Marukusa 2

Everuro lyosirema

1Konyima zeyi kapi pwa pitire mazuva, Jesus ta tengwire koKaperenaumu, makura vantu tava mu zuvhu asi kweli kembo. 2Vantu wovanzi kwa ya pongere nousikameno si woowu nepevero si lyonzugo paapa. Jesus kwa va udisililire nonkango daKarunga. 3Makura vantu vamwe tava wiza, tava mu retere muntu gosirema, vane va mu simbire. 4Morwambunga kapi va vhulire kugwana mpito zokuheda kwaJesus, yipo nye va tomwenene mbando zonzugo poyiha apa ga kere Jesus. Eyi va mana kuzitomona, tava mu hegumuna muntu gosirema, age ana rara pouro. 5Apa ga mwene Jesus epuro lyawo, ta tantere muntu gosirema asi: “Munwange, nonzo doge vana di ku dongwenene po.”

6Pwa hingilire valirongi vamwe womatjangwa, ava va lipulire monomutjima dawo asi: 7“Eyi ana kuuyungira ngesi ogu mugara a swaure Karunga, hena yisinke? Nagumwe si a vhuru kudongonona po nonzo, ntudi Karunga googo!” 8Naruvali si Jesus nare ana siki po, ta va nongonona asi yisinke vana kulipura monomutjima dawo. Makura ta va pura asi: “Yisinke muna kugazarera yininke yangesi? 9Yoyireru po nani yisinke? Yokutantera ogu sirema asi, ‘Nonzo doge vana di ku dongwenenene po,’ ndi yokutanta asi, ‘Katuka, o damune uro woge, o gende’? 10One mu dive asi, nani Munwamuntu kwa kara nononkondo apa pevhu dokudongonona po nonzo.” Makura ta tantere sirema asi: 11“Tani ku tantere asi, katuka, o damune uro woge, o ze kembo!” 12Naruvali si nare ana katuka, ta damuna uro wendi, ta hakauka moyitarameho yanavenye. Navenye kwa tetukire unene, tava tanga Karunga, tava uyunga asi: “Ose ha twa kara kumona sininke sangesi.”

Jesus ta horowora Revhi

13Makura Jesus ta tengwire hena konontere dekurudiva lyaGalireya, nye mbunga mudima tazi wiza kwendi, ta ya zi rongo. 14Kutunda opo haga za mokugenda, ta mono mufutisi gomutero Revhi zaArufeusa, age ana hingire momberewa zendi. Makura Jesus ta mu tantere asi: “Kwama nge!” Revhi nare ana katuka, ta mu kwama.

15Konyima zeyi Jesus yipo ga zire, a ka lye membo lyaRevhi. Ano vafutisi womutero novananzo wovanzi va mu hamenene. Nye sinzi sawo nendi novarongwa vendi va lire. 16Apa va mu mwene Jesus valirongi womatjangwa wonkwaVafalisayi, age ta li novananzo novafutisi womutero, makura tava pura varongwa vendi asi: “Yisinke ana kulira kumwe novananzo novafutisi womutero?” 17Jesus apa ga yi zuvhire eyi, ta va tantere asi: “Vakanguki kapi va hepa muhakuli, vaveli velike va mu hepa. Ame kapi na wizira vahungami, vananzo na wizira.”

Yediliro

18Pwa kere ruveze, oru ngava dilire nondya varongwa vaJohanesa Mukuhwi noVafalisayi. Makura vantu tava wiza kwaJesus, tava mu pura asi: “Eyi ava dililire varongwa vaJohanesa Mukuhwi nava woVafalisayi nani yinke, nye woge va dire kudilira?” 19Jesus ta va pura asi: “Nani vagenda wosipito sononkwara kuvhura kudilira, age mukwali pweli? Amesi nokuwapa si. Siruwo esi vana kara nomukwali, nokuwapa si kudilira. 20Ngapa wiza siruwo sokuvagusa mukwali, ntani ngava dilira ezuva olyo.

21“Nagumwe si a vandekesa sikoverero sokukurupa kosivando sosipe. Nsene a yi rugana, tasi zomonona sikoverero sokukurupa, si kare nentomo lyenene. 22Hena, nagumwe si a dwire vhinyu zompe monompunda dokukurupa. Eyi nsene a yi rugana, vhinyu tazi taura nompunda, makura vhinyu nonompunda tayi zonauka. Ano vhinyu zompe kuzidwira monompunda donompe.”

YEsabata

23Ezuva limwe lyEsabata Jesus kwa gendere zomapya gorukokotwa. Varongwa vendi hava za mokugenda nendi, tava tezagura nomutwe dorukokotwa. 24Pokuyimona eyi Vafalisayi, tava tantere Jesus asi: “Ko tara si, eyi vana kurugana varongwa mEsabata, kuna kulilimba noVeta zetu.” 25Makura Jesus ta va limburura asi: “Nani kapi mwa resa eyi ga rugene Ndafita, apa za va kwete nzara novantu vendi, 26a hwilire monzugo zaKarunga, a lye mboroto zonzambo zaKarunga. Eyi kwa horokere mouzuni waAbiyatara, mupristeli gomunene. Ame asi mokukwama Veta zetu vapristeli ava zi li zene ezi mboroto, nye Ndafita ga zi lire a paape ko vantu vendi.” 27Makura Jesus ta tanta asi: “Esabata muntu va li ruganena, kapisi muntu yige va ruganena Esabata. 28Yipo nye asi MunwaMuntu age kupangera nEsabata lyeeli.”

Currently Selected:

Marukusa 2: KWN

Highlight

Compare

Copy