Marakiya 1
1
1Ezi yizo mbudi ezi ga geve Hompa kwaMarakiya, a zi tantere mbunga zaIsraeli.
Eharo lyaHompa kwaIsraeli
2 Hompa ta tantere vantu vendi asi: “Ame kwa mu hara nkenye apa.”
Nye awo tava limburura asi: “Ngapi omu wa tu likida eharo lyoge?”
Hompa ta limburura asi: “Esau naJakopo vantu namumbyendi va kere, nye ame kwa hara po Jakopo noruvharo rwendi 3yiyo na nyenga Esau noruvharo rwendi. Ame kwa mburundudika sirongo sonondundu saEsau, yiyo na si zumbira yikorama.”
4Ruvharo rwaEsau, Vaedomu, nsene va tanta asi: “Yitata yetu kwa yi zungurura, nye ngatu yi tungurura,” Hompa nga limburura asi: “Va sigeni va tungurure — ngani yi zungurura po hena. Vantu ngava yi tumbura asi: ‘Sirongo sosidona’ hena asi: ‘Muhoko ogu ga handukira Hompa narunye.’ ”
5Vaisraeli ngava yi limonena eyi nomeho gawo, makura tava tanta asi: “Hompa kwa kara nononkondo noponze zosirongo saIsraeli paapa!”
Hompa ta hahura vapristeli
6 Hompa Munankondo nadinye ta tantere vapristeli asi: “Muna gomugara kufumadeka guhwe, ano mukareli kufumadeka hekurwendi. Ame nyame guhyeni — yinke nye eyi omu nyokere kufumadeka nge? One kudina nge, nye kuna kupura asi: ‘Ngapi omu twa ku dina’? 7Ayo ngesi — pokuzamba nondya da hana mulyo posizambero sange. Tomu pura hena asi: ‘Ngapi omu atu nyoka kukutumbadeka?’ Tani mu tantere asi — pokuswaura sizambero sange. 8Nsene o reta nzambo zosimuna sokutwika ndi sokuvera ndi sokuremana, one kugazara asi, patupu epuko opo ndi? Ngo yi heteke nye o gave simuna sangoso kwahompa no! Nga ku hafera ndi a ku hare ndi?”
9Ano one vapristeli, kambadareni kuhundira kwaKarunga, a tu fire nkenda. Kapi nga limburura ekanderero lyeni, ano epuko lyeni ngali kara. 10Hompa Munankondo nadinye ta tanta asi: “Ame kuna hara asi ngano pokatji keni tapa kara ogu ana kuzedira mavero gontembeli, yi mu kandane kokuhwameka mundiro gwa hana sikwafa posizambero sange. Ame kapi na mu hafera; kapi ngani tambura nonzambo edi ngomu retera nge. 11Vantu wokutundilira kohuro ezi dogoro kohuro nkwawo zouzuni kufumadeka nge. Napenye awo kututumikida yedumba lyewa, tava zambere nge nonzambo dokuvhura kutambura. Navenye kufumadeka nge! 12Nye one kuswaura nge apa omu tanta asi, sizambero sange kutupu sirugana napa omu zambere po nondya edi mwa swaura. 13One kutanta asi: ‘Ee, yireru omu tuna yi roroka eyi!’ Makura tomu swaura nge. Nzambo zokukwange one kureta simuna sokuvaka ndi sokuremana ndi sokuvera. One kugazara asi ni yi tambure nye oyo ndi? 14Efingiliro komukumbageli ogu ana kuzambera nge simuna sosidona, ano nye mosiunda sendi simuna mo sosiwa esi ga tumbwidira kupa nge! Morwa ame ni mupangeli gomunene, ano vantu wonomuhoko nadinye kutjira nge.”
Currently Selected:
Marakiya 1: KWN
Highlight
Share
Compare
Copy
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
