Varoma 2
2
Epanguro lyaKarunga kwa hungama
1Muntu ove ogu o pangura vakweni, kutupu yokulipoperesa. Moyo o pangura vakweni, nyamoge o lipangura, yeeyi asi nove kurugana nawa‐nawa yokuliza neyi yawo. 2Ose tuna diva asi, epanguro lyaKarunga lyouhunga kuvyukilira navenye ava ava rugana yangesi. 3Ove mukwetu ogu o pangura vakweni, nampili nyamoge nove yiyo o rugana, ove kugazara asi kuvhura kuhenduka epanguro lyaKarunga ndi? 4Ove kuna dini nye ufenkenda wounene waKarunga nedidimiko nezaverero lyendi? Kapi ono dimburura asi ufenkenda waKarunga kukutwara momalitezururo? 5Ove kwa kara nomutjima gomukukutu gokudira kulitezurura. Ano nyamoge ono kulivhukisira ehandu eli ngali ku gwana mezuva eli ngali horoka ehandu nepanguro lyaKarunga lyouhunga. 6Yeeyi Karunga nga tengwida kuwoko nkenye muntu neyi yokuliza noyirugana yendi. 7Ava ava rugana yoyiwa nomupampi, va papare eyererepeko nefumano neyi ayi dili kuhaga, Karunga nga ka va pa mwenyo gwanarunye. 8Nye ava ava papara yavene, va dire kulimburukwa kweyi yoyiwa, nye kulimburukwa tupu kweyi yoyidona, makura ehandu nepanguro lyaKarunga ngali va vyuka. 9Ngaku kara runyando nokukora kwankenye ogu a rugana udona, nye muhowo koVajuda, ntani kovapagani hena. 10Nye ogu a rugana yoyiwa, ngava mu pa uyerere nefumano nombili, muhowo koMujuda, ntani komupagani hena. 11Karunga kutengwida kuwoko navenye yokuhetakana.
12Ano navenye ava va zona va hana kudiva Veta, ngava zumbana va hana Veta. Nye ava ava zono, nye vana diva Veta, ngava va pangura paVeta. 13Vapurakeni tupu woVeta, kapisi yiwo ava hungama kosipara saKarunga, nye vaava ava sikisa mo Veta, yiwo nga hungameka Karunga. 14Ano vapagani ava va pira Veta, nsenesi va limburukwa paunsitwe eyi za hepa ko Veta, awo vene nye yiwo Veta, nampili kapi va kara noVeta ezi va tjanga. 15Ukaro wawo kuhorora asi, eyi za hepa ko Veta kwa yi tjanga monomutjima dawo. Ezwi lyomonomutjima dawo yilyo ali va gavere undipo weyi. Yeeyi magazaro gawo pamwe kuvapangera, pamwe kuvapopera. 16Ano mokuliza noMbudi zoNgwa ezi ani udisa, Karunga nga ka ninka Jesus Kristusa a pangure yihorekwa yomagazaro gomonomutjima dovantu mezuva lyoMpanguro.
Vajuda noVeta
17Ano one kulitumbura asi mu Vajuda, yiyo mwa zegamena nye koVeta oku tomu litangere mwaKarunga. 18One kwa diva eyi ga hara Karunga asi mu yi rugane, one hena kwa mu ronga kuhorowora moVeta yoyiwa po. 19One asi nyone nawa‐nawa vapitisili wovatwiku nouzera wava vana kara momundema. 20One asi mu vapukuruli wovagova novarongi wovanona. One kwa lipanda asi moVeta yimo mwa kara nediwo nalinye nousili naunye. 21Ngapi nye o rongo vantu, wa hana kulironga nyamoge? Ove kuudisira vantu asi, walye omu vaka, nye ove nyamoge kuvaka. 22Ove kusilika ruhonda, nye ove nyamoge kuhondera? Ove kwa nyenga vakarunga woyimpempa, nye ove nyamoge kuhakana yininke yomontembeli dawo. 23Ove kulitangera Veta zaKarunga, nye ove nyamoge kufisa Karunga nomuga mokutaguruka Veta zendi. 24Moomu gana kutanta matjangwa asi, “Mwarweni one Vajuda vana kuswawira edina lyaKarunga, kuna kuliswaura mokatji kovapagani.”
25Erugano lyoge lyovamba kwa kara nekwafo, nsenesi ove kusikisa mo Veta. Nye ntene o zi taguruka Veta, ove kwa fana nye ngwendi gogu va dira kurugana yovamba. 26Ano ogu va dira kurugana yovamba, nsenesi ta sikisa mo Veta, nani Karunga kapi a mu tara ngwendi gogu va rugana yovamba? 27Ogu va dira kurugana yovamba age yiyo a sikisa mo Veta nawa‐nawa, yige nga mu pangura one ava va rugana yovamba mwa kara noVeta va tjanga, nye zi sikiseni mo, nye mpaga! 28Yeeyi kapisi nompo dokontunda tupu adi ninki muntu a kare Mujuda mwene‐mwene. Ano kurugana yovamba kokontunda tupu kapisi erugano lyovamba lyene‐lyene. 29Nye Mujuda mwene‐mwene po googu ga kara noUjuda womonda. Ano erugano lyovamba lyene‐lyene, sininke somomutjima sopaMpepo, kapisi sopaVeta zokutjanga. Ehamberero lyomuntu gwangesi kapisi movantu ali tundu, mwaKarunga ali tundu.
Currently Selected:
Varoma 2: KWN
Highlight
Copy
Compare
Share
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003