Varoma 7
7
Sihonena somononkwara
1Vakwetu, mwa yi diva nawa‐nawa, yeeyi ame kuna kutantera ava va diva Veta, asi Veta kupangera muntu paapa ana kuhesera. 2Amesi mukadikwara kumumanga Veta nayendi, paapa a kara yendi age simpe muzuni. Nsene ana fu mugara, makura mukadi ta manguruka mo moVeta zononkwara. 3Nsene a kara sinanga nomugara peke, nye age yendi simpe muzuni, tava mu tumbura asi ruho. Ano yendi nsene asi ana fu, makura mukadi ana manguruka mo nye moVeta, nokumutumbura si hena asi ruho, nsene a kwara nagepeke. 4None yimo nye vakwetu. One kuna kara maruha gorutu rwaKristusa. Kombinga zoVeta one kwa fa yiyo muna hamene kwaKristusa, ogu va pindura koufe, negano eli asi mu yime yiyimwa yoyirugana yokuliza nompango zaKarunga.
5Apa twa kere moukaro wetu wopantu, Veta ngazi pindura madowo gomadona gononzo, ga rugane momarutu getu. Yirugana yetu yiyo ngayi tu retere nomfa. 6Nye pwantaantani twa manguruka mo moVeta, yeeyi twa fa kombinga zeyi ya tu kwatererere moupika. Kapi tuna kuruganena hena Karunga monkareso zanare zoVeta zokutjanga, nye monkareso zompe zopaMpepo.
Veta nononzo
7Omu natu tanta ngapi? Tu ninke asi Veta yizo nzo ndi? Nampili kuna manga! Nye Veta yizo za divisa nge asi nzo yinke. Ngano kapi za tanta Veta asi, “Walye o dovauka,” ngano kapi na diva madowo asi yinke. 8Veta yizo azi gava evega kononzo, di pindure mwange madowo peke‐peke. Ngano asi kapi pa kere Veta, nonzo ngano da fa mo. 9Nare ame kwa kere nomwenyo, nampili ngomu na likere ure noVeta. Ano apa nye na koneka yipango, nonzo nado yipo nye da horoka, 10ame yiyo na fa. Ano oso sipango oso, asi ngano yiso nasi pa nge mwenyo, nani nye nomfa sina kuretera nge. 11Yeeyi nzo yimo nye za gwanena evega mosipango, zi pukise nge, yiyo za dipagesa nge kosipango.
12Ano Veta zene‐zene kwa pongoka, sipango naso kwa pongoka, aso kwa hungama aso siwa. 13Nani eyi yoyiwa po yiyo nye ya retera nge nomfa ndi? Nampili kuna manga! Nzo yizo za yi rugana. Pokuruganesa yoyiwa yipo za retera nge nzo nomfa, ukaro wonzo u lihorore, sipango si zi horore asi nzo ndona unene‐nene.
Noveta mbali momuntu
14Twa diva asi Veta zopaMpepo, nye ame ni muntu tupu gokufa, kwa randesa nge ni kare mupika gononzo. 15Yeeyi ame kapi na divilisa eyi ani rugana. Morwa eyi na hara kurugana, kapi ani yi rugana, ano eyi na nyenga, yiyo ani rugana po. 16Ano pokurugana eyi na dira kuhara, yiyo na pulira asi nani Veta ngwa. 17Ntaantani kapisi nyame hena nina kuyirugana, deedi nonzo da kara mwange. 18Ame kwa diva asi mwange mutupu uwa, kuninka asi morutu rwange. Eharo lyokurugana uwa lyeli tupu, yi rugana ko nye, hawe mpaga. 19Kapi ani rugana uwa ou na hara asi ni u rugane. Ano udona ou na nyoka, yiwo ani rugana. 20Ano nsene ni rugana eyi na dira kuhara, kuninka asi nyame sa hena ani yi rugana, nonzo edi da kara mwange, yido adi yi rugana.
21Sosinene esi na gwana po sesi: Ame kwa hara kurugana uwa, nye udona nawo kapi hena wa pira po pwange. 22Komutjima gwange ame Veta zaKarunga kwa zi panda unene. 23Nye ame kumona hena veta zapeke ezi azi rugana morutu rwange. Veta ozo kurwisa Veta zomomutjima gwange. Azo yizo za tura nge moupika wononzo edi adi pangere morutu rwange. 24Oru ruhepo rwange ame muntu ame rureru oru! Yilye ogu nga yoworora nge mo morutu oru rokutwara nge konomfa? 25Ame tani pandwire Karunga mwaJesus Kristusa, Hompa gwetu.
Ano mwenyo gwange ko kwa harera nge ni sikise mo Veta zaKarunga, nye rutu ko kwa harera nge ni sikise mo veta zononzo.
© Egwanekerobibeli Lyanamibia 1987, 2003
© Bible Society of Namibia 1987, 2003