ପେରିତ 18
18
କରିନ୍ତିୟ ଉଂଗମ୍ବକ୍ ପାଉଲଲା ଡେମ'କୁନୁଂ କାମ୍
1ଗୁତୁନ୍ ତିର୍ଗି' ପାଉଲଲା ଆତିନି ମୁନା'ଉଂଗମ୍ ଅନ୍ତୁର'ସେକ୍ କରିନ୍ତିୟ ମୁନା'ଉଂଗମ୍ବକ୍ ଉଇଗା'। 2ସା' ମାଇ ଆତା ପନ୍ତ ଡ'ସେକ୍ ମୁଇ ଦେସ୍ନା ଆକିଲା ଡ'ସେକ୍ ଇମିକୁନୁଂ ଆମୁଇନ୍ଡା ଜିଉଦିରେମ ସୁସପ୍ବାଂଗା' । ମାଇ ମାଇନା କୁନୁଇ' ପ୍ରିସ୍କିଲାଲାବୁରଂ ଇତାଲିଆକୁରୁଂ ଆତା ସାକ୍ସେକ୍ ଅବୁଦି ଦିନ୍ ଡେଂଆଡୁତା । ମାସା'ଡ'ନା କ୍ଲାଉଦିଅ ଡ'ସେକ୍ ଇମିକୁନୁଂ ରମିୟନା ରାଜା ଆଗୁଲାଇ ଜିଉଦିରେମଲେ ରମିୟ ଦେସ୍କୁରୁଂ ତୁର୍ସେକ୍ ଡୁଂଡୁଂପୁଲେଇ ସୁନ'କୁ । ସା' ଆମାଇପା ଜୁଜୁପୁଲେଇ ପାଉଲଲା ଉଇଗା' । 3ମାଇପା ଇମ୍ବାୟ କୁନୁଇ'ଡାମ୍ ବାଲ୍ସା ଅ'ରଇଁନା କାମ୍ ଡେମ'ସେକ୍ ଡୁକୁ, ପାଉଲଲାସା ଗୁତୁନ୍ ସମାନ୍ କାମ୍ ଡେମ'କୁ, ସା' ମାଇ ମାଇପାବୁରଂ ଡୁକୁକ୍ସେକ୍ ମା'ଏ ଗୁଲାଇର ମିସ୍ସେକ୍ କାମ୍ ଡେମ' । 4ମାରି ପାଉଲଲା ଇସାଉ ବିସ୍ରାମ୍ଦିନ୍ବକ୍ ଜିଉଦିରେମଲେନ୍ ପାର୍ତନା ଡିଂଅଁବକ୍ ଉଇସେକ୍ ଜିଉଦିରେମଲେବୁରଂ ମାରି ଗିରିକ୍ ରେମଲେବୁରଂ ଜିସୁନା ବିସୟ ଅବୁଦି ଅଇଁୟ'ସେକ୍ ଆମା'ଏ ଜିସୁଲାଉ କିରିସ୍ଟଲା ଡ'ସେକ୍ ବିସ୍ବାସ୍ ଅ'ଡେମ୍ପୁଲେଇ ମାଇ ଅବୁଦି ସେସ୍ଟା ଡେମ' ।
5ଉନ୍ତା ସିଲାଲା ମାରି ତିମତିଲା ମାକିଦନିଆ ଦେସ୍କୁରୁଂ କରିନ୍ତିୟ ମୁନା'ଉଂଗମ୍ବକ୍ ସା'ଗା'ସା' ପାଉଲଲା ଇସାଉ ଆଜିଉଦିରେମଲେ ଜିସୁନା ବାନିକବର୍ ସୁଁସୁପୁଲେଇଉ ଡୁକୁଗା' । ଜିସୁଲାଉ କିରିସ୍ଟଲା ଡ'ସେକ୍ ମାଇ ଆଗୁଲାଇ ଜିଉଦିରେମଲେ ସାକି ସୁନ'ସେକ୍ ଡୁକୁ । 6ମାତର୍ ମା'ଏ ଆପାଉଲଲା ପିଟାୟ'ସେକ୍ ଅଲିରାକ୍ବାଇ' ତୁମ' ସୁନ'ସା', ପେ ଡି'କେନ୍ ଡେମ'କୁନୁଂ ଜୁଲ'ନା ମାପ୍ରୁ ସାର୍ଦା ଆଡେନ୍ତା ଡ'ସେକ୍ ଆମା'ଏ ଅସୁଇ'ପୁଲେଇ ପାଉଲଲା ନିଜର୍ନା ସକା ଜୁର୍ସିଡ'ସେକ୍ ସୁନ' “ମାପ୍ରୁ ଆପେ ଡନ୍ଡ୍କସ୍ଟ ବେଡ'ନା ଗୁତୁନ୍ ପେନାଉ ଦସ୍, ନିଂନା ଦସ୍ ଆରାକ୍! ଜୁ, ନିଂ ଆ'ନାବାଂସା' ଜାଜା ଜିଉଦି ଆରାକ୍ ଡୁ'ତୁନ୍ବାଇ' ରେମଲେନ୍ବକ୍ ଉଇତିଂ” ଡ'ସେକ୍ ସୁନ' ।
7ତିର୍ଗି' ପାଉଲଲା ପାର୍ତନା ଡିଂଅଁକୁରୁଂ ତୁର୍ସେକ୍ ଗୁତୁନ୍ ପାର୍ତନା ଡିଂଅଁ ଉନ୍ତୁ' ଡୁକୁନୁଂ ତିତସ୍ ଜୁସ୍ତ ଡ'ସେକ୍ ଇମିକୁନୁଂ ମୁଇନ୍ଡାନା ଡିଂଅଁବକ୍ ଉଇଗା' । ମାଇ ଆମାପ୍ରୁ ଇସାଉ ସୁନ୍ଡ୍ରକ୍ସେକ୍ ଡୁକୁ । 8ପାର୍ତନା ଡିଂଅଁନା ମୁନା'ରେମ୍ କିରିସ୍ପ ଡ'ସେକ୍ ଇମିକୁନୁଂ ମୁଇନ୍ଡା ମାରି ମାଇନା ଡିଂଅଁନ୍ରେମ୍ ଗୁଲାଇର ଆପ୍ରବୁଲା ବିସ୍ବାସ୍ ଡେମ' । ମାରି କରିନ୍ତିୟ ମୁନା' ଉଂଗମ୍ନା ରେମଲେ ଅବୁଦିର ପାଉଲଲା ଅମାଗ'କୁନୁଂ ଅଂଅଁ'ସେକ୍ ବିସ୍ବାସ୍ ଡେମ' ମାରି ମା'ଏ ବାପ୍ତିସ୍ମା ରିଂଗା' ।
9ମୁସିଂ ତୁମୁଂଗ ପ୍ରବୁଲା ଆପାଉଲଲା ମୁସୁକ୍ଡିମ୍ସୁଗ ଅସୁୟ'ସେକ୍ ସୁନ', “ନ ଆବୁତୁଂଗା', ନିଂନା ବଲ୍କବର୍ ଆରେମଲେ ସୁନ'ସେ'ଗାଉ ଡୁକୁଲା, ନ ଜୁ' ଡେଂସେକ୍ ଆଡୁକୁଗା'; 10ମାସା'ଡ'ନା ନବୁରଂ ନିଂ ଡୁତିଂ । ଜାଏସା ଆନ କସ୍ଟ ବିବେ'ପୁଲେଇ ମାସା ଡିନ୍ଡେମ୍ ଆଗଂତା । ମାସା'ଡ'ନା କେନ୍ ମୁନା'ଉଂଗମ୍ବକ୍ ନିଂନା ରେମଲେ ଅବୁଦିର ଡୁତା” ଡ'ସେକ୍ ସୁନ' । 11ସା' ପାଉଲଲା ଆତା କରିନ୍ତିୟ ଉଂଗମ୍ବକ୍ ମାପ୍ରୁନା ତୁମ' ଅମାଗ'ସେକ୍ ବର୍ସେକ୍ ଅଦା ଡୁକୁ ।
12ଗାଲିୟନ୍ ଡ'ସେକ୍ ମୁଇନ୍ଡା ଆକାୟା ଦେସ୍ବକ୍ ରମିୟ ସର୍କାର୍ନା ମୁନା'ରେମ୍ ଏଗ୍ସେକ୍ ଡୁକୁନୁଂବେଲା କରିନ୍ତିୟ ମୁନା'ଉଂଗମ୍ନା ଜିଉଦିରେମଲେ ଆ'ଇରସୁଗ ମିସ୍ସେ'ଗା ଆପାଉଲଲା ସବ'ସେକ୍ ଆମାଇ ବିସାର୍ନା ଡିନ୍ଡେମ୍ପୁଲେଇ ଗାଲିୟନ୍ବକ୍ ରିଂଅଁ' ସା'ଗା' । 13ରିଂଅଁ' ସାକ୍ସେକ୍ ସୁନ', “କେନ୍ ରେମ ନେଇନା ନିୟମ୍ବକ୍ ଲେକ୍ଲ'କୁନୁଂସୁଗ ଆରାକ୍ ପାଲ୍ ତୁମ' ଆରେମଲେ ଅମାଗ'ସେକ୍ ଡୁ'ତୁନ୍ସୁଗ ଆମାପ୍ରୁ ସୁନ୍ଡ୍ରଲା ଡ'ସେକ୍ ରାଜି ଅ'ଡେମ'ତା” ଡ'ସେକ୍ ସୁନ' ।
14ପାଉଲଲା ଗୁତୁନ୍ ଅଂଅଁ'ସେକ୍ ସୁନ୍ତିଂ ଡ'ସେକ୍ ମୁଲାଇବାର୍ବେଲା, ଗାଲିୟନ୍ଲା ଆଜିଉଦିରେମଲେ ସୁନ', “ଅ ଜିଉଦିରେମଲେ ପେ ଅଂ! କେନ୍ ରେମ ମାମା ଅଲିରାକ୍ବାଇ' ଡେମ'ତା ଡ'ନା ଆରା'ଗେ ରମିୟ ରେମଲେନା ନିୟମ୍ ମମାନ୍ବାର୍ ଡୁତା ଡ'ନାଏ ନିଂ ପେ ସୁନ'କୁନୁଂ ତୁମ' ବଲ୍ ଅଂନିଂ । 15ମାତର୍ କେନା ଗୁଲାଇ ତୁମ'ନା ବାଗ୍ବକ୍, ଇମିନା ବାଗ୍ବକ୍ ମାରି ପେ ଜିଉଦିରେମଲେନା ନିୟମ୍ ବାଗ୍ବକ୍ ଡି'କେନା ଅଇଁୟ'ତୁପେ ଡ'ନା ଗୁତୁନା ପେ ନିଜେ ବିସାର୍ନା ଡିନ୍ଡେମ୍ ଡୁତା । କେନା ନିଂ ବିସାର୍ନା ଡିନ୍ଡେମ୍ପୁଲେଇ ମୁନ୍ ଡେଂ ଆଡୁତିଂ” ଡ'ସେକ୍ ସୁନ' । 16ମାଇ ଡି'କେନା ସୁନ'ସେକ୍ ଆମା'ଏ ବିସାର୍ନା ଡିଂଅଁକୁରୁଂ ଅ'ତୁର'ବେଡ' । 17ଗୁତୁନ୍ ରେମଲେ ପାର୍ତନା ଡିଂଅଁନା ମୁନା' ରେମ ଆସସ୍ତନାଲା ସବ'ସେକ୍ ବିସାର୍ନା ଡିନ୍ଡେମ୍ନା ଡିଂଅଁନା ଡାନ୍ଡର୍ କନ୍ଡେକ୍ଉ ବୁଗ' । ମାତର୍ ଗୁତୁନ୍ ଗାଲିୟନ୍ଲା ମାସା ଆସୁନ୍ତ ।
ପାଉଲଲା ଆନ୍ତିୟକିଆବକ୍ ଆନ୍ଡେଇଁଡେନ୍
18ପାଉଲଲା ଆତା କରିନ୍ତିୟ ଉଂଗମ୍ବକ୍ ମାରି ଅବୁଦି ଦିନ୍ ଡୁକୁଗା' । ତିର୍ଗି' ମାଇ ଆତା ଆଜିସୁ ବିସ୍ବାସ୍ ଡେମ'କୁନୁଂ ଆଗୁଲାଇର ନମସ୍କାର୍ ସୁନ'ସେକ୍ ପ୍ରିସ୍କିଲାଲା ମାରି ଆକିଲାଲାବୁରଂ କେଂକ୍ରେୟା ମୁନା'ଉଂଗମ୍ବକ୍ ସା'ଗା'। ସା' ମାପ୍ରୁନ୍ବକ୍ ପାଉଲଲା ମୁଇ ପର୍ମାନ୍ ସବ'ବୁଂଅଁ'କୁସା' କେଂକ୍ରେୟା ଉଂଗମ୍ବକ୍ ମାଇ ନିଜର୍ନା ବ'ବ୍ ଅ'ଆର୍ସୁଂଅଁ' ମାରି ଆତାକୁରୁଂ ମୁଇ ମୁନା' ଡଂଗାବକ୍ ଲେଇ'ସେକ୍ ସୁରିଆ ଦେସ୍ବକ୍ ଉଇଗା' । 19ତିର୍ଗି' ମା'ଏ ଏପିସିୟ ମୁନା'ଉଂଗମ୍ବକ୍ ଡେଲ' । ଡେଲ'ସେକ୍ ଆପ୍ରିସ୍କିଲାଲା ମାରି ଆଆକିଲାଲା ଆତା ମାଇ ଅନ୍ତୁର'ସେକ୍ ଉଇଗା' । ମାତର୍ ମାଇ ଏପିସିୟବକ୍ ଡୁକୁନୁଂବେଲା ନିଜେ ଜିଉଦିରେମଲେନା ପାର୍ତନା ଡିଂଅଁବକ୍ ଉଇସେକ୍ ଜିଉଦିରେମଲେବୁରଂ ଅଇଁୟ'କୁ । 20ମା'ଏ ଆମାଇ ମାରି ଆ'ଇଦିନ୍ସୁଗ ଆତା ଡୁକୁପୁଲେଇ ସୁନ', ମାତର୍ ମାଇ ମୁନ୍ ଆଡେନ୍ତା । 21ମାଇ ଉଇବେଲା ସୁନ', “ମାପ୍ରୁନା ମୁନ୍ ଡୁତା ଡ'ନା ପେନ୍ବକ୍ ନିଂ ମାରି ଆନ୍ଡେଇଁ ସା'ପ୍ତିଂ” ଡ' ସୁନ' । ମାରି ମାଇ ଏପିସିୟ ଉଂଗମ୍କୁରୁଂ ତୁର୍ସେକ୍ ମୁଇ ମୁନା' ଡଂଗାବକ୍ ଲେଇ'ସେକ୍ ଉଇଗା' । 22ସା' ମାଇ କାଇସରିଆ ଉଂଗମ୍ବକ୍ ଡେଲ' । ସା' ମାଇ ଆତା ଜର୍ସେକ୍ ଜିରୁସାଲମ୍ ମୁନା'ଉଂଗମ୍ବକ୍ ଆଜିସୁ ବିସ୍ବାସ୍ ଡେମ'କୁନୁଂ ଗୁଲାଇ ରେମଲେବୁରଂ ଅ'ଜୁନୁକ୍ସେକ୍ ଆନ୍ତିୟକିଆ ମୁନା'ଉଂଗମ୍ବକ୍ ଉଇଗା' ।
23ଆତା ମାଇ ଆ'ଇମାସ୍ସୁଗ ଡୁକୁକ୍ସେକ୍ ତିର୍ଗି' ଗାଲାତିୟ ମାରି ପୁର୍ଗିଆ ଡ'କୁନୁଂ ଇମ୍ବାରୁ ଦେସ୍ବକ୍ ଉଇଗା' । ଆତା ମାଇ ଗୁଲାଇ କୁନ୍ଡା ବୁଲ୍ଲ'ବୁଲ୍ଲ'ସେକ୍ ଆଜିସୁ ବିସ୍ବାସ୍ ଡେମ'କୁନୁଂ ରେମଲେବକ୍ ଆଗୁଲାଇର ଅ'ବପୁଲ' ।
ଏପିସିୟ ମାରି କରିନ୍ତିୟ ଉଂଗମ୍ବକ୍ ଆପଲ୍ଲା ଡେମ'କୁନୁଂ କାମ୍
24ଆଇ'ତୁନ୍ବେଲା ଆଲେକ୍ଜାନ୍ଡ୍ରିଆ ଉଂଗମ୍ବକ୍ ଜନମ୍ ଡେଂକୁନୁଂ ଆପଲ୍ ଡ'ସେକ୍ ଇମିକୁନୁଂ ମୁଇନ୍ଡା ଜିଉଦିରେମ ଏପିସିୟ ଉଂଗମ୍ବକ୍ ସା'ଗା' । ମାଇ ଆରେମଲେ ଅବୁଦି ବଲ୍ ସୁଁସୁ ଗଂକୁନୁଂ ରେମ ଡୁକୁ, ମାରି ମାପ୍ରୁନା ଉଲାକ୍ବକ୍ ଡୁକୁନୁଂ ଗୁଲାଇ ମାଇ ଅବୁଦି ବଲ୍ ମାଗ'କୁନୁଂ ରେମ । 25ପ୍ରବୁନା କୁରୁଂବକ୍ ଉଇନା ବିସୟରେ ପାଲ୍ ରେମଲେ ଆମାଇ ଅମାଗ'କୁ । ମାତର୍ ଜଅନ୍ଲା ଆରେମଲେ ବାପ୍ତିସ୍ମା ବେଡ'କୁନୁଂ ବିସୟରେଉ ମାଇ ମାଗ'କୁ ଡ'ନାସା ଜିସୁନା ବିସୟରେ ମାଇ ମାମା ମାଗ'କୁ ଗୁତୁନ୍ ଗୁଲାଇ ମାଇନା ଜିବନ୍ବକ୍ ଅବୁଦି ସାର୍ଦା ଡେଂସେକ୍ ଆରେମଲେ ସୁନ'କୁ ମାରି ସତ୍ବାବରେ ଅମାଗ'କୁ । 26ମାଇ ମବୁତୁଂ ମାପ୍ରୁନା ତୁମ' ଜିଉଦିରେମଲେନା ପାର୍ତନା ଡିଂଅଁବକ୍ ସୁଁସୁ ମୁଲାୟ' । ପ୍ରିସ୍କିଲାଲା ମାରି ଆକିଲାଲା ମାଇନା ତୁମ' ଅଂଅଁ'ସେକ୍ ଆମାଇ ମାଇପାନା ଡିଂଅଁବକ୍ ୱାୟ'ସେକ୍ ମାପ୍ରୁନା କୁରୁଂବକ୍ ଉଇନା ବିସୟରେ ଆମାଇ ଅଦିକ୍ ବଲ୍ବାବରେ ଅମାଗ'ବେଡ' ।
27ଆପଲଲା ଆକାୟା ଦେସ୍ବକ୍ ଉଇତିଂ ଡ'ସେକ୍ ମୁନ୍ଡେଂକୁନୁଂ ଅଂଅଁ'ସେକ୍ ଏପିସିୟ ଉଂଗମ୍ବକ୍ ଆଜିସୁ ବିସ୍ବାସ୍ ଡେମ'କୁନୁଂ ରେମଲେ ଅବୁଦି ସାର୍ଦାକ୍ସେକ୍ ଆମାଇ ଅ'ବପୁଲ' ମାରି ଆତା ଆକାୟା ଉଂଗମ୍ବକ୍ ଆଜିସୁ ବିସ୍ବାସ୍ ଡେମ'କୁନୁଂ ରେମଲେ ସାର୍ଦାକ୍ସେକ୍ ଆମାଇ ମା'ଏନ୍ବକ୍ ୱାଇ ଡ'ସେକ୍ ଲେକ୍ଲ' ବେଡ' । ମାଇ ଆତା ଡେଲ'ସେକ୍ ମାପ୍ରୁ ଦୟା ଡେମ'ସା' ଆଜିସୁ ବିସ୍ବାସ୍ ଡେମ'କୁନୁଂ ରେମଲେବକ୍ ଅବୁଦି ସାନ୍ଡୁଂଅଁ' । 28ମାସା'ଡ'ନା ମାଇ ଗୁଲାଇ ଜିଉଦିରେମଲେ ଡୁକୁନୁଂବକ୍ ମବୁତୁଂ ମାପ୍ରୁନା ଉଲାକ୍ବକ୍ ଲେକ୍ଲ'କୁନୁଂସୁଗ ଜିସୁଲାଉ କିରିସ୍ଟ ଡ' ଜିଉଦିରେମଲେନା ମୁନା'ରେମଲେବୁରଂ ଅଇଁୟ'ସେକ୍ ଆମା'ଏ ଜୁ' ଅ'ଡେମ' ।
CC BY-NC-ND 4.0