Marukusa 3

Mugara gokuwoko kokufa

1Jesus kwa zire hena mosinagoge, omu mwa kere mugara gokuwoko kokufa. 2Pwa kere vantu vamwe, ava va nomenene Jesus asi mpamwe na verura muntu ogo mEsabata, va vhure kumupera po usima. 3Makura age ta tantere muntu ogu ga fa kuwoko asi: “Katuka o wize pokatji kovantu.” 4Jesus ta va pura asi: “Eyi va gava po yokurugana mEsabata, yoyiwa ndi yoyidona, yokupopera muntu ndi yokusiga a lifire?” Nye vena va teete. 5Ta va tarurura nehandu oku ana guwu pokumona ukukutu wonomutjima dawo, ta tantere mugara asi: “Gonyonona kuwoko koge.” Gwina ta ku gonyonona, kuwoko kwandjewa?-?ndjewa. 6Naruvali si Vafalisayi tava pwaga mo mosinagoge, va ka liyonge nava onkwaHerodesa, va ka ture po mayere gokudipaga Jesus.

Epongera lyovantu pekurudiva

7Kutunda opo Jesus novarongwa vendi kwa zire kekurudiva lyaGalireya. Nye mbunga zonene za mu kweme, zi tunde moGalireya nomoJudeya, 8nomoJerusarema nomonomukunda daIdumeya nedi demesinya mwina lyaJorodana, nava va likundamene noyirongo yaTirusi naSidoni. Mbunga zonene za wizire kwendi, yeeyi va zuvhire nayinye eyi ga rugene. 9Makura Jesus ta tantere varongwa vendi va mu wapaikire wato morwambunga, a tunde mompatakani zovantu. 10Yeeyi age vanzi ga verwire, makura navenye ava va verere, tava mu lirombere asi va mu gume. 11Ano vantu ava va kere nonompepo donondona apa ngava mu mono, ngava mu ligandere oku tava bandama asi: “Ove o MunwaKarunga!” 12Age ta di nyokere asi walye ava mu horora.

Ehoroworo lyovapostoli murongo?-?navavali

13Kutunda opo Jesus ta rondo kondundu, ta zigida ava ga here mo, makura awo tava zi kwendi. 14Age ta horowora murongo navavali, ava ga rukire vapostoli, va vhure kukara kumwe nendi oku ta va tumu va ka udise. 15Age ta va pe hena nononkondo dokutjida mo nompepo donondona. 16Ta horowora murongo navavali, yiwo nye ava: Simoni (ta mu rundumuna Peturusa), 17ntani Jakopo zaSebede naJohanesa, mumbyaJakopo, (awo ta va rundumuna ‘Bowaneregesi’, kuninka asi ‘Vana wosindundumo somvhura’), 18ntani Andiliyasa naFilipusa naBaratoromeusa naMateusa naTomasa naJakopo zaArufeusa naTadeusa naSimoni gomupampi, 19naJudasa Isikalyoto, ogu ga ya mu horwere.

Jesus naBelisebubu

20Makura Jesus ta zi kwawo. Ano hena mbunga zovantu tazi pongo, dogoro nonondya si kapi va vhulire kudilya. 21Apa va yi zuvhire vezimo lyendi, tava pwaga va ka mu kwate, yeeyi awo kwa tanta asi: “Ana piyagana.”

22Valirongi womatjangwa, ava va tundire koJerusarema, kwa tente asi: “Age Belisebubu ga mu kara,” hena asi: “Age kutjida mo nompepo donondona nononkondo domukurona gonompepo donondona.” 23Makura yipo ga va zigidire a va tantere moyifanekeso asi: “Satana omu a vhuru kutjida mo Satana mukwawo hena ngapi? 24Ano untungi nsene si u lilimba wene nawene, untungi wangoso nokukara po si. 25Li kare embo, nsene si li lilimba lyene nalyene, embo lyangoso nokukara po si. 26A kare Satana, nsene si a likatukire mwene a lilimbe, kapi a kare po, ta huru.

27“Nagumwe si ogu a hwilire monzugo zomunankondo a ka mu hokore yininke yendi, age ga hana tanko kupandeka munankondo ogo, ntani ngano a vhura kuhomona nzugo zendi.

28“Yosili tani mu tantere asi: Nayinye yovana wovantu kuyivagusira po, nonzo nomaswau mudima, aga ava swawisa Karunga. 29Nye ogu a swaura Mpepo zoKupongoka, kapi ngava mu gusira po dogoro narunye, age nga kara musima goMpanguro zanarunye.” 30(Morwa awo kwa uyungilire Jesus asi: “Age nompepo zondona ana kara.”)

WonkwaJesus

31Vamumbya vaJesus nozina kwa wizire, tava sikama ponze, tava mu tumine va ka mu zigide. 32Azo mbunga zina mu kundurukida uhingiro, makura tava mu tantere asi: “Onyoko novamumbya woge poveli ponze, nyove vana kupapara.” 33Makura age ta va limburura asi: “Wolye nani onane ndi vamumbya vange?” 34Makura ta tarurura ava va mu kundurukidire, ta tanta asi: “Onane novamumbya vange vava. 35Nkenye ogu a sikisa mo mpango zaKarunga, yige mumbyange, yige mpanzange, yige nane googo.”

Currently Selected:

Marukusa 3: KWN

Highlight

Compare

Copy