Marakiya 2
2
1 Hompa Munankodo nadinye ta tantere vapristeli asi: “Mpangera zokumuhamena zezi: 2Omu fumadekese nge kweyi omu rugana. Nsene kapi muna hara kupurakena eyi nina kutanta, ngano ngani mu retera efingiliro. Ngani fingilira yininke eyi omu gwana asi yi mu kwafe. Nayene nare na yi fingilira, morwa one kapi mwa tambura mpangera zange nawa‐nawa. 3Ngani futisa vana veni, tani goga‐goga yipara yeni moruhoho royimuna eyi omu zamba, makura ngava mu tware kondambo zoruhoho. 4Makura ngomu divire po asi nyame na mu pa mpangera ezi, asi egwanekero lyange novapristeli, monontekuru daRevhi lya ha zunguruka po.
5“Megwanekero lyange ame kwa va tumbwidilire mwenyo noyikara yoyiwa, eyi yiyo na va pere, asi va vhure kufumadeka nge. 6Awo ngava rongo eyi ya hungama, kapisi yepuko. Awo kwa kere mombili name; kapi ngava lirugana momuwa vene velike, nye ngava kwafa hena wovanzi va hageke kurugana udona. 7Sirugana sovapristeli sokuronga vantu ediwo lyosili lyaKarunga. Vantu kuhepa kuza kwawo va ka lironge eharo lyange, morwa awo nontumi daHompa Munankondo nadinye.
8“Nye ntaantani one vapristeli muna tundu mo monzira zouhunga. Erongo lyeni lya zapura wovanzi va rugane yoyidona. Mwa teza po egwanekero eli na likwete neni. 9Ano ame ngani ninka vantu vaIsraeli va mu swaure, morwa kapi mwa limburukwa keharo lyange, ano apa omu rongo vantu vange, kapi omu va rugana va hetakane.”
Uhalimburukwi wovantu kwaKarunga
10Nani kapisi natuvenye guhyetu gumwe tupu? Nani kapisi Karunga gumwe tupu ga tu sita natuvenye! Yinke nye tuna kutezera po matumbwidiro getu kovakwetetu, neyi tuna kuswawira egwanekero eli ga peke po Karunga nozinyakurwetu, yinke nye? 11Vantu womoJuda va teza po egwanekero lyawo kwaKarunga, yiyo va rugana yuma yoyihuna moJerusarema nomosirongo nasinye. Awo kwa nyateka ntembeli ezi ga hara Hompa. Vagara va kwara vakadi ava ava tongamene vakarunga peke. 12Hompa ngano ta mu gusa mo mombunga zaIsraeli nkenye ogu a rugana eyi, ga ha mu siga hena a hame ko kononzambo edi agu twarere muhoko gwetu Hompa Munankondo nadinye.
13Yimwe yeyi eyi omu rugana. One kuworeka sizambero saHompa mahodi, tomu lili oku tomu kwenauka asi kapi hena ana kutambura nonzambo edi omu mu retere. 14Tomu pura asi yisinke eyi ana kudilira kuditambura. Kuna kerere po morwa wa teza po etumbwidiro komukadi ogu wa kwere ove simpe o mumati. Age mbandura zoge ga kere, makura yiyo wa teza po etumbwidiro lyange kwendi, ove nye kwa tumbwidilire kosipara saKarunga asi ngo kara gokuvhura kuhuguvara kwendi. 15Nani kapisi Karunga kwa mu ninka mu kare rutu rumwe nompepo zimwe? Nani eharo lyendi mweyi lipilyo? Asi ngomu rete vana ava ngava kara nawa‐nawa vana vaKarunga. Ano yi diveni asi, pa ha kara ogu ana kuteza etumbwidiro lyendi kwamukadendi. 16“Ame kwa nyenga malizumbo,” yimo ana kutanta Hompa Karunga gwaIsraeli. “Kwa yi nyenga nsene pa kara ogu ana kurugana mukadendi yininke yoyidona ngoso. Kara ono yi diva asi nokuteza si etumbwidiro lyoge lyokukara gehuguvaro kwamukadoge.”
Ezuva lyepanguro pepi
17Muna rorokesa Hompa koyiuyunga yeni. Nye one tomu pura asi: “Ngapi omu twa mu rorora?” Pokuuyunga asi: “Hompa Munankondo nadinye kugazara asi: Varugani woudona navenye vawa; age kwa va hara.” Ndi pokupura asi: “Kupi ana kara mwene Karunga asi yige muhungami?”
Currently Selected:
Marakiya 2: KWN
Highlight
Share
Compare
Copy
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
