MAPISAROME 148
148
Yisitwa nayinye yi hamberere Hompa
Hamberereni Hompa!
1Hamberereni Hompa kutunda gekuru
One ava mwa kara ure meguru!
2Mu hamberereni, vaengeli vendi navenye,
vakwayita vendi vemeguru navenye,
3yi mu hamberere ezuva nokwedi;
di mu hamberere nombungururu
nadinye dokutema!
4Eguru lyokoure li mu hamberere,
nomema aga ga kara keguru‐guru!
5Nayinye yi hamberere edina lyaHompa!
Kwa pangere, makura nayinye
tayi pu kusita;
6nompangera zendi ga pakesere po
nayinye yi kare narunye,
ano ayo kapi ya zi nyoka.
7Hamberereni Hompa kutunda pevhu
nomakasama gemefuta nomatondo gomema;
8nonombadi nakamanya
noyiterengenze nomaremo,
nekundungu eli ali sikisa mo
mpango zendi!
9Yi mu hamberere yindundu nonondundu,
noyitji yenyango nomawiza nagenye,
10noyikorama nayinye,
eyi ya deuka neyi ya dira kudeuka,
neyi yokuwovana noyidira!
11Mu hamberereni,
one ohompa nonomuhoko nadinye,
none ohompagona novapangeli navenye;
12vamati novakadona,
vakurona novanona veni!
13Navenye va hamberere
edina lyaHompa.
Edina lyendi enene lya pitakana nagenye;
efumano lyendi lya pitakana
evhu neguru!
14Age kukoreka muhoko gwendi,
asi vantu vendi navenye
va mu hamberere,
Vaisraeli ava ga tokomena!
Hamberereni Hompa!
Currently Selected:
MAPISAROME 148: KWN
Highlight
Share
Compare
Copy
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
