Mateusa 18

Ogu ga nenepa po moUntungi weguru

1Movili ozo yipo va mu wizililire Jesus varongwa, va ya mu pure asi: “Yilyogu nani ga nenepa po moUntungi weguru?” 2Jesus makura ta zigida po munona gumwe, ta ya mu tura pokatji kawo, 3ta uyunga asi: “Yosili nina kumutantera asi, nsene mu dira kulitezurura, nye mu dire kufana vanona, ngano kapi ngomu hwilira moUntungi weguru. 4Nye ogu a linunupike ngwendi munona ogu, yige nga ka nenepa po moUntungi weguru. 5Ogu a tambwire munona ngogu medina lyange, nyame a tambura.

Yokuhamena maheteko

6“Ogu a pukisa kanonagona kamwe potu twa pura nge gwangesi, ngano ga fira kumumangerera emumanya monsingo, a ka damene nalyo mekurutondo lyefuta. 7Ani nane uzuni ou morwamapukiso. Mapukiso mwagene kuhoroka yiko kwago, nye munkonko kalika muntu ogu a retesa po mapukiso.

8“Nsenesi kuwoko koge ndi mpadi zoge tazi ku twaredesere konzo, zi kamuna ko, o zi zugumine kwina, zi ku lipore. Yeeyi yoyiwa po koge ove yokuza meguru oku ono zonauka ndi ono remana, kumwe sa neyi yokukakuzugumina mEndiro lyanarunye, ove ha wa kerera nomawoko goge gavali nonompadi doge mbali. 9Ndi li kare eho lyoge, ntene tali ku twaredesere konzo, li korora mo, o li zugumine kwina li ku lipore. Yeeyi yoyiwa po koge ove kuza meguru neho limwe, kumwe sa neyi yokukakuzugumina mEndiro lyanarunye, ove ha wa kerera nomeho goge gavali.

Nzwi zokuzumbana

10“Omu takamese tomu likungu kepayo lyokupaya kanona kamwe potu twangesi. Morwa ame tani mu tantere asi, vaengeli vawo vemeguru nkenyapa kumona sipara saTate gemeguru. 11Yeeyi MunwaMuntu kwa wizira a ya popere ava va zumbana.

12“Omu muna kugazara hena ngapi? Nsenesi muntu ga weka nonzwi efere limwe, makura pa zumbane po zimwe, kapi na siga edi nomurongo ntano‐nane ponondundu, a ze a ka hara‐hare zokuzumbana? 13Nsenesi a ka zi gwana, yosili nina kumutantera, yilyo sa ehafo lyomu na ka hafera nzwi zimwe ozo kupitakana omu na hafera odo nomurongo ntano‐nane nantano‐nane, edi da dira kuzumbana. 14Naguhyeni gemeguru yimo ngorooro ga hara asi potunona otu ngano paha kana kamwe.

Malivyukiso gosikwawo

15“Nsenesi mukweneni ana ku zono, zende o ka mu vhukisire pompengi nyovelike nendi. Nsenesi ana ku zuvhu, ono mu kongwa nye. 16Nye nsene kapi ana kukuzuvha, zigida ko mukweni gumwe ndi vavali, mokuninkira asi undipo wotuna tuvali ndi tutatu kuvhura kutokora nawa usima. 17Nsenesi napoopo kapi ana kuzuvha, yi sikisa nye kongereka. Ano nsenesi nokongereka kooku kapi ana kuzuvha, mu siga nye, a kare koge ngwendi mupagani ndi mufutisi gomutero.

Kumanga nokumangurura

18“Yosili nina kumutantera asi, nkenye eyi ngomu manga pevhu, nemeguru namo ngava yi manga, ano nkenye eyi ngomu mangurura pevhu, nemeguru namo ngava yi mangurura.

19“Tani mu tantere hena asi, nsenesi vavali pokatji keni va liza mutjima gumwe apa pevhu, nye va lihundilire yuma, ngano ngava yi gwana kwaTate gemeguru. 20Yeeyi nkenye oku aku pongo vantu vavali ndi vatatu medina lyange, name pokatji kawo ani kara.”

Mukareli ga hana nkenda

21Makura Peturusa ta hedere Jesus, ta mu pura asi: “Hompa, rungapi nani dongwenena po mukwetu ogu ga zona nge, nzo zendi? Dogoro nokorutano‐naruvali ndi?” 22Jesus makura ta mu limburura asi: “Ame tani ku tantere asi, kapisi dogoro pwarutano‐naruvali tupu, dogoro rokonomurongo ntano‐nambali rutano‐naruvali. 23Yipo nye ava u fanekesere Untungi weguru nahompa, ogu ga here kudivilisa makongo aga va lya vantu vendi. 24Apa ga tamekere kuvara, tava mu retere ko mukareli gwendi gumwe, ogu ga mu lililire makongo gomayovi gonoranda. 25Morwakupira yokufuta, ga pangerere hompa gwendi asi va mu randese po namukadendi novana vendi noyininke yendi nayinye eyi ga wekere, a fute makongo gendi. 26Makura mukareli ogu ta tu nongoro pevhu komeho zendi oku ta mu likwata mepindi asi: ‘Lididimika tupu, ngani ku futira nayinye.’ 27Ano hompa tazi mu gwire nkenda, makura ta mu sigi mukareli a ze, age ana mu gusire po makongo gendi.

28“Age nage eyi ga pwaga, ta ka gwana mukareli mukwawo gumwe, ogu ga mu lililire makongo gonosenda dingapi tupu. Makura ta mu kwata, ta mu sini oku ta tanta asi: ‘Futira nge yininke yange eyi wa lya.’ 29Ano mukareli mukwawo ta tu nongoro pevhu komeho zendi, ta mu likwata mepindi asi: ‘Lididimika tupu, ngani ku futira nayinye.’ 30Nye gwina nokuyipura si, ta zi ta ka mu pakesa modorongo, dogoro nga mane kufuta makongo gendi. 31Vakareli vakwawo eyi va mwene sihoroka sangoso, tayi va nyengenyesa, makura tava zi, va ka yi simwitilire hompa gwawo nayinye eyi ya horokere. 32Makura hompa gwendi ta mu zigida, ta mu ninki asi: ‘Ove nani o mukareli gomudona. Muntu, kani gusilire po makongo goge morwa ko likwamberere nge. 33Nani nove nokuvhura si kufira nkenda mukareli mukweni, moomu kani ku fililire ame nkenda?’ 34Makura hompa gwendi ta handuka, ta mu gava kovahepeki, dogoro noku nga mane kufuta nzo zendi mudima. 35NaTate gemeguru nage yimo nga mu ninka nkenye ogu a dili kudongwenena po mukwawo nzo zendi nomutjima nagunye.”

Currently Selected:

Mateusa 18: KWN

Highlight

Compare

Copy