JEREMIYA 2
2
Epakerombili lyaKarunga kwaIsraeli
1 Hompa kwa tanterere nge 2ni sanseke mbudi ezi kwanavenye moJerusarema.
“Tani diworoka omu wa kere o
mulimburukwi ove simpe mudinkantu,
nomu wa kere neharo ove simpe
o mufuko gomupe;
ove ngo kwama nge momburundu,
mosirongo esi sa ha mene yuma.
3Israeli, ove kwa hamena kwange nyamelike;
ove kwa kere siweka sange sokupongoka.
Ame kwa tuma mahepeko
noyihuna kwankenye ogu
ana kukukoresa.
Ame Hompa, nyame na yi uyunga.”
Nzo zazinyakurwaIsraeli
4Purakeneni kombudi zaHompa, one nontekuru daJakopo, one mazimo gaIsraeli. 5Hompa ta tanta asi:
“Ozinyakurweni udona musinke
ou va mona nge va ka vyuke nge?
Eyi ya va ninkisa va tunde ko
kwange, nani yinke?
Awo ngava tongamene
vakarunga va hana sikwafo,
makura yiyo va kara vene
va hana sikwafo.
6Kombinga zange kapi ngava
pakere ko mbili,
nampili ngomu na va yowerere moEgipite
ni va gendese momburundu;
sirongo sonomburundu
nomatutumbo gomuheke,
sirongo sa kukuta soyimpagwa
omu mwa pira vantu
nagumwe si ga heteka rumwe
asi a gende mo.
7Ame kwa va reta mosirongo
sevhu lyewa,
va ya djobwane nomuzangu daso
noyininke yamo yapeke yoyiwa.
Makura awo yiyo nye
va zonagura sirongo sange;
va nyateke sirongo esi na va pa.
8Vapristeli kapi ngava pura asi:
‘Hompa kupi ana kara?’
Vapristeli vaamwange nokudiva
nge si.
Vapangeli ngava katukire nge;
ano vaporofete ngava uyunga
medina lyaBara
tava tongamene vakarunga
woyimpempa va hana sikwafo.
Yuma yaHompa yokuvyuka vantu vendi
9“Ame Hompa ngani tangwisa hena mbunga zange. Ngani tangwisa nonontekururururwa dawo.
10Zende koUtokero kosirudi saKipurusi,
tuma ko gumwe koUpumezuva
kosirongo saKedara.
Ngo mona asi kutupu eyi
ya horoka rumwe ngwendi yeyi.
11Kutupu muhoko ogu gwa sinta
rumwe vakarunga vago,
nampili ngomu va dira kukara vakarunga‐runga.
Nye mbunga zange yiyo za sinta nge,
ame Karunga ogu na va retera efumano,
novakarunga ava va dira
kuvaruganena yuma.
12Tani pangere eguru li kankame koutjirwe,
li tetuke li komoke,
13morwa mbunga zange za zona
nonzo mbali:
va zumba nge ame runone
romema gomwenyo,
yiyo va sima nondjombo,
nondjombo donomufa edi adi dili
kukara mema nampili nakauke.
Eyi au reta uhalimburukwi waIsraeli
14“Israeli kapisi mupika;
kapi va mu vharera moupika.
Yinke nye eyi dina kumusanena
nonkore dendi?
15Awo kumugonena ngwendi vanyime;
sirongo sendi va si paka mburundu,
yitata yendi nondambo domarunda,
va yi zumba nuunu.
16Nhi, vagara womoMemufisi naTafanihesi
va tavagura sikora sendi.
17Israeli, eyi nyamoge wa yi liretera!
Wa zumba nge ame Hompa
Karunga goge,
ame kuna kukugendesa monzira.
18Yinke eyi ngo gwanena po
yokuza koEgipite
o ka nwe mema moNili?
Yinke eyi ngo gwanena po
yokuza koAsiliya
o ka nwe mema moEufurata?
19Udona waamoge yiwo ngau ku futisa,
ano yokuzumba nge ame
yiyo ngayi ku pangura.
Makura ngo lironga asi udigu
nepuko musinke lya kara po
lyokuzumba nge ame Hompa
Karunga goge,
o dire kulimburukwa nge ngorooro.
Ame Mupangeli, Hompa
Munankondo nadinye, nyame
na yi uyunga.”
Israeli ta nyoka kutongamena Hompa
20 Hompa Mupangeli ta tanta asi:
“Israeli, moyiruwo ya ka pita
ove kwa nyoka epangero lyange;
wa nyoka kulimburukwa
nokutongamena nge.
Kwankenye ndundu zonde
nomonda zankenye sitji sositarara,
yimo omu tongamenene
vakarunga vevhu lyewa.
21Ame kwa mu tapeka ngwendi
sindjembere sokuhorowora
mombuto zongwa po unene.
Nye tareni tupu nye omu muna kara!
One kuna fana sindjembere
sa hana sirugana sokuwora.
22Nampili mu likuhwe nomfewa
zononkondo unene,
simpe tani mono mavara
gononzo deni.
23Ngapi omu nomu tanta asi
kapi mwa linyateka nyamweni,
asi kapi mwa tongamena rumwe Bara?
Tareni omu mwa zonena momuramba;
keukeni eyi mwa rugana.
Ove ngwendi ngameru
zoundandi zina pi,
zina lisigilire kuduka,
24zi nanene komburundu.
Nsene zina pi, yilye gokuvhura kuzipangera?
Zongara ezi zina zi hara
nokulihepeka si zene;
azo kuzigwana posiruwo
senikuro lyazo.
25Israeli, wa ha rorora nompadi doge,
ndi asi o ninkise muliu goge
gu kukutire mo
mokutjida vakarunga peke.
Nye ove kuna kutanta asi:
‘Hawe! Ame nokutengura si.
Ame kwa hara vakarunga wovanayirongo,
yiwo nani kwama.’ ”
Israeli kwa liruganena kumufutisa
26 Hompa ta tanta asi: “Moomu tupu a fu nomuga muwidi nsene vana mu kwata, Vaisraeli namuvenye yimo ngorooro ngava mu fisa nomuga — ohompa veni nomarenga, vapristeli veni novaporofete. 27Namuvenye ngava mu fisa nomuga — one ava muna kutanta asi sitji yige guhyeni, ano emanya yige zinyeni. Eyi ngayi horokera morwa mwa tunda ko kwange mevega lyokutengwira kwange. Nye nsene moudigu muna kara, ntani nye muna kuhundira asi ni wize ni ya mu kwafe.
28“Vakarunga ava mwa rugana nyamweni vapi? Nsene moudigu muna kara, va mu parure nye — nsene ngava yi vhura! Juda, vakarunga woge vanzi ngwendi yitata yoge. 29Nompata deni nompata musi? Yinke eyi omu katukire mu vyuke nge? 30Ame kwa mu futisa, nye nayimwe si; kapi mwa hara ni mu pukurure. Ngwendi nyime gokuhanduka, yimo mwa dipaga vaporofete veni. 31Mbunga ove zaIsraeli, purakeneni eyi na kuuyunga. Kweni ame one ngwendi mburundu, ndi ngwendi sirongo somundema soyimpagwa? Yinke nye nani eyi muna kutantera asi ngomu rugana moomu muna hara, hena asi narumwe si kutengwira kwange? 32Mukadona kuvhura nani a divare maurenga gendi, ndi mufuko a divare hema zendi zekwareko ndi? Nye one vantu vange mwa divara nge mazuva gomanzi ga hana kuvhura kuvarura. 33Mwa diva nawa‐nawa kutjida yipara. Novakadi vaava va hana nondunge va yi mu nongonona. 34Yikoverero yeni kwa gehagana honde zovahepwe novantu va hana nzo, nye kapisi honde zovatezi womambo.
“Nye mwanayinye eyi, 35ove kutanta asi: ‘Ame kutupu nzo; yosili Hompa kapi nga handukira nge.’ Nye ame Hompa, ngani mu futisa, morwa mwa patana asi kapi mwa zona. 36Mwa lizonagura nyamweni pokukwama vakarunga wonomuhoko peke. Egipite nga mu fisa nomuga, moomu tupu ya mu kere naAsiliya. 37Ngomu tunda ko kwaEgipite noyipara yina suwu konomuga. Ame Hompa nina nyenge ava mwa huguvara; nayimwe si eyi ngomu gwana ko kwawo.”
Currently Selected:
JEREMIYA 2: KWN
Highlight
Copy
Compare
Share
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
