YISEWE 10
10
Yisewe yaSaromo
1Yisewe yaSaromo yeyi: Mumati gounongo kutumbadekesa guhwe; ano gomugova kuretera zina eguwo.
2Emona lyokugwanena moudinikarunga neisi ali kwafa, nye uhungami kuparura monomfa.
3 Hompa kapi nga tarerera vantu wovawa va kare nonzara, nye vadinikarunga nga va tengeka eyi va hara.
4Kukara udwa kureta ruhepo, nye kurugana unene kureta ungawo.
5Mugara gonondunge kuzangura muzangu nsene guna siki mo; yokurara pokuteza‐teza oyo nomuga.
6Muntu gomuwa nga gwana matungiko. Nonkango domudinikarunga kuhoreka ukorokotji.
7Vantu wovawa ngava va diworoka ngetungiko, nye vadinikarunga ngava va divara usimbu.
8Vanandunge kutambura evyukiso lyewa. Vantu ava ava uyunga yimpempa ngava hanauka po.
9Vantu womousili kuyoworoka tava likangura, nye ava va hana usili ngava kara poruzera.
10Ogu a horeke usili kureta udigu, nye ogu a dukura kuruganena mpora.
11Nonkango domuntu gomuwa runone romwenyo, nye nonkango domudinikarunga kwa horeka ukorokotji.
12Nyengo kukatura udona, nye eharo kukudumika mazapuko.
13Vanandunge kuuyunga yomulyo, nye vagova va hepa kuvafutisa.
14Vanongo kugwana ediwo nalinye paapa va hulira, nye vagova nsene tava uyunga, udigu pepi.
15Emona kugamena ngawo; ruhepo kuhanagura muhepwe.
16Mfeto zokurugana uwa, mwenyo, nye nzo kutwaredesa tupu kononzo dononzi.
17Vantu ava ava purakene, nsene tava va pukurura ngava kara nomwenyo, nye ava ava nyoka kupura asi mepuko vana kara, mosimpagwa va kara.
18Muntu ogu a horeke nyengo zendi, munayimpempa. Nkenye ogu a hanesa eswau, mugova.
19Mokuuyunga koge kokunzi yimo hena mokuzona koge. Nsene asi o munandunge, to mwena pore zoge.
20Nonkango domuntu gomuwa ngwendi sisiliveli sene‐sene; yigazo yomudinikarunga kutupu mutompo.
21Nonkango domuntu gomuwa kukwafa vantu wovanzi, nye ugova kuvhura u ku dipagese nyamoge.
22Etungiko lyaHompa yilyo ali ku ngawopeke. Kurugana unene taku ku ngawopeke unene.
23Kuhafera unzoni ugova. Vanandunge kwa hafera unongo.
24Vahungami kugwana eyi va hara, nye vadinikarunga kugwana eyi va tjira unene.
25Makundungu taga wiza, makura vadinikarunga taga va rerura po, nye vanausili kwa likangura awo nkenye apa.
26Nokanunu si o papare goudwa asi a ku ruganene yuma; age nga kara ngwendi moomu azi kara vhinyu zoururu uhe komazego goge ndi musi momeho goge.
27O limburukwe kwaHompa, makura ngo kare nomwenyo gomure. Vadinikarunga kufa awo va hana kusika mo.
28Ehuguvaro lyovantu wovawa kutwara mehafo, nye vadinikarunga kutupu yawo yokomeho.
29 Hompa kugamena vantu wousili, nye age kuhanagura ava ava rugana udona.
30Vahungami ngava likangura nkenye apa, nye vadinikarunga kapi ngava hupa mo mosirongo.
31Vahungami kuuyunga unongo, nye eraka eli ali uyunga udona ngali haga po.
32Vahungami va diva yininke yoyiwa yokuuyunga, nye vadinikarunga awo kuuyunga nkenye apa yokukoresa komutjima.
Currently Selected:
YISEWE 10: KWN
Highlight
Share
Compare
Copy
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
