Mateusa 17

Jesus ta likida uyerere wendi mepaimo

1Eyi pa pita mazuva gatano‐nalimwe, Jesus makura ta gusa oPeturusa novantu namumbyendi oJakopo naJohanesa, ta va twara kondundu zonde kompengi. 2Makura ta lisitunuka komeho zawo. Sipara sendi kwa paimine ngwendi ezuva, ano yikoverero yendi tayi zere tooto ngwendi site. 3Va tara ko, oMosesa naEliya vava, nendi vana kuuyunga. 4Peturusa makura ta lizugumine mo, ta tanta asi: “Hompa, tuna wapeke kukara po. Nsene ono hara, ninka tu tunge marutambo gatatu, rumwe roge, rumwe rwaMosesa, ano oru rukwawo rwaEliya.” 5Haga za mokuuyunga, va tara ko, eremo lyokupaima tali va kara keguru, makura meremo omo tamu tundu nye ezwi asi: “Ogu yige Munwange ogu na hara, ga za nge komutjima, omu mu zuvhe.” 6Ano varongwa eyi va zuvha ngoso, makura tava gu kawomba, tagu va pwaga unene. 7Jesus makura ta wiza, ta va nyungu ta tanta asi: “Katukeni, gwa ha mu pwaga.” 8Vena va kankuke, nagumwe si vana kumona, Jesus googo a huru.

9Eyi vana humburuka kondundu, Jesus makura ta va ngongomekeda asi: “Eyi muna mono, mwa ha ka yi tantera muntu, dogoro noku nga ka vhumbuka MunwaMuntu koufe.” 10Kutunda opo tava mu pura varongwa vendi asi: “Valirongi womatjangwa morwasinke ava tantere asi, Eliya yige tanko nga hova kuwiza?” 11Jesus ta va limburura asi: “Nhi yosili Eliya nga wiza, nga ya wapeke nayinye. 12Nye ame tani mu tantere asi, Eliya nare ga wiza, nye awo kapi va ya mu tambwire, ngava ya mu paka moomu va here. NaMunwaMuntu yimo ngorooro ngava mu hepeka.” 13Makura varongwa vendi yipo va yi kwete egano asi, nani yaJohanesa Mukuhwi ana kuvatantera.

Jesus ta verura mumati gosihegani

14Eyi vana wiza peyanga lyovantu, mugara gumwe ta mu wizire a ya mu twire nongoro komeho zendi, 15ta tanta asi: “Hompa, fira munwange nkenda, yeeyi age kwa kara nehamba lyosihegani, nye yiko sa kuhepa komu. Nkenye apa age kugwira‐gwira momundiro nomomema. 16Kovarongwa woge yiko na mu retere, nye awo kapi va vhulire kumuverura.” 17Makura Jesus ta limburura asi: “Ani one vantu va hana epuro va lipuka. Siruwo sokuhura kupi ngani kara pokatji keni? Siruwo sokuhura kupi ngani mu fa nonkenga? Mu retera nge oku!” 18Jesus makura ta tugumukire mpepo zondona, makura azo tazi pwaga mo momumati, ta veruka movili zoozo.

19Eyi ya pwa oyo, varongwa tava wizire Jesus, va ya mu pulire pompengi asi: “Ose yinke za tu vhulilire kuzitjida mo?” 20Age ta va limburura asi: “Morwaununu wepuro lyeni. Yeeyi yosili nina kumutantera asi, nsenesi epuro lyeni li hura pombuto zomositareta, one kuvhura tupu kutantera ndundu ezi asi, ‘Tunda po apa, o hedere pena,’ makura tazi hedere po. One ngano nayimwe si yeeyi ngayi mu tjindira. 21Nye dorudi rwangesi kuditjidisa kooko kekanderero nediliro.”

Jesus ta divisa hena nomfa dendi

22Paapa ngava gendagura moGalireya, yipo ga va tantere Jesus asi: “MunwaMuntu ngava mu gava momawoko govantu. 23Ngava mu dipaga, nye age nga ka vhumbuka koufe mezuva lyatatu.” Makura awo eguwo tali va kwata unene.

Yedimu lyontembeli

24Apa va wizire moKaperenaumu, vafutisi vedimu lyontembeli tava wiza kwaPeturusa, va ya mu pure asi: “Nani ogu murongi gweni kapi a futu edimu?” 25Gwina ta limburura asi: “Hawe, kufuta.” Makura apa ga ya hwililire monzugo, Jesus ta mu kwata meraka asi: “Simoni, ngapi omu ono kugazara: kwalye nani ava gusa ohompa wouzuni yomutero ndi yedimu, kovantu vawo ndi, ndi kovanayirongo?” 26Peturusa ta mu limburura asi: “Kovanayirongo.” Jesus ta mu tantere asi: “Nani vantu vawo va likerera. 27Nye morwakuhenduka kuvanyegenyesa, no zira kekurudiva o ka rovere. Mfi ezi nazi ka hova kukalya ko, yizo no ka tampura. To zi zahameke, makura to gwana mo simaliva. Ka si guse, o ka futise ko edimu lyange neli lyoge.”

Currently Selected:

Mateusa 17: KWN

Highlight

Compare

Copy