Mateusa 1

Malikwamo gezimo lyaJesus Kristusa

1Malikwamo gezimo lyaJesus Kristusa, munwaNdafita, munwaAbirahamu: 2MwaAbirahamu mwa tunda Isaka, mwaIsaka Jakopo, mwaJakopo Juda novamumbya vendi, 3mwaJuda Peresi naSera gwawo naTamara, mwa Peresi Hesironi, mwaHesironi Arama‐Rama, 4mwaArama‐Rama Aminadaba, mwaAminadaba Nasoni, mwaNasoni Salimoni, 5mwaSalimoni Bowasa gwawo naRahabu, ano mwaBowasa Obete gwawo naRutu, mwaObete Jese, 6ano mwaJese hompa Ndafita.

MwaNdafita yimo mwa tunda Saromo gwawo namukada Uliya, 7mwaSaromo Rehoboyamu, mwaRehoboyamu Abiya, mwaAbiya Asa, 8mwaAsa Josafata, mwaJosafata Joramu, mwaJoramu Usiya, 9mwaUsiya Jotamu, mwaJotamu Ahasa, mwaAhasa Hisikiya, 10mwaHisikiya Manase, mwaManase Amoni, mwaAmoni Josiya, 11mwaJosiya Jekoniya novamumbya vendi moyiha yoruveze rwekwato lyomoBabironi.

12Kutunda kekwato lyomoBabironi: mwaJekoniya yiyo mwa tundire Seyalitiyeli, mwaSeyalitiyeli Serubabeli, 13mwaSerubabeli Abiudu, mwaAbiudu Eliyakimu, mwaEliyakimu Asoro, 14mwaAsoro Sadoku, mwaSadoku Akimu, mwaAkimu Eliudu, 15mwaEliudu Eliyasara, mwaEliyasara Matani, mwaMatani Jakopo, 16mwaJakopo yiyo mwa tundire Josefa, mugara gwaMariya, ogu ga hampurukire Jesus, ogu va ruka asi Kristusa.

17Navenye kumwe kutunda kwaAbirahamu dogoro noku kwaNdafita mazimo murongo‐nagane, ano kutunda kwaNdafita dogoro nekekwato lyomoBabironi mazimo murongo‐nagane, kutunda kekwato lyomoBabironi dogoro nokwaKristusa mazimo murongo‐nagane.

Ehampuruko lyaJesus Kristusa

(Ruk 2:1-7)

18Ehampuruko lyaJesus Kristusa yimo ngesi lya gendere. Zina Mariya, apa ga mu vandekerere Josefa, yipo ya mu horokerere yokugwana ezimo koMpepo zoKupongoka, awo simpe nokulikundama si. 19Morwa mugara gwendi Josefa muhungami ga kere, yiyo ga dilire kuhara kumuhorora montanto. Yipo nye ga gazarere asi a mu zumbe mokahore‐hore. 20Haga za mokugazara ngesi, a tare ko, muengeli gwaHompa ana mu monekere konzodi, ta mu tantere asi: “Josefa zaNdafita, wa ha tjira kugusa Mariya, a kare mukadoge, yeeyi eyi yina kara mwendi, koMpepo zoKupongoka ya tunda. 21Ano age nga hampuruka muna gomugara, ogu ngo ruka edina Jesus, yeeyi yige nga zowora muhoko gwendi kononzo dago.”

22Nayinye eyi kwa horokerere asi di sike mo nonkango edi ga uyungisisire Hompa muporofete asi: 23“Tara, mukadona nga kara nezimo, ta hampuruka muna gomugara, ogu ngava ruka Imanuwere, kutanta asi ‘Karunga kumwe nose’.”

24Eyi ga pinduka Josefa monompofu, ta rugana moomu ga mu tanterere muengeli gwaHompa, makura ta tambura Mariya, va hingire kumwe. 25Mariya kwa hampurukire muna gomugara, age yendi ga hana kumukundama. Makura Josefa ta mu ruku Jesus.

Currently Selected:

Mateusa 1: KWN

Highlight

Compare

Copy