MAPISAROME 147
147
Ehamberero kwaKarunga Munankondo nadinye
1Hamberereni Hompa! Yiwa yokudimba
tu hamberere Karunga gwetu;
ya zira mo, ayo ya hungama yokumuhamberera.
2 Hompa nga tungurura Jerusarema;
nga tengwida Vaisraeli ava va lihana.
3Age kuverura ava
va gwa nomutjima,
ta dingi yironda yawo.
4Age yige ga panga
sivaro sonombungururu,
age kuditumbura nadinye madina gado.
5 Hompa gwetu munene
age Munankondo nadinye;
ediwo lyendi nokuvhura si kuliyereka.
6Age kuzerura valisupipiki,
ta nyikida vadinikarunga.
7Dimbireni Hompa nonsumo dehamberero;
sikireni Karunga gwetu siumba.
8Age yige a paka ko maremo keguru,
ta rokesere evhu mvhura,
ta menesa wayi konondundu.
9Age kupa yikorama nondya dayo,
10Age kapi ga hafera nonkondo dononkambe,
ndi asi a hafere vakwayita vendi wovaradi;
11nye age kwa hafera ava va mu tjira,
ava va huguvara eharo lyendi lyenene.
12Hamberera Hompa, Jerusarema!
Hamberera Karunga goge, Siyoni!
13Age kukoreka marungavero goge;
ta tungike vantu woge.
14Age kugava mpora konomururani doge,
ta ku kutike nonondya donontovara.
15Age kugava mpangera,
makura tazi genderere kuwiza pevhu.
16Age kutuma ndau,
tazi kara ngwendi enoto,
kumwaga eundu,
tali kara ngwendi mbundu.
17Age kutuma kamanya
ngwendi yingurumanya;
nagumwe si gokuvhura kuparuka
komufu ezi a tumu!
18Makura ntani na gava mpangera
a hemune yiterengenze,
ta tumu mpepo, mema ga pupe.
19Age kugava mbudi zendi kwaJakopo,
nonompangera nonoveta dendi kwaIsraeli.
20Eyi kapi ga yi rugana konomuhoko dapeke;
awo kapi va diva noveta dendi.
Hamberereni Hompa!
Currently Selected:
MAPISAROME 147: KWN
Highlight
Share
Compare
Copy
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
