Varoma 1
1
Ekundo
1Mbilive ezi kuna kutunda kwaPaurusa, mukereli gwaJesus Kristusa, ogu ga horowora Karunga a kare mupositoli. Age kwa mu horowora a udise Mbudi zoNgwa, kweni namuvenye one mwa kara moRoma ava ga hara Karunga, yiyo ga mu zigida mu kare vantu vendi. Karunga Guhyetu naHompa Jesus Kristusa va mu fire nkenda, awo va mu pe mbili. 2Pwanare‐nare Karunga kwa tumbwidisisa Mbudi ezi zoNgwa motuna tovaporofete momatjangwa gokupongoka. 3Mbudi ezi zoNgwa kwa hamena kwaMunwendi Jesus Kristusa, Hompa gwetu. Pasiuntu age kwa mu hampuruka mezimo lyaNdafita. 4Pokumuvhumbura koufe Mpepo zoKupongoka kwa mu horora nononkondo dononene asi age MunwaKarunga. 5Mwendi yimo ga fililira nge Karunga nkenda a ture nge moupositoli morwaKristusa, mokuninkira asi ni kune monomuhoko nadinye epuro lyokumupura nelimburuko lyokulimburukwa edina lyendi. 6-7None momuli mombunga zava va horowora mu hamene kwaJesus Kristusa.
Ekanderero lyompandu
8Muhowo tani pandwire Karunga gwange mwaJesus Kristusa mwarweni one namuvenye, yeeyi epuro lyeni kuna lihanene mwaza uzuni. 9Karunga ogu ani ruganene nomutjima nagunye mokuudisa Mbudi zoNgwa zaMunwendi, ga yi diva asi ame kumudiworoka nkenye apa momakanderero gange. 10Narunye ame kuhundira Karunga a pe nge meharo lyendi lyewa evega lyokuyamudingwira po. 11Yeeyi ame kuna mu diworoka unene, na hara kumumona, ngani ya mu pe ko uhwi umwe wopampepo, mu ya kore. 12Eyi na gazara po yeeyi asi, natuvenye ngatu ya gwanene simwe ekwafo: one li ya mu kwafe epuro lyange, ano ame name li ya kwafe nge lyeni.
13Vakwetu, ame kuna hara ni mu divise eyi asi: Runzi ani tumbura kweni, nye nkenye apa yuma ayi dumwisa nge. Ame kwa hara ni ya yimise mo yiyimwa mokatji keni namo, moomu na yi rugana movapagani vamwe.
14Ame kuna kara nosinka sakwanavenye, nokoVagereka noku kwava vapeke, nokovalirongi nava va dira kulironga. 15Eyi yiyo yina kutumangeda nge asi ni ya mu udisire Mbudi zoNgwa none ava mwa kara moRoma.
Nonkondo doMbudi zoNgwa
16Ame nokufasi nomuga koMbudi zoNgwa, yeeyi azo nonkondo daKarunga dokuparura nkenye ogu a zi pura, pomuhowo Mujuda, ntani Mugereka. 17Ya horoka moMbudi zoNgwa asi epuro yilyo etameko nouhura weyi a hungikisisa Karunga vantu. Moomu va tjanga asi: “Ogu ga hungameka Karunga, epuro yilyo ngali mu pa mwenyo.”
Unzoni womuntu
18Ehandu lyenene lyaKarunga ngali tunda keguru li gwane udinikarunga naunye noudona naunye wovantu ava ava foferesa usili koudona wawo. 19Nayinye eyi va hepa kudiva yokuhamena Karunga ya va zerera, yeeyi Karunga mwene ga yi va zeresera. 20Yeeyi nkareso zendi ezi azi dili kumoneka, nononkondo dendi danarunye noukarunga wendi, ha wa twa uzuni kuyimonena moyirugana yendi, ngayi va limbe kulipopera. 21Nampili ngomu va divire Karunga, nye kapi ngava mu fumadeke ndi asi va mu pandure moomu ga yi fira. Nye vana govapere momatedo gawo, ano monomutjima dawo mutupu nondunge, kwa di govakanesa. 22Mokulitumbura vene asi vanandunge, yimo va karera magova. 23Uyerere waKarunga gwanarunye kwa u pirura va u fanese nomuntu ogu a huru noyidira noyikorama neyi yokuwovana, va yi kerere.
24Karunga yiyo ga va sigilira momadowo gonomutjima dawo monyata, makura yiyo ava retere marutu gavene nomuga. 25Awo kwa pirura usili waKarunga u kare yimpempa, makura yiyo ava fumadeke oku tava kerere yisitwa, va pitakanese poMusiti ogu va fira kufumadeka narunye nanarunye. Amen.
26Makura Karunga yipo ga ninka a va sigilire momadowo gawo gomadona. Yeeyi vakadi vawo kwa pirura mukaro gopasintu gu kare gopasiukorama. 27Vagara nawo si va zumba mukaro gopansitwe gokugwanekera nomukadi, yiyo va hwamukira mokulihora vene navene. Vagara kulirugana vene navene yonomuga, makura yiyo va gwanena mo mfuto zawo moyirugana yawo yoyidona.
28Ano moomu va nyoka ngoso kudiva yokuhamena Karunga, naKarunga nage yipo ga va sigililira momagazaro gawo gomadona, va rugane eyi ya dira kuzira mo. 29Awo kwa zura umbudi nounye, ruhonda noudona noudumbe nezinzameho, nomfudu sa zomu nedipago nonomutangu noyimpempa nomaserauko. 30Awo woyimbokauka novarundili, wonyengo naKarunga novakorokotji novalinenepeki. Awo kulikanganga, awo vatoti veyi yoyidona, awo kwa dina vakurona vawo. 31Awo vahezuvhu wokudira kulimburukwa, kapi va paka eharo, kapi va paka nkenda. 32Vantu ava kwa diva nawa‐nawa asi Karunga kwa panga asi vantu ava ava rugana eyi, mfuto zawo nomfa. Nampili ngomu va yi diva, nye yiyo ava rugana, kapisi mwavene velike, nye awo hena kutwa ukarara ava ava yi rugana.
© Egwanekerobibeli Lyanamibia 1987, 2003
© Bible Society of Namibia 1987, 2003