍ଜାନ୍ଡର୍ଲା ଆରେମଲେ ଜୁ' ଡୁକୁଲା ଡ'ସେକ୍ ତିତି ଅସୁୟ'ସେକ୍ ଅମାକ୍ପୁଲେଇ ସେସ୍ଟା ଡେମ' । 34ମାତର୍ ମାଇ ମୁଇନ୍ଡା ଜିଉଦିରେମ ଡ'ସେକ୍ ମା'ଏ ମାଗ'ସା' ମା'ଏ ଗୁଲାଇର ମିସ୍ସେକ୍ ଦୁଇ ଗନ୍ଟାସୁଗ କିରକ୍ସେ'ଗା' “ଏପିସିୟ ରେମଲେନା ଆର୍ତେମି ମାପ୍ରୁବୁଇ' ଅବୁଦି ମୁନା'!” ଡ'ସେକ୍ ସୁନ' ଡୁକୁ ।
35କେନା ଅଂଅଁ'ସେକ୍ ଗୁତୁନ୍ ମୁନା'ଉଂଗମ୍ନା ମୁଇନ୍ଡା ମୁନା'ରେମ୍ ମା'ଏ କିରକୁନୁଂ ଜୁ' ଅ'ଡେମ'ସେକ୍ ସୁନ', “ଅ ନିଂନା ଏପିସିୟ ଉଂଗମ୍ନା ରେମଲେ, ଆର୍ତେମି ଡ'ସେକ୍ ଇମିକୁନୁଂ ମୁନା' ମାପ୍ରୁବୁଇ'ନା ମନ୍ଦିର୍ ମାରି କି'ତୁଂକୁରୁଂ ଲଗ୍କୁନୁଂ ଆତୁନ୍ ପବିତ୍ର ମୁର୍ତି ନେଇ' ଏପିସିୟ ଉଂଗମ୍ବକ୍ ଡୁକୁନୁଂ ରେମଲେ ଜାଗ୍ଲ'ତୁନେଇ' ଡ'ସେକ୍ କେନ୍ ଦର୍ତନିନା ରେମଲେ ମାଗ' ଆଡୁତା ଇ? 36ଡୁ'ତୁନ୍ସା' କେନ୍ ତୁମ' ସତ୍ ଆରାକ୍ ଡ'ସେକ୍ ଜାଏସା ସୁଁସୁ ଆଗଂତାସା' ପେ ଜୁ' ଡେଂସେକ୍ ଡୁକୁଡୁତା । ମାରି ପେ ମାଏସା ଡିନ୍ଡେମ୍ ସିଁସେଇଁଉ ମାସା ମଏତ୍ବାର୍ ଆଡେମ' । 37ମାସା'ଡ'ନା ପେ ଆକେନ୍ ଇମ୍ବାୟ ରେମବକ୍ ଆକେ ୱାୟ' ରିଂଅଁ'ତୁପେ ମାତର୍ ମାଇପା ନେଇ'ନା ମନ୍ଦିର୍କୁରୁଂ ଆଡୁଂଗାତ ମାରି ନେଇ'ନା ମାପ୍ରୁବୁଇ'ନା ବାଗ୍ବକ୍ ଅଲିରାକ୍ବାଇ' ତୁମ' ମାସା ସୁନ' ଆଡୁତା । 38ଜୁ, ମାଇପାନ୍ ବାଗ୍ବକ୍ ଦିମିତ୍ରିୟନା କି ମାଇନା କାମ୍ରେମେନାସା ମାମା ସୁଁସୁ ଡୁତା ଡ'ନା ବିସାର୍ନା ଡିନ୍ଡେମ୍ନା ଜାଗା ଡୁତା ମାରି ବିସାର୍ନା ଡିନ୍ଡେମ୍ରେମ୍ସା ଡୁତା; ସା' ଗୁତୁନ୍ବକ୍ ଉଇସେକ୍ ଜାନ୍ ବାଗ୍ବକ୍ସା ମାମା ଅ'ସୁନୁ ଗଂତା । 39ମାତର୍ ପେନା ମାମା ପାଲ୍ ବିସୟ ସୁଁସୁ ଡୁତା ଡ'ନା ଗୁତୁନ୍ ନିୟମ୍ ଅନୁସାରେ ବିସାର୍ନା ଡିନ୍ଡେମ୍ପୁଲେଇ ଡୁକୁନୁଂବକ୍ ଉଇସେକ୍ କେନ୍ ବିସୟ ଅଂଅଁ'ସେକ୍ ବଲ୍ ଡେମ'ବେ' ଡ'ସେକ୍ ସୁଁସୁ ଡୁତା । 40ମାସା'ଡ'ନା ଆ'ନା ଡୁ'ତୁନ୍ଉ କିରକ୍ମରକ୍ସେକ୍ ଇନ୍ଡ୍ରିମ୍ସୁଗ ଡେଂକୁସା' ଆନେଇ' ରମିୟ ସର୍କାର୍ ସୁସପ୍ସୁଗ ଲାଗ୍ଗୁତା । ମାସା'ଡ'ନା ଡି'କେନା ମାସା' ଡେଂଗା' ଡ'ସେକ୍ ମା'ଏ ଅ'ଗଁସ୍ଲା'ଗା' ଡ'ନା ନେଇ' ମାସା ବଲ୍ ସୁଁସୁ ଆଗଂତୁନେଇ' ” ଡ'ସେକ୍ ସୁନ', 41ମାଇ ଡି'କେନ୍ ଗୁଲାଇ ସୁଁସୁ ଅ'ଡମ'ସେକ୍ ଆଗୁଲାଇର ନିଜର୍ନା ଡିଂଅଁ'ବକ୍ ଉଇପୁଲେଇ ସୁନ' ।
CC BY-NC-ND 4.0