Varoma 6
6
Kufa kombinga zononzo, tu kare nomwenyo
1Omu natu tanta ngapi? Atu zone nye ngorooro, asi nkenda zaKarunga ntani zi vhuka ndi? 2Nampili kuna manga! Ose no asi twa fa kombinga zononzo, omu natu kara‐kara mo hena? 3Ndi kapi mwa yi diva asi, natuvenye ava va kuhwira mwaJesus Kristusa, kwa tu kuhwira monomfa dendi? 4Ose kwa tu vhumbika nendi mekuho monomfa, asi moomu va pindwisisa Kristusa kononkondo douyerere waGuhwe, nose atu kareni moukaro woupe womwenyo.
5Ose nsene twa kere gumwe tupu nendi monomfa ngwendi dendi, yimo ngatu kara ngorooro gumwe tupu nendi pevhumbuko, moomu ga vhumbuka age a kare nomwenyo. 6Twa diva eyi asi, muntu gwetu gomukuru‐kuru kwa mu pampara kumwe naKristusa kosilivindakano, asi nonkondo dorutu rononzo di hanauke po, tu dire hena kukara vapika wononzo. 7Yeeyi muntu nsene asi ana fu, makura ana manguruka mo nye mononkondo dononzo. 8Nsene asi twa fa kumwe naKristusa, tuna yi huguvara asi ngatu ka kara hena nomwenyo kumwe nendi. 9Yeeyi twa diva asi, Kristusa moomu va mu pindura koufe, kapi nga fa hena, nomfa kutupu hena nonkondo dokumupangera. 10Nomfa edi ga fa Kristusa kwa fira nonzo rumwe tupu makura. Nye mwenyo ogu ana kara nago pwantaantani, kuna kerere nago kwaKarunga. 11None ligazareni nyamweni asi mwa fa kombinga zononzo, yiyo muna kerere nomwenyo Karunga mwaJesus Kristusa.
12Nomfa walye hena adi pangere marutu geni gokufa, di mu ninke mu limburukwe komadowo geni gopantu. 13Maruha gomarutu geni walye omu ga gava kononzo, ga kare yiruganeseso youdona. Nye omu ligave nyonevene kwaKarunga, moomu va fira vantu ava va vhumbuka koufe va kare komwenyo. Maruha geni nagenye omu ga pe Karunga, ga kare yiruganeseso youhungami. 14Yeeyi nonzo nokumupangera si hena, yeeyi one kapisi womoVeta, one womonkenda zaKarunga.
Vapika wouhungami
15Atu zone sa tupu nye, morwa asi kapi twa kara konhi zoVeta, ose kwa kara konhi zonkenda. Nampili kuna tu manga! 16Yeeyi mwa diva nawa‐nawa asi ogu nomu ligava mu mu kerere oku tomu mu limburukwa, vapika vendi nomu kara. Eyi kutanta asi, mu vapika wononzo edi adi twara konomfa, ndi velimburuko eli ali twara kouhungami. 17Pandureni Karunga! Yeeyi nare vapika wononzo mwa kere, nye ntaantani tomu limburukwa nonomutjima nadinye kousili ou mwa gwana merongo eli mwa tambura. 18One hena kwa mu zowora mo mononzo, makura yiyo nye muna kara vapika wouhungami. 19Tani uyunga pasintu, morwa na diva upirankondo weni wopantu. Nare one kwa ligavere nyamweni moupika wonyata nouhezuvhu, mu kure mouhezuvhu. Nye ntaantani ligaveni nawa‐nawa mu kare vapika wouhungami, mu kure moupongoki.
20Yeeyi apa mwa kere vapika wononzo, uhungami nombili ko si zawo. 21Uwa musinke nye ngomu gwana mo moyininke eyi ngomu rugana, eyi muna kufa ntaantani nomuga? Ayo uhura wayo nomfa. 22Moomu nye va mu zowora mo mononzo, muna kara nye vapika vaKarunga, yiyimwa youkaro weni kutwara moupongoki, ano uhura weni mwenyo gwanarunye. 23Yeeyi mfeto zononzo nomfa, nye uhwi wonkenda waKarunga yiwo mwenyo gwanarunye mwaJesus Kristusa, Hompa gwetu.
© Egwanekerobibeli Lyanamibia 1987, 2003
© Bible Society of Namibia 1987, 2003